LUCAS 10
10
Te Jesuse la stikon bael te setenta ta jtule
1Ta patil te Kajwaltike la stuj xan setenta ta jtul winketik. Ta cheb cheb a stikonlan bael ta spisil te jtejklum te ba luwaretik te ba puersa ya xkax ae. 2Jich a yaltalanbe:
—Bayal te kꞌajoje. Yan te jꞌaꞌteletike maꞌyuk bayal. Jaꞌ yuꞌun, kꞌambeyaik te yajwal kꞌajoje te yauk stikon jꞌaꞌteletik ta kꞌajoje. 3Baanik me, aꞌ me kꞌotuk ta awoꞌtanik te jich kꞌoemex tutꞌil karnera te ya jtikonex bael ta yolil te genteetike, te jaꞌ pajal kꞌoem sok te jweꞌawal chojetike. 4Ma me awichꞌ amoralik, ni atakꞌinik, ni a jel-xanabik. Y ma me jalajanik ta spajtil-oꞌtanil ta be. 5Te kꞌalal ya xꞌochex ta nae, nail xꞌapatbe yoꞌtan te yajwale. Jich me xꞌawalik: “Bujtsꞌanuk me kꞌinal ya awaꞌiyik liꞌ ba na to”, xchaex me. 6Teme ay machꞌa teꞌey a te ya smali te bujtsꞌan kꞌinale, bujtsꞌan kꞌinal ya xjil ta skuenta euk. Yan teme maꞌyuk teꞌ ae, ya me sujt tal ta akuentaik te bujtsꞌan kꞌinal ya awalbeyike. 7Teꞌ me xꞌainex a te ba na ya xkꞌoexe. Junuk me awoꞌtanik xweꞌex xꞌuchꞌaex teꞌa chikan te tut ay yuꞌunike. Yuꞌun te machꞌa ya xꞌaꞌteje, puersa me ya xtojot. Ma me kꞌaxanik ta nanatik. 8Teme kꞌoex ta jun jtejklume, te machꞌa ya snajkanexe junuk me awoꞌtanik ya aweꞌik te tut ya yaꞌbeyexe. 9Lekutesbeya xchamelik te jayeb ayik ta chamel teꞌ ae. Y jich me xꞌawalbeyik: “Nopol ya xlijkix ta mantal te Kajwaltik Dios te ba ayexe —xchaex me. 10Yan te ba jtejklum te ma skꞌanexe, lokꞌanik bael te ba kayaetik yuꞌune. Jich me xꞌawalik: 11“Te stsꞌubil lumil te alumalik te ay ta koktike ya jkustik jilel yuꞌun seña te ma joꞌukotik ta jkuentatik te ma xꞌachꞌuunike. Pero naꞌbeyaik me sluwar te nopol ya xlijkix ta mantal te Kajwaltik Diose”, ya me awutik. 12Ya kalbeyex: Bayal me kastigo ya yichꞌ te jtejklum to te tut ora Dios ya yilbe yaꞌtel spisil te genteetike. Yan te jtejklum Sodoma ma sta jich kastigo ya yichꞌ stukelik.
Te jtejklumetik te ma xchꞌuunik mantale
13¡Te jtejklum Corazin oꞌol me sbaik! ¡Sok te jtejklum Betsaida oꞌol me sbaik euk! Te teyuk a yichꞌ pasel a te milagroetik te ba jtejklum Tiro sok jtejklum Sidone tutꞌil te la yichꞌix pasel ta atojolike, ora me la sujtes yoꞌtanik yuꞌun smulik te jichuke. La me slapik pakꞌ te ay xchꞌixale sok la me snajkan sbaikix ta tan yuꞌun yajtal yoꞌtanik yuꞌun smulik te jichuke. 14Pero te kꞌalal ya sta yorail yuꞌun Dios te ya yilbe yaꞌtel spisil genteetike, mas tulan kastigo ya yichꞌik. Yan te jtejklum Tiro sok jtejklum Sidone ma sta jich kastigo ya yichꞌ stukele. 15Jichex euk jtejklum Capernaum, akuyojik te aꞌbilex ta jkuenta ya xkꞌoex ta chꞌulchan. Mauk, sino ke ya me awichꞌik chꞌojel ochel kꞌalal ta yutil chꞌen.
