‘Apositoló 19
19
Ko Paula ‘i ‘Efesō
1PEA lolotonga ‘ene ‘i Kolinitō ‘a ‘Āpolosi, na‘e ‘osi ‘e Paula ‘ene foli ‘a e ngaahi feitu‘u ‘o tuku‘uta, ‘o ne hoko ki ‘Efesō. Pea ne ‘ilo ai ha tu‘unga me‘a ako. 2Pea pehē ‘e ia kiate kinautolu, Na‘a mou ma‘u ‘a e Laumālie Mā‘oni‘oni ‘i ho‘omou tui?
Pea nau tali kiate ia, ‘Ikai; kae‘uma‘ā na‘e ‘ikai te mau fanongo kuo hoko mai ‘a e Laumālie Mā‘oni‘oni, mou papitaiso ki he hā?
3Pea nau pehē, Ki he me‘a na‘e papitaiso ki ai ‘e Sione.
4Pea pehē ‘e Paula, Ko e papitaiso na‘e fai ‘e Sione ko e papitaiso fakatomala; ‘o ne pehē ki he kakai ke nau tui kiate ia ‘oku hoko mo ia, ko hono ‘uhinga, kia Sīsū.#Māt 3.11; Ma‘ake 1.4,7-8; Luk 3.4,16; Sioné 1.26-27
5Pea ‘i he‘enau fanongo ki ai, na‘a nau papitaiso ki he Huafa ‘o e ‘Eiki ko Sīsū. 6Pea ‘i he hilifaki ‘e Paula hono nima kiate kinautolu, na‘e hoko hifo kiate kinautolu ‘a e Laumālie Mā‘oni‘oni; pea nau kamata lea‘aki ‘a e ngaahi lea kehekehe mo palofisai. 7Pea ko e lau kātoa ‘o e kau tangata na‘e fe‘unga nai mo e toko hongofulu mā toko ua.
8Pea ne hū ki he falelotu, pea ko e māhina ‘e tolu ‘ene malanga mālohi ‘aki ‘a e ngaahi me‘a na‘e lau ki he Pule‘anga ‘o e ‘Otua; ‘o ne fakakikihi ai, mo fakatui‘i kinautolu. 9Pea ‘i he faka‘a‘au ‘o fefeka honau ni‘ihi, mo e ‘ikai te nau tuitala, mo nau lau‘ikovi ‘a e lotu ‘i he ‘ao ‘o e kakai, na‘a ne hiki meiate kinautolu, ‘o ne vahe‘i ‘a e kau ako, ‘o ne talanoa lotu ‘i he ‘aho kotoa pē#19.9 ‘i he… pē; ‘Oku tānaki mai ‘i he ngaahi hiki fuoloa ‘e ni‘ihi ‘a e: mei he 11 pongipongi ‘o a‘u ki he 4 efiafí. ‘i he fale ako ‘o Tīlano. 10Pea na‘e fai pehē ‘o ta‘u ua; ko ia, na‘e fanongo ki he folofola ‘a e ‘Eiki ‘a e nofo ‘Ēsia kotoa, ‘a e Siu mo e Kalisi fakatou‘osi.
Ko e Ngaahi Foha ‘o Siva
11Na‘e fai foki ‘e he ‘Otua ‘ia Paula ha fa‘ahinga mana na‘e taha ‘ana: 12he na‘e ‘ave pē ki he kau mahaki ha ngaahi holoholo, mo ha ngaahi vala, kuo lave ki hono sino, pea na‘e mahu‘i meiate kinautolu ‘a e ngaahi alanga mahaki, pea ‘alu kitu‘a foki ‘a e ngaahi fa‘ahikehe. 13Pea na‘e ai ha ni‘ihi foki ‘o e kau Siu na‘e ‘alu fano pē ‘o faito‘o ‘āvea, na‘a nau ‘ahi‘ahi lea‘aki ki he kakai kuo fa‘ahikehea ‘a e huafa ‘o e ‘Eiki ko Sīsū, ‘o pehē, Ko ‘eku kouna atu ‘ia Sīsū ‘oku fakahā ‘e Paula. 14Na‘e fai pehē ha ni‘ihi ‘i he fāmili ‘o Siva, ko e Siu na‘e Taula‘eiki Lahi, ‘a hono foha ‘e toko fitu.
