San Mateo 16

Thethemnaanau amach dakhĩir amachdeu nem ooba aajem ompaa aupi narr

(Mr. 8:11-13; Lc. 12:54-56)

1Mag Magadán durr paaukhabaimaawai fariseonaanau Saduceonaan dʉimua Jesús oon beejierram. Pari mag beetarran sĩi i imeraa pʉr aum khõchgaupai arr aawai irig amachdeu bʉ̃ʉrjã ooba aajem nemta amach dakhĩir edjã ee waupi jaau naajim, mag gaaimua chadcha Ẽwandamau pʉiwiata mag nʉrrʉm a amachig khap jaaumkhĩir.

2Pari Jesuu am ipierraajã khaba, warag sĩi amag, —¿Khan jãgwi pãrau kheeurag edau dubmamua edjã phur waau thʉnʉm oowia, “Nan edau wärjäphä aju” aajẽ; 3maimua jũrr edaupherrejã agjo edau ober urum bʉʉu edjã phur thʉnʉm oowi, “Nan edau khõrkhaju” a jaaujẽ? ajim. Pãrau jãg edjã oobarm gaaimuapai ed wärjäug aju wa ed khõrkhajujã nem khaug nʉmta, ¿jãga jãg pãrau pãach daúa mua nem wau chitʉm oo nʉmjã pod khaug auba nʉ mʉ chadcha Ẽwandamau pʉiju jaaujerr? ajim amag. 4Pãran pãachdeu Ẽwandam iseg nʉm gaaimua warag chi ajaugjã chukhu thʉnaawaita warag pãachdeu nem ooba aajem nempata pãach dakhĩir waupi nʉm. Mamʉ mua waubamgui ajim. Mag khãai warrgar jooi Jonás aajerr nemmeeurrkhan buch ee khãai thãrjup sĩethurtarr gaaimua Nínivepienau Ẽwandamau i pʉitarr khaug autarrjota, ĩchab mʉchjã Ẽwandamau pʉitarr pãrag khaphʉ apijugui ajim, mʉch iiu phiidʉbarm gaaimua. Mamʉ magʉmjã pãrau ʉkhabajugui ajim.

Mag iekhapet awi ichta warag chaaug igbaadejim.

Jesuu ich khapeenag fariseonaanjo apiba jaautarr

(Mr. 8:14-21)

5Mag igbaadewi ya thoom igar paaukhabaimaawaita maar khĩir ee dʉnʉisijim, panjã aibeeba sĩi ich jãgta wenʉrrʉm. 6Magbarm dʉichata ich Jesuujã marag, —Khĩir khaphʉ wenʉrrathʉ̃ ajim. Fariseonaan benta saduceonaan ben dʉi jãg levadurajo sim pãach gaai dʉrbapimiet ajim marag.

7Mag ũrwia, chadcha levadurata jaau simpii awi, maach appaijã, —Keena, maach chan chadchata pan aibeebajimwai anaajim.

8Mamʉ maar mag iyʉʉ nʉmjã ich Jesuu khaphʉ sĩerr aawai, —¿Khantheeta pãar mag pan aibeebajim anʉ́ma? Pãrau chan jãgan mua nem wau chitʉmjã oobamjota aajeeb ajim, mʉg mʉ dʉi ãba wenʉrrʉmjã ʉkhaba aag. 9¿Pãrau khĩir ee paba nʉ, mua pandam cincopai narrau ʉʉinjã beerba, chaainjã beerba, emkhooin appai cinco mil jãhogtarr? Maimua ¿thʉbʉt kharr ipiirkha aujĩ chi sobau? 10¿Khĩir ee paba nʉ agjo, pan sietepai narrau õor pom cuatro mil narr jãhogtarr? Maimua jãg edjã, ¿thʉbʉt kharr ipiirkha aujierrá chi sobau? Pan chaarta ig nʉm akhiinjã, ¿pãrau khĩirjuawai ĩsjã mua pod pãach jãhog aubajupii nʉ? 11¿Jãga jãg pãrau bʉ̃ʉrjã khaug auba nʉ ajim, mua pãachig, “Fariseonaan ben saduceonaan ben dʉi levadurajo simta pãach gaai dʉrbapimiet” aawai? Mua mag chirʉm aig chan pan chaar igwiata pãrag mag iekhaba chirʉm; wajapcharan muan maiguin, oob amjo chikham khĩir aawaipaita chadam iekjo iekhamiet a chirʉmʉu ajim marag.

12Magbaawaita marau khaugphobaadejim, Jesuu levadura chaar jaauba, sĩi fariseonaanau saduceonaan dʉimua nem jaaujemta jaau sim.

Pedroou jaauwai Jesuun warrgarwe ich Ẽwandamau pʉiju aajerrau a jaautarr

(Mr. 8:27-30; Lc. 9:18-21)

13Mag wetwia deeum durr Cesarea de Filipo anʉm paaukhabaimaawai ich Jesuu marag, —Õrau mʉch chi Emkhooi Iewaa igwia iyʉʉ nʉm ũurwai, am iek ¿mʉ khai aajẽ? ¿Pãrau ũrba aajẽ? a jeeujim.

14Magbaawai marau irig, —Am iek pʉ Juan chi õor por choomie aajem; deeum khʉʉnau jaauwai pʉʉta Elías aajem, warrgar Ẽwandam i jaaujerr; wa magba Jeremías khabam khai, dewam khãijã aajem, agjo Ẽwandam i jaaujerr.

15Marau ichig magbaawai jũrr maachigta, —¿Ma pãachdeujãma? Pãrau khĩirjuawai, ¿mʉ khai agá? ajim.

