‘Apositoló 10
10
Ko Pita mo Kōniliusi
1PEA na‘e ai ha matāpule, tokua, ‘i Sesalia na‘e hingoa ko Koliniusi; ko e senituliō ia ‘i he vāhenga tau na‘e hingoa ki ‘Ītali. 2Ko e toko taha lotu mo‘oni pea ‘apasia ki he ‘Otua, ‘e ia mo hono fale kotoa, ‘o lahi ‘ene fai ‘ofa ki he kakai ‘Isileli na‘e tu‘utāmaki; pea ko e toko taha na‘e lotu ki he ‘Otua ma‘u ai pē. 3Pea fe‘unga nai mo hono hiva ‘o e houa, ‘aho, na‘e mamata pau ‘e ia ‘i hā vīsone ki hā ‘āngelo ‘a e ‘Eiki, ‘oku ne hū ange ‘o me‘a mai, ‘E Koliniusi.
4Ka ka sio fakamama‘u ia, ‘o ne mo‘utāfu‘ua, ‘o ne toki pehē, ‘Ēī, ko e hā?
Pea me‘a mai ‘e ia, Kuo tau hake ho‘o ngaahi hū, mo ho‘o ngaahi fai ‘ofa, ‘o hoko ko e me‘a ke manatu ki ai ‘e he ‘Otua.
5Pea ko eni, fekau leva ha kau tangata ki Siopa ke ‘omi ha motu‘a ko Saimone, ‘a ia ‘oku hingoa foki ko Pita: 6‘oku ‘āunofo ia ki ha motu‘a ko Saimone ko e tufunga kili‘imanu, ‘a ia ‘oku tu‘u hono fale ‘i matātahi. 7Pea kuo sītu‘a ‘a e ‘āngelo na‘e lea kiate ia, pea ne ui ange ha toko ua ‘o ‘ene kau tamaio‘eiki, pea mo ha toko taha ‘o e kau tau na‘e ma‘unganofo kiate ia, ko e siana sōtia lotu mo‘oni: 8pea hili ‘ene fakamatala kātokatoa kiate kinautolu, na‘a ne fekau atu kinautolu ki Siopa.
9Pea pongipongi hake, lolotonga ‘a e fononga mai ‘a e tu‘unga me‘a ko ia, ‘o fakaofiofi ki he kolo, mo e ‘alu hake ‘a Pita ki he tu‘afale ke fai ‘ene lotu, fe‘unga nai mo hono ono ‘o e houa. 10Pea kuo hālofia ia, pea ne loto ke tokoni: pea lolotonga ‘enau teuteu ne ‘āvea hono loto. 11Pea na‘a ne vakai ‘oku matangaki ‘a e langi, pea ‘oku ‘alu hifo ha ‘angame‘a ‘o hangē ha fu‘u lā, pea tuku hifo ki māmani ‘aki ha hiku‘i maea ‘e fā: 12pea na‘e ‘i ai ‘a e ngaahi fa‘ahinga manu kehekehe ‘o e kelekele, ‘a e ve‘efā mo e totolo, pea mo e manupuna ‘o e ‘atā. 13Pea na‘e ongo mai ha le‘o kiate ia na‘e pehē, Tu‘u, Pita, ‘o tāmate‘i ‘o kai.
14Ka ka tali ‘e Pita, ‘Ēī, ‘e ‘ikai ha me‘a pehē; he ‘oku te‘eki si‘i te u kai ha ngaahi me‘a ‘oku ta‘etaau mo ta‘ema‘a.
15Pea toe hoko mai ‘a e le‘o ko hono tu‘o ua, ‘o pehē, Ko e ngaahi me‘a kuo fakama‘a ‘e he ‘Otua, ‘oua te ke pehē ‘e koe ‘oku ta‘etaau. 16Na‘e fai pehē ‘o tu‘o tolu, pea toki ‘ohake ‘a e ‘angame‘a ki he langi.
17Pea lolotonga na‘e toumoua ‘a Pita, pe ko e hā nai ‘a e vīsone kuo ne mamata ki ai, ‘iloange, ko e kau talafekau ‘a Koliniusi, ‘a ia kuo nau fehu‘i holo ki he ‘api ‘o Saimone, ‘oku nau tutu‘u mai ki he matapā hū‘anga. 18Pea kuo nau ui ange ha taha, ‘o nau toutou fehu‘i, ‘Oku ‘apitanga hena ‘a Saimone, ‘a ia ‘oku hingoa foki ko Pita?
