JUAN 6
6
Te Jesuse la smakꞌlin sinko mil winketik
1Patil kꞌax bael ta jejchꞌ mar yuꞌun Galilea te Jesuse, te jaꞌ mismo mar yuꞌun te Tiberiase. 2Bayal gente stsꞌaklibil yuꞌun, porke la yilik te señaetik smilagro te la slekutes jchameletike. 3Jich te Jesuse mo bael ta jun wits y teꞌ kꞌo snajkan sba sok a te jnopojeletik yuꞌune. 4Nopolix a te kꞌin Pascuae yuꞌun te juriyoetike. 5Kꞌalal la yil te Jesuse te bayal genteetik tsꞌaklibil yuꞌune, la yalbey te jFelipee:
—¿Ba ya xba jmanbetik sweꞌel spisil te genteetik to? —xchi.
6Te tutꞌil jich a yal te Jesuse, yuꞌun ya yaꞌi tut xchi te jFelipee, porke te Jesuse snaꞌoj lek te tut ya xba spase. 7Te jFelipe la yal:
—Te ayuk dosiento denario takꞌin yuꞌun ya jmantik a te waje, ma teyuk ya sta chꞌinuk a te juju-tule —xchi.
8Jich te jꞌAndrese, te jaꞌ ekꞌa te jnopojel yuꞌune te jaꞌ yijtsꞌin te Simon Pedroe, la yalbe:
9—Liꞌ ay jtul chꞌin kerem to te ay joꞌpejch sebada-waj y sok chaꞌkojt chay. Pero ¿ba wan kꞌan juꞌuk a te bayal genteetike? —xchi.
10Te Jesuse la yalbe te jnopojeletik yuꞌune:
—Albeyaik spisil te genteetike aꞌ snajkꞌan sbaik —xchi.
Te luwar ba ayike beno wamal a, y teꞌ snajkan sbaik a. Ay wan sinko miluk te winketike. 11Te Jesuse la yichꞌ ta skꞌab te waje, sok la yalbe kola yal Dios yuꞌun. Patil la yaꞌbe te jnopojeletik yuꞌune, y la spukbeyik te machꞌatik te nakajtik ae. Y jich mismo spas sok te chaye, la yaꞌbe spisil te machꞌatik la skꞌanike. 12Kꞌalal nojelix xchꞌujtik ae, te Jesuse la yalbe te jnopojeletik yuꞌune:
—Tsobaik te xejtꞌemal te la spas sobrae yuꞌun jich me makꞌ xchꞌay xejtꞌuk —xchi.
13Jich a stsobik y noj yuꞌunik lajchayeb moch te xejtꞌemal te la spas sobra te joꞌpejch sebada-waje. 14Te kꞌalal la yilik te gente te seña milagro te la spas te Jesuse, la yalik:
—Batsꞌi jaꞌix to te jꞌalwanej yuꞌun Dios te kaꞌiyejtik te ya xtal ta balmilale —xchiik.
15Pero te Jesuse la snaꞌ te puersa ya yotsesik ta reyil ta skꞌopike, jich stukel nax chaꞌbajt xan ta jol wits.
Te Jesuse been ta baba mar
16Te kꞌalal xꞌijkꞌubix a te kꞌinale, te jnopojeletik yuꞌun te Jesuse koik bael te ba tiꞌmare. 17Moik bael ta jun barko y lijk kꞌaxikuk bael ta jejch mar, yuꞌun ya xlaj kꞌot ta Capernaum. Lom ijkꞌix a te kꞌinale, te Jesuse ma to sujt tal a. 18Lijk taluk tulan ikꞌ, y te mare lijk wilawetuk. 19Kꞌalal beenikix bael te barko joꞌeb o wakeb kilometro ae, la yilik te Jesuse te yipal ta beel ta baba mar. Tijilaj tal te ba barkoe, y la xiꞌik yuꞌun. 20Te Jesuse la yaltalanbe:
—Joꞌon me. Ma me xiꞌanik —xchi.
