‘Apositoló 20
20
1PEA hili ‘a e mālōlō ‘o e maveuveu, na‘e ui ange ‘e Paula ‘a e kau ako, ‘o ne fai ha tokoni, mo fekita kiate kinautolu, pea ne toki mahu‘i ke ‘alu ki Masitōnia. 2Pea hili ‘ene ‘a‘ahi ki he ngaahi feitu‘u ko ia, mo ne fai ha tokoni lahi kiate kinautolu, pea ne toki hoko ki Kalisi, ‘o ne tolu māhina ai. 3Pea ‘i he puleaki‘i ia ‘e he kakai Siu ‘i he‘ene fai ke tuku folau atu ki Sīlia, na‘a ne fakakaukau ke foki hake ‘i Masitōnia. 4Pea na‘e fe‘ao mo ia ‘i he fononga ‘a Sōpeta ko e tangata Pēlea, ko e foha ‘o Pulo, pea mei he kakai Tesalonaika ‘a ‘Alisitako mo Sekunio; mo Keio ko e tangata Teape, mo Tīmote; kae ‘uma‘ā ‘a e ongo me‘a mei ‘Ēsia ko Tikiko mo Talofima. 5Pea na‘e mu‘omu‘a ‘a e tu‘unga me‘a ni, ‘o tatali kiate kimautolu mei Taloasi. 6Ka ko kimautolu na‘a mau toki folau mei Filipai, hili ‘a e ngaahi ‘aho ‘o e tapu lēvani, pea mau hoko kiate kinautolu ki Taloasi ‘i hono ‘aho nima; pea mau nofo ai ‘o ‘aho fitu.
Ko e Fakamāvae ‘a Paula mo e Kāinga Taloasí
7Pea ‘i he ‘uluaki ‘aho ‘o e uike#20.7 ‘uluaki ‘aho ‘o e uiké: Ko e Tokonakí ia, pe ko e Sāpaté. na‘a mau fakataha ke pakipaki mā; pea na‘e talanoa lotu ‘a Paula kiate kinautolu, he na‘a ne ‘amanaki ‘alu ‘apongipongi; ‘o ne fano atu ‘ene fakamatala ki he tu‘uapō. 8Pea na‘e lahi ‘a e maama ‘i he loki ‘i ‘olunga, ‘a ia kuo mau fakataha ai. 9Pea na‘e ai ha talavou na‘e hingoa ko ‘Ūtiko, na‘e hekeheka ‘i he kātupa; pea na‘a ne tule hifo ‘o mohe ma‘u ‘i he fai fuoloa fau ‘a Paula; pea ne mate ‘ene mohe, ‘o ne patū hifo mei hono tolu ‘o e fata, pea na‘e hiki hake kuo pekia. 10Pea ‘alu hifo ‘a Paula, ‘o fo‘ohifo kiate ia, ‘o fā‘ofua ki ai, ‘o ne toki pehē, ‘Oua te mou puputu‘u; he ‘oku ‘iate ia ‘ene mo‘ui. 11Pea ne ‘alu hake ‘o fai ‘a e pakipaki ‘o e mā, mo ne kamata; na‘a ne talanoa foki ‘o fuoloa, ‘o a‘u ki he ma‘a ‘a e ‘aho, Na‘e pehē ‘a e anga ‘o ‘ene ‘alu. 12Pea nau taki mai ‘a e tama kuo mo‘ui, pea hono tangenge ‘enau fiemālie!
Ko e Folau mei Taloasi ki Mīleto
13Pea na‘a mau mu‘omu‘a kimautolu ki vaka, ‘o mau tuku folau atu ki ‘Āsosi ke mau fakaheka ‘a Paula ‘i he potu ko ia: he na‘e pehē ‘ene tu‘utu‘uni, ko ‘ene fie hala ‘uta pē ia. 14Pea kuo ne fetaulaki tu‘u mo kimautolu ki ‘Āsosi, na‘a mau fakaheka ia, ‘o hoko ki Mitilene. 15Pea mau folau mei ai ‘i he ‘aho ‘e taha, pea mau hoko ‘o fe‘unga mo Kaio; pea ‘i he ‘aho ‘e taha na‘a mau afe ki Samo; pea ‘i he ‘aho na‘a na feholoi na‘a mau hoko ki Mileto. 16He kuo tu‘utu‘uni ‘e Paula ke laka ‘i ‘Efesō, koe‘uhi ke ‘oua na‘a mole hono taimi ‘i ‘Ēsia: he na‘a ne fakavave, hei‘ilo te ne lava ke ne ‘Aho Penitekosi ki Selusalema.