19Pea lolotonga ‘a e fakakaukau ‘a Pita ki hono ‘uhinga ‘o e vīsone, mo e folofola ‘a e Laumālie kiate ia, Ko eni, ‘oku kumi koe ‘e ha tu‘unga tangata:#10.19 tu‘unga tangata: Ko hono fakalea ia ‘i hono ngaahi hiki fuoloa ‘e ni‘ihi ka ko hono faka-Hepeluú ko e: ongo tangata ‘e tokoua. 20ka neongo ia, ka ke tu‘u pē ‘o ‘alu hifo, ‘o ō mo kinautolu, ‘o ‘oua ‘e momo‘i tāla‘a; he ko ‘eku fekau kinautolu ‘e au. 21Pea ‘alu hifo ‘a Pita ki he kau tangata, ‘o ne pehē, Eni, ko au ia ‘oku mou kumi ki ai: ko e hā e me‘a ‘oku mou omi ai?
22Pea nau tali, Ko e senituliō ko Koliniusi, ko e matāpule faitotonu pea ‘apasia ki he ‘Otua, pea ‘oku fakaongolelei foki ‘e he kakai Siu kātokatoa, na‘e fale‘i ia ‘e ha ‘āngelo tapu ke ‘omi koe ki hono fale, ke ne ma‘u fakamatala meiate koe. 23Pea ne ui ai kinautolu ke nau hū ange ‘o ‘apitanga ai. Pea pongipongi hake na‘a ne tu‘u, ‘o ‘alu atu mo kinautolu, pea na‘e ō mo ia ha ni‘ihi ‘i he kāinga mei Siopa.
24Pea nau a‘u ki Sesalia ‘i he ‘aho ‘e taha. Pea na‘e nofo talitali ‘a Koliniusi kiate kinautolu, kuo ne fakataha hono kāinga, pea mo hono ngaahi kaume‘a. 25Pea ‘i he ‘iloange ‘oku hū mai ‘a Pita, na‘e fakafetaulaki kiate ia ‘a Koliniusi, ‘o ne hinga atu ki hono va‘e, ‘o hū. 26Ka ka langa‘i hake ia ‘e Pita, ‘o ne pehē, Tu‘u pē, he ko e tangata foki mo au. 27Pea ne hū atu pē mo talanoa mo ia; pea tā ‘oku ‘i ai ‘a e tokolahi kuo fakataha. 28Pea ne pehē kiate kinautolu, ‘Oku mou lāu‘ilo, ko e me‘a ia ‘oku tāpuhā ki he tangata Siu, ke fafale ki ha toko taha ‘i ha fa‘ahinga kehe, pe ‘uhi ki ai: pehē foki mo au, ka ne ta‘e‘oua ‘a e ‘Otua, ‘ene hīnoi‘i au ke ‘oua na‘a ku lau ha tangata ‘e taha ‘oku ne ta‘etaau pe ta‘ema‘a. 29Ko hono ‘uhinga foki ia na‘a ku ha‘u leva ‘i ho‘omou fekau, ‘o ‘ikai te u fakapepe‘e: ko ia, ko ‘eku fehu‘i pe ko e hā ‘a e me‘a na‘a mou fiema‘u ai au?
30Pea me‘a ‘a Koliniusi, Ko hono fā ‘o e ‘aho kuo hili ange, ne u fai ‘i hoku fale ‘a e feinga lotu#10.30 lotu; Ko hono fakalea ‘i hono ngaahi hiki fuoloa ‘e ni‘ihi: lotu mo ‘aukai. ‘o hono hiva ‘o e houa, pea u fai atu ke a‘u ki he feitu‘ula‘ā ‘oku tau ‘i ai ni: mo e ‘iloange ‘oku tu‘u ha matāpule ‘i hoku ‘ao ‘oku kofu ngingila. 31Pea ne pehē mai, ‘E Koliniusi, kuo ongo hake ho‘o hū, pea ko ho‘o ngaahi fai ‘ofa kuo tauhi ‘a e manatu ki ai ‘i he ‘ao ‘o e ‘Otua. 32Ko ia, ke ke fekau leva ki Siopa, ‘o tala ke ha‘u ‘a Saimone, ‘a ia ‘oku hingoa foki ko Pita; ‘oku ne ‘āunofo ‘i he fale ‘o Saimone ko e tufunga kili‘imanu ‘i matātahi. 33Ko ia, na‘e ‘alu atu leva ‘eku fekau kiate koe; pea mālō mo koe ho‘o lava mai. Pea ko eni kuo mau tefua mai ‘i he ‘afio ‘a e ‘Otua, ke ma‘u ‘a e ngaahi tu‘utu‘uni kuo ha‘u mo koe mei he ‘Eiki.