21Ben jun yoꞌtanik la yikꞌik ochel te ba barkoe, y tsꞌin xanix a laj lokꞌ kꞌoel ta luwar te ba yaloj xlaj bajtike.
Te genteetike ya sleik te Jesuse
22Ta yan kꞌaal te genteetik te ayik jilel te jejchꞌ tiꞌmare la snaꞌik te úniko jnopojeletik te moik bael ta barko te yal jkojt xanix teꞌey ae, y te Jesuse ma junuk nax a bajt sok. 23Pero jtsꞌin to nax a ay yan barkoetik a laj kꞌot te lijk tal ta jtejklum Tiberiase. Teꞌ laj kꞌot te ba luwar te nopol nax ay a ba la sweꞌik waj te la yalbe kola yal Dios yuꞌun te Kajwaltike. 24Kꞌalal la yilik te maꞌyuk teꞌa te Jesuse ni euk te jnopojeletik yuꞌune, te gentee moik bael euk te ba barkoe y bajtik ta Capernaum. Ba sleik te Jesuse.
Te Jesuse jaꞌ waj yuꞌun te kuxlejale
25Te kꞌalal laj kꞌot te baꞌ jejch mare, teꞌ kꞌo staik a te Jesuse. La sjojkꞌobeyik:
—Maestro, ¿tut ora julat liye? —xchiik.
26Te Jesuse la yaltalanbe:
—Jamal ya kalbeyex, jaꞌ nax ya aleikon porke lom lek aweꞌex asta toj lek a noj achꞌujtik. Ma jaꞌuk ya aleikon yuꞌun te la awilik te seña milagroetik te la jpase. 27Ma me jaꞌuk xꞌawaꞌtelinik sleel te aweꞌelik te ya xlaje. Jaꞌ me xꞌawaꞌtelinik sleel te aweꞌelik te ya xkuxuyinex yuꞌun sbajtel kꞌinale. Jaꞌ to jaꞌ weꞌelil te ya yaꞌbeyex te Nichꞌanile, porke te Dios Tatile la yakꞌ chiknajuk te lek yoꞌtan yuꞌune —xchi te Jesuse.
28La sjojkꞌobeyik:
—¿Tut a te yaꞌtel Dios te ya skꞌan jpastike? —xchiik.
29Te Jesuse la sjakꞌtalanbe:
—Te tut ya skꞌan Dios te ya apasike jaꞌ ya skꞌan ya achꞌuunik te machꞌa la stikon tale —xchi.
30Jich a sjojkꞌobeyik:
—¿Tut señail ya awaꞌbotik kiltik yuꞌun teme la kiltike ya me jchꞌuuntikat? ¿Tutik a te awaꞌtele? 31Te antibo jmeꞌ-jtatike la sweꞌik te mana-waj ta jojchol tꞌantꞌan kꞌinale, jich tutꞌil te ya yal te Sjun Diose: “Dios a akꞌtalanbot sweꞌ waj te tal ta chꞌulchane”, xchi me —xchiik.
32Te Jesuse la sjakꞌtalanbe:
—Jamal ya kalbeyex, ma jaꞌuk te jMoises te la yaꞌbey te antibo ameꞌ-atatik te waj te tal ta chꞌulchane; te machꞌa ya yakꞌ te batsꞌil waj te ya xtal ta chꞌulchane, jaꞌ te jTate. 33Porke te waj yuꞌun Diose jaꞌ te machꞌa koem tal ta chꞌulchane te ya yaꞌbey xkuxlejal te genteetike —xchi te Jesuse.
34Te gentee la skꞌanbeyik:
—Kajwal sil tiempo me xꞌawaꞌbotik te waj ya awale —xchiik.
