Woo bɛ ŋa 24

Zuifu* ŋa à má Pɔlu ide

1Iyi í ce ajɔ miiu ŋɔi Ananiasi woo wee nlai Ilaaɔ̃u í bɔ Sezaree nŋu do inɛ ngbo gɔ ŋa do woo mà wooda gɔ iyi à ya kpe Tɛɛtulu. Ŋɔi à bɔ bi Felisi ilu ilɛu à koo à waa fɔ taalei Pɔlu. 2Ŋɔi à kpe Pɔlu wa nɔ Tɛɛtulu í lɔsi ide ku fɔ wa yɛò taaleɛ wa ni, awɔ Felisi ilu bɛɛrɛ nla, à nɛ laakai ku sũ ntɔ ntɔ do baakaɛ. Ilu ku yɛ jiidaɛ í jɔ̀ ì kpaasi mii nkpɔ na aranfãanii ilɛ nwa. 3À jɛsi mii iyi ì waa ce fei bii fei si waati kãma fei do saabu jiida. 4A kù bi ka kpa waatiɛ amma à waa tɔɔɛ i cɔ wa do iju jiida nɔ i gbɔ ide keeke iyi à nɛu ihɛ̃. 5À yɛ iyi mɔkɔu ihɛ̃ ilu naanaui, nɔ í nɛ kòsi si aninii Zuifu ŋa si andunyau ihɛ̃ fei. Nŋui í jɛ inɛ ngboi kpãai Aɔ̃ ku tɔɔ gɔ iyi à ya kpe ti inɛi Nazarɛti ŋa. 6Í dɛ kpãa mɔm ku riisiò kpasɛ̃i Ilaaɔ̃u. Nŋui í jɔ̀ à muu. [À bi ka kiitiɛ do wooda nwa. 7Amma Lisiasi inɛ ngboi igũu í naa í gbaa hai si awɔ nwa do gbugbã. 8Nɔ í ni woo yɛ taaleɛ ŋau a naa bi tɛɛ.] Awɔ takaɛ beeɛ ide, aa yɔkɔ i gbɔ ntɔi ideu si bii í jɔ̀ à waa yɛ taaleɛu.

9Iyi Tɛɛtulu í fɔ bɛɛbɛ í tã nɔ Zuifu ŋa iyi à wa bɛu fei à ni ideu ntɔi.

Pɔlu í kɔò araɛ si wajui Felisi

10Ŋɔi Felisi ilu ilɛu í tosi Pɔlu awɔ í ni ku fɔ ideɛ. Ŋɔi Pɔlu í ni, ǹ mà iyi awɔi ì jɛ woo ce kiitii ilɛu ihɛ̃ hai ku kpɛ. Na nŋu, an kɔò aram do laakai ku sũ. 11Bii ì bee aa sɔ̃ɛ iyi kù re ajɔ maateeji wa iyi ǹ bɔ Zeruzalɛmu Ilaaɔ̃ ku gulɛa. 12Inɛ kãma kù yɛm bii ǹ wa n ce kakɔɔ do inɛ gɔ titã hee má jɛ n kòsi ŋa ija si kpasɛ̃i Ilaaɔ̃ walakɔ ile bii à ya ce kutɔtɔɔ ŋa walakɔ si inɔ iluu. 13Ide iyi à waa mám nɔu bɛ nsɛi, nkãma kù wɛɛ iyi wa nyisi iyi ntɔi. 14Amma ide akãi an jɛsi si wajuɛ, ǹ wa n tɔɔ Ilaaɔ̃ Lafɛ̃ɛi bala nwa ŋa do kpãa iyi inɛ ihɛ̃ ŋa à waa ni iboi. Do nŋu fei, ǹ wa n jirima woodai Moizi ŋau do tiai walii ŋau fei. 15Ǹ dasi naanɛ iyi Ilaaɔ̃ á jĩ amanɛ jiida ŋa do amanɛ laalɔ ŋa hai si balɛ, bɛi aŋa mɔ à dasi naanɛ. 16Nŋui í jɔ̀ amu mɔ ǹ wa n hanya ajɔ fei ku ba idɔm ku maà yɛ taalem si wajui Ilaaɔ̃ do si wajui inɛ ŋa.

17Adɔ̃ nkpɔ nkpɔi í lɔ n kù bɔ Zeruzalɛmu. Si ajɔ gbeejiu ihɛ̃i ǹ koo bɛ ǹ bɔ ku sobi inɛi ilɛm ŋa do fia nɔ n cea Ilaaɔ̃ amua. 18Si nŋui à bam kpasɛ̃i Ilaaɔ̃ bɛ ǹ wa n ce bukii ara ku maaju. Zamaa kãma kù wa bɛ, ija ku kòsi mɔ kù wa bɛ. 19Amma Zuifui ilɛi Azii gɔ ŋa à wa bɛ. Á sĩa aŋa taka nŋa a naa a jɛ sɛɛda si wajuɛ bii í jɛ à yɛ sim taale gɔ. 20Walakɔ jɔ̀ inɛ ŋau ihɛ̃ a fɔ taale iyi à yɛ sim si waati iyi à leekĩm si wajui igbɛi woo kiiti ŋau. 21A kù yɛ taalem si nkãma bii kù jɛ si ide akãu ihɛ̃ iyi ǹ fɔ hee lele ǹ ni, nnyi ì waa kiitim ŋai si na iyi í jɔ̀ ǹ dasi naanɛ iyi iku ŋa aa na a jĩ hai si balɛ.

22Wee Felisi í mà yaasei kpãai woo dasi Jesu naanɛ ŋa sãa sãa, ŋɔi í sɔ̃ Zuifu ŋau í ni, waati iyi Lisiasi inɛ ngboi igũu á to wa, ajɔ nŋui an wũa ide nŋɛu. 23Nɔ í sɔ̃ inɛ ngboi sooge ŋau í ni ku mu Pɔlu titã, amma ku jɔ̀ ku nɛ araɛ keeke nɔ kú ya jɔ̀ kpaasiɛ ŋa a ya naa a cɔɔ nɔ a máa gbɔaa.

Pɔlu í wa wajui Felisi do Dusila

24Iyi waati í lɔ keeke ŋɔi Felisi í naa do Dusila aboɛ. Abou Zuifui. Ŋɔi í ni a koo a kpe Pɔlu wa. Iyi í to wa nɔ à waa desiɛ itĩ si bɛi wa fɔ idei naanɛ ku dasi si Jesu Kirisi. 25Amma si bɛi Pɔlu wa sisi nŋa idei dee dee ku jɛ do idei ara ku mu do kiiti iyi wa naa, zigii Felisi í da nɔ í ni, aa yɔkɔ i nɛ titã. Bii ǹ ba faya an kpeɛ má. 26Wee wa bi Pɔlu ku mua nŋu fiai. Ŋɔi í ce í ya maa kpoo kpaa kpaa aŋaò a maa fɔ ide.

27Iyi í ce bɛi adɔ̃ minji ŋɔi Pɔsiu Fesitu í na í sãsi agbɛi Felisi. Wee Felisi í jɔ̀ Pɔlu ile piisɔ̃ɔ bɛi si na iyi í jɔ̀ wa bi nŋu ku nɛ bɛɛrɛ bi Zuifu ŋau.

المحددات الحالية:

Woo bɛ ŋa 24: MKL

تمييز النص

نسخ