Fingec fingec 23
23
Sara homeec
1Anu Sara ye kecma kifaya 127 ammanu homeec. Ye kifaya ifiguc ammanu 2#Fing 50:10; Yos 14:15Kenacan bangecfu Kiriat Areba imohai bangecsebi waec. Nga bangec imocac kpara mong Heweron. Homeu Awraham ye ubamanganggac songgong yearu kenec.
Mahpela uau hocsinga feec imoc meudeac negenec
3Ye kiac ubamangang angkecma enemaac fareng feecfunac yacma Het ngicngac yenearu kemma yofi dema edeyunuec, 4#1Ngts 29:15; Myeg 39:13; Heb 11:9, 13; Aps 7:16“Ni ngeneac botucfu naso wegenanecsac kuric kecduae imocac ngeni bangec mong kicsereac desinenggec enennaac farenga tonggoba imoc hoannau mi febeso.” 5Ifi deu Het ngicngac yeni Awraham yofi dema edegec, 6“Kunennina, yoac edeguni negenna. Ge ngictauac medac Anutungo faiguu botucninau kecnec imocac kicserenina mong gombunga meisinggema enenggaac fareng ihai tonggobesena. Nenearunac mongngo imoc tonggonadeac kicsere naric mi segeregenude me kpae mi faigenude.” 7Ifi degec Awraham ye yacma bangec mingina Het ngicngac yeni eweheihei fakau ngonducneyemmema yofi dema edeyunuec, 8“Ni enennaac farenga hoannaunac mekemma tonggobadeac negenggec naric andeu deba negenggec. Tsohar medaha Efron 9yeac bangec tosea wisic wisickeau Mahpela hocsinga fede imocac mingina kecde. Anu ngeni neac enac mema ye edegec yeng hocsinga imoc neac anudeac desibeso. Imoc kicnginau silwadzongo meba hocsing imocngo neac kicsere ua anudeac bung deude imocacsoc mibade.”
Mahpela ua bummeudac Efronggoc denegeng anoc
10Ifi deu Efron ye Het ngicngac sasawa kpedzucyunuma taong naguu tacgec yeneac botucfu tacma ngic yeni negemma tacmagec Awraham yofi dema edeec, 11“Kunenna, ifi kpac, deba negenna. Bangectosea imoc desigenduae amma uau hocsinga fede imoc momoc desigenduae. Ogofocna momoc negemma tacmagec desigenduae imocac enenggaac fareng imohai tonggobesena.” 12Ifi deu Awraham ye bangec mingina ngonducneyemmema bangec mingina tacmagec Efron yofi dema edeu negendacgec, 13“Imoc naric, amma sifu negennenna ni bangecac bung gemba mebesena anu ni enennaac farenga imohai tonggobade.” 14Ifi deu Efrongngo Awraham yofi dema edeec, 15“Kunenna, ge deba negenna. Bangec imocac buma silwadzo 400 ande nga nerang imocac botucnirau yoac mong mi dede. Ge sifu enenggaac farenga ihai tonggobesena.”
Mahpela ua silwadzo 400ngo bummeu yeac anec
16 #
Fing 23:15
Ifi deu Awraham ye Efronggac yoac negemma Het ngicngac negemma tacmagec silwadzo kpetea deec imocac sirihau ebiha mema miec. Ngic wiac bummegecdeac faiandae yeneng silwa kpetea negengandae imocac siricfu silwadzo 400 miec. 17Awraham ye ifi amma Efronggac ua Mamereu wenac ere ereaubigeng Mahpelau feec amma hocsinga nga ic sasawa ua imohai nangkenggec imoc hafoangoc bummeu desimigec. 18#Fing 49:30; 50:13; Aps 7:16Imoc Het medacfora yeni bangec mingina nga ngic negenniac Efronggac taong naguusing hadacma henggec yeneac kicfu bangec imoc yeac anec. 19#Fing 25:9-10Anu imocac ngadeau Awraham ye enema Sara Mahpela uau hocsinga feec imohai tonggoec. Mahpela imoc Mamereac edibigeng imoc Heweron ama nga imoc Kenacan bangecfu feec. 20Imocac amma Het medacfora yeni ua nga hocsinga imoc momoc sasawa Awrahamgac kicsere ua anudeac desimigec yeac anec.
المحددات الحالية:
Fingec fingec 23: Ded
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© (Active), Wycliffe Bible Translators, Inc. All rights reserved.
