San Mateo 15

Sĩi jua sũgba thach kho nʉmuapai chan maach ãrba aajem a jaautarr

(Mr. 7:1-23)

1Ĩchab Moiseeu phã pʉatarr iek wajapcha ʉʉrkhaajem khʉʉn dʉi Ẽwandam iek jawaag chi machnaan i aig beejierram. Makhʉʉn Jerusalenmua beetarr khʉʉn ajim. 2Mag beewi irig, —¿Jãgwi pʉ khapeenau maach jooin i pʉa nʉ? ¿Jãgwi thach khoowaijã jua ʉbata thach khoojẽ? ¿Pãrau khaugba naab jãg ʉu khaba sim? aichejierram.

3Magbaawai Jesuu ĩchab, —¿Khanthee pãraujã agjo Ẽwandamau jaau sim thum ipierraa abanaa sĩi pãach jooin iita ʉ̃rcha ʉʉrkhaju ẽkhaajerráma? ajim amag. 4Magnaa amag, ¿Pãrau khaugba nʉ ajim, Ẽwandam iek phã sim gaai jaauwai, “Pʉch aaijã pʉch ãd dʉi jãsenenaa okho abá” a sim? Maimua “Ar iwiir ãbmua khãijã ich aai wa ich ãd khãijã thõpnaa ãaukha iekha simʉn warreta thõopʉiju aai nʉm” a sim, ¿majã pãrau khaugba nʉ? ajim amag. 5Magnaa ichdeupai, Pari Ẽwandamau ich iek gaai mag jaau simta, jũrr pãar iek mag ãbmua khãijã dich ayag wa dich ãdag khãijã, “Pãrau ig nʉm mua wai chirab mamʉ, pod mua deeju khabam, ya thum Ẽwandam atheem aawai” a iekhaju aai sim anʉm, dich dennaan dau aug khaugba. 6Pari pãrau õrag mag jaau nʉm aig, Ẽwandamau nem jaau sim isegnaa jũrr pãach jooin iita ʉ̃rcha ʉʉrkha naabahab ajim Jesuu, amach khĩircha. 7Magnaa, Chadcha jãg Ẽwandam iek gayam pãachdeu nem jaaujemjo khaba jũrr ag chaaur nem wau sĩerrjeem khapta Ẽwandamau ich i jaaumie jooi Isaías khararrag pãach igwia ich iekhatarr iek mʉg phãpijimgui ajim.

Magnaa chadcha ag gayam jaaubaademua,

8“Pãran, sĩi par iekhaupaita Ẽwandam iek ʉkha nʉm ʉkha nʉm aajemgui” ajim Jesuu amag.

“Pari mag nʉm chan par chadcha thãraucha ʉkhabamta mag sĩerrjeem.

Pãach mag nʉm gaaimua pãar thãar chan i dakhajã khaba, sĩi i warpta thʉnʉmgui” ajim.

9“Jãg nʉm aiguin parii pãach iphithur pãrau irig jeeuju.

Pãrau jaau nʉmjã sĩi wir aig pãach khĩirjugpaiu; jã i iek khabamgui” ajim Jesuu amag, warrgarwe Ẽwandamau jaautarr igwia. (Is. 29:13)

10Magnaa õragta eerpanaa, —Wajapha mʉ iek ũrbat ajim. 11Maadeu nem parhooba kho nʉmuapai chan Ẽwandam dau na maach ãrpiba aajemgui ajim. Ẽwandam na õor ãrpiejemʉn iekhaju khabam nempa khĩirjunaa iekha nʉmuata õor ãrpiejemgui ajim.

12Irua magbapäaiwai maach chi khapeenauta irig, —Fariseonaan iek, mag pua magbarm aig, am khĩirta iekhabapʉim aajem anaajim.

