Lûqa 22
22
Bêbexteya Yawuday
(Matta 26:1-5; Marqos 14:1-2; Yûhanna 11:45-53)
1Roşanê Nandê Bêmîrazîyo ki nameyê ci Pesax#22:1 Pesax, Yawudîyan mîyan di roşano en gird o. Pesax di, Yawudî anê xo vîrî ki Ellay kalikê înan koleyîn ra reynayê û welatê Misir ra vetê. Wexto ki ê Misir ra eceleya vijyay, înan nano bêmîraz (bêmîraj) pewt ew tey berd, ay ra vanê Roşanê Nandê Bêmîrazî. o, amebi nezdi. 2Serdarê kahînan û Alîmê Kitaban geyrayê rayê bivînê ki hele Îsay senî bikişê, çiki ê milet ra tersayê. 3Wexta Şeytan kewt Yawuda Îsqaryotî mîyan, no diwês wekîlandê Îsay ra jewê ci bi. 4Yawuda şi serdarandê kahînan û yizbaşîyan hetek ew înana qisey kerdî ki çi hesaba o do Îsay bido înan dest. 5Înan kêf kerd ew qebul kerd ki perrey bidê ey. 6Yawuday zî qebul kerd ew hinî geyrayê firsen ki cayêndo xewlet di Îsay bido înan dest.
Nanê Rojda Pesaxî
(Matta 26:17-19; Marqos 14:12-16)
7Roja Roşandê Nandê Bêmîrazî amê. Na roj di, gerek merdimî kavirê Pesaxî qurban kerdayê. 8Îsay, Petrûs û Yûhannaya vernî di riştî sûk ew înan rê va: “Şima verî şirê ew ma rê nanê Pesaxî hadre kerê.”
9Hima înan Ey ra pers kerd va: “Ti qayil ê ma kotî di nan hadre kem?”
10Ey zî wuna va: “Şima ki resayê sûk mîyan, jew mêrdeko ki dorîyê aw wegiroto, şima do ey bivînê, o şiro kamcî keye se, heta o keye ey dima şirê. 11Bahdo wihêrdê ê keyî ra pers kerê ew vajê: ‘Mehlîm o vano, cayê meymanan kotî yo? Min û telebandê xoya do nanê Pesaxî uja di bûmi.’ 12Wihêrê keyî do qatê corî di#22:12 Yazî: dîyaro jew odeyêndo gird o weş şima misno, uja di şima nanî hadre kerê.”
13Nê wirna telebey zî şî, heme çî zeki Îsay înan rê vatbi winî dî ew uja di nanê Pesaxî kerd hadre.
14Wextê nanî ame ew Îsa wekîlandê xoya pîya sifre di ronişt. 15Ey înan rê wuna va: “Hendik mi ezîyet nîyanto, ez bol qayil bîya nê nanê Pesaxî şimaya pîya bûra. 16Ezo şima rê vana: Ez do hinî nanê Pesaxî fina nêwera hetanî Hukumdareyda Ellay di mahneyê Pesaxî bîro herun.”
17Bahdo Ey tasa şerabî girot, Ellay rê şukur kerd ew înan rê va: “Na tas bigîrê ew xo mîyabeyn di bara kerê. 18Ezo şima rê vana, hendik Hukumdareya Ellay nîyameya, ez do fina awda engûr ra nêşima.”
19Bahdo Ey nan girot, Ellay rê şukur kerd ew kerd letey û da înan ew va: “No nan bedenê min o, bedenê mino ki deyayo oxirdê şima. Ney wuna bikerê û mi bîyarê xo vîrî!”
20Bahdê nandê şanî Ey tasa şerabî zî zeydê nanî girot û wuna va: “Na tas zî Qewlo Newe yo ew gûnîda mina mor#22:20 Yazî: mihor beno, gûnîya mina ki oxirdê şima di do birijyo.#22:20 Îsa telebandê xo rê mahneyê Qewldê Newî (Ahda Newî) vano ew ferqê Qewldê Newî û qewlandê verênan misneno. Ê qewlê verênî Ellay Îbrahîmîya, Nûhîya ew Mûsaya kerdîbî. Ê qewlan di Ellay waştê ki, wa merdimî dewarî qurban kerê ew gûnîda dewarîya qewl bîyê mor. Hima Qewldê Newî di, Îsa bixo do zeydê qurbanîya bimerdayê ki Ellay û merdimana newedere umiş bîyayê. 21Naqor merdimo ki do mi rê bêbextey bikero, o yo mina pîya tîya sifre di ronişte yo. 22Xora Lajê Însanî, raya ki belikerdî ya, O yo a ray ra şino, hima merdimo ki Ey rê bêbextey keno, wax bi ey rê!”
