Fingec fingec 24
24
Itsakac ngac meficgebesonga
1Anu Awraham ye naso herea kecma ngickpengeng yombong anec. Ammanu Kebungo Awrahamgac wiac sasawa kenehedarec. 2#Fing 15:2; 47:29Awraham enac tofoc tofohofora yeneac enarangina ye Awrahamgac wiac sasawa kpeturanggedacma garenggekefec. Imocac amma Awraham ye yofi dema edeec, “Ge mariga tabunau faima 3#Fing 26:34-35; 28:1-2, 8; Mke 34:16; Dser 7:3-4Kebu bangec nga kurumenga kurumengaac Anutu yeac kicfu yofi deserinenna. Ni kenacangngic botucnginau kecduae. Nga ge yenearunac naroang mong mema medacna mi mibesena. 4Ge ine medacna Itsakac enema meficgebeso dema neac fingec fingec bangecfu arengfocna kecdae yenearu kembesena.”
5Ifi deu enac tofoc tofohoha ye yofi dema kpesimiec, “Anu ngac ye ni modacnuma bangec yomohai haudeac mi efaiudeu dafi ambade? Geng bangec wama hanec imohai ni medacga monggoc wangecma kembade me dafi negennec?” 6Ifi deu Awrahamngo yofi dema edeec, “Kpac, neac medacna ye imohai monggoc mi hesickema kembesena. 7#Fing 12:7; Mke 23:20Kebu, kurumenga kurumenga imocac Anutungo mannaac amaunac nga arengfocna yeneac bangecfunac wangecnuma haec yeng yoac yofi dema deserinenec, ‘Bangecfocga yeni bangec yomoc yombong yemmebesandua.’ Kebu yengenaoc angeroya sueu waraigenu medacnaac enema bangec imohacnac mehanade. 8Anu ngac ye modacguudeac mi efaiudeu ine ge yoac deseridang imocngo monggoc mi dzegeguude. Nga medacna ye ine imohai mi wangecma kembesena.” 9Ifi deu enac tofoc tofohongicngo maria Awrahamgac tabuyau faima Awrahamngo yoac deec imoc modarudeac deseriec.
Enac tofoc tofohongincgo ngac meficgeudeac kenec
10Anu enac tofoc tofohongicngo kunengaac kamelefora yenearunac teng meyunuec amma kunengaac wiac gombunga hania hania homac mema kenec. Kengkecma Aram Naharayim#24:10 Aram Naharayim imocac titiha doku yohockanggac Aram bangec. Kpara mong imoc Mesopotamia. Nahorac taonnu kensikeec. 11#Fing 24:42; 29:2; Mke 2:16; 1Sm 9:11Kensikeu ama toforebeso ammanu dokuteng mong taonggac ngadeau tarec imocac wegenahau kamelefora ayemmeu mama fedacgec. Nga ngac yeni maraisoc imohai doku figecdeac haandae.
Anutungo meficgeudeac numuec
12Anu ye yofi dema numuec, “O Kebu, kunenna Awrahamgac Anutu, ge dzadzahac yegoc modacma uana yaguc gombunga fingerudeac meficnuna. 13Negennec, ni yei doku kiwau nambare taongngicngac yeneac naroangfocngina doku figecdeac magecde. 14Nga naroang mong mau doku enannu finenna neba ifi deba negemma yofi merennude, ‘Naric nena nga ni kamelefocga yeni ifingoc doku yemmeba negecde.’ Naroang imoc enac tofoc tofohongicga Itsak yeac meisinggenec ni ifi negemma yofi negembade, ge kunenna Awrahamgoc dzadzahac annec imoc modacnec.”
Riweka haec
15 #
Fing 22:23; Yes 65:24 Yoac imoc demanungoc henu Riweka ye dokuenanga fuayau tofohoma haec. Riweka imoc Mileka medaha Betucel yeac naroanga. Nga Mileka imoc Awraham munia Nahor yeac enema. 16Naroang imoc ye kicsiriha gombunga yombong anu ye ngic mongngo mong mi kpesereec. Ye dokuu kemema dokuenangau doku fima ereec. 17Ereu enac tofoc tofohongic ye yearu nedzima kemma yofi deec, “Dokuenanggaunac doku kapianec nenna neba.” 18Ifi deu Riweka ye yofi meremmiec, “Kunenna, naric nenade.” Ifi dema imohaingoc dokuenang dokuyagoc sinemiu mema neec. 19Nga miu neu wisickeu Riwekango yofi dema edeec, “Ni kamelefocga ifingoc doku fima yemmeba nema gebecyunuude.” 20Ifi dema doku bic yombong kpetinggeu otou kemeu monggoc fiudeac dokuu nedzima kemeere anec. Ifi amma kamelefora sasawa doku gumecyunudarec. 21Ifi anu ngic imoc ye yoac mi deec. Eng wareckema namma yofi negensiec Kebungo sing yomohai meficnuu uana foragoc anude me kpac imocac negembibieduae.
