Utusang pung Carita 10
10
Allah pung malekat suru Kornelius panggel Petrus
10:1-8
1Di kota Kaisarea ada laki-laki satu. Dia pung nama Kornelius. Dia tu komandan kompi tantara Roma, di pasukan satu yang akang pung nama Pasukan Italia. 2Kornelius deng dia pung basudara samua somba Allah deng dengar-dengarang Antua. Dia jua banya tolong orang-orang Yahudi yang kasiang. Dia tu jaga sombayang tarus-tarus par Allah.
3Satu kali bagini, mangkali barang jam tiga sore bagitu, Allah pung malekat satu datang kasi unju rupa par Kornelius la bilang kata, “Kornelius e!”
4Kornelius nganga malekat tu deng takotang paskali la bilang kata, “Bapa e, ada apa?”
Malekat tu bilang, “Allah su dengar ale pung sombayang deng su lia apa yang ale su biking par orang-orang kasiang. Tagal itu, Antua inga ale tarus. 5Jadi, sakarang suru satu dua orang pi ka kota Yope la ambe Simon yang dapa panggel par Petrus tu. 6Dia ada tinggal di Simon tukang kasi barsi kuli binatang pung ruma, di pinggir pante.”
7Waktu malekat tu pi kasi tinggal Kornelius, dia langsung panggel dia pung orang suru-suru dua orang deng tantara satu. Tantara tu biasa jaga dia. Tantara tu jua dengar-dengarang Allah. 8Tarus, Kornelius carita par dong samua parkara yang malekat tu su bilang par dia. Abis itu, dia suru dong tiga pi ka Yope.
Petrus lia apapa satu turung dari langit
10:9-16
9Akang pung eso bagini, mangkali barang jam sapulu dua siang bagitu, orang-orang yang dapa suru dari Kornelius tu su mau sampe di kota Yope. Waktu itu jua, Petrus nai ka Simon pung atas ruma#10:9 Atas ruma: Dolo, orang Yahudi pung atap ruma tu, akang rata. Ada tangga yang dong su biking di pinggir ruma par nai ka atas. Dong biasa ambe sanang deng jumur apapa di situ. par sombayang. 10Tarus, dia rasa lapar paskali, jadi dia mau makang. Waktu dia ada tunggu orang kasi siap makanang, skrek bagini, Allah kasi lia apapa par dia. Itu macang dia ada mimpi, mar dia ada sadar. 11Dia lia bagini, langit tabuka la ada apapa satu yang turung dari langit ka bumi. Akang macang deng kaeng basar satu yang taika di akang pung ampa ujung. 12Dalang kaeng basar tu ada sagala macang binatang yang haram par orang Yahudi makang. Binatang-binatang tu ada yang pung kaki ampa, ada yang maraya, deng ada burung-burung.#Imam-Imam pung Atorang 11 13Tarus, ada suara yang bilang par dia kata, “Petrus e, bangong! Bunu binatang-binatang tu la makang!”
14Mar Petrus bilang, “Seng! Seng Tuhan! Beta balong parna makang apa sa yang haram.”
15Mar suara tu bale bilang par dia kata, “Apa yang Allah bilang itu seng haram, jang ale bilang itu haram.”
16Samua tu akang jadi sampe tiga kali baru kaeng tu bale nai ka langit.
Petrus pi ka Kornelius pung ruma
10:17-33
17Waktu Petrus masi bapikir soal apa yang Allah kasi lia tu pung arti, tiga orang yang Kornelius utus tu su dapa Simon tukang kasi barsi kuli binatang pung ruma la ada badiri di muka pintu pagar. 18Tarus, dong kasi suara orang yang tinggal di situ la tanya kata, “Simon yang dapa panggel par Petrus tu tinggal di ruma ni ka?”
19Waktu Petrus masi bapikir soal kaeng basar yang dia lia tu, Allah pung Roh bilang par dia kata, “Petrus e! Tiga orang ada datang cari ale. 20Badiri, turung ka bawa, la pi sa deng dong. Jang bimbang, tagal Beta sandiri yang suru dong tiga tu datang par ale.”
21Tarus, Petrus turung dari atas ruma tu la pi par dong tiga. Dia bilang kata, “Beta ni yang kamong cari. Kamong cari beta par apa?”
22Dong bilang, “Komandan kompi tantara Roma yang pung nama Kornelius tu suru katong datang par ale. Antua tu orang yang hidop batul di muka Allah deng jua dengar-dengarang Allah. Samua orang Yahudi jua taru hormat par antua lai. Allah pung malekat kudus baru datang sa par antua la bilang kata antua musti panggel ale datang ka antua pung ruma, biar antua bisa dengar pasáng yang ale mau bilang par antua.”
23Dengar bagitu, Petrus mangaku par pi sama-sama deng dong tiga tu. Mar dia bilang par dong kata, “Labe bae malang ini kamong tiga tidor di sini jua, nanti eso baru katong pi.”
Akang pung eso, Petrus bangong, manyimpang, la pi sama-sama deng dong tiga tu. Babarapa sudara yang parcaya Yesus dari kota Yope jua pi sama-sama deng dong lai. 24Akang pung eso bagini, dong sampe di kota Kaisarea. Di kota tu, Kornelius deng dia pung basudara deng dia pung tamang-tamang dekat yang dia su undang, ada dudu tunggu-tunggu Petrus dong. 25Waktu Petrus dong mau maso ka dalang Kornelius pung ruma, Kornelius pi tarima Petrus. Dia tikang lutu di muka Petrus taru hormat par Petrus. 26Mar Petrus kasi badiri dia la bilang kata, “Badiri! Beta ni manusia sama sa deng ale.”