16“Te machꞌatik ya yaꞌibe sluwar te akꞌopike, jaꞌ a yaꞌibeyix sluwar jkꞌop abi. Te machꞌatik ya spꞌajexe, joꞌon a spꞌajikonix abi. Te machꞌa ya spꞌajone, jaꞌ a spꞌajix euk te machꞌa stikonejon tale —xchi te Jesuse.
Sujtik tal te setenta ta jtule
17Te setenta ta jtule ben kontentoik te kꞌalal a sujtik tale. Jich a yalik:
—Kajwal, asta te pukujetike la xchꞌuumbotik jmantaltik ta akuenta —xchiik julel. 18Te Jesuse la yaltalanbe:
—Laꞌ nix a. Yuꞌun yipalon ta yilel te chꞌay ta koel ta chꞌulchan te Satanase. Jich xlemeta koel tutꞌil te chawuke. 19Joꞌon kakꞌojbeyex apoderik te ya xjuꞌ xbeenex ta sba te chanetike sok te tseketike, sok yuꞌun ya xjuꞌ awuꞌunik stsalel spisil yip te akontraike. Jich maꞌyuk tut ya xjuꞌ yuꞌun spasbeyex. 20Pero ma me jaꞌuk nax ben jun awoꞌtanik yuꞌun te tutꞌil ya xchꞌuumbeyex amantalik te pukujetike. Jaꞌuk me ben jun awoꞌtanik yuꞌun te tutꞌil tsꞌibabilix abiilik te ba chꞌulchane —xchi te Jesuse.
Te Jesuse ben kontento kꞌajta
21Mismo tiempo a te Jesuse ben kontento kꞌajta yuꞌun te Chꞌul Espiritue. Jich a yal:
—Kola awal Jtat, te yajwalat chꞌulchan sok te balmilale, ben bayal te slekil awoꞌtane. Porke jaꞌ la awakꞌtalanbe snaꞌ sluwaril spisil te machꞌatik chꞌin yakꞌoj sbaike. Ma jaꞌuk la awaꞌbe snaꞌ te machꞌatik pꞌijike, sok te machꞌatik ben pꞌij skuyoj sbaike. Jich Jtat, yuꞌun jich a skꞌan awoꞌtan atukel —xchi.
22Y la yal xan:
—Te Jtate la yaꞌbonix entregal ta jkꞌab spisil te tutik aye. Maꞌyuk machꞌa ya snaꞌbe sluwar te machꞌa a te Nichꞌanile; jaꞌ nax ya snaꞌbe sluwar te Jtate, Sok maꞌyuk machꞌa ya snaꞌbe sluwar te machꞌa ekꞌa te Jtate; jaꞌ nax stukel te Nichꞌanil te ya snaꞌbe sluware. Sok euk te jayeb machꞌa ya yaꞌbe snaꞌbe sbae —xchi te Jesuse.
23Sujt skꞌelu te jnopojeletik yuꞌune y la yaltalanbe ta stukelik nax:
—Ben me tsaꞌam slekilik te machꞌatik ya yilik ta sitik te tutik yipalex ta yilele. 24Jich ya kalbeyex: Ay bayal jꞌalwanejetik yuꞌun Dios sok bayal reyetik te yoꞌtanuk lauk yilik te tut yipalex ta yilel te jaꞌexe, pero ma yilik. Yoꞌtanuk lauk yaꞌiyik sluwar te tut yipalex ta yaꞌiyel sluwar te jaꞌexe, pero ma yaꞌiybeyik sluwar stukelik —xchi te Jesuse.
Seña-kꞌop te lekil samaria-winike
25Ay jtul maestro yuꞌun te mantaliletike la stejkꞌan sba, ba skꞌopon sba sok te Jesuse, yuꞌun ya skꞌan yilbe yoꞌtan. La sjojkꞌobe:
—Maestro, ¿tut lek ya skꞌan ya jpas yuꞌun ya xkꞌo jta te jkuxlejal sbajtel kꞌinale? —xchi.
26La sjakꞌ te Jesuse:
—¿Tut yaꞌiyel ya awaꞌi te tsꞌibabil jilel ta mantaliletike? ¿Tut xchi ya awaꞌi te ya awile? —xchi.
