‘Apositoló 9
9
Ko e Ului ‘a Saulá
(Ngā 22.6-16; 26.12-18)
1KA ko Saula na‘a ne kei hō‘aki ‘a e fakamanamana mo e lau fakapō ki he kau ako ‘a e ‘Eiki, ‘o ne ‘alu ki he Taula‘eiki Lahi, 2‘o ne kole ke fai ha‘ane ngaahi tohi ki Tāmasikusi ki he ngaahi fale lotu, ke fakangofua ‘ene ha‘i mo taki mai ki Selusalema ‘a kinautolu te ne ‘ilo ai ‘oku ‘i he ‘alunga ko ē, ‘a tangata mo fafine.
3Pea ‘i he‘ene fai ‘ene fononga, ‘o fakaofiofi ki Tāmasikusi, fakafokifā na‘e malama takatakai kiate ia ha maama mei he langi: 4pea tō ia ki he kelekele, ‘o ne fanongo ki ha le‘o ‘oku pehē mai, ‘E Saula, ‘e Saula, ko e hā ‘oku ke fakatanga‘i ai au.
5Pea pehē ‘e ia, ‘Ēī, ko hai koe?
6Pea me‘a mai ‘e ia, Ko au ko Sīsū, ‘a ia ‘oku ke fakatanga‘i: ka ke tu‘u ā, ‘o hū ki kolo; pea ‘e fakahā ai kiate koe ha‘o me‘a ke fai.
7Pea tutu‘u ‘a e kau tangata na‘e fononga mo ia ‘oku nau mo‘ulongoa: he na‘a nau fanongo pē ki he le‘o, ka na‘e ‘ikai te nau sio ki ha taha. 8Pea kuo tu‘u hake ‘a Saula, ‘o ne fakaava hono mata, tā ‘oku ‘ikai te ne ‘ilo ha me‘a: pea na‘a nau taki nima‘i ia ‘o hūfaki ki Tāmasikusi. 9Pea na‘a ne nofo ai ‘o ‘aho tolu, ‘o kui pē; pea na‘e ‘ikai te ne kai pe inu.
10Pea na‘e nofo ‘i Tāmasikusi ha ako na‘e hingoa ko ‘Ānanaia: pea na‘e folofola ‘a e ‘Eiki kiate ia ‘i ha vīsone, ‘E ‘Ānanaia.
11Pea pehē ‘e ia, ‘Eī, ko au ‘eni.
Pea folofola ‘a e ‘Eiki kiate ia, Tu‘u, ‘o ‘alu ki he hala ‘oku hingoa ko Totonu, ‘o ‘eke ‘i he fale ‘o Siutasi ki ha motu‘a Tāsusi ‘oku hingoa ko Saula. He ko eni, ‘oku ne lolotonga fai ‘ene hū. 12Pea kuo ne mamata ki ha tangata ‘oku hingoa ko ‘Ānanaia, ‘oku ne hū mai ‘o hilifaki hono nima kiate ia, koe‘uhi ke ne toe ‘ā.
13Pea tali ‘e ‘Ānanaia, ‘Eiki, kuo u fanongo mei he tokolahi ki he tangata ni, ‘ene fu‘u ngaohikovi‘i ho kakai tapu ‘i Selusalema: 14pea ‘i heni kuo ne ma‘u tu‘utu‘uni mei he hou‘eiki taula‘eiki, ke ha‘i ‘a e kakai kotoa pē ‘oku tāpafua‘i ho huafa.
15Pea folofola ‘a e ‘Eiki kiate ia, ‘Alu pē; he ko e ipu mātu‘aki fili ‘eni ‘a‘aku, ke hapai hoku hingoa ‘i he ‘ao ‘o e Senitaile, mo e ngaahi tu‘i, mo ha‘a ‘Isileli foki. 16He ko au te u fakahā kiate ia ‘a e ngaahi fu‘u mamahi ‘e tō kiate ia koe‘uhi ko hoku hingoa.