23Wexta wekîlan pêjewbînan rê va: “Ma mîyan di kam şeno na bêbextey bikero?”
Kam Gird o?
24Ew ê mîyabeyndê xo di pê vero şîyê ki înan ra kamcî do heminan sera bihesibyo. 25Hima Îsay înan rê wuna va: “Padîşayê nê dinyay qewmandê xo sero hukum kenê ew serdarê înan xeyrwer vajîyenê. 26Hima şima do wuna nêbê! Herunda ney di, şima ra kam gird o, wa o zeydê werdî bo, ew kamo ki serdarey keno, wa o zî zeydê xizimkarî bo. 27Vajê, kam gird o? Oyo ki sifre di roşeno, yazî oyo ki xizimkarey keno? Merdimo ki sifre di roşeno, o gird o, winî nîya? Hima ez zî şima mîyan di zeydê jew xizimkarîya ya. 28Ew şima zî, çi wext ki ez kewta teng, şima mina pîya damiş bîyê. 29Ay ra Hukumdareya ki Pêrê mi daya mi, ezo zî a Hukumdarey dana şima ki 30sifredê mi di ew Hukumdareyda mi di, şima do mina pîya bûrê û bişimê. Ew şima do textî sero roşê ew diwês ezbetandê Îsraîlî rê hukumdarey bikerê.#22:30 Diwês ezbetê Îsraîlî estê, qandê coy, mahneyê ney: Îsraîl pêroy rê hukumdarey bikerê.”
Qiseyê Ki Îsa Telebandê Xo Rê Soyin Di Vano
31Îsay va: “Sîmon, Sîmon, çimakerde bi, Şeytanî îzin giroto ki, wa şima zeydê xelîya pirojin ro do#22:31 Yazî: zeydê xelîya pirojin ra ravêrno.. 32Hima mi qandê to duay kerdî ki ti îmanê xo vinî nêkerê, ew çimhal ki ti amey ray ser, wexta biraranê xo zî îman di pêt ki!”
33Hima Petrûsî Îsay rê wuna va: “Ya Rebbî, ez hadre ya toya pîya şira zîndan zî, merg zî.”
34Îsay zî ey rê wuna va: “Petrûs, ez to rê vaja, emşo hendik dîkî nêveyndayo, ti do hîrê finî mi înkar kerê ki tî yê mi nêsilasnenê.”
35Bahdo Îsay înan ra pers kerd va: “Wexto ki mi şima bê perran, bê pûl, veyşan teyşan ew bê postalî riştê ray se, wexta qe kemaneya şima bî?”#22:35 Bewnîrê letedê 9:3.
Înan zî va: “Nê, qethîna çîyêndê ma kemî nêbî.”
36Wexta Îsay va: “Naqor neya tepya, cizdanê kamî ew tewreyê kamî esto se, wa bigîro xo hetek. Ew şemşêrî kamî çinî yo se, wa ebaya xo biroşo ew perrandê aya xo rê jew şemşêr bigîro. 37Çiki qandê mi senî yazi bîyo, o do bîro ca: ‘O mahkûmana jew hesibîya.’#22:37 Bewnîrê kitabdê Yeşaya'y di 53:12. Ew ezo şima rê vana, hirg qiseyo ki qandê mi yazi bîyo, gerek bîro ca.”
38Teleban va: “Ya Rebbî, tîya di, di teney şemşêrî estê.”
Hima Îsay înan rê va: “Hend bes o!”
Kerredê Zeytûnan Di Şewa Soyinî
(Matta 26:36-46; Marqos 14:32-42)
39Bahdo Îsa sûk ra vijya ew zeydê hirg fina, şi Kerredê Zeytûnan. Hima telebey zî Ey dima bî. 40Wexto ki Îsa resa uja, înan rê va: “Duay bikerê ki wextê cerbinayen di şima nêxapeyê!”
41Bahdo Îsa teleban ra tenekê kewt dûrî ew saqandê xo sero ronişt û duay kerdî: 42“Pîyê mi, eki ti zî qayil ê, na tasa tal mi ra dûrî fîn. Fina zî wa meramê mi nê, wa meramê to bîro herun!” 43A çeq di, azmîn ra jew melekî xo misna Ey ew dayax dê Ey. 44Tew amê Ey ser ew Ey deha vêşî duay kerdî. Ariqê ci zeydê çilkda gûnîya kewtê erdî ser.
45Wexto ki Îsa duay ra werişt û ame telebandê xo hetek, ê mixulan ra şîbî hewna. 46Ey înan rê va: “Çi şima rakewtê? Werzê ew duay bikerê ki şima nêxapeyê!”