35Te Jesuse la yaltalanbe:
—Joꞌon wajon yuꞌun te kuxlejale. Te machꞌa ya xtal ta jtojole ni makꞌ xwiꞌnajix a, y te machꞌa ya xchꞌuunone, ni makꞌ xtakejix yoꞌtan a. 36Pero komo la kalbeyexix, te jaꞌexe ma xꞌachꞌuunik aunke me ya awilikon. 37Spisil te machꞌa ya yaꞌbon te jTate ya xtal ta jtojol; y te machꞌatik ya xtal ta jtojole, makꞌ ya jlokꞌes bael ta juera. 38Porke ma jaꞌuk koemon tal ta chꞌulchan yuꞌun te ya jpas te tut ya skꞌan koꞌtane; jaꞌ ya jpasbe sboluntar te jTat te la stikonon tale. 39Jaꞌ te sboluntar te Machꞌa la stikonon tale te spisil te machꞌa ya yaꞌbone ni jtuluk ya xchꞌay kuꞌun, sok ya me jchaꞌkuses tal ta slajibal kꞌaal. 40Porke te sboluntar jTate jaꞌ te ay skuxlejalik sbajtel kꞌinal spisil machꞌa ya yil sok ya xchꞌuun te Nichꞌanile. Y joꞌon ya jchaꞌkuseslan tal ta slajibal kꞌaal —xchi te Jesuse.
41Te juriyoetike lijk yaꞌbiyanik te Jesuse yuꞌun jaꞌ te tuti yale: “Te joꞌon wajon te koemon tal ta chꞌulchan” te xchie. 42Y la yalik:
—¿Me ma wan jaꞌuk te Jesus te xnichꞌan Josee? Te joꞌotike ya jnaꞌbetik sba te state y sok te smeꞌe. ¿Tuꞌun te ya yal te ora to te koem tal ta chꞌulchane? —xchiik.
43Te Jesuse jich a yaltalanbe:
—Ma awaꞌbiyanik te jaꞌexe. 44Ni maꞌyuk machꞌa ya xtal ta jtojol teme ma jaꞌuk ikꞌbil tal yuꞌun te jTat te la stikonon tale. Y joꞌon ya jchaꞌkuses tal ta slajibal kꞌaal. 45Ta sjun te jꞌalwanejetike jich ya yal: “Dios me ya spꞌijuteslanot yuꞌun ta spisilik”, xchi me. Jaꞌ yuꞌun spisil te machꞌa ya yaꞌibeyik sluwaril skꞌop te Tatile y teme la snopbeye, ya me xtalik ta jtojol.
46“Maꞌyuk machꞌa yiloj te Tatile; úniko te joꞌone kiloj, yuꞌun teꞌ talemon ta stojol Dios. 47Jamal ya kalbeyex: Te machꞌa ya xchꞌuunone ay xkuxlejal sbajtel kꞌinal. 48Joꞌon wajon yuꞌun te kuxlejale. 49Te antibo ameꞌ-atatike la sweꞌik te mana-waj te ba jojchol tꞌantꞌan luware, pero chamik bael. 50Pero te tut ya kal joꞌone, jaꞌ te waj te koem tal ta chꞌulchane. Te machꞌa ya sweꞌbeye makꞌ xcham. 51Joꞌon te kuxul wajone te koem tal ta chꞌulchane. Te machꞌa ya sweꞌ te waj to, ya xkuxuyin sbajtel kꞌinal. Te waj te ya kakꞌe jaꞌ te jtiꞌbalule te ya kakꞌ yuꞌun jich ya xkuxuyin a te genteetike —xchi te Jesuse.
52Te juriyoetike talel bael a lijk sjojkꞌobe sbaik. La yalik:
—¿Tutꞌil ay a te ya yaꞌbotik jweꞌtik te stiꞌbalule? —xchiik.