15Pea tali ‘e he fa‘ahikehe ki honau tokoua, Kuo u ‘ilo mo‘oni ‘a Sīsū, pea ‘oku ou ‘ilo ‘a Paula, ka ko e hā fua kimoua?
16Pea hopo kiate kinaua ‘a e tangata na‘e ulusino ai ‘a e fa‘ahikehe, ‘o ne lava‘i kinaua fakatou‘osi, pea na‘e pehē ‘ene ngaohi kinaua, ko ia ne na feholaki mei he fale ko ia kuo na telefua mo makafokafo. 17Pea na‘e faifai pea ‘iloa ‘a e me‘a ni ki he nofo ‘Efesō kotoa pē, ‘a e Siu mo e Kalisi fakatou‘osi; pea na‘e tō ha ilifia kiate kinautolu kotoa pē, pea na‘e fakahīkihiki‘i ‘a e huafa ‘o e ‘Eiki ko Sīsū. 18Ko e tokolahi foki ‘o e kakai kuo lotu na‘a nau omi, ‘o vete mo fakamatala ‘enau ngaahi ngāue. 19Pea ko e ni‘ihi ‘i he fa‘ahinga na‘e ngāue fie mana na‘a nau ha‘u mo kinautolu ‘enau ngaahi tohi, ‘o tutu ‘i he ‘ao ‘o e kakai: pea nau fatu ‘a e mahu‘inga ‘o e ngaahi tohi, pea tā ko e konga siliva#19.19 konga siliva; Ko e konga silivá na‘e fe‘unga hono mahu‘ingá mo ha ngāue faama ‘a ha tokotaha ‘i ha ‘aho ‘e taha (vakai kia Māt 20.2). ‘e nima mano. 20Na‘e pehē ‘ene tupu fakamālohi ‘a e folofola ‘a e ‘Eiki,#19.20 Na‘e pehē… ‘Eikí; pe Ko ia, ko e me‘a ‘i he ivi ‘o e ‘Eikí, na‘e mafola ai pē ‘a e folofolá. pea ne faka‘a‘au ‘o kaukaua.
Ko e Maveuveu ‘i ‘Efesō
21Pea kuo ‘osi ‘a e ngaahi me‘a ko ia, pea tu‘utu‘uni ‘e Paula ‘i hono laumālie#19.21 tu‘utu‘uni ‘e Paula ‘i hono laumālié; pe ‘i hono tataki ‘e Laumālié na‘e pehē ‘e Paula. ke fai ha ‘a‘ahi ki Masitōnia mo ‘Akeia, pea ke toki ‘alu ki Selusalema; ‘o ne pehē, Hili ‘eku lava ki he potu ko ia, pea kuo pau ke u mātā ‘a Loma foki. 22Pea ne fekau atu ki Masitōnia ha toko ua ‘o ‘ene kau tokoni, ko Tīmote mo ‘Elasito; ka ne toe ta‘ofi si‘i hifo ia ki he ngāue ‘i ‘Ēsia.
23Pea lolotonga ia na‘e hoko ha maveuveu lahi koe‘uhi ko e lotu. 24He na‘e ai ha motu‘a na‘e hingoa ko Temetelio, ko e tufunga tuki siliva, ‘a ia na‘a ne ngaohi ‘a e fanga ki‘i fale siliva ko e fakatātā ‘o e temipale ‘o Taiana, pea ko e me‘a lahi ‘a e koloa na‘e ma‘u ‘e he kau tufunga ‘iate ia. 25Pea ne fakataha kinautolu, pea mo e kakai na‘e ngāue ki he ngaahi alā me‘a pehē, pea ne pehē, Kau Matāpule, ‘oku mou lāu‘ilo ko e faiva ni ‘oku tau tu‘umālie ai. 26Pea ‘oku mou sio mo fanongo, ko e siana ko Paula kuo ne fakaloto‘i mo taki kehe ha fu‘u kakai, ‘o ‘ikai ‘i ‘Efesō pē, ka meimei ko hono kotoa ‘o ‘Ēsia, he‘ene pehē ‘oku ‘ikai ko e ngaahi ‘Otua ē ‘a ia kuo ngaohi ‘e he nima ‘o e tangata.