Ko e Lea Fakamāvae ‘a Paula ki he Kau Taki ‘o e Siasi ‘i ‘Efesoó
17Pea ne fekau mei Mileto ki ‘Efesō ke ha‘u kiate ia ‘a e kau faifekau ‘o e siasi. 18Pea kuo nau hoko mai, pea pehē ‘e ia kiate kinautolu, Ko kimoutolu ē, kuo mou lāu‘ilo ‘eku anga tu‘u ma‘u ‘iate kimoutolu, talu mei he ‘uluaki ‘aho ‘o ‘eku hoko ki ‘Ēsia; 19‘a ‘eku ngāue fakatamaio‘eiki ki he ‘Eiki, ‘a ia na‘a ku fai mo e fakavaivai mo‘oni, mo e tangi lo‘imata; kae‘uma‘ā ‘a e ngaahi ‘ahi‘ahi na‘e hoko kiate au ‘i he puleaki‘i ‘e he kakai Siu. 20‘Oku mou ‘ilo foki na‘e ‘ikai te u taetae ha me‘a, ka u fakahā pē mo ako‘aki kiate kimoutolu ‘i he ‘ao ‘o e kakai, pea ‘i he fale takitaha; 21‘o u talatalatonu ki he Siu mo e Kalisi fakatou‘osi ‘a e fakatomala ‘o tafoki ki he ‘Otua, mo e tui pīkitai ki hotau ‘Eiki ko Sīsū. 22Pea vakai ko ‘eku ‘alu ‘eni ki Selusalema kuo no‘otekina au ‘i hoku laumālie, pea ‘oku ‘ikai te u ‘ilo pe ko e hā ha me‘a ‘e fepaki ai mo au: 23ngata pē ‘i he tala fakapatonu mai ‘e he Laumālie Mā‘oni‘oni ‘i he kolo takitaha, ‘o pehē tokua, ‘oku nofo‘aki tali kiate au ha ‘ū ha‘i, mo ha koto fakamamahi. 24Ka tala‘ehai ‘oku ou lau ‘eku mo‘ui ko e me‘a mahu‘inga, pe tatau kiate au mo e lava ‘o ‘eku fakapuepue, mo e lakanga na‘a ku ma‘u mei he ‘Eiki ko Sīsū, ke talatalatonu ‘a e Kōsipeli ‘o e kelesi ‘a e ‘Otua.#2 Tīm 4.7
25Pea ko eni ‘oku ou ‘ilo ni ‘e ‘ikai hamou taha ‘e toe vakai ki hoku mata ni, ‘a kimoutolu kuo u ‘alu holo ai ‘o malanga‘aki ‘a e Pule‘anga. 26Ko ia ‘oku ou fakapapau atu ‘i he ‘aho ko eni, kuo u ‘ata‘atā mei homou toto. 27He na‘e ‘ikai te u taetae ‘a e finangalo ‘o e ‘Otua ka na‘a ku fakahā atu hono kotoa. 28Ko ia, mou lamasi kimoutolu, mo e fanga sipi kotoa, ‘a ia kuo fakanofo kimoutolu ‘e he Laumālie Mā‘oni‘oni ‘i honau lolotonga ko honau kau le‘o, koe‘uhi ke mou tauhi ‘a e Siasi ‘o e ‘Otua,#20.28 ‘Otuá; ‘Oku pehē ‘i hono ngaahi hiki fuoloa ‘e ni‘ihi: ‘Eikí. ‘a ia na‘a ne fakatau ‘aki hono ta‘ata‘a ‘o‘ona. 29He ‘oku ou ‘ilo, ‘oka hili ‘eku hokosi, ‘e hū atu ha fanga ulofi anga mālohi, ‘a ia ‘e ‘ikai te nau mamae ki he fanga sipi. 30‘Io, na‘a mo kimoutolu ‘e tupu mei ai ha kau tangata ‘oku lea‘aki ‘a e ngaahi me‘a ‘oku ‘alu kehe, ke tohoaki ‘aki ‘a e kau ako ke muimui kiate kinautolu. 31Ko ia, mou le‘o, ‘o mou manatu, ko e ta‘u ‘e tolu, ‘i he pō mo e ‘aho, na‘e ‘ikai tuku ‘eku na‘ina‘i kimoutolu tāutaha, ‘o fai mo e tangi.
32Pea ko eni ‘oku ou tuku kimoutolu ki he ‘Otua, mo e folofola ‘a ‘ene kelesi, kiate ia te ne mafai ke lava homou langa hake, pea ke ‘atu ‘a e tofi‘a ‘i he lotolotonga ‘o e kakai kotoa pē kuo fakahaohaoa. 33Na‘e ‘ikai te u mānumanu ki ha konga siliva ‘a ha taha, pe ha koula, pe ha kofu. 34‘Io, ‘oku mou ‘ilo ‘e kimoutolu na‘e ngāue ‘a e ongo nima ni ki he tauhi ‘o‘oku mo e kakai na‘e ‘iate au. 35‘I he me‘a kotoa pē na‘e enginaki ‘e he‘eku ngāue kiate kimoutolu ‘oku totonu ke fakaongosia pehē, koe‘uhi ke tokoni ‘a e vaivai; pea ke fakamanatu foki ki he folofola ‘a e ‘Eiki ko Sīsū, ‘a si‘ene me‘a mai, ‘Oku te monū‘ia lahi ‘i he fai ha foaki atu, ‘i he‘ete ma‘u ha foaki mai.
36Pea ‘i he‘ene lea pehē, na‘a ne tū‘ulutui mo kinautolu kotoa ‘o hū. 37Pea nau fu‘u tangi kotoa pē, ‘o nau tāupe ‘i he u‘a ‘o Paula, ‘o nau toutou ‘uma lolomi kiate ia: 38pea lahi taha ‘enau mamahi koe‘uhi ko e lea kuo ne toki fai, tokua ‘e ‘ikai te nau toe siofia si‘i fofonga ‘o‘ona. Pea nau moimoi‘i ia ki vaka.
المحددات الحالية:
‘Apositoló 20: TMB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Tongan Moulton Bible © Bible Society of the South Pacific, 2011.
