THRÜNTAN 38
38
Juda tüsho Tamar
1Ju kim ching Judanü api keoniorübo kheaknü chamachih, tüsho Adullamrü Hira ki lapü yüki. 2Judanü Kananrü tsührübe Shua shoru, tüsho apinü alibe lu tüsho anihbe lung müyam. 3Jumonü alibe mübünkeangde kambah tsührü khülang zübe, tüsho api mung Er de ji. 4Alibe kheaküshe mübünkeangde kambah tsührü khülang zübe, tüsho anihbenü api mung Onan de ji, 5Kheaküshe alibe mübünkeangde kambah tsührü khülang zübe, tüsho api mung Shela de ji. Alibenü anihbuh zübechoki api Kezib ching lakheah. 6Judüki Judanü atsührü adüjibuh Er niube lujih, tüsho alibe mung Tamar lakheah. 7Tüshe Juda tsührü adüjibuh Er ju Atungpuh miki mihbukmuyuk lakheah, tüsho Atungpuhnü api sheshih. 8Judanü Onan ki tha, “Nü khiung niube ki yüang tüsho anihbe müyamang, tüsho nü khiung münü asürüshang.” 9Tüshe Onannü münü ju api yo müthsü de mükheah; tüsho apinü akhiung niube lung müyamchoki, apinü akhiung kilim api münü müjihpü thsüde müjih ju alo kheak bah. 10Tüsho apinü arhimokhi ju Atungpuh miki mihbukmuyuk lakheah; jumonü apinü anihbuh she sheshih. 11Judüki Judanü atsühmeakbe Tamar ki tha, “I tsührü Shela muzoyi khiungde nü buh yam ching khimode lacholang.” Tümüde apinü lüm, “Jude yungsho akhiung pürü nangde api she ashebah.” Jumonü Tamarnü yübah abuh yam ching la.
12Ju kim dükeak ching Shua tsührübe, Juda niube sheabah; Juda mulong shukheam tüsho api lung amüyambuh Adullamrü Hira ane Timna ching api namfimihnu namrhiprü kilim wutu. 13Tüsho Tamar ki ha tha, “Kheahang, nü kü thsü api namfimihnu nam rhippü Timna lim wutuchoh.” 14Jumonü alibenü anihbe khimoberü khimmihbo yihkhitbah adukiubenü anihbe hingdo, tüsho Timna limro kheak bin; tümüde Shela zokhi anihbenü ngü tüshe alibe ju aniube thsüpü müjihde alakheah. 15Küyimki Judanü alibe ngükhea, anihbe müzammüramrü ah de apinü lüm, tümütüsho anihbenü amiro muhiudo. 16Judüki apinü limro chingnü rholode alibe kilim yü, tüsho tha, “Arang, inü nü kheak müyamanü”; tümüde alibe ju atsühmeakbe ah de apinü mümükheah. Jumonü alibenü tha, “Nünü I kheak müyambah tümü jihba?” 17Tüsho apinü alo, “Inü mihnu boto lungnü mihnu nunu 1 mühahbah.” Tüsho alibenü tha, “Nünü ju mümühahyi khiungde thiyuchihchim khülang thsüba shi?” 18Apinü tha, “Nü kilim inü tümü thiyuchihchim jihba?” Alibenü alo, “Shungliu bede nü yo mütsanyüm, tüsho nü khah ching lakhi tso.” Jumonü apinü jurü alibe kilim jihbah anihbe kheak müyam, tüsho api hode alibe mübünkeangde kam. 19Jumonü alibenü wusubah tsoabah, tüsho adukiube yihkhia zobah khimoberü khimmih yih.
20Judüki Judanü alibe khah chingnü thiyuchihchim kukruk lushihpü api müyambuh Adullamrü kheaknü mihnu nunu mühah-a yüshih, tüshe apinü alibe müyimkhit. 21Apinü ju ching larü mihtsürübo ki keokhi, “Limro yean lakhi müzammürambe thsü küching la?” Tüsho arünü alo, “Ha dangpung ching müzammüramrü müla.” 22Tüsho apinü Juda kilim alode yübah tha, “Inü alibe müyimkhit. Tüsho ju ching lakhi mihtsürübonü she ha dangpung ching müzammüramrü müla de thado.” 23Judüki Judanü tha, “Kukrukbo anihbe lushang, jude yungsho isa achih ngübah; tümüde inü ha mihnu nunu mühah tüshe nünü alibe müyimkhit.”
24Khinu mahsam bande hobah, Juda ki tha, “Nü tsühmeakbe Tamar müzammüram ahoria lah; müzammüramkhinü anihbe khungarü lah.” Jumonü Judanü tha, “Alibe bekhitang tüsho anihbe takabahang!” 25Küyimki alibe bede akhiukkheanü, anihbenü akü kilim thiyia yüshih, “Harü shepü yoanü ju mihtsürü hode I khungarü lah.” Tüsho alibenü tha, “Harü shepü yoanü lümakheahang– shungliu bede mütsanyüm, tüsho tso.” 26Jumonü Judanü jurü mütsan tüsho tha, “I kheaknü alibe alü thiyuro-lungki lado, tümütüsho inü anihbe I tsührü Shela kilim müjih.” Tüsho apinü alibe kheak mümüyamlodebah.
27Alibe zübepü kim khiungchoki, anihbe nuyam ching tsührü 2 lakheah. 28Alibenü zübede alachoki, khülangnü khah chungkhit; jumonü zübe-mütrürünü aneakrüm hing lubah akhah tsüngtsüngpü kheak rümkihjih tüsho tha, “Ha akhuh akhiukdo.” 29Tüshe küyimki apinü akhah tholoa lukheanü, aniurü akhiuk tüsho alibenü tha, “Hanangde nünü nü limro yahshung!” Tüsho api mung Perez de ji. 30Ju dunglim abin kheak aneakrüm hing kihkhi, akhiung thsü akhiuk tüsho api mung Zera de ji.
المحددات الحالية:
THRÜNTAN 38: YIMCBSI
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