17Pea ‘alu ange ‘a ‘Ānanaia, ‘o hū ki he fale; ‘o ne hilifaki hono nima kiate ia, ‘o ne pehē, ‘Alā Saula, ko e ‘Eiki, ‘io, ‘a Sīsū na‘e hā kiate koe ‘i he hala ‘i ho‘o fononga mai, kuo ne fekau mai au koe‘uhi ke ke toe ‘ā, mo ke fonu ‘i he Laumālie Mā‘oni‘oni. 18Pea na‘e ngangana leva mei hono ongo mata ha ngaahi me‘a hangē ni ‘uno‘i ika; pea na‘a ne ‘ā, ‘o ne tu‘u hake ‘o papitaiso. 19Pea hili ‘ene fai ‘ene kai na‘a ne mālohi.
Ko e Malanga ‘a Saula ‘i Tāmasikusi Pea na‘a ne nofo mo e kau ako ‘i Tāmasikusi ‘i he ngaahi ‘aho ni‘ihi.
20Pea ne hanga leva ‘o malanga‘aki ‘a Sīsū ‘i he ngaahi falelotu, ‘o pehē, Ko e ‘Alo ‘o e ‘Otua ia.
21Pea nau fakatumutumu kotoa pē ‘a kinautolu na‘e fanongo ki ai, ‘o nau pehē; ‘Ikai ko eni ia na‘e laiki ‘a e kakai ‘i Selusalema na‘e tāpafua‘i ‘a e hingoa ni, pea ne ha‘u ki heni foki ke fai pehē, ‘o taki ha‘isia ‘a e kakai ki he hou‘eiki taula‘eiki?
22Ka ka ‘āsili fakautuutu ai ‘a e mālohi ‘a Saula, ‘o ne fakapuputu‘u ‘a e kakai Siu na‘e nofo ‘i Tāmasikusi, ko e maau ‘ene fakamo‘oni ko e Mīsaia pē ia.
23Pea kuo hili fuoloa, pea na‘e puleaki ‘a e kakai Siu ke fakapoongi:#2 Kol 11.32-33 24ka ka ‘ilo pē ‘e Saula ‘enau fakakaukau. Pea na‘a nau le‘ohi ‘a e ngaahi matanikolo ‘i he ‘aho mo e pō, koe‘uhi ke fakapoongi ia: 25ka ka ‘ave po‘uli ia ‘e he‘ene kau ako, ‘o nau ‘ohifo ‘i he ‘ā, ‘o tukutuku ki lalo ‘i ha kato.
Ko Saula ‘i Selusalema
26Pea ‘i he‘ene hoko ki Selusalema, na‘a ne ala‘aki ke fakahoko ia ki he kau ako: pea nau teteki kotoa pē kiate ia, ko e ‘ikai te nau tui ko ha ako ia. 27Ka ka puke ‘e Pānepasa hono nima, ‘o ne taki ki he kau ‘Aposetolo, ‘o ne fakamatala kiate kinautolu ‘a ‘ene mamata ki he ‘Eiki ‘i he hala, mo ‘ene folofola kiate ia, mo ‘ene malanga mālohi ‘aki ‘a e huafa ‘o Sīsū ‘i Tāmasikusi. 28Pea na‘a ne nofo mo kinautolu ‘o fetoutoumoliliu‘aki ‘i Selusalema, mo ne malanga mālohi ‘aki ‘a e huafa ‘o e ‘Eiki. 29Kae‘uma‘ā na‘a ne akonaki ki he kau ‘Elinisito, ‘o fakakikihi mo kinautolu; pea ‘ahi‘ahi ‘e kinautolu ke fakapoongi ia. 30Pea ‘i he ‘ilo ki ai ‘e he kāinga, na‘a nau holataki ia ki Sesalia, ‘o tuku mei ai ki Tāsusi.