16Magbaawai Simón Pedroou, —Pʉ Cristo khabahab ajim irig, ich Ẽwandam Iewaa warrgarwe ichdeu jʉr auwia õor peerdʉ aumkhĩir pʉiju a jaaujerr.

17Magbaawai Jesuu irig, —Simón Pedro, Jonás iewaa, õrau bʉ̃ʉrjã pʉrʉg jaautarr khabamta chadcha pua ag eyaa jaaubapʉimke ajim. Jãg pua khaphʉ jaaubapʉimʉn, jãan ich mʉ Aai ʉ̃gthar chiraajemuata pʉrʉg mag khĩirjupiwi ajim. Maguata pua ag eyaa jaaubapʉibahab ajim. 18Pedro, maagwai pʉʉn chadcha pʉch thʉ̃riu jaau simjo mokdauu ajim irig. Pua mʉ iek jaaubaadem gaaimuata mua mʉch iek ʉkha nʉm khʉʉn khapaana apiju. Mag khapaana aadem chan pãach chi ʉ̃rʉm khʉʉnan khechwiajã, pãar akhaar chan okhooba ich mag Ẽwandam dʉita nʉisiju ajim. 19Pedro, pʉrʉgta mua mʉch iek jaaumkhĩir jaau chirʉmgui ajim. Pua mʉ iek jaaubaadem ũrwi ʉkha nʉm khʉʉn mʉ denkha nʉisiju. Mamʉ ĩchab pua jaau khitʉm ũr nʉmjã asekasba warag iseg nʉm khʉʉnan amach mag nʉm gaaimua warag ich mag okhoo wenʉrrajugui ajim. Mag nʉm aiguin pua chi mʉ aar oberju aai nʉm khʉʉnag puertdi weeu deenaa pod dubbaju aai nʉm khʉʉn athee sĩi warag phãar sĩsiukhamjota aju.

20Mamʉ Jesuu mag ich chadcha ich Ẽwandamau jʉr auwia pʉitarrkha simjã bʉ̃ʉrjã õrag jaaupiba jaaujim marag.

Õrau ich thõoju jaautarr

(Mr. 8:31–9:1; Lc. 9:22-27)

21Maimua jaaumamua ich Jerusalenag majujã jaaujim. Mag Jerusalén pabaimaawai jooin chi porkha nʉm khʉʉnau phadnaan chi porkha nʉm khʉʉnaupa Moisés iek jawaag chi machnaan dʉimua ich dau aphʉʉ wai naawi ich thõojujã jaaujim. Mamʉ mag amau i thõowiajã deeu ũwaai khãai thãrjup nʉm ee deeu ich iiu phiidʉjujã jaaujim.

22Mag jaaumam ũrwia, Pedroou ich appai chaaur thʉ̃rnaa, —Señor, ¿khanii Ẽwandamau pʉ dʉi magpibarju? Pʉ dʉi chan õrau magju khaba nʉmgui ajim irig.

23Pari Pedroou ichig magbaawai, jũrr chi Jesuu irig, —Jopkhaa mʉ aigmua chaaug petá ajim. Meperauta pʉrʉg mag iekhapi sĩebahab. Puan mag sim aig sĩi warag khaibag ee mʉ burrpijuuta ẽkha simgui ajim. Pua chan Ẽwandamau nem waum ig simjã khaugba, sĩi parhoobam khʉʉnjota khĩirju simgui ajim irig.

24Maimua ichdeupai jũrr maach thumaam khʉʉnagta, —Chadcha pãrau mʉ iek pãach thãraucha ʉkha nʉm khai, magan mua nem waupi jaau chirʉm appaita waubat, “Mʉchdeuta khap chirʉm mʉchdeu nem wauju” a iekhaba. Mʉ gaaimua chikhamnau pãach dau aphʉʉ thõoju khĩirjuwia khãijã magʉmjã igba waragta ʉkhanaat ajim. 25Ar mʉig eegarjã mʉ gaaimua phithurg aumapha nʉm khʉʉn chan bʉ̃ʉrjã ʉ̃gthar oberbam. Magarrau ar chi mua nem jaau chirʉm waum khõchgauta amach nemjã khĩirjuba, sĩi warag mʉ gaaimuata dau aphʉʉ anʉm khʉʉnan chadau ʉ̃gtharcha oberju jaaujim. 26Pãrau oowai, ¿khan wajaug sĩ ajim, ãbmua mʉg durr thum ichdeupai jʉ̃a wai sĩsim, mamʉ mag sim meebaadee khĩmie durr petam? ¿Irua ich durr thum ich dʉi arrju aai sĩ? Pod arrbam. ¿Pãrau khĩirjuawai ãbmua khãijã ʉ̃gthar oberaag phatkhon pom phagju aai sĩ? Mag phagwiajã pod dubbamgui ajim. 27Mʉgnaa mʉ Ayau mʉg durr i agkham edjã mʉchta ichdeu jua theeg deetarr dʉi i chognaan angelnaanpa beewi, mʉig eegar amach nem waaujerrpierr aju am dʉi: chi nem wajapha waaujerr khʉʉn dʉijã ich agjo maimua nem khaigba waaujerr khʉʉn dʉijã ich agjo. 28Cha mʉ iekha chirʉm iekhau ãaur khʉʉn cha mʉ iek ũr nʉm khʉʉn chan mʉch chi Emkhooi Iewaa thumaam khʉʉn Porkha beeju edamjo aadem oobam aigjã meebajugui a jaaumajim.

المحددات الحالية:

San Mateo 16: noaA

تمييز النص

نسخ