53Te Jesuse la yaltalanbe:
—Jamal ya kalbeyex, teme ma la aweꞌbe stiꞌbalul te Nichꞌanile, sok teme ma la awuchꞌbe te xchꞌichꞌele, maꞌyuk akuxlejalik. 54Te machꞌa ya sweꞌbe te stiꞌbalule sok te ya yuchꞌbe te xchꞌichꞌele, ay xkuxlejal sbajtel kꞌinal, y joꞌon ya jchaꞌkuses tal ta slajibal kꞌaal. 55Porke te jtiꞌbalule batsꞌi jaꞌ weꞌelil stukel, y te jchꞌichꞌele batsꞌi jaꞌ lek ta uchꞌel stukel. 56Te machꞌa ya sweꞌ te jtiꞌbalule y te ya yuchꞌ te jchꞌichꞌele kuxulix ta jtojol, y te joꞌone jun nax ya xkuxuyinon sok. 57Te Tatil, te la stikonon tale, ay kuxlejal yuꞌun, y jaꞌ kuxulon ta stojol. Jich mismo ekꞌa te machꞌa ya sweꞌbon jtiꞌbalul ya xkuxuyin ta jtojol. 58Jaꞌ ya kalbe skꞌoplal te waj te koem tal ta chꞌulchane. Joꞌon te waj te ma pajaluk sok te mana-waj te la sweꞌik te antibo ameꞌ-atatike. La sweꞌik pero chamik bael. Te machꞌa ya sweꞌ te waj to ya xkuxuyin sbajtel kꞌinal —xchi te Jesuse.
59Te Jesuse la yakꞌ ta nopel spisil to te ba la stsob sbaik ta sinagoga yuꞌun Capernaum.
Te kꞌop yuꞌun xkuxlejal sbajtel kꞌinal
60Te tutꞌil jich a yal ta pꞌijuteswanej te Jesuse, jich a yalik bayal te machꞌatik stsꞌaklijyeike:
—Te tut ya yale ben wokol ta naꞌbeyel sluwar. ¿Machꞌa kꞌan snaꞌbe sluwar? —xchiik.
61Te Jesuse la snaꞌ te tut mukul yipalik ta yalele. Jaꞌ yuꞌun la sjojkꞌolanbe:
—¿Meꞌn ma tsaꞌamuk a kꞌot ta awoꞌtanik te tuti kale? 62¿Jal tsꞌin teme la awilik te ya xmo bael te Nichꞌanil te ba ay ta nail toe? 63Jaꞌ kuxulat yuꞌun te Espiritue; yan te atiꞌbalule ma tut snaꞌ stukel. Y te tutik la kalbeyexe jaꞌ yuꞌun te Espiritue, jaꞌ ya xkuxuyinex yuꞌun. 64Pero ay to jtul-chebukex te ma xꞌachꞌuunike —xchi. Yuꞌun te Jesuse snaꞌoj ta slijkibal te machꞌatik te ma xchꞌuunot yuꞌune y sok te machꞌa ya xꞌakꞌot entregal yuꞌune. 65Jich la yal xan:
—Jaꞌ yuꞌun la kalbeyex te maꞌyuk machꞌa ya xtal ta jtojol te manchuk ya xꞌikꞌot tal yuꞌun te Tatile —xchi.
66Jich ora a chꞌojot jilel te Jesus yuꞌun te bayal machꞌatik stsꞌakliyejik, y maꞌ skꞌan a sjoyinikix bal a. 67Te Jesuse la sjojkꞌolambe te lajchaytul jnopojeletike:
—¿Me ya xbaex euk te jaꞌexe? —xchi.
68Te Simon Pedroe la sjakꞌ:
—Kajwal, machꞌa yan ya xbootik sok, porke yuꞌun kuxlejal sbajtel kꞌinal te akꞌope. 69Te joꞌotike la jchꞌuuntikix, y jnaꞌojtik te jaꞌat Cristoat te xNichꞌanat Chꞌul Diose —xchi.
70Te Jesuse la sjakꞌtalanbe:
—Me ma joꞌukon a tsaex te lajchaytulexe, pero ay jtul te jaꞌexe te ya xꞌuꞌuninot yuꞌun pukuje —xchi.
71Te tutꞌil jich a yal te Jesuse, jaꞌ a yalbe skꞌoplal te Judas te xnichꞌan Simon Iscariotee. Porke te Judase jaꞌ ya xꞌakꞌawan entregal, manchuk me jaꞌ jtuluk te ta xlajchaytulule.
المحددات الحالية:
JUAN 6: AMANNT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Nuevo Testamento Tzeltal de Amatenango © Sociedad Bíblica de México, 2006.