27Tarus, Petrus maso ka dalang ruma bicara-bicara deng Kornelius. Di sana, Petrus lia bagini, banya orang su bakumpul. 28Tarus dia bilang kata, “Kamong tau to? Par katong orang Yahudi ni, haram paskali kalo katong batamang deng orang-orang yang bukang Yahudi, ka maso ka dong pung ruma. Mar Allah su kasi unju par beta kalo beta seng bole anggap satu orang lai haram. 29Tagal itu, waktu kamong minta beta datang kamari, beta seng tola. Jadi, sakarang ni beta tanya kamong do, kamong panggel beta datang ka sini ni par apa?”
30Kornelius bilang, “Petrus e! Tiga hari lalu, mangkali barang jam tiga sore bagini, beta ada sombayang di beta pung ruma. Skrek bagini, Allah pung malekat datang la badiri di muka beta. Malekat tu pung baju mangkilat paskali. 31Malekat tu bilang kata, ‘Kornelius e, ale pung sombayang tu, Allah su dengar akang. Antua jua su lia apa yang ale su biking par orang-orang kasiang. 32Jadi, utus satu dua orang pi ka kota Yope par panggel Simon yang dapa panggel par Petrus tu par datang kamari. Dia ada tinggal di Simon tukang kasi barsi kuli binatang pung ruma, di pinggir pante.’ 33Jadi, oras itu jua beta utus orang pi panggel ale datang, la ale bae paskali par datang kamari. Sakarang, katong samua su bakumpul di muka Allah di tampa ni par dengar apa yang Tuhan suru ale musti bilang par katong samua.”
Petrus kasi tau Kabar Bae soal Yesus par Kornelius dong
10:34-48
34Tarus, Petrus mulai bicara par Kornelius dong kata, “Sakarang ni baru beta batul-batul tau kalo di muka Allah, samua bangsa tu sama.#Carita Ulang 10:17 35Antua tarima sapa sa yang dengar-dengarang Antua deng hidop iko Antua pung mau, biar kata dia dari bangsa mana lai. 36Kamong su tau soal Kabar Bae yang Allah su bilang par orang-orang Israel. Akang bilang kata manusia nanti baku bae deng Allah kalo parcaya Yesus Kristus, yang pegang parenta par samua orang. 37Kamong su tau samua yang Yesus biking di sagala tampa di propinsi Yudea. Antua mulai itu di propinsi Galilea abis Yohanis tabaos par orang-orang kata dong musti kasi tinggal dong pung dosa-dosa la kasi diri par dapa baptis. 38Kamong su tau kalo Allah su kasi Antua pung Roh deng kuasa par Yesus orang Nasaret tu. Antua bajalang koliling tampa biking hal-hal yang bae par orang-orang deng kasi bae samua orang yang dapa parenta dari Setang pung Raja, tagal Allah ada sama-sama deng Antua tarus.
39Beta deng Antua pung utusang-utusang laeng lai su lia deng mata kapala sandiri soal samua yang Antua su biking di orang-orang Yahudi pung negri deng di kota Yerusalem. Biar bagitu lai, orang-orang Yahudi tu su bunu Antua deng cara salib Antua. 40Mar, Allah kasi hidop Antua pas hari katiga deng biking sampe orang bisa lia Antua. 41Mar seng samua orang yang bisa dapa lia Antua, cuma katong yang Antua su pili dari kamuka par jadi saksi. Katong ni yang makang-minong sama-sama deng Antua abis Antua hidop kombali. 42Antua jua suru katong par kasi tau par orang-orang kalo Allah su angka Antua jadi hakim par orang-orang yang hidop deng yang mati. 43Allah pung juru-juru bicara samua su kasi tau soal Antua tu. Dong bilang kata, ‘Sapa sa yang parcaya Orang yang Allah su Angka par Kasi Salamat Manusia, Allah nanti kasi ampong dong pung dosa-dosa tagal Antua pung kuasa.’ ”
44Waktu Petrus ada bilang bagitu, Allah pung Roh turung par samua orang yang dengar Petrus bicara. 45Tarus, orang-orang Yahudi yang parcaya Yesus yang ada iko Petrus dari kota Yope tu taherang-herang, tagal dong lia Allah kasi Antua pung Roh par orang-orang yang bukang Yahudi lai. 46Barang, dong dengar Kornelius dong bicara deng puji-puji Allah pake macang-macang bahasa yang dong sandiri seng mangarti akang. Tarus, Petrus bilang kata, 47“Coba lia do! Kornelius deng dia pung orang-orang su tarima Allah pung Roh macang deng katong lai. Jadi, seng ada satu orang lai yang bisa larang katong par baptis dong to?”
48La Petrus suru dong par dapa baptis, par kasi unju kalo dong su satu hati deng Yesus Kristus. Abis dapa baptis, Kornelius dong minta Petrus deng dia pung tamang-tamang par tinggal di situ barang dua tiga hari lai deng dong.
المحددات الحالية:
Utusang pung Carita 10: ABMA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2022, Sinode Gereja Protestan Maluku
