Fingec fingec 22
22
Anutungo Awraham faitobannu faiec
1 #
Heb 11:17-19
Wiac imoc wisickedaru Anutungo Awraham tobanggema yofi deec, “Awraham.” Ifi deu yeng yofi meremmiec, “Ni yomoc.” 2#2Ngts 3:1Ifi deu Anutungo yofi deec, “Ge medacga Itsak mocgusac yeac songo kuneng negengannec yenoc geanggaoc Moria bangecfu wangecma kemma tiki mong edzacgubade imohai ye ni sesegerec anembesena.”
3Ifi deu Awraham ye asoacngoc yacma donggiya mengerema enac tofoc tofohohora yohockang nga medaha Itsak hesicyunuec. Amma hosuc oho ohoac gerec hendzicma mema yacma Anutungo bangec deecmoc imohai kenggec. 4Kengkecmagec uameme harebec ammanu Awrahamngo kic fiu enu bangec deecmoc edi feu henec. 5Feu hemma enac tofoc tofohohora yofi dema edeyuruec, “Ngeri donggigoc yei tarec ni medacgocsac edimoc emma Anutuac kicfu ngonducnemaguc ngerearu monggoc dzigenema madede.”
Awraham nga Itsak tikiu enoc
6Ifi dema Awraham ye sesegerec oho ohoac gerec mema medaha Itsakac witiau faiec. Nga ye yengena ine gerec dzedzea nga soe meec. Meu yerahafocngoc kenoc. 7Sinnu kemma Itsakngo mama Awraham yofi dema kpesimiec, “Manggac.” Deu deec, “Oc, medacna dena.” Deu medahango yofi deec, “Negennec, gerec mosora nga feranga imoc mekecdipe nga sesegerec ohodede imocac rama damoc?” 8Ifi deu Awrahamngo yofi deec, “Medacna, Anutu yengenaoc sesegerecac rama meficgeude.” Ifi deu yerahafoc kenoc.
9 #
Yak 2:21
Kengkecma Anutungo bangec deecfu kensikeoc. Sikema Awrahamngo imohai arata mong mema imocac witiau gerec arenggeec. Faima medaha Itsak hanimaria dzegema arata nga gerec witiau faiec. 10#Heb 11:17; Yak 2:21Faima maria sinema medaha kpeudeac soe meec. 11Meu Kebuac angerongo kurumennunac kpacma yofi deec, “Awraham, Awraham.” Ifi deu ye deec, “Ni yomoc.” 12#Rom 8:32Ifi deu yofi meremmiec, “Ge medacgaaru mariga mi sinena nga wiac mong mi ammina. Ge medacga mocgu ye mi segerenendanggac amma ge Anutuac yoac modacma eweheihei ammiannec imoc yaguc negengguduae.”
Sese mong meficgemiec
13Ifi deu Awraham ye dzigenema ngadeau fima henu ramangiwa mong baihango ic gigidangau fau keme gidanggeu nanec. Nanu Awraham ye kemma imoc mema medahaac turunga rama imocngo sesegerec ohoec. 14Ifi amma Awraham ye bangec imocac kpara yofi kparec, “Kebungo wiac meficgenende,” imoc yofinenggac bangec mingina yeneng yofi deandaengoc, “Kebungo yengena tikiau#22:14 Tiki imoc kpara Moria tiki nga imoc yagucac Yerusalaim ande. Kpara mong Tsion tiki deandae. wiac meficgenemmeude.”
Dzadzahac meseriec
15Anu angero ye kurumennunac Awraham monggoc kpacma yofi deec, 16#Ruk 1:73; Heb 6:13-14“Kebungo yofi dede, ‘Ge medacyombongga mocgu mi segerema desima faka imoc andang. Imocac amma ni neanna kpacfu deseriduae 17#Fing 12:2; 13:16; 15:5; 24:60; 26:4; Heb 11:12; Yak 2:21ni kenecguyombonggema bangecfocga homac yombong mesaheyunuba sawau asomeng tackendae nga kondunnu sangi fekende ifi isoc ambesande. Nga bangecfocga yeni ngabafocngina feracyunuma yeneac amabangec mema mingina ambesande. 18#Fing 12:3; 18:18; 26:4; Aps 3:25; Gar 3:8Nga geng yoacna tofohodang imocac amma geac bangecgaac arennu bangecfu ngicngacareng sasawa kenecnginagoc ambesandae.’ ”#22:18 Paurongo yoac imoc hemma Garata 3:8 imohai yoac imocac kpou kpou faiec fede 19Ifi deu Awraham medahagoc yeri enac tofoc tofohohora yerearu dzigeneoc. Dzigeneec yeni yacma yenahafoc Becer Sewa bangecfu kenggec nga ye wiacforagoc imohai tacyac anggec.
Nahor nambaracfora yeneac kpacareng
20Anu wiac imoc wisickedacmanu Awraham siduc yofi dema edegec, “Negennec, Mileka nga munaga Nahor yereac nambaracfocngira fingecgec. 21Yeneac kpacngina ine yofi waracmedaha imoc Uts nga yeac bageau Budzi amma Kemucel ye ine Aram mama. 22Amma Kesed, Hadzo, Piledas nga Yidelaf amma Betucel.” 23Betucel imoc Riweka mama. Awraham munia Nahor yeac enema Mileka ye medac 8 imoc meyunuec. 24Nga wanacenema#22:24 Wanacenema yeni enema foraac kuc amau mi mekecgec nga yeni nambaracfocngina maridzoming mong mi yemmegec. kpara Recuma yeng ifingoc yeac medac meyunuec imoc yofi, Tewa, Gaham nga Tahas amma Macaha.
المحددات الحالية:
Fingec fingec 22: Ded
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© (Active), Wycliffe Bible Translators, Inc. All rights reserved.