Îsa Tepêşyeno
(Matta 26:47-56; Marqos 14:43-50; Yûhanna 18:3-12)
47Îsay hewna qisey kerdê ki jû find' şêligêndo bol vera înan ame. Vernî di Yawuda bi, o zî diwês wekîlandê Îsay ra jewê ci bi, ew o şi hetê Îsaya ki lew Eya no. 48Hima Îsay ey rê wuna va: “Yawuda, tî yê Lajê Însanî jew lewa danê dest?”
49Naqor êyê ki Îsay hetek di bî, senî ki fahm kerd milet qandê çiçî ameya, înan Îsay rê va: “Rebbî, şemşêra piro dim?” 50Ew a çeq di înan ra jewê ci şi şemşêrdê xoya da xizimkardê serdardê kahînan ro û goşê ci yo raşt cikerd.
51Hima Îsay va: “Vinderê! Bes o!” Ew Îsay destê xo na goşdê xizimkarî ser û goşê ci kerd weş.
52Bahdo Îsay serdarandê kahînan rê ew êyê ki Keyedê Ellay di nobet pawenê, serdarandê înan rê ew pîlandê ci rê, êyê ki heme ameybî, Îsay înan rê wuna va: “Şima çi wuna şemşêr û çuwana ameyê? Zeki şima jew mahkûmî dim kewê. 53Ez xora hirg roj şimaya pîya Keyedê Ellay di bîya ew şima destê xo mina nêna. Hima na sehata şima ya, yanê sehata hukumdê tarî ya.”
Petrûs Îsay Înkar Keno
(Matta 26:57-58, 26:69-75; Marqos 14:53-54, 14:66-72; Yûhanna 18:12-18, 18:25-27)
54Înan Îsa tepişt ew girot berd keyedê serdardê kahînan. Petrûs zî dûrî ra înan dima şîyê. 55Wertedê hewşî di adir wekerde bi ew ê çorşmedê ci di roniştey bî. Petrûs zî ame û înan hetek di ronişt. 56Uja di jû xizimkar roşneyda adirî di senî ki Petrûs dî, o silasna, ay va: “No zî Eya pîya bi!”
57Hima Petrûsî înkar kerd, va: “Cenî, ez Ey nêsilasnena!”
58Bahdê gamekna, jewnay o silasna ew va: “Ti zî înan ra yê!”
Hima Petrûsî va: “Nê merdim, ez înan ra nîya!”
59Nezdî jû sehata tepya, fina jewnay va: “Eynî raşt a, no zî înana pîya bi, çiki no zî Celîleyij o!”
60Naqor Petrûsî wuna va: “Merdim, ezo nêzana tî yê qalê çiçî kenê.” Ew a çeq di hewna Petrûsî qisey kerdê, dîkî veynda. 61Wexta Rebbî xo pey di açarna û weyna Petrûsî ra, ew a çeq di qiseyê Rebbî amey Petrûsî vîrî: “Emşo hendik dîkî nêveyndayo, ti do hîrê finî mi înkar kerê.” 62Petrûs uja ra şi teber ew zerrî ra berma.
63Naqor camêrdê ki Îsa pawitê, huwayê Îsay ew dayê Ey ro. 64Înan rîyê ey pişt ew Ey ra pers kerd va: “Nek ti pêxember ê, de vaj, newe kamî day to ro?” 65Bê nînan hewna înan Ey rê bol nengî zî çînay.
Îsa yo Meclîsdê Yawudîyan Ver Di
(Matta 27:1-66; Marqos 15:1-47; Yûhanna 18:19-24)
66Senî ki roj akewt, pîlê qewmdê Yawudîyan, serdarê kahînan ew Alîmê Kitaban arêbîyay pêser ew Îsa zî ard nê meclîsdê#22:66 Wextdê Îsay di, no meclîs hukmê Yawudîyan bi, hima înan nêşayê ki mergdê jew merdimî rê qerar bidê. Qerarêndo winayin hukmatê Romay tenya şayê bido. înan ver. 67Înan Ey rê va: “Ti Mesîh ê? Eki winî yo, ma rê vaj!”
Ey zî va: “Eki ez şima rê vaja, şima xora emel nêkenê, 68ew ez şima ra qiseyê pers kera, şima ciwab nêdanê. 69Hima hinî neya tepya, Ellayo ki heme çî sera yo, Lajê Însanî do kişta Eya raştî di roşo.”
70Wexta pêrin va: “Winî yo se, ti Lajê Ellay ê?”
Ey înan rê wuna va: “Zeki şima va, ez O ya.”
71Înan va: “Hinî ma rê şahîdey çi îcab kena? Xora ma bixo fekdê ey ra aşnawit!”
المحددات الحالية:
Lûqa 22: diq
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© (Active), Wycliffe Bible Translators, Inc. All rights reserved.
