MATIUS 13
13
Papinintungu singkatau mananawuhi
(Mrk. 4:1-9; Luk. 8:4-8)
1Su l᷊ou e'e l᷊ai I Yesus nul᷊umintu bou wal᷊e e'e nakoa sarang wiwihu rano nukumaiang su se'e. 2#Luk. 5:1-3Maul᷊i kahingang taumata nukomol᷊i nahumbung su sindihang I Yesus, ual᷊ingu e'e i Sie tamai nukumaing su sakaeng, arawe taumata ko maul᷊i e'e kararisi su apeng. 3Bou e'e I Yesus nanintiro ngu hal᷊i maul᷊i si sire dingang u papinintu.
“Singkatau mangangawuhi natarai nanawuhi sasuang,” kere'e I Yesus nanitau wuke-Nge. 4“Su tempo ngu kapanawuhe, pia sasuang ko nanawo su ral᷊eng. Bou e'e nisongongu burung dang nukumang kaul᷊i u sasuang e'e. 5Pia l᷊ai nanawo su tampa ko mawatu, ko mahal᷊i tanange. Sasuang e'e singkakonda nutumuwo watu'u tanange manipi. 6Kitang suapang matangutiti nasahengke manga tumbal᷊e e'e nanita nal᷊obe, bou e'e nahango dang nate watu u hamue tatumaniu mal᷊al᷊ung. 7Pia l᷊ai sasuang nanawo su tal᷊oarau rindulu ko mal᷊ahoro. Rindulu ko mal᷊ahoro e'e nutumuwo dang nangumpisi manga tumbal᷊e e'e sarang nate. 8Kitangu pia l᷊ai sasuang nanawo su tana ko matawa, bou e'e nuwua; pia ko mahasu, pia ko nungupul᷊o, dang pia l᷊ai ko tilumpul᷊o susul᷊enge.”
9Bou nuwukengu papinintu e'e I Yesus nangul᷊i, “Boko pia tul᷊i, daringihe!”
Nakurawe I Yesus mupake u papinintu
(Mrk. 4:10-12; Luk. 8:9-10)
10Bou e'e manga tumatuhu I Yesus nusumongo dang nukina si Sie, “Nakurawe i Tuang mupake u papinintu boko mudidato dingang u taumata ko maul᷊i e'e?”
11I Yesus nusumimbahi, “Watu u si kumu seng pia ghaghil᷊e tadeau makatitong rahasiangu hal᷊i u kirapa Mawu Ruata mamarenta, arawe si sire takoae. 12#Mat. 25:29; Mrk. 4:25; Luk. 8:18, 19:26Watu u su taumata ko seng pia, sau onggol᷊ang pakaul᷊i, dang si sie sarung mapal᷊iu. Arawe su taumata ko takoae apa-apa, kute ko ene si sie seng singkodo e'e mborong sau al᷊akeng. 13E'e sabapie Ia mupakeu papinintu boko Ia mudidato dingang u taumata ko maul᷊i, ual᷊ingu i sire makawua, kateho musul᷊ungu taumata ko tanakawua; i sire mundaringihi, kateho musul᷊ungu taumata ko tanakaringihi dang tanakahingang. 14#Yes. 6:9-10Dingangu e'e naganapi ko niul᷊i i Nabi Yesaya,
‘Mawu Ruata nudidato:
I sire turusi mundaringihi
kateho mang tamakahingang,
I sire turusi mutuhung
kateho mang wugha apa ko nariadi.
15Watu u sipirang i sire umati i'i seng matimomo,
tul᷊i ngi sire seng nawenggel᷊i dang mata ngi sire seng nipakawuta.
Ii nipakariadi tadeau mata ngi sire kumbahang makawua,
tul᷊i ngi sire kumbahang makaringihi,
sipirang i sire kumbahang makahingang
dang kumbahang musul᷊e si Sia,
bou e'e Ia mupakaul᷊e ngi sire.’ ”
16 #
Luk. 10:23-24
“Arawe untung i kumu wal᷊inge kodio,” angkung I Yesus su manga tumatuhu-E, “watu u i kumu tinga-tingari seng nakawua dang nakaringihi. 17Putinaungte, maul᷊i nabi dang taumata ko matuhu su Mawu Ruata mo mutuhung apang ko nikawua ngi kumu su orasi i'i, kateho i sire mang tamakawua. I sire mo mundaringihi apang ko nikaringihi kumu su orasi i'i, kateho i sire mang tamakaringihi.”