22Anu kamele yeni doku negec wisickeu ngic ye samacac ring mong golngo memea imoc ebiha beka#24:22 Beka imoc golac kpete nga imocac ebiha 7 grams. ebic mocgu nga sibuc yohockang golngo memea ebicngira 10 shekel#24:22 Shekel mocgu imoc 14 grams. imoc miec. 23Mima yofi dema kpesimiec, “Dena negemba, ge meracac naroang? Manggaac amau ama titinga naric nandeac tofocnac imohai febing me?” 24#Fing 22:20-23; 24:15Ifi deu yeng yoac turunga yofi meremmiec, “Ni Betucel naroanga nga ye ine Mileka nga Nahor yereac medacngira.” 25Ifi dema torokpema yofi deec, “Kamele yeneac kpindzingsira nga yakangina homac fenemmede amma tofocnac fegecdeac amanina titinga soha nande.”
Lawangngo yeac amau haudeac heitaiec
26Ifi deu ngic ye ngoducnema Kebu dengerema yofi deec, 27“Kunenna Awrahamgac Anutu, Kebu ye dzadzahac modacande faka imoc mi waec nga yoac deec imoc modacma kunenna gombunga ammide ye kenehebeso. Yeng ni dindingac yombong wangecnuu kunennaac arengfora yeneac amau hasikedua.”
28Anu naroang imoc ye nedzima kemma nonggeaac amau emma faka fingerec imocac siduc ammidarec. 29-30Anu Riweka naina mong kefec kpara Lawan ye nainaaru samacac ring nga fuyau sibuc taru henec amma monggoc ngic imocngo yoacsiduc anec imoc nainango siduc anu negemma yeng ngic dokuu nanec yearu nedzima kenec. Nga ngic imoc ye kamelefora yenigoc dokuungoc nanggec. 31Nanu Lawangngo yofi deec, “Ii ogona, ge Kebuac kenecgoc, ge hana kende. Ni ama bic mengeredua nga kamele yeneac ama ifingoc fede. Ge nocac hama ngadeau nannec?” 32Ifi dema ngic ye amau emma uamedacfora edeyunuu kamele yeneac finac nganoc meickegec. Meickema kamele yeneac fefe nga yakagedangngina faigec. Amma ye nga ngic yegoc hagec yeneac hani dzuac dzuac doku momoc faigec. 33Ifi anggec wisickeu yaka mehama migec. Migec Awraham yeac enac tofoc tofohongicngo yofi deec, “Ni yoac mekecduae imoc dedacmaguc yaka ngade nebade.” Ifi deu Lawangngo yofi deec, “Dena negenniyac.”
Enac tofoc tofohongicngo Itsakac siduc edeyunuec
34Ifi deu yofi deec, “Ni Awrahamgac enac tofoc tofohongic. 35#Fing 13:2; 24:1Kebungo kunenna keneheyombonggeu ngic kuneng anec kecde. Ammanu rama nga burumaka, silwa nga gol, wanacngic nga wanacngac, kamele nga donggi imoc sasawa homac midarec. 36#Fing 21:2; 25:5Nga kunennaac enema Sara ye ngackpengeng ammaguc sifu kunennaac medac mong meec. Anu Awraham ye iwaia sasawa yeac mariu faidarec. 37Amma ni yoac yofi demeserima deserimibadeac edenuec, ‘Ge kenacangngic bangecnginau kecduae yeneac naroangfocngina mema medacna mi mibesena. 38Ge sifu mannaac amau neanna arengfocna yenearu kemma yenearunac medacnaac ngac mong meficgebesena.’ 39Ifi deu ni kunenna yofi dema edeai, ‘Ngac imoc ye efaima mi modacnuude gedang.’ 40Ifi deba yeng yofi dema edenuec, ‘Ni Kebuac kicfu kecerema kecduae imocac yeng angeroya sueu gegoc kecma singga foragoc anudeac meficguu arengfocna nga mannaac amaunac medacnaac enema mong naric meficgenade. 41Ge ifi anna yoac demeserinennec imoc foragoc anu wisickeude. Nga arengfocna yenearu kenna ngac segerema mi genggecdeu yoac demeserinennec imocngo ge mi dzegeguude.’
42Anu ni yaguc dokuu hama yofi dema numudua, ‘Kebu, kunenna Awrahamgac Anutu, ni sing yomohai ua mebadeac hadua imocac fora fingerudeac kpesi kpesi faigenduae. 43Negennec, ni yei dokukiwau nambareng ngacnaroang mong doku fiudeac hau, “Dokuenanggaunac doku kapianec nenna neba.” 44Ifi deba yoac turunga yofi merennenude, “Naric nena nga ni kamelefocga yeni ifingoc doku fima gumecyunubade.” Ifi deu yeac yofi negembade. Kebungo kunennaac medaha yeac ngacbingec meisinggeec yomoc.’