27Te maestro yuꞌun te mantaliletike la sjakꞌ:
—Jich tsꞌbabil: “Kꞌux me xꞌawaꞌi ta awoꞌtan te Kajwaltik Diose sok spisil awoꞌtan sok spisil akuxlejal sok spisil apuersa, sok spisil apꞌijil. Sok kꞌux me xꞌawaꞌi te ajoy ta genteile, jich tutꞌil te kꞌux ya awaꞌi aba atukele”, xchi me —xchi.
28Te Jesuse la yalbe:
—Lek la anaꞌ sujtesel. Teme jich ya apas to, ya me ata akuxlejal sbajtel kꞌinal —xchi.
29Te maestro yuꞌun te mantaliletike ma skꞌan teme maꞌyuk skꞌoplal ya xkꞌot te tuti sjojkꞌoye. La sjojkꞌobe xan te Jesuse:
—¿Machꞌa a te joy ta genteil te ya yale? —xchi.
30Jich te Jesuse la sjakꞌbe:
—Ay jtul winik ay kꞌael ta sbelal Jerusalen te ya xbajt ta Jericoe, pero tsakot yuꞌun jꞌelekꞌetik ta be. Jich a spojbeyik bael te stutik yuꞌune, sok te skꞌuꞌ-spakꞌe. Toj lek a smajik jilel, chamen a jil yuꞌunik, y laj bajtix. 31Ben tey ora a tal jtul saserdote, kꞌan nax skꞌelu te ba pojole. La soypꞌin ta ilel, kꞌax bael, bajt. 32Y ay jtul levita winik kꞌot ta ba pojole. Te kꞌalal la yile, la soypꞌin ta ilel, kꞌax bael, bajt. 33Pero ay jtul samaria-winik teꞌetal ekꞌa ba bee. Kꞌux a yil te winike, la snaꞌbe yoꞌolil sba. 34Tijila ochel teꞌa. La xpoxtabe te yejchꞌene, la yaꞌbe aseite sok bino, y la spotsbe. La smoes ta sba skawu, y la yikꞌ bael ta na ba ay wayibale. Te ba skanantay a. 35Ta yan kꞌaal te samaria-winike la slokꞌes jilel cheb denario takꞌin, la yaꞌbe jilel te yajwal nae, y la yalbe: “Kanantaybon jilel te winik to. Teme ay to xan takꞌin ya xlaj awuꞌune, ya me jsujtesbeyat te kꞌalal ya sujton tale”, xchi. 36¿Machꞌa ya awaꞌi a ta yoxebalik te sjoy sba ta genteil a kꞌot sok te winik te taot yuꞌun te jꞌelekꞌetike? —xchi te Jesuse.
37Te maestro yuꞌun te mantaliletike la sjakꞌ:
—Jaꞌ te machꞌa la skꞌuxutaye —xchi.
Te Jesuse la yalbe te maestroe:
—Baan, jich me xba apas euk te jaꞌate —xyut.
Te Jesuse la yuluꞌtay te xMarta sok te xMariae
38Te Jesuse lijk xan bael ta beel y kꞌot ta jun kolonya. Ay jtul ants teꞌa te xMarta sbiile la yikꞌ ochel ta sna. 39Te xMartae ay jtul yijtsꞌin te xMaria sbiile tal snajkan sba ta yok te Jesuse yuꞌun tal yaꞌibe sluwar te tut ya yale. 40Yan te xMartae jaꞌ nax a bajt ta yoꞌtan spisil te tut ya spase. Jicha tal te ba ay te Jesuse y la yalbe:
—Kajwal, ¿meꞌn ma yajtaluk awoꞌtan te makꞌ skoltayon ta spasel spisil te tut ya jpas te kijtsꞌine? Albeya te yauk xtal skoltayone —xchi.
41Jakꞌbot yuꞌun te Jesuse:
—xMarta, bayal te tut baem ta awoꞌtan spasele. Ma me awakꞌ yajtal awoꞌtan yuꞌun. 42Pero jun nax te tut puersa ya skꞌane. Te xMariae la stꞌujix te tut a te leke. Maꞌyuk machꞌa ya xjuꞌ ya xpojbot yuꞌun —xchi.
المحددات الحالية:
LUCAS 10: AMANNT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Nuevo Testamento Tzeltal de Amatenango © Sociedad Bíblica de México, 2006.
