Mwa 25
25
Nzyawa sya Avalaamu na Ketula
(1Mav 1.32-33)
1Avalaamu nĩwatwaie kĩveti kĩngĩ kyeetawa Ketula. 2Ketula nĩwamũsyaĩie syana ii: Nzimilani, Yokisani, Metani, Mitiani, Isivaki na Suua. 3Yokisani aĩ ĩthe wa Sieva na Ndetani. Nzyawa sya Ndetani syaĩ Aasuli, Aletusi na Aleumi. 4Ana ma Mitiani maĩ Evaa, Evieli, Anaki, Avita, na Elitaa. Isu syonthe syaĩ nzyawa sya Ketula.
5Avalaamu nĩwatiĩie Isaka syĩndũ syake syonthe ila waĩ nasyo. 6Ĩndĩ Avalaamu eo thayũ nĩwanengie syana ila wasyaĩwe nĩ iveti ila ingĩ mĩthĩnzĩo. Nĩweeie syana isu ingĩ ithi ikatũĩle nthĩ ĩla yĩ ngalĩko ya wumĩlonĩ wa syũa, vaasa na mwana wake Isaka.
Kĩkw'ũ kya Avalaamu na kũthikwa kwake
7Avalaamu ekalile thayũ vandũ va myaka ĩana na mĩongo mũonza na ĩtano. 8Nĩwakwie e mũkũũ mũno, na e na myaka mingĩ, na athi kũla andũ make ala makwie tene maendie. 9Ana make Isaka na Ĩsumaeli nĩmamũthikie ngunganĩ ya Makivela ĩla yĩ kĩthekanĩ kĩ ngalĩko ya wumĩlonĩ wa syũa wa Mamile. Kĩtheka kĩu mbeenĩ kyaĩ kya Eviloni mwana wa Nzoali ũla Mũititi. 10#Mwa 23.3-16 Kĩtheka kĩu nĩ kĩla Avalaamu wathooete kuma kwa Aititi. Vau nĩvo Avalaamu wathikiwe, na novo Sala mũka wake wathikĩtwe. 11Ĩtina wa kĩkw'ũ kya Avalaamu, Ngai nĩwaathimie Isaka mwana wake. Isaka atwĩe vakuvĩ na kĩla kĩthima kĩtawa “Kĩthima kya Ũla wĩ Thayũ Ũmbonaa.”
Nzyawa sya Ĩsumaeli
(1Mav 1.28-31)
12Ii nĩsyo nzyawa sya Ĩsumaeli mwana wa Avalaamu, ũla Akali Mũmisili, mũthũkũmi wa Sala mwĩĩtu wamũsyaĩe Avalaamu. 13Aa nĩmo masyĩtwa na ana ma Ĩsumaeli maandĩkĩtwe kwambĩĩa ũla mũkũũ kũvika ũla wa ĩtina: Nevaiothi, Ketali, Ativeeli, Mivisamu, 14Misima, Nduma, Masa, 15Aatati, Tema, Yetuli, Navisi na Ketema. 16Asu nĩmo ana ma Ĩsumaeli, na nomo masyĩtwa ĩkũmi na elĩ ma asumbĩ ma mbaĩ syoo kwĩanana na motũi na mĩsyĩ yoo. 17Ĩsumaeli ekalile thayũ myaka ĩana na mĩongo ĩtatũ na mũonza. Nĩwakwie athi kũla andũ make ala makwie tene maendie. 18Nzyawa sya Ĩsumaeli syatũie nthĩ ĩla yĩ katĩ wa Avila na Suuli vakuvĩ na mũvaka wa nthĩ ya Misili kwelekela nthĩ ya Asuli. Matũaa matekwĩw'ana na nzyawa ila ingĩ sya Avalaamu.
Kũsyawa kwa Esaũ na Yakovo
19Ũũ nĩw'o ũvoo wa Isaka mwana wa Avalaamu. 20Isaka aĩ na ũkũũ wa myaka mĩongo ĩna yĩla watwaie Laveka mwĩĩtu wa Mbethueli mũndũ waĩ Mũalamia kuma Mesovotamia. Laveka aĩ mwĩĩtu-a-inyia wa Lavani. 21Isaka nĩwavoyie Mwĩai Ngai nũndũ wa mũka wake nĩkwĩthĩwa aĩ ngũngũ. Mwĩai Ngai nĩwasũngĩie mboya syake, na Laveka aitava. 22Laveka aĩ na ĩvu ya mavatha na atanamba kũsyaa, syana isu nĩsyambĩĩie kũng'ang'ana syĩ ĩvunĩ yake. Nĩvo ĩndĩ Laveka wakũlilye atĩĩ, “Ũndũ wa mũthemba ũũ wĩĩkĩka kwakwa nĩkĩ?” Kwoou nĩwaendie kũkũlya Mwĩai Ngai amũsũngĩe.