34Pea ofa‘aki ‘e Pita ‘ene lea ‘o ne pehē, Tā ko ‘ene toki mahino mai ē kiate au, ‘oku ‘ikai ke filifilimānako ‘a e ‘Otua:#Teu 10.17 35ka neongo pe ko e fe‘ia ‘a e kakai, ka ‘ilonga ‘a ia ‘oku ‘apasia kiate ia, pea ngāue fai ki he totonu, ‘oku ngofua ke ne a‘u mai kiate ia. 36Tā ko e akonaki ia na‘a ne tuku atu ki ha‘a ‘Isileli, he‘ene fakahā ‘ia Sīsū Kalaisi ‘a e ongoongolelei ‘o e melino; ko e ‘Eiki mo‘oni ia ‘o e kakai kotoa pē. 37‘Oku mou ‘ilo ‘a e ongoongo na‘e pavake ‘i Siutea kātoa, ‘a ia na‘e kamata mei Kāleli, hili ‘a e papitaiso na‘e malanga‘aki ‘e Sione; 38‘a e ongoongo ‘o Sīsū–‘a ia mei Nāsaleti–‘a hono pani ia ‘e he ‘Otua ‘aki ‘a e Laumālie Mā‘oni‘oni, mo e mafai ‘o e mana: pea ‘alu atu ia mo ngāue ‘aonga, mo ne faito‘o ‘a kinautolu ‘oku fakapōpula‘i ‘e he tēvolo; he na‘e kau ma‘u pē mo ia ‘a e ‘Otua. 39Pea ko kimautolu ko e kau fakamo‘oni ‘o e ngaahi me‘a na‘a ne fai ‘i he fonua ‘o e kakai Siu, kae‘uma‘ā ‘i Selusalema; ‘a ia foki na‘a nau fakapoongi, he‘enau tautau ia he ‘akau: 40ko e toko taha ko ia na‘e fokotu‘u ‘e he ‘Otua ‘i hono ‘aho tolu, ‘o ne tuku ke mātu‘aki hā; 41‘o ‘ikai ki he kakai kotoa pē, ka ki ha kau fakamo‘oni na‘e sinaki fili ‘e he ‘Otua, ‘a ia ko kimautolu, ko e tu‘unga me‘a na‘a mau kai mo inu fakataha mo ia hili ‘ene toetu‘u mei he pekia. 42Pea na‘a ne fekau ke mau fanongonongo ia ki he kakai ‘Isileli, mo fakapapau ko eni ia ‘a e toko taha kuo polo‘i ‘e he ‘Otua, ko e fakamaau ‘o e kau mo‘ui mo e kau pekia. 43‘Oku fakamatala ‘a e kau palōfita kotoa pē ki he toko taha ko ia, ‘o pehē, ‘Ilonga ha taha ‘oku tui pīkitai kiate ia, ‘oku ne ma‘u ‘a e fakamolemole angahala koe‘uhi ko hono Huafa.
44Lolotonga ‘a e kei lea‘aki ‘e Pita ‘a e ngaahi me‘a ko ia, na‘e hifo ‘a e Laumālie Mā‘oni‘oni kiate kinautolu kotoa pē na‘e fanongo ki he fakamatala. 45Pea ko kinautolu ‘o e fa‘ahinga kamu na‘e tui, ‘a ia kuo nau omi mo Pita, na‘a nau fakatumutumu, koe‘uhi ko e hua‘i ki he Senitaile foki ‘a e me‘a‘ofa ko e Laumālie Mā‘oni‘oni. 46He na‘a nau fanongo kiate kinautolu ‘oku nau lea‘aki ‘a e ngaahi lea kehekehe, mo fakahīkihiki ‘a e ‘Otua.
Toki lea ange ‘a Pita, 47Ko hai ‘e kākunga ke ta‘ofi ‘a e vai, ke ‘oua na‘a papitaiso ‘a kinautolu na, ka kuo nau ma‘u ‘a e Laumālie Mā‘oni‘oni ‘o tatau tofu pē mo kitautolu? 48Pea ne fekau ke papitaiso kinautolu ‘i he huafa ‘o e ‘Eiki. Pea nau kole kiate ia ke nofo si‘i hifo mo kinautolu.
المحددات الحالية:
‘Apositoló 10: TMB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Tongan Moulton Bible © Bible Society of the South Pacific, 2011.
