Genesis 4

Kaini ni Abele

1Adamu aakona ni mwaariye Heva nave mutthiyanooyo aakusa erukullu. Sika aamuyara mwaana aamullopwana nave aallota wi, “Koomwaakhella mwaana mookaviheriwa ni Apwiya.” Sika mwaanooyo yaamuvaha nnddina nawi Kaini.#4.1 Kaini: Nnddina nenna niniiweya wonanko na Eheberi nno ninattaphullella okusiwa. 2Vatulli viwa aamuyarattho Abele, mung'onong'onwaaye a Kaini. Abele aari oochiha enkhosa nave Kaini aari oollima. 3Viviralle enthawi, Kaini aakusavo ezipaso allimalleeye, aaharaatthella mukutho Apwiya. 4#Ahe 11.4Abele nayeenettho aakusa amodda a anamwani awaamba a enkhosa ddaye nave aavelleella wonanko mukutho enama yaphaama yamakhura. Sika Apwiya yaahakallalla ni Abele ni mukuthwaaye. 5Koma Apwiya kheyaahakallallille ni Kaini ni mukuthwaaye. Ekaamba ya yeella Kaini aasha murima wunchichi, mwawi ekhovaaye yaamora navettho yaawa mahinyare.

6Enthawi yeeyo Apwiya yaamukoha Kaini wi, “Ethiyo oshelle murima tini? Ethiyo omorelle ekhove tini ni owa mahinyare? 7Weerilleke ddaphaama, keerohakallalla ni weyaano#4.7 keerohakallalla ni weyaano: apaalle weyaano waweerekohakallalla apaalle miyaano keerowaakhella mukuthwaawo. koma ekaamba yawi woheera ddoonanara, nichimo noowaatthamella wonanko enama yawoopiha. Ninapaalla wi nuuphare koma weyaano onapaalleya wi ogonjihe nichimonno.”

8 # Mat 23.35; Luk 11.51; 1 Yoh 3.12 Nllapo nimodda Kaini aamulleella mung'onong'onwaaye Abele wi, “Hanko niye omata”#4.8: Ottaphullella wakhalle waamodda wookhalla ni mawu awi hanko niye omata; Eheberi khenna mawu yaalla. Ephiyalle omata wulle, Kaini aamurukunuwella mung'onong'onwaaye nave aamwiipha.

9Sika vano Apwiya yaamukoha Kaini wi, “Ethiyo mung'onong'onwaawo Abele ari wuuwi?”

Olliye ahaakhulla wi, “Nginadduwella. Ethiyo mi tti mullupa mutteko oomuwehera mung'onong'onwaaka?” 10#Ahe 12.24Apwiya yaamukohattho wi, “Ethiyo weerille tini? Nikhame na mung'onong'onwaawo ninnakinllella miyaano ovenyera muthayani. 11Sika wootembeleliwa, khoyillimattho ethaya eyo ewinrye nikhame na mung'onong'onwaawo oyo omwiiphalleewe ni mattaawo. 12Weesa ollima mmiddo, ethayeeyo kheyimmihaka nave onaakhalle muthu aweeteeta va ellapo yavatthi, aweeteeta shisha nave oohikeraattheya nipuro nimodda.”

13Nave Kaini ahaalleella Apwiya wi, “Mookillaka wunchichi mookhwaranya masivaaka. 14Vano mookiikaravo va ellapo yavatthi vamoddattho ni vamiitthoni vanyu. Kinaakhalle aweeteeta shisha, oohikeraattheya nipuro nimodda nave arive muthu anaakiphwanye aneerokiipha.”

15Koma Apwiya yaamwaakhulla wi, “Khe ddiiddo, arive muthu oyo anaawiiphe weyaano Kaini aneerollakiwa nave miyaano kineeromuhokollosella otthanu ni opiilli.” Sika Apwiya yaahiya echizindikiro va Kaini omuchenjeza arive muthu anaamuphwanye wi ahimwiiphe Kainooyo. 16Vano Kaini aavenyavo vamiitthoni va Apwiya nave aya akhalla mu ellapo yooromolliwa Nodi, wookhuma nndduwa wa Edeni.

Edduullu dda Kaini

17Kaini aakona ni mwaariye nave mutthiyanooyo aakusa erukullu. Sika aamuyara Enoki. Vano Kaini aamaka muzinda oyo awuromonlleeye ni nnddina na mwanaye Enoki. 18Enoki aamuyara mwaana nave aamuvaha nnddina nawi Iradi. Iradi aamuyara Mehuyaele. Mehuyaele aamuyara Metushaela, attiitthinnya a Lameki. 19Lameki aatthenlle atthiyana eelli. Nnddina na mwaariye awaamba naari Ada nave na mwaariye aneepiilli naari Zila. 20Ada aamuyara Yabala nave olliyooyo sika nikhollo na athu attheene oochiha eziweto ni ookhalla m'misasani. 21Mwanamunne aari Yubale nave olliyooyo sika nikhollo na athu attheene awiipa gitala ni echitolilo. 22Zila aamuyara Tubala Kaini. Olliyoolla sika nikhollo na athu attheene oophara mutteko woohana malluku mukuwa ni mikoko.#4.22 nikhollo…mikoko: apaalle oopotokosa ezida ddoohiyanahiyana. Murokora a Tubala Kaini nnddina naye naari Naama.

23Vano Lameki aallota ni awariye.

“Nyuwaano Ada ni Zila, mwiiwellelle mawaaka,

apellani maaru, nyu awaraka.

Mi koomwiipha muthu ekaamba yookiphoriiha,

kaamwiiphattho musombwe oyo akuukuthalle.

24Oyo anaamwiiphe Kaini ahokolloselliwe otthanu ni opiilli,

sika wi anaakiiphe miyaano Lameki

ahakolloselliwe wookwakhwana 77.”

Dda Seti ni Enoshi

25Adamu aakonattho ni mwaariye Heva nave aakusa erukullu amuyara mwaana. Vano Hevooyo aallota wi, “Mulluku ookivaha mwaana mmodda ovollowa munipuroni mwa Abele olle iiphiwe ni Kaini.” Mwaanooyo aamuvaha nnddina nawi Seti.#4.25 Seti: Nnddina nenna niniiweya wonanko na Eheberi nno ninattaphullella oonivaha. 26Seti aamuyara Enoshi. Enthawi yeeyo athu Yahaambeella waallapella Apwiya.

المحددات الحالية:

Genesis 4: MW2019

تمييز النص

نسخ