13Magbaawai jũrr ichdeu maachigta iekhamamua, —Oob am iek asekasmiet ajim. Pãrau khaphʉ nʉm, nemjĩir ee phũak khaigbam obeerwai thʉrreupäaijem. Ich jãgta ajugui ajim mʉ Ayau am dʉi. Am ichdeu jʉr au sim khʉʉn khaba aawai nemjĩir ajapham eemua phũak chi khaarpa thʉrreunaa barbapʉimjota ajugui ajim. 14Magua, ideu warag khĩuu sĩubat ajim. Jãkhʉʉnan amachjã dau khĩsu nʉmta agjo dau khĩsum khʉʉn jua gaai pʉrnaa eudʉ arrjem khʉʉnjota nʉmgui ajim. Pãrau oowai merag chukhu sĩebá, dau khaugba khitʉmua agjo dau khĩsu khitʉm jua gaai pʉrnaa arrkhiin, ãb bʉheu subaadee amach numwe burrjugui ajim.

15Magbaawaita maar eem ãb Pedro aajemua irig, —Señor, cha pʉchdeu jaaubapʉim deeu marag wajapha jaaubá; marau pod khaugba abarmgui ajim irig.

16Magbaawai Jesuu marag jaaubaadewia magjim:

—¿Wa pãrau agtha khaugbata nʉwa? ajim. 17¿Pãrau khaphʉ naabá, maadeu nem kho nʉm thum maach bi ee mawia chebapäaiwai deeu chukhu aadeejem? Magua dichdeu thach kho nʉmuapai chan maach ãrba aajemgui ajim. 18Maach ãrpi nʉmʉn thãar eemua khĩirjug khaigbam iekha nʉmuata Ẽwandam na maach ãrpiejemgui ajim, ya khĩirjunaata iekhamaawai. 19Nem thum maach khĩirjug eemuata ober thʉnʉm: khĩirjug khaigbam, õor thõoju, dich õor khabam dʉi khapes aju, dich khaman apha khãijã dich õor dʉímjo aju, nem jĩgkhaju, seukhaju maimua chikham eugar chad khabam iek iekhaju. 20Magʉm nemeuta chadcha Ẽwandam na õor ãrpiejem. Mamʉ chi machnaanau jaau nʉmjo sĩi jua sũgba thach kho nʉmuapai chan Ẽwandam dau na maach ãrba aajem a jaaujim marag, ich Jesuu.

Canaanpie ʉʉirau Jesuu ich chaai monaauju khaphʉ sĩerr

(Mr. 7:24-30)

21Maigmua igbaadeeu jũrr phobor numí Tiro Sidón dʉi nʉmʉg petaawai maarjã i dʉi wetjim. 22Maimua ya mam paaukhabaimamta, ʉʉi ãb Israel durram khaba Canaanpie ʉʉi mag perás sĩejerrta ähäag beewia Jesuug, —Señor, mʉ ap ʉrrʉm mʉ dau aug khaugbá ajim. Mua khaphʉ ʉmgui ajim, pʉʉta chadcha Ẽwandamau pʉiju aajerrau. Maagwai mʉ chaai monawaagjã pʉ jua theeg sim. Mʉ kha dosãt beneu baarjemta pʉrʉg monaaubapʉi a ʉmgui aichejim, irig chaigpamamua.

23Pari par ũanau mag chaigpa khitʉmjã Jesuu bʉ̃ʉrjã i iek ʉkhabajim. Magbaawaita marau irig, —Señor, ¿jãg pua irig mapi jaaubamma? Ya atcha magaajã marau ũrmapha nʉm. Magbamʉn ich jãg maach ẽudee ähäag majuwai anaajim.

24Pari magbaawai jũrr Jesuu chi ʉʉiragta, —Ẽwandamau mʉ pʉitarran, maach meeun israelnaan sĩi oveja okhoo durrumjo durrum khʉʉn peerdʉ aumkhĩirta mʉ pʉijim ajim.

25Pari mag nʉm ee, warag i aigcha beenaa kanieu phõbkhanaata, —Señor, mʉ ap ʉrrʉm mʉ chaai monaaubapʉi ajim.

26Magbaa, judionaan khabam khʉʉn chan monaauju khabam awi juau ogthompai chi Jesuu warag, —¿Pua mʉ iekha chirʉm ũrbata sĩ? ajim. Pʉ deeum durram aawai, mua pʉ chaaita nacha monaaukhiin, mua oowai dich chaainag deeju arr panta khecheunaa saakienag deebarmjo ajugui ajim irig.