I Yesus nupakal᷊ahe mangal᷊engu papinintu
(Mrk. 4:13-20; Luk. 8:11-15)
18“Daringihe apa mangal᷊enge papinintu hal᷊i u mananawuhi e'e. 19Sasuang ko nanawo su ral᷊eng, musul᷊ungu manga taumata ko nakaringihi habari hal᷊i u kirapa Mawu Ruata mamarenta, kateho tanakahingang. I sie ko kadal᷊aikange nusumongo nangaho apang ko seng nisuang su l᷊al᷊ungu naung i sire. 20Sasuang ko nanawo su tana ko mawatu, musul᷊ungu manga taumata ko nundaringihi habari e'e, dang turusi nanarima dingang u naung mal᷊uasi. 21Kitang habari e'e ko ta nuhamu su l᷊al᷊ungu naung i sire, hakiu ta nataeri mal᷊iwue. Kere'e i sire nakapundangu susa arako siksa ual᷊ingu habari e'e, i sire turusi nusunial᷊i. 22Sasuang ko nanawo su rindulu mal᷊ahoro musul᷊ungu manga taumata ko nundaringihi habari e'e, kateho ghumaghangu puwawiahi sire dang mo muwiahi marange, ual᷊ingu e'e habari bou Mawu Ruata, nahepesi su l᷊al᷊ungu naungi sire hakiu tanuwua. 23Dang sasuang ko nanawo su tana ko matawa musul᷊ungu manga taumata ko nundaringihi habari e'e dang nakahingang. I sire nuwua maul᷊i, pia ko mahasu, pia ko nungupul᷊o dang pia ko til᷊umpul᷊o susul᷊enge hasile.”
Papinintu hei su tal᷊oarau gandung
24I Yesus nu wuke ngu l᷊ai simbau papinintu su taumata ko maul᷊i angkung-E, “Boko Mawu Ruata mamarenta, kakakoae mang musul᷊ungu papinintu i'i: Singkatau mangangawuhi nanawuhi sasuang ko mapia su ansere. 25Pia sihuwi, su tempong taumata kaul᷊ie seng katikie, musungu mangangawuhi e'e nusumongo nanawuhi sasuang hei su tal᷊oarau gandung e'e, bou e'e napul᷊e. 26Tempong sasuang e'e nutumuwo dang nanita nuhowa, hei e'e seng ni kawua l᷊ai. 27Bou e'e taumata ngu mangangawuhi nusumongo sarang koau tataghuange dingang nangul᷊i, ‘Tuang, i Tuang bal᷊ingewe nusuangu sasuang ko mapia su l᷊al᷊ungu anseri Tuang? Kirapa hakiu nakoa pia hei su l᷊al᷊unge?’ 28Mangangawuhi e'e nusumimbahi, ‘E'e hal᷊i u musu.’ Bou e'e taumatangu mangangawuhi e'e sau nukina, ‘I Tuang mo i kami tarai manawu apang hei e'e?’ 29‘Kumbahang,’ nisimbahe, ‘watu u boko hei e'e i sawu, ntihang sarang gandung mawuwul᷊i l᷊ai. 30Balate tatuwonge hei dingang u gandung sarang tempo ngu manipo. Hindo ia muhabari su taumata ko manipo: Komol᷊i horo apang hei, wukisi, mbuhue tutung. Bou e'e gandunge komol᷊i reso su l᷊al᷊ungu tampae.’ ”
Papinintu watu ngu sawi
(Mrk. 4:30-32; Luk. 13:18-19)
31I Yesus nuwuke ngu l᷊ai simbau papinintu su taumata ko maul᷊i, angkung-E, “Boko Mawu Ruata mamarenta, kakakoae mang musul᷊ung u papinintu i'i: Simbau watu ngu sawi#13:31: Sawi: Sawi i'i ko sasuang ko botonge umuwo range e patehang manga tilu meteri. nial᷊ai singkatau, bou e'e nisuang su ansere. 32Watu ngu sawi ko simbau bibiti ko kadiokange. Kateho boko seng mul᷊aesi makoa kau ko kal᷊abokange, hakiu makoa pusasal᷊ehangu burung su lelange.”
Papinintu ngu ragi
(Luk. 13:20-21)
33Pia l᷊ai simbau papinintu ko wal᷊inge niwuke-Ngi Yesus su taumata ko maul᷊i. “Boko Mawu Ruata mamarenta, mang musul᷊ung u ragi ko nial᷊a u singkatau kowawine, bou e'e nil᷊au dingang u tapong paupul᷊o su litere sarang nutumuwo kaul᷊ie!”
Nakurawe I Yesus nupake papinintu
(Mrk. 4:33-34)
34Kaul᷊ie nitintiro-Ngi Yesus su taumata ko maul᷊i dingang u papinintu. 35#Mzm. 78:2Dingang u e'e nariadi apang ko nihabaru nabi,
“Ia mupake u papinintu boko mudidato dingang i sire;
Ia sarung mangul᷊i hal᷊i ko mborong kawawuni bou tita u karariadingu dunia i'i.”
I Yesus nupakal᷊ahe papinintu hei su tal᷊oarau gandung
36Bou e'e I Yesus nanintang u taumata maul᷊i e'e, nusumu su wal᷊e. Manga tumatuhu-E nusumongo dang nangul᷊i, “Kenangko i Tuang pupakal᷊ahe si kami mangal᷊engu papinintu hei sutal᷊oarau gandung e'e.”
