‘Apositoló 22
22
1PEA ‘i he‘ene fakangofua ia, na‘e ta‘alo ‘e Paula ki he kakai, ‘oku ne tu‘u mei he tu‘unga taupotu ki ‘olunga. Pea kuo nau fakanonga hifo, na‘a ne lea kiate kinautolu ‘i he lea faka-Hepelū ‘o pehē:
2Kāinga Matāpule mo Hou‘eiki, mou me‘a lelei mai ki he‘eku fakamatala ‘oku fai atu ni. (Pea ‘i he‘enau fanongo ‘oku ne lea kiate kinautolu ‘i he lea faka-Hepelū, na‘e ‘āsili ai ‘enau fakalongo. Pea ne fai atu.)
3Ko au ko e motu‘a Siu. Na‘e fanau‘i au ‘i Tāsusi ‘i Silisia, ka u tupu hake ‘i he kolo ni, ‘o u ta‘utu ‘i he va‘e ‘o Kāmelieli, ‘o u ako ke mamafa ki he ngaahi mingimingi‘i me‘a ‘o e lao ‘a ‘etau ngaahi kui, kae‘uma‘ā na‘a ku mamahi‘i ‘a e ‘Otua, ‘o hangē ko kimoutolu kotoa pē he ‘aho ni.#Ngā 5.34-39 4Pea u fakatanga‘i ‘a e ‘alunga ko ē, ‘o ‘ikai te u nā ‘i he tāmate, pea u ha‘i ‘o fakahū pilīsone ‘a tangata mo fafine fakatou‘osi.
Ko e Fakamatala ‘e Paula ki he‘ene Tafokí
(Ngā 9.1-19; 26.12-18)#Ngā 8.3; 26.9-11
5Pea ko ‘eku me‘a ko ia ‘e fakamo‘oni ki ai ‘a e Taula‘eiki Lahi, mo e Fakataha Fakamātu‘a kotoa: ‘a ia na‘a ku ma‘u tohi mei ai foki ki he kāinga ‘i Tāmasikusi, ‘o u ‘alu mo au, ko ‘eku fai ke ha‘i ‘a e kakai foki na‘e nofo ‘i he potu ko ia, ‘o taki mai ki Selusalema ke tautea.
6Pea lolotonga ‘eku fononga, ‘o fakaofiofi ki Tāmasikusi; kuo ho‘atā nai; fakafokifā na‘e malama takatakai kiate au ha fu‘u maama mei he langi. 7Pea u tō ki lalo, pea u fanongo ki ha le‘o ‘oku pehē mai, ‘E Saula, ‘e Saula, ko e hā ‘oku ke fakatanga‘i ai au? Pea u tali, ‘Ēī, ko hai koe?
8Pea folofola mai ‘e ia, Ko au ko Sīsū mei Nāsaleti, ‘a ia ‘oku ke fakatanga‘i.
9Pea ko kinautolu na‘e ‘iate au na‘a nau tokanga‘i ‘a e maama, ka na‘e ‘ikai te nau ongo‘i ‘a e le‘o ‘o ia na‘e me‘a mai. 10Pea u pehē, ‘Eiki, ko e hā te u fai? Pea folofola ‘a e ‘Eiki kiate au, tu‘u pē ‘o ‘alu ki Tāmasikusi; pea ‘e fakahā ai kiate koe ‘a e ngaahi me‘a kuo tu‘utu‘uni ke ke fai. 11Pea ‘i he ‘ikai te u fa‘a fakasiosio, ko e me‘a ‘i he fu‘u ngingila ‘o e maama ko ia, na‘e takinima‘i au ‘e he kakai na‘a mau ō, pea u hoko ki Tāmasikusi.