31Pea na‘e mālōlō ‘a e Siasi ‘i Siutea kotoa, mo Kāleli, mo Samēlia, pea hangē ha fale na‘e langa hake ai pē; pea na‘e fou ‘i he ‘apasia ki he ‘Eiki; pea ko e me‘a ‘i he tokoni ‘a e Laumālie Mā‘oni‘oni na‘e hoko ‘o fu‘u tokolahi.
Ko e Fakamo‘ui ‘e Pita ‘a ‘Eneasi
32Pea ko eni, lolotonga ‘a e fai ‘e Pita ‘ene ‘a‘ahi ki he kakai lotu kotoa pē, na‘a ne hoko hifo kiate kinautolu na‘e nofo ‘i Lita. 33Pea ne ‘ilo ai ha tangata na‘e hingoa ko ‘Eneasi, ‘a ia kuo valu ta‘u ‘ene toka, he ko e mamatea. 34Pea pehē ‘e Pita ki ai, ‘E ‘Eneasi, ‘oku faito‘o koe ‘e Sīsū Kalaisi: tu‘u, ‘o ngaohi ho mohenga ‘e koe. 35Pea ne tu‘u leva; pea na‘e mamata kiate ia ‘a e kakai kotoa pē na‘e nofo ‘i Lita, mo e Feitu‘u ko Sāloni: pea ko kinautolu na‘a nau tafoki ki he ‘Eiki.
Ko e Fakamo‘ui ‘e Pita ‘a Toakase
36Pea na‘e nofo ‘i Siopa ha fefine ako na‘e hingoa ko Tāpaita, ‘a ia ‘oku ui ‘i he lea ‘e taha ko Toakase: ko e fefine ia na‘e mohu ‘i he ngaahi ngāue lelei, mo e fai ‘ofa ki he tu‘utāmaki, ‘a ia na‘a ne toutou fai. 37Pea ‘i he taimi ko ia na‘a ne tu‘ia ‘i ha mahaki, ‘o ne pekia: pea hili ‘enau tatafi ia, na‘a nau tuku ‘i ha loki ‘i ‘olunga. 38Pea ko e me‘a ‘i he vāofi ‘a Lita mo Siopa, mo e fanongo ‘e he kau ako ‘oku ‘i ai ‘a Pita, ko ia na‘a nau fekau atu kiate ia ha ongo tangata, ke na kole ‘o pehē, ‘Oua te ke louloua‘a ke a‘u mai kiate kimautolu. 39Pea tu‘u ‘a Pita, ‘o ō mo kinautolu. Pea ‘i he‘ene lava mai na‘a nau ‘ohake ia ki he loki ‘i ‘olunga: pea tutu‘u mai ‘a e kau uitou ‘oku nau tangi, mo faka‘ali‘ali honau ngaahi kofu loto mo e ngaahi kofu tu‘a, ‘a ia ne ngaohi ‘e si‘i Toakase ‘i he‘ene kei ‘iate kinautolu. 40Pea kapusi kinautolu kotoa ‘e Pita, ‘o ne tū‘ulutui ‘o lotu, ‘o ne toki tafoki ‘o lea ki he ‘anga‘anga ‘o pehē, Tāpaita, tu‘u hake. Pea ‘ā ai ‘a e fefine: pea ‘i he‘ene vakai kia Pita na‘a ne nofo hake. 41Pea ne mafao hono nima ki he fefine, ‘o fokotu‘u ia; pea ne ui ‘a e kakai lotu mo e kau uitou, ‘o ne fakahā ia kiate kinautolu kuo mo‘ui. 42Pea na‘e faifai pea ‘ilo ki ai ‘a Siopa kātoa, pea tui ha tokolahi ki he ‘Eiki. 43Pea hoko ai na‘a ne nofo fuoloa ‘i Siopa ‘i he fale ‘o ha motu‘a ko Saimone ko e tufunga kili‘imanu.
المحددات الحالية:
‘Apositoló 9: TMB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Tongan Moulton Bible © Bible Society of the South Pacific, 2011.