37I Yesus nusumimbahi, “Taumata ko nanawuhi sasuang mapia e'e ko Ahusu Taumata. 38Ansere e'e ko dunia i'i. Sasuang ko mapia e'e ko manga taumata nakoa umat u Mawu Ruata. Hei e'e manga taumata ko su simbukangu setang. 39Musu ko nusuangu hei e'e ko setang. Tempong manipo e'e L᷊ou Kiamati, dang mananipo e'e apang malaekati. 40Kere hei nikomol᷊i l᷊au tutungang su putung, kere'e l᷊ai su L᷊ou Kiamati. 41Ahusu Taumata sarung mundoi malaekat-E pangomol᷊i bou tal᷊oara u umat-E apang ko nakakoa taumata nukoa dosa, dang kaul᷊ie taumata kowal᷊inge ko nukoa ko dal᷊ai. 42I sire kaul᷊ie sarung i rume su ral᷊ungu sunggili ko pia putunge karilie; pai se'e i sire sarung mumpal᷊ehe dang mutatahangu siksa. 43Dang manga taumata ko nukoa kao u Mawu Ruata sarung kumerong kere matangu titi su dunia ngu Mawu Ruata ko wuhu, I Yamang i sire. Inau boko pia tul᷊i, daringihe!”
Papinintu kakakala ko mal᷊aambung
44“Boko Mawu Ruata mamarenta, kakakoae mang musul᷊ung u papinintu i'i: Pia kakakala mal᷊aambung su tana ko nikarea u singkatau, bou e'e sau niambunge su tana. Watu u l᷊iaghe, tau e'e natamai nuwal᷊u apang rarotonge, mbuhue nusul᷊e nul᷊uang tana e'e.”
Papinintu mutiara ko masidada
45“Boko Mawu Ruata mamarenta, kakakoae musul᷊ung u papinintu i'i: Singkatau tahapudagang kapundeae apang mutiara ko mal᷊al᷊ighari. 46Suapang i sie nakarea simbau mutiara ko kasidadakenge, i sie dingang u natamai nuwal᷊u apang rarotonge, mbuhue sau nusul᷊e nul᷊uang mutiara simbau e'e.”
Papinintu ngu soma
47“Boko Mawu Ruata mamarenta, kakakoae mang musul᷊ungu papinintu kere soma nipilo su rano, nakasaung haghing u kina. 48Suapang napene tahoe, soma e'e niwol᷊eng u mananoma sarang rul᷊unge. Mbuhue i sire nukumaiang dang nuhae apang kina e'e: Ko mapia nitaho su l᷊al᷊ung u bunsari dang ko dal᷊ai nirume. 49Kere'e kakakoae su L᷊ou Kiamati; manga malaekati sarung muhae ngu taumata ko dal᷊ai bou taumata ko nukoa kao u Mawu Ruata. 50Mbuhue manga taumata ko dal᷊ai e'e i rume su sunggili ko kahenange. Su se'e i sire sarung mumpal᷊ehe dang mutatahangu singsara.”
Barang ko wuhu dingang u barang ko tuwei
51“Apa kaul᷊i u tamai e'e seng nikanangi kumu?” kakina I Yesus.
“Nakana, Tuang!” nisimbahi sire.
52I Yesus nangul᷊i, “Koe'e sabapie manga meteru agama ko seng nakoa umat u Mawu Ruata, musul᷊ung u tataghuangu wal᷊e ko nupasuwang bou pundaresokangu rarotonge barang ko wuhu dingang u barang ko tuwei.”
I Yesus ta nitarima su Nasaret
(Mrk. 6:1-6; Luk. 4:16-30)
53Saritau I Yesus nasue bou nuwukengu kaul᷊i u papinintu e'e, I Sie nanintangu tampa e'e, 54bou e'e nusul᷊e sarang wanuange. Pai se'e i Sie nanintiro su wal᷊e pukakal᷊iomanengang, dang manga taumata ko kapundaringihe si Sie se'e kaul᷊ie naherang. I sire nangul᷊i, “Bou apa taumata i'i nakarea titonge kere'e? Bou apa l᷊ai i Sie nakarea kawasa mukoa tatia ko makal᷊aherang? 55I Sie wal᷊ingewe ana i Yusuf base u kau e'e? Bal᷊ingewe i Maria mamang-E; dang ana u singkataung-E i Yakobus sirengi Yusuf, i Simon dingang i Yudas? 56Dang wal᷊ingewe manga wawineng-E natana l᷊ai su si'i? Bou apa i Sie nakarea kaul᷊ie tamai e'e?” 57#Yoh. 4:44Kute i sire tananarima si Yesus. Bou e'e I Yesus nangul᷊i si sire, “Singkatau nabi adateng suapang tampa, sul᷊ikuru wanuange dingang u su wal᷊enge sisane.” 58Inau u e'e I Yesus ta nukoa haghi ngu tanda herang su se'e watu u i sire ta nangimang.
المحددات الحالية:
MATIUS 13: LAISXN
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
2014 Indonesian Bible Society (Lembaga Alkitab Indonesia)