23 #
Alo 9.12
Nake Mwĩai Ngai amwĩa atĩĩ,
“Syana isu syĩ ĩvunĩ yaku, ikatw'ĩka mbaĩ ilĩ sya andũ;
ũkasyaa syana ilĩ ila syeana ikethĩwa imenanĩte.
Ũmwe wasyo akeethĩwa e vinya kwĩ ũla ũngĩ;
ũla mũkũũ akeethĩwa mũthũkũmi wa ũla mũnini.”
24Ĩvinda ya Laveka ya kũsyaa yavika, nĩwasyaie mavatha ma tũvĩsĩ. 25Kala kasyaĩwe mbee kaĩ na kĩkonde kĩtune na kaĩ na maw'ĩa ta ma ngũa, na kwoou keetwa Esaũ#25.25 Esaũ: Ũalyũlo wa ĩsyĩtwa yĩĩ nĩ mũndũ wĩ maw'ĩa. Kwa ĩsyĩtwa yĩngĩ Esaũ eetawa Etomu; ũalyũlo wayo nĩ mũtune. 26Kana kala ka kelĩ kasyaiwe kakwete kĩtiinyo kya Esaũ, na kwoou keetwa Yakovo#25.26 Yakovo: Ũalyũlo wa ĩsyĩtwa yĩĩ nĩ ũla ũkwataa kĩtiinyo; ũu nĩ kwasya ũla ũkenganaa.. Isaka aĩ na ũkũũ wa myaka mĩongo thanthatũ yĩla syana isu syasyaiwe.
Esaũ Aithoosya kĩla Kĩmwaĩlĩte ta we Mwana ũla Mũkũũ
27Yĩla ivĩsĩ isu syeanie, Esaũ nĩwatw'ĩkie mũsyĩmi mũseo na mũndũ wa kũtindaa ithekanĩ, nake Yakovo aĩ mũndũ mũuu na ekalaa maeemanĩ. 28Isaka nĩwendete Esaũ, nũndũ nĩweew'aa mũyo aiya nyama sya nyamũ ila Esaũ wasyĩmaa, ĩndĩ Laveka endete Yakovo.
29Mũthenya ũmwe Yakovo aendee na kũua suvu, Esaũ nĩwookie aumĩte kũsyĩma ew'ĩte nzaa mũno. 30Nĩvo ĩndĩ Esaũ weeie Yakovo atĩĩ, “Mbĩkĩe mĩtũkĩ suvu ũsu mũtune; nĩw'ĩte nzaa mũno!” (Kĩu nĩkyo kyatumie Esaũ etwa kwa ĩsyĩtwa yĩngĩ Etomu).
31Yakovo amwĩa, “Nĩngũkwĩkĩa ethĩwa nũkwĩtĩkĩla kũnthooesya kĩla kĩkwaĩlĩte ta wĩ mwana ũla mũkũũ.”
32Nake Esaũ amwĩa, “Ngilĩlye kũkw'a, kĩla kĩmbaĩlĩte ta nĩ mwana ũla mũkũũ kĩna ũtethyo mwaũ kwakwa?”
33 #
Aevl 12.16
Yakovo amwĩa, “Amba kwĩvĩta mbee wakwa.” Kwoou Esaũ nĩweevĩtie mbee wa Yakovo, na amũthooesya kĩla kĩmwaĩlĩte ta we mwana ũla mũkũũ. 34Nĩvo ĩndĩ Yakovo wanengie Esaũ mũkate na ũla suvu wa ndengũ. Esaũ nĩwaĩe, na anyw'a, na ookĩla athi. Ũu nĩw'o Esaũ wavũthĩĩisye kwĩthĩwa na kĩla kĩmwaĩlĩte ta we mwana ũla mũkũũ.
المحددات الحالية:
Mwa 25: KAMBA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
BIBLE SOCIETY OF KENYA © 2011