27Pea ko hono kovi, ‘oku longolongo ta‘etokanga‘i ai ‘etau lakanga ni; pea ‘ikai ko ia pē, ka ‘oku hangē ka faifai pea lau ‘a e temipale ‘o e fu‘u ‘otua fefine ko Taiana ko e me‘a va‘inga, pea ke hifo mei hono tu‘unga lāngilangi ‘a ‘Ene ‘Afio, ‘a ia ‘oku lotu ki ai ‘a ‘Ēsia kātoa, ‘io, mo māmani.
28Pea ‘i he‘enau fanongo ki ai, na‘a nau mātu‘aki lili, ‘o nau kalanga ‘o pehē, Lāngilangi ā ka ko Taiana, ko e ‘Otua ‘otautolu ‘Efesō! 29Pea na‘e maveuveu fu‘u ‘a e kolo: na‘a nau ‘oho taha foki ki he fale faiva, kuo nau puke ‘a Keio mo ‘Alisitako, ko e ongo me‘a Masitōnia, ‘a ia na‘e kaungā fononga mo Paula. 30Ka ‘i he tokanga ‘a Paula ke hū ki he fakataha, na‘e ta‘ofi ia ‘e he kau ako. 31Pea ko e ni‘ihi foki ‘o e hou‘eiki ‘Ēsia, ‘a ia na‘a nau ‘ofa kiate ia, na‘a nau fekau ange ‘o kole ke ‘oua te ne hū ki he fale faiva, ‘o li‘aki ‘ene mo‘ui. 32Pea kalanga‘aki ‘e he ni‘ihi ‘a ē, pea ko e ni‘ihi ko ē: he na‘e hangē ha pepeli ‘a e fakataha; pea ko honau tokolahi na‘e ‘ikai te nau ‘ilo pe ko e hā ‘a e me‘a kuo nau fakataha ai. 33Pea ko e ni‘ihi ‘o e kakai na‘a nau fusi hake ‘a ‘Ālekisānita; na‘e teke hake ia foki ‘e he kakai Siu, pea ta‘alo atu ‘a ‘Ālekisānita ko ‘ene fie fai ha fakamatala ki he fakataha. 34Ka ‘i he‘enau vakai ko e Siu ia, na‘e hangē ha le‘o pē taha ‘enau kalanga kotoa pē, ‘o ‘osi nai ha houa ‘e ua, Lāngilangi ā ka ko Taiana ko e ‘Otua ‘otautolu ‘Efesō!
35Pea kuo lolomi ‘a e kakai ‘e he sēkelitali ‘o e kolo, na‘a ne pehē, ‘A Matāpule ‘Efesō, seuke, ko hai ha taha ‘i māmani ‘oku ‘ikai ke ‘ilo ‘oku ‘i he kolo ‘otautolu ‘Efesō ‘a e tauhi ‘o e temipale ‘o ‘Ene ‘Afio ko Taiana, mo e tamapua ne tō hifo meia Siupita? 36Ko e me‘a ko ia ‘e ‘ikai ala faka‘ikai‘i: ko ia, na‘e mei taau ke mou fakama‘uma‘u mu‘a, ‘o ‘oua ‘e ‘ohonoa ke fai ha me‘a. 37He vakai, kuo mou taki mai ‘a e ongo matāpule ni, ‘a ia kuo ‘ikai te na maumau ‘a e tapu ‘o e temipale, pe tālalakulaku ki hotau ‘otua. 38Pea ko e me‘a kia Temetelio, mo e kau tufunga ‘oku kau mo ia, kapau leva kuo ‘i ai ha me‘a ‘oku nau kovi‘ia ai ki ha taha, ko e ngaahi ‘aho ‘eni ‘o e fai fakamaau, pea ‘oku ‘i ai ha hou‘eiki kōvana: tuku ke nau fakatou hopo. 39Pea ka ko ho‘omou tangi ki ha me‘a ange, ‘e fakatonutonu ia ‘i he fakataha kuo tu‘utu‘uni ‘i he lao. 40Kae‘uma‘ā ‘oku hangē ka ‘ekea kitautolu koe‘uhi ko e angatu‘u kuo fai he ‘aho ni, he tala‘ehai ‘oku ‘i ai ha‘atau fakamatala ke ‘atu ke ‘uhinga ai ‘a e fakataha kehe ni. 41Pea hili ‘ene lea pehē, na‘a ne tukuange ‘a e fakataha.
المحددات الحالية:
‘Apositoló 19: TMB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Tongan Moulton Bible © Bible Society of the South Pacific, 2011.