12Pea ko ‘Ananaia, ko e motu‘a lotu na‘e mātu‘aki tauhi ‘a e Lao, pea fakaongolelei ‘e he kakai Siu kotoa pē na‘e nofo ai. 13Na‘e ha‘u ia kiate au, pea ne tu‘u mai ‘o ne pehē, ‘Alā Saula, ‘ā hake. Pea u sio hake ‘i he taimi ko ia, ‘o ‘ilo ia. 14Pea ne pehē, Ko e ‘Otua ‘o ‘etau ngaahi kui na‘a ne sinaki tu‘utu‘uni ke ke ‘ilo hono finangalo, pea ke mamata ki he Toko Taha Angatonu, pea ke fanongo ki ha le‘o mei hono fofonga, 15koe‘uhi ke ke hoko ko ‘ene fakamo‘oni ki he kakai kotoa pē ‘i he ngaahi me‘a kuo ke mamata mo fanongo ki ai. 16Pea ko e toe tatali ke hā? Tu‘u pē ke papitaiso koe, ‘o fufulu koe mei ho‘o ngaahi angahala, ‘o takua hono huafa.
Ko Hono Ui ‘o Paula ke Malanga ki he Kakai Mulí
17Pea ‘i he faifai pea u foki ki Selusalema, lolotonga ‘eku lotu ‘i he Temipale, ‘iloange na‘e ‘āvea au. 18Pea u mamata kiate ia ‘oku ne me‘a mai, Fakato‘oto‘o, pea ‘alu vave mei Selusalema: koe‘uhi ‘e ‘ikai te nau tali ha‘o fakamatala kiate au.
19Ka u pehē ‘e au, ‘Eiki, ka ko kinautolu ia ‘oku lāu‘ilo, ko au ia na‘a ku fa‘a ‘ai pilīsone, mo haha ‘i he ngaahi falelotu kehekehe, ‘a e kakai ‘oku lotu kiate koe: 20pea ‘i he fai ‘a e lilingi ‘o e toto ‘o ho‘o mā‘ata ko Sitīveni, na‘a ku ‘i ai mo au, ‘o u tu‘u ofi ai ‘o fakava‘eva‘e, mo tauhi ‘a e kofu ‘o e kakai na‘e fakapoongi ia.#Ngā 7.58
21Pea ne folofola mai kiate au, ‘Alu pē: he ko au te u tuku atu koe ke ‘alu ki he mama‘o, ke fai ‘eku fekau ki he Senitaile.
22Pea na‘a nau fakafanongo kiate ia ‘o a‘u ki he lea ko ia, pea nau toki ‘ioho, Tafi‘i mei māmani ‘a e siana kehe na: he na‘e hala hono tuku ke mo‘ui.
Ko Paula mo e ‘Eikitau Lomá
23Pea ‘i he‘enau kaikaila, mo tupe‘i honau kofu, mo fakapuna efu ki ‘olunga, 24na‘e fekau ‘e he ‘eikitau ke hūfaki ia ki he taua, ‘o ne pehē ke ‘eke taa‘i ia; koe‘uhi ke ne ‘ilo pe ko e hā hono ‘uhinga ‘o ‘enau ‘ioho pehē ki ai. 25Pea kuo nau ha‘i punou ia ke fai hono kau‘imaea, na‘e pehē ‘e Paula ki he senituliō na‘e tu‘u ai, ‘Oku ngofua koā ke mou kau‘imaea ha tangata Loma, kae‘uma‘ā ha toko taha kuo te‘eki fakamaau?
26Pea ‘i he fanongo ki ai ‘a e senituliō, na‘a ne ‘alu ‘o tala ki he ‘eikitau, ‘o pehē, Ko e hā ‘a e me‘a ‘oku ke pehē ke fai? He ko e siana ni ko e Loma.
27Pea ha‘u ‘a e ‘eikitau, ‘o lea kiate ia, Tala mai, ko e Loma koe?
28Pea pehē ‘e ia, Ko ē.
Pea tali ‘a e ‘eikitau, Na‘a mo au ne u totongi lahi ke u kau ki he kolo ko ia.
Pea pehē ‘e Paula, Ka ko au na‘a ku tupu pehē foki.
29Pea tuaiekemo ‘a e hiki meiate ia ‘a e kakai na‘e fai ke ‘eke ia: ‘io, pea ko e ‘eikitau foki na‘a ne manavahē ‘i he‘ene ‘ilo ko e Loma ia, pea kuo ne ha‘i fakamo‘omo‘oni ia.
المحددات الحالية:
‘Apositoló 22: TMB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Tongan Moulton Bible © Bible Society of the South Pacific, 2011.