45Ni negen negennango ifi numubarengoc Riweka hemba ye dokuenanga fuayau tofohoma hama dokukiwau kemema doku fidac. Fima ereu ni yofi kpesimidua, ‘Ge naric doku nenna nebai me.’ 46Ifi deba imohaingoc dokuenanga fuayaunac memama yofi dedac, ‘Naric nena nga kamelefocga yeni doku fiyemmeba negecdengoc.’ Ifi deu ni doku neba ye kamele doku ifingoc gumecyunudac.
47Ifi anu wisickeu yofi kpesimidua, ‘Ge meracac naroang?’ Ifi deba yeng yofi dedac, ‘Ni Betucel naroanga, Betucel ye ine Nahor nga Mileka yereac medacngira.’ Ifi edenuu ring samahau faidua nga sibuc fuayau heimiba kemedac. 48Heimiba kemeu ngonducnema Kebu, kunenna Awrahamgac Anutu ye kenehedua. Yeng kunenna muniaac esea Awraham medahaac enema mebadeac sing gombungau wangecnudac. 49Imocac amma ngeni edenugec, ngeni kunenna ubaefac kpemima yoac imoc modacgecde me kpac imoc edenubisia. Wagecdeu ine ni wama noboc me noboc kembade.”
Riweka ye Itsakac enema anudeac migec
50Ifi deu Lawan nga Betucel yeri yofi dema edeoc, “Wiac imoc Kebuarunac, imocac neri yoac mong mangana me gombunga naric mi dedede. 51Negennec, Riweka ye kicgau tacde. Ye kunenggaac medahaac enema anude imocac siricfu wangecma kembesena. Kebungo deec ifi isoc fingecbeso.” 52Ifi deec enac tofoc tofohongic ye yoacngira imoc negemma eweheihei fakau kicmesuya bangecfu hetutuckema Kebu numunemiec. 53Ifi anu wisickeu yacma wiac homac silwa nga golngo memea amma wamba mema Riweka miec nga wiac goa buma engena imoc naina nga nonggea momoc yemerec. 54Ifi amma enac tofoc tofohongic nga ngic yegoc hagec yeni momoc kpeturanggema nenedoku negec ama toforeu imohai fegec. Nga ama wereckenu asoacguc yacma yofi deec, “Fainugec kunennaac kemba.” 55Ifi deu Riweka nonggonaina yereng yofi deoc, “Naroang ye sifu uameme teng nganoc nenigoc wana kecmanu imocac ngadeau ine naric kembeso.” 56Ifi deec yeng yoac turunga yofi merenec, “Kebu ye sing hadua imoc meficnuu foraya fingecdac imocac mi dzegenubisia, fainugec dzigenema kunennaaru kemba.” 57Ifi deu yofi deoc, “Neri naroang dede hau yengena kpesimide.” 58Ifi dema Riweka deec hau yofi dema kpesimioc, “Ge ngic yomocgoc naric kennade me?” Deec yeng yofi merengyemerec, “Ni kembadeac efaiduae.”
59-60 #
Fing 22:17
Ifi deu yeni naingngina Riweka kenehema yofi dema edegec, “O nainnina, ge ngicngac tausenga tausenga yeneac nenggac ambesena amma geac gboricfocga yeni ngabafocngina feracyunuma yeneac amabangecngina mema mingina ambisia.” Ifi dema yeni naingngina Riweka enac tofoc tofohoyagoc nga Awraham enac tofoc tofohongiha amma ngicfora faiyunugec kenggec.
Riweka amea wama kenec
61Faiyunugec wisickeu Riweka nga enac tofoc tofohonaroangfora yeni yacma kamele witiau emma tacma ngic imoc modacma kenggec. Enac tofoc tofohongic ye faka ifi amma Riweka mema kenec. 62#Fing 16:14; 20:1; 25:11Anu Itsak ye Negew bangecfu tacyac anecac Becer Lahai Roi, imohai kefecfunac dzigeneec. 63Anu ama marai yombong ammanu negen negeng ua meudeac uau kenec. Kengkecma kic fiu kenu kamele goa hagec yenenec. 64Nga Riweka ye ifingoc kic fiu kenu Itsak hemma kameleunac bic yombong yacma maec. 65Mama enac tofoc tofohongic yofi dema kpesimiec, “Ngic edimoc uaunac hama meficnunude imoc merac?” Ifi deu enac tofoc tofohongicngo yofi deec, “Imoc neac kunenna.” Ifi deu kporucsusuha mema kicmesuya semeec.
66Anu enac tofoc tofohongicngo ine wiac sasawa anec imocac siduc Itsak ammidarec. 67#Fing 25:20Ammiu wisickeu Itsakngo Riweka wangecma nonggea Saraac kporucamau enec. Anu ye meu enema anu yeac songo negenec. Negemmanu enemango mekiriu nonggeaac ubamangang nigeckpeec.
المحددات الحالية:
Fingec fingec 24: Ded
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© (Active), Wycliffe Bible Translators, Inc. All rights reserved.
