‘Apositoló 23
23
Ko e Fakamāu‘i ‘o Paula he Fakataha‘anga Lahí
1PEA ‘i he ‘aho ‘e taha, ko e me‘a ‘i he‘ene fie ‘ilo pe ko e hā nai ‘a e me‘a ‘oku talatalaaki‘i ai ia ‘e he kakai Siu, ko ia na‘a ne vete ange ia, ‘o ne fekau ke fakataha ‘a e hou‘eiki taula‘eiki, mo e Sanetalimi kātoa, pea ne ‘ohifo ‘a Paula ‘o fokotu‘u ‘i honau ‘ao. 2Pea sio fakamama‘u ‘a Paula ki he Sanetalimi, ‘o ne toki pehē, ‘A Kāinga Matāpule, ko au ‘eni ‘oku ‘ata‘atā ‘aupito hoku konisēnisi; he kuo u fai ‘eku ngāue fakafonua ki he ‘Otua, ‘o a‘u ki he ‘aho ni. 3Pea fekau ‘e he Taula‘eiki Lahi ko ‘Ānanaia kiate kinautolu na‘e tu‘u ofi ai, ke nau taa‘i hono ngutu.#Māt 23.27-28
4Pea pehē leva ‘e Paula kiate ia, ‘a e ‘a vali hina, ‘e taa‘i koe ‘e he ‘Otua: ko ho‘o nofo na ke fakamaau au ‘o fakatatau ki he Lao, ka ke fekau ke taa‘i au, ‘a ia ‘oku tapu ‘i he Lao!
5Pea ko kinautolu na‘e tu‘u ofi mai na‘a nau pehē, ‘Oku pehē koā ho‘o ngaohi ‘a e Taula‘eiki Lahi ‘a e ‘Otua? Pea tali ‘e Paula, ‘Ā, na‘e ‘ikai te u ‘ilo, kāinga, ko e Taula‘eiki Lahi ia; he kuo tohi, ‘E ‘ikai te ke lea kovi ki he pule ‘o ho kakai.#‘Eki 22.28
6Pea ‘i he ‘ilo ‘e Paula, ko e potu ‘e taha ko e kau Sātusi, pea ko e potu ‘e taha ko e kau Fālesi, na‘a ne hanga ‘o kalanga ‘i he lotolotonga ‘o e Sanetalimi, ‘o pehē, Kāinga Matāpule, ko au ko e Fālesi, ko e hako‘i Fālesi: ko e me‘a ‘oku tau ‘amanakia, ‘io, ‘a e toetu‘u ‘a e pekia, ko ia ‘oku ‘ekea ai au.#Ngā 26.5; Filip 3.5
7Pea ‘i he‘ene lea pehē, na‘e hoko ai ‘o fetu‘usi ‘a e kau Fālesi mo e kau Sātusi: pea mavahe ua ‘a e fakataha. 8He ‘oku lau ‘a e ha‘a Sātusi, tokua ‘oku ‘ikai ha toetu‘u, pe ha ‘āngelo, pe ha laumālie: ka ‘oku tui ‘a e ha‘a Fālesi ‘oku ‘i ai fakatou‘osi.#Māt 22.23; Ma‘ake 12.18; Luk 20.27 9Pea na‘e hoko ha fu‘u vālau: pea tutu‘u hake ha ni‘ihi ‘o e kau sikalaipe na‘e kau ki he fa‘ahi Fālesi, ‘o nau taukave ‘o pehē, ‘Oku ‘ikai te mau ‘ilo ha kovi ‘i he tangata ni: pea na‘a kuo lea kiate ia ha laumālie pe ha ‘āngelo.
10Pea ‘i he fākalalahi ‘a e fetu‘usi na‘e manavahē ‘a e ‘eikitau na‘a haeua ‘a Paula ‘e kinautolu, pea na‘a ne fekau ‘a e tau ke ‘alu hifo, ‘o ‘ave fakamālohi mei honau lotolotonga, pea ke nau taki foki ki he taua.
11Pea ‘i he pō ko ia na‘e tu‘u mai ‘a e ‘Eiki, ‘o ne folofola kiate ia, ‘o pehē, ‘Oua te ke lotosi‘i: he hangē ko ho‘o talatalatonu ‘i Selusalema ‘a e ngaahi me‘a ‘oku kau kiate au, pehē foki kuo pau te ke fakamatala ‘i Loma.
Ko e Alealea ke Tāmate‘i ‘a Paula
12Pea kuo ‘aho hake, na‘e fai ha puleaki ‘e ha kakai Siu, ‘o nau tuki faka‘aungafa kinautolu, ‘e ‘ikai te nau kai pe inu kae‘oua ke nau tāmate‘i ‘a Paula. 13Pea na‘e hulu atu ‘i he toko fāngofulu ‘a e kakai na‘a nau fai ‘a e fuakava ko ia. 14Pea na‘e ‘alu ‘a e fa‘ahinga ko ia ki he hou‘eiki taula‘eiki, mo e kau mātu‘a, ‘o nau pehē, Kuo mau mātu‘aki tuki faka‘aungafa kimautolu, ‘e ‘ikai te mau mama ha me‘a kae‘oua ke mau tāmate‘i ‘a Paula. 15Pea ko eni, ke ‘amoutolu mo e Sanetalimi ‘a e fakahā ki he ‘eikitau, ke ne ‘ohifo ia kiate kimoutolu, ‘o hangē ko ha‘amou fie ‘eke ke mahu‘ingamālie ‘a e ngaahi me‘a ‘oku kau kiate ia: pea ko kimautolu, ‘i he te‘eki ke ne ofi mai, te mau ‘i ai ke fakapoongi ia.