27Pari magbaa ũanau dʉi, —Señor, jãan chadaugui ajim. Mamʉ pua oowai, ¿saakienaujã amach pap juasur mes eegar khʉimam khoba aajẽ? ajim. Maagjeewai mʉ Israelpie ʉʉi khaba ʉab mamʉ, ¿pua mʉ chaaijã dau aug khaugbaju khai? Mua khaphʉ ʉm, pua i monaaupʉiju aai simgui ajim irig.

28Magbaawaita, —¡Joo! Jãgan chadchata mua pʉch chaai monaauju khaphʉnaata pua ʉkha ʉmgui ajim. Magan chadcha pʉchdeu jaau simjo pʉ chaai monaauju ajim irig Jesuu.

Mag, chadcha Jesuu mag iekhabarm bʉrre chi chaai monakkha aadejim aajem.

Jesuu õor pom monaautarr

29Mag Sidonmua deeu maar beewia ũwaai mag thʉrrdo pom sim Galilea aajem igaau naaichejim, ich Jesús dʉi. Maimua buchag gaai waaidʉwia oo sĩsijim. 30Mag amach dakhĩir jupbaimaawai õor pom i aar wetwi i bigaau phʉʉrbaadejim. Mag õor pom thʉnʉm ee i aig aibeemajim: bʉ wedʉ wedʉ khitheem khʉʉn, dau khĩsum khʉʉn, bʉdam wa juadam khãijã ãkhãraam khʉʉn, meu meraam khʉʉn maimua tag aaunaan khamor machag khĩirpierr i aig aibeenaa i bʉkhʉrr ausĩumaajeejim. Maagwai magʉm thum ichdeu monaaupʉi maajeejim. 31Amach daúacha mag meu meraa khithee arrjã ijẽb nʉrrjee, juadam wa bʉdam khãijã ãkhãraa khithee arrjã monakha, maimua dau khĩsu khithee arr khʉʉnpa dau wajapha nʉrrjeem oowia, sĩi õor dauderraa naajim. Mag amachdeu oo nʉm gaaimua maach meeun khabam khʉʉnaupata maach meeun israelnaan Ẽwandamag jeeuphoo thʉnaajim.

Emkhooin appai cuatro mil Jesuu jãhogtarr

(Mr. 8:1-10)

32Maimua mag maach ich dʉi ogdʉba wenʉrraajerr khʉʉnagta, —Õor pom mʉg thʉnʉm mʉ dau ee dau aphʉʉ durrumgui ajim. Ya khãai thãrjup pam am maach aigmua bʉ̃ʉrjã ogdʉba, thachdam khojujã chukhu nʉm. Ich jãg thach khoba chan mua amach diig pʉimapha chirʉmgui ajim. Ich jãg pʉikhiin, di aar barba khãijã khʉd ee jãdaúa phʉreubajupa ajim, ich Jesuu.

33Magbaawaita marau irig, —Mamʉ mʉg õorjã chuk sim ee, ¿jam maadeu khoju bawaagauma? anaajim, õor pom mʉg thʉnʉm khopieg.

34Magbaawai ich Jesuu marag, —¿Pãrau pan dau kharr wai nʉma? a jeeujim.

Magbaa marau, —Sietepai, maimua ãwarrdamjã ar dau khapan khaba durrumgui anaajim.

35Magbaawai ichdeu õrag khʉt jupkhapi jaauwia, 36mag pandam siete narrjã chi ãwarrdam dʉi ãba jua ee phe auwia, Ẽwandamag ʉu ajim anaa thorreubaadejim. Magnaa maachig ʉapʉimaawai marau jũrr õrag jigmajim. 37Mag jig phʉʉrdʉdʉgmamua thumaam khʉʉnau amachdeu khom aig khotarrjã, pan pom sob thʉnʉisijim. Mag chi sobtarr, thʉbʉt siete marau ipiirkha aujim. 38Mag ed mag chi thach kho narr khʉʉn cuatro mil naajim, emkhooin appai, ʉʉinjã beerba ni chaainjã beerba. 39Maimuan chadau õrag wetpi jaaubaawai agdaujo amach majupierr aaidʉjierram. Mag thumaa ereubaadeewain chadau, ichjã jap ee waaidʉbaadee, marau i Magadanag arrjim.

المحددات الحالية:

San Mateo 15: noaA

تمييز النص

نسخ