THRÜNTAN 37
37
Josep tüsho Api Keoniorübo
1Jakob ju abuh lacholakhi lomi, Kanan lomi ching lakheah. 2Ha Jakob yamkhün yukhean.
Josep kam 17 azorü lachoki abuh hanniuberü Bilha tüsho Zilpa tsührübo akhiung pürü lung namfimihnubo neakde alakheah. Apinü akhiung pürünü arhimokhi amütsü yusheak arü abuh kilim lude arü. 3Kheakü Israelnü api tsührü alala kheaknü Josep muzho, tümütüsho api ju ashinshu tsührü lakheah. Apinü anihbuh khilim züt-thsükhi shulünkhim she thsüjih. 4Tüshe küyimki arü abuhnü akeoniorübo alala kheaknü api alü muzhokhi akhiung pürünü angükhea, arünü api mükheahnede kam, tüsho api ki amuzho yu müthakhukde alakheah.
5Kheakü Josepnü milim khülang mi, tüsho apinü ju akhiung pürü ki thaa huh; tüsho arünü api alü mükheahnede kam. 6Jumonü apinü arü ki tha, “Muzhobah inü amikhi milim ha aniang: 7Isabo thulu ching hiphung thsünde alakheah, tüsho kheahang, I hiphung wusu tüsho langakindo zhip; tüsho kheahang, nüsa hiphungbonü ju mükamdo tüsho I hiphung ki khukning.” 8Akhiung pürünü api ki tha, “Nünü isa kurungkheak kiulongthsüpü? Yungsho nünü isa kurungkheak yakzan shuhpü?” Jumonü api milimbo tüsho api yubo dünkheaknü arünü alü api mükheahnede kam.
9Judüki api milim püpü mi tüsho akhiung pürü ki tha, “Inü milim püpü mido. Kheahang, ani, khinu, tüsho chining 11nü I ki khukningdo.” 10Jumonü apinü ha abuh tüsho akhiung pürü ki thaa huh; abuhnü thürüh tüsho api ki tha, “Nünü amikhi milim ha tümü a? Nü be le I tüsho nü khiung pürünü arübah nü miki alo kheak khukningba de?” 11Akhiung pürübonü api lungkhang, tüshe ju dünkheak abuhnü lüm ching zo.
Josep Yinkhi tüsho Ijip lim Bede Ayükhi
12Judüki akhiung pürübo arü abuh namfimihnubo kümpü Shekem ching yü. 13Tüsho Israelnü Josep ki tha, “Nü khiung pürübo Shekem ching namfimihnubo kümchoh yung de? Arang, inü nü arü kilim yüshihanü.” Jumonü api ki alo, “I ha kheak lah.” 14Apinü anihbuh ki tha, “Nü khiung pürü le namfimihnubo tsüde lanahnü muzhobah yünü kheahang, tüsho I kilim thiyusheak lubah arüloang.” Jumonü apinü Hebron jindükhün chingnü thiyia wukhiukshih, tüsho apinü Shekem lim yü. 15Kheakü mihtsürü khürünü api ngü, tüsho api thulu ching rümde alakheah. Mihtsürünü api ki keokhi, “Nü tümü yimcho?” 16Jumonü apinü alo, “I akhiung pürü yimchoh. Arü küching namfimihnubo kümchonü muzhobah I ki thaang.” 17Tüsho mihtsürünü tha, “Arübo ha kheaknü tsodo, tümüde arünü athakhi inü sodo, ‘Isanü Dothan lim yüanü.’” Jumonü Josepnü akhiung pürü dunglim yü tüsho arübo Dothan ching yimkhit.
18Küyimki api limshu ching arüde arünü angükhea, arü ki api thüninde marüyide arünü api laksahpü rük asah. 19Judüki arü khülangnü khülang ki thaachih, “Kheahang, ha milim mibuh thsü arüchoh! 20Jumonü arang, isanü api laksahanü tüsho alokhün khürü ching bahanü; tüsho isanü athabah, ‘Mütüm shiwüh khürünü api tsühdo.’ Api milimbo tümü kambanü isanü akheahbah!” 21Tüshe Reubennü ju so, tüsho apinü arü khah chingnü anihbuh bekhit tüsho tha, “Isanü api mülaksahnü.” 22Tüsho Reubennü arü ki tha, “Thiyih dübuk, tüshe sunglo ching lakhi shingkung ching api jipyukang, tüsho api kheak khah düchung”–ha apinü arü kheaknü bekhitbah abuh kilim belode arüpü lümkhi thsükheah. 23Küyimki Josep akhiung pürü kilim arükhea, arünü Josepnü aphuyukhi züt-thsükhi shulünkhim khukkhia lujih. 24Jushu arünü api bea lu tüsho shingkung ching jipyuk. Tüsho shingkung ju ke müzahde akeangkeang lakheah.
25Arü yimtsühpü binde alachoki, arünü abinkih-a kheah tüsho Ishmaelrü hantsahrü bo khülang Gilead limnü arüde ngü. Arü yo kemelbo ju thüneathürabebo, molike tüsho jinjinlaknü hah thsüa lakheah, tüsho arü jurü hanbah Ijip lim yükide alakheah. 26Jumonü Judanü api keoniorübo ki tha, “Isanü isa niurü laksahbah api thiyih ramkhi chingnü tümü alü la? 27Arang, isanü api Ishmaelrü ki yinanü, tüsho isa khah api kheak muchungnü, tümüde api isa niurü tüsho isa shih ah.” Tüsho api keoniorübonü mulong. 28Küyimki Midiarü shothsümolorü arüde alakheanü, akhiung pürünü Josep ju shingkung chingnü thokhit tüsho shotoyinchi nak 20 mo Ishmaelrü ki yin. Tüsho arünü api Ijip lim bede yüki.
29Judüki Reubennü shingkung lim alode yü, tüshe Josep ju shingkung ching mülade alakheah; tüsho apinü akhimmihbo thorüp. 30Apinü akeoniorübo kilim yülo tüsho tha, “Azübuh müla; tüsho I külim yüba?” 31Judüki arünü mihnu khülang laksah tüsho Josep yo shulünkhim thiyih ching thsam. 32Arünü züt-thsükhi shulünkhim ju arü abuh kilim lulode yü tüsho tha, “Isanü ha ngükheah, ha nü tsührü shulünkhim a shi yungnü kheahang.” 33Apinü ju kheahkhit tüsho tha, “Ha I tsührü shulünkhim ah. Mütüm shiwüh khürünü api tsühdo. Josep a atsütsünü adütre kamde thonakdo.” 34Judüki Jakobnü api khimmihbo thorüpbah achim kheak shungliukhim yihkih, tüsho api tsührü thsungkheak nimung ahihdo tüzho. 35Tüsho api tsührübo le tsührübebo alalanü api shukheampü wusurü; tüshe apinü ashukheampü arochih tüsho tha, “Tümüde I tsührü shepung I tüzhode ayükibah.” Hanangde abuhnü api thsungkheak mitrip. 36Kheakü api ju Midiarünü Ijip ching Pharao torü tüsho api aheangrü wühkenobuh Potiphar ki yin.
المحددات الحالية:
THRÜNTAN 37: YIMCBSI
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