16Ka ka fanongo ‘a e ‘ilamutu ‘o Paula ki he malumu, ‘o ne ‘alu ange ‘o hū ki he taua, ‘o tala kia Paula. 17Pea ui ange ‘e Paula ha taha ‘o e kau senituliō, ‘o ne pehē, Ke ke ‘ave ‘a e talavou ni ki he ‘eikitau: he ‘oku ‘i ai ha‘ane me‘a ke fakahā ki ai. 18Ko ia na‘a ne ‘ave ia, ‘o taki ki he ‘eikitau, ‘o ne pehē, Ko e pōpula ko Paula na‘a ne ui ange au, ‘o kole ke u ‘omi ‘a e tama ni kiate koe; he ‘oku ‘i ai ha‘ane lea ke fai atu.
19Pea puke hono nima ‘e he ‘eikitau, ‘o ‘ave fakaekinaua, ‘o ne fehu‘i, Ko e hā ‘a e me‘a ‘oku ke fie fakahā mai, ē?
20Pea ne pehē, Kuo fa‘ufa‘ufono ‘a e kau Siu ke tala kiate koe, ke ke ‘ofa ‘o ‘ohifo ‘a Paula ‘apongipongi ki he Sanetalimi, ‘o hangē ‘oku nau fie ‘eke ke mahu‘ingamālie ‘a e me‘a ‘oku kau kiate ia. 21Ko ia, ‘oua te ke tui kiate kinautolu: he ‘oku toka malumu kiate ia hanau kau tangata ‘e toko fāngofulu tupu, ko e fa‘ahinga kuo tuki faka‘aungafa kinautolu, ‘e ‘ikai te nau kai pe inu kae‘oua ke nau fakapoongi ia: pea kuo nau ‘osi teuteu, ‘o talitali pē ki ha‘o tali ‘enau kole.
22Pea tukuange ‘e he ‘eikitau ‘a e tama, ‘o ne fekau ki ai, ‘Oua te ke tala ki ha taha kuo ke faka‘ilo ‘a e me‘a ni kiate au.
Ko Hono Tuku atu ‘o Paula ki he Kōvana ko Filike
23Pea ne ui ange ha toko ua ‘o e kau senituliō, ‘o ne pehē, Teuteu mai ki hono tolu ‘o e houa po‘uli ha kau sōtia ‘e toko uangeau ke ‘alu ki Sesalia, mo ha kau heka hoosi ‘e toko fitungofulu, mo ha kau to‘o tao pē ‘e toko uangeau. 24Pea ‘omai foki ha fanga manu, koe‘uhi ke nau fakaheka ai ‘a Paula, ‘o a‘utaki lelei kia Filike ko e kōvana. 25Na‘a ne fai foki ha tohi, ‘a ia na‘e fou pehē: 26“Ko au Kaloti Līsia kia Filike ko e ‘Eiki Kōvana, ‘ofa atu.” 27“Ko e matāpule ko eni ne puke ‘e he kau Siu, pea na‘e toe si‘i pea fakapoongi ia ‘e kinautolu: ka u ha‘u mo ‘eku tau, ‘o fakahaofi, he kuo u ‘ilo ko e Loma ia.” 28“Pea ‘i he‘eku fie‘ilo foki ‘a e ‘uhinga ‘o ‘enau fakahopo ia, ko ia na‘a ku ‘ohifo ia ki he Sanetalimi ‘onautolu: 29pea u ‘ilo, tā kuo fakahopo ia ‘i ha koto me‘a pē ‘oku kau ki he‘enau lao, ka ‘oku ‘ikai ha me‘a ‘i he talatalaaki ‘oku taau ke ne mate ai, pe nofo pilīsone.” 30“Pea ‘i he faka‘ilo mai kiate au kuo puleaki‘i ha me‘a ke fai ki he matāpule ni, na‘a ku tuku leva ia kiate koe, pea u fekau foki ki he kau tukuaki ke nau fai ‘enau lea kiate koe.”
“‘ofa atu.”
31Ko ia ko e kau tau na‘a nau ‘ave ‘a Paula, ‘o hangē ko honau tu‘utu‘uni, ‘o nau taki po‘uli ia ki ‘Anitepeta. 32Pea ‘i he ‘aho ‘e taha na‘a nau tuku ‘a e kau heka hoosi ke ‘alu mo ia, ka nau foki kinautolu ki he taua: 33pea ko e fa‘ahinga ko ia na‘a nau hoko ki Sesalia, ‘o nau ‘ave ‘a e tohi ki he kōvana, ‘o nau tuku foki ‘a Paula ki ai. 34Pea kuo ne lau ia, na‘a ne fehu‘i pe ko e fē hono vahefonua. Pea ‘i he‘ene ‘ilo ko e toko taha mei Silisia. 35Na‘a ne pehē, Te u fakamāu‘i ho‘o me‘a ‘oka toki hoko mai ho kau tukuaki. Pea ne fekau ke tauhi ia ‘i he palasi ‘o Hēlota.
المحددات الحالية:
‘Apositoló 23: TMB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Tongan Moulton Bible © Bible Society of the South Pacific, 2011.
