Woo bɛ ŋa 23

1Pɔlu í kãsi inɛ ŋa iyi à tɔtɔɔu iju nɔ í ni, iŋɛ kpaasim ŋa, idɔm kaa yɛ taalem domi ǹ ce kuwɛɛm nii dee dee si wajui Ilaaɔ̃ hee do nnyi fei. 2Ŋɔi Ananiasi woo wee nlau, í sɔ̃ inɛ ŋa iyi à waa leekĩ bi Pɔluu í ni a cãa si gɛlɛɛ. 3Nɔ Pɔlu í buu í ni, Ilaaɔ̃i á cãɛ, awɔ idĩ fũfũ#23:3 awɔ idĩ fũfũ Bi Zuifu ŋa arabui. Bi tu ŋa inɔ ilei à ya si inɛ ŋa nɔ à ya teese anyii ileui jiida. Amma inɔ ileu takaɛ konkombii í ya maa nu. Bii à nia inɛ idĩ fũfũ í yɛ bɛi ilu muafitii à waa kpoo.. Ì buba ì waa kiitim si woodai Moizi, nɔ ì kua wooda má ì ni a cãm. 4Ŋɔi inɛ ŋa iyi à waa leekĩ kɔkɔɛu à ni, woo wee nlai Ilaaɔ̃i ì yɔkɔ ì waa bu bɛɛbɛ? 5Ŋɔi Pɔlu í ni, kpaasim ŋa, n kù mà mà woo wee nlai. Ǹ mà iyi kukɔi idei Ilaaɔ̃ í ni, i maà ya fɔ taalei ilu iri nŋɛ ŋa.#23:5 Cɔ Kufita 22:28.

6Pɔlu í mà si igbɛu inɛ gɔ ŋa Sadusi ŋai, inɛ gɔ ŋa mɔ Farisi ŋai. Ŋɔi í fɔ ide hee lele si igbɛu í ni, iŋɛ kpaasim ŋa, amu Farisii, inɛ iyi Farisi ŋa à bí. Ì waa kiitim ŋai si na iyi í jɔ̀ ǹ dasi naanɛ iyi iku ŋa aa na a jĩ hai si balɛ. 7Iyi í fɔ bɛɛbɛ gbakã, ŋɔi Farisi ŋau do Sadusi ŋau à waa ce kakɔɔ nɔ igbɛu í kpɛ̃ minji. 8Sadusi ŋa à ya ni iku ŋa a kaa jĩ hai si balɛ, amaleka do hunde mmu gɔ ŋa mɔ a kù wɛɛ, amma Farisi ŋa à jɛsi iyi mii ŋau bɛ fei à wɛɛ. 9Nɔ wakata í dede si anini nŋa à waa jã do gbugbã, nɔ Farisi woo kɔ inɛ ŋa si wooda gɔ ŋa à ni, a kù yɛ taalei mɔkɔu. Yooi í mà mà amaleka gɔi walakɔ hunde mmu gɔi í sɔ̃ɔ ide.

10Ŋɔi kakɔɔu í la ntɔ ntɔ hee njo í mu inɛ ngboi igũu jiida a maà na a ga arai Pɔlu. Nɔ í ni sooge ŋau a koo a gbã Pɔlu wa a nyiòɛ inɔ ileu.

11Idũ ajɔ nŋu Lafɛ̃ɛ í naa í sɔ̃ Pɔlu í ni, maà mɔngɔ munya. Si bɛi ì jɛɛm sɛɛda Zeruzalɛmu ihɛ̃, bɛɛbɛ mɔi aa jɛɛm sɛɛda Romu má.

À waa dɛ Pɔlu ku kpa

12Iju kumáɛ daadaakɔ ŋɔi Zuifu ŋau à ce anu akã nɔ à ce kugbasi à ni aŋa a kaa jɛ hee má jɛ a mɔ bii kù jɛ à kpa Pɔlu sisi. 13Aŋa iyi à ce anu akãu à re baa aŋa ciiji. 14Ŋɔi à koo à ba inɛ ngboi Zuifu ŋa do inɛ ngboi woo weei Ilaaɔ̃ ŋau à sɔ̃ ŋa à ni, à ce kugbasi iyi a kaa ka tiɛ ngɔgɔ bii kù jɛ à ba à kpa Pɔlu sisi. 15Na nŋu, à bi iŋɛ do igbɛi woo kiiti ŋau i koo i sɔ̃ inɛ ngboi igũu ku naaò Pɔlu wa bi tu ŋɛ, nɔ ku jɔ bɛi ì waa bi i teese i cɔ yaasei ideɛu má ŋa. Awa aa ka ce sɔɔlu ka kpaa hee ku maa to wa bɛ.

16Amma ama inɛmɔkɔi wecĩi Pɔlu í gbɔ à waa fɔ idei zambau. Ŋɔi í koo í lɔ idei sooge ŋau nɔ í sɔ̃ Pɔlu ideu. 17Ŋɔi Pɔlu í kpe inɛ akãi inɛ ngboi sooge ŋau í sɔ̃ɔ í ni, bɔò ama awaasũu ihɛ̃ bi inɛ ngboi igũu domi í nɛ ide gɔ iyi á sɔ̃ɔ. 18Ŋɔi inɛ ngboi sooge ŋau í bɔò awaasũu bi inɛ ngboi igũu, nɔ í sɔ̃ɔ í ni, Pɔlu inɛi piisɔ̃ɔu í kpem nɔ í tɔɔm n naaò awaasũu ihɛ̃ wa bi titɛɛ, domi wa bi ku sɔ̃ɛ ide gɔ. 19Ŋɔi inɛ ngboi igũu í mu awɔi awaasũu í bɔòɛ kɔkɔlɛ í beeɛ í ni, ide mii ì waa bi i sɔ̃m. 20Ŋɔi í ni, Zuifu ŋa à ce anu akã a tɔɔɛ ala i bɔò Pɔlu bi igbɛi woo kiiti ŋau, nɔ ku jɔ bɛi à waa bi a teese a cɔ yaasei ideɛ má. 21Amma maà ti i gbɔ ide nŋau, domi à re baa aŋa ciiji inɛ ŋa iyi à waa siaa kpãa ku ba a muu. Nɔ aŋa fei à ce kugbasi à ni aŋa a kaa jɛ a kaa mɔ bii kù jɛ à kpaa. Baa nsɛi à tã sɔɔlu a coo. Awɔ akãi à waa degbe i jɔ̀ ku naa wa. 22Ŋɔi inɛ ngboi igũu í ni, maà sɔ̃ inɛ gɔ i ni ì sisiim ideu ihɛ̃ má. Nɔ í jɔ̀ awaasũu í nɛ.

À bɔò Pɔlu bi Felisi ilu ilɛ

23Ŋɔi inɛ ngboi igũu í kpe inɛ ngboi sooge minji gɔ ŋa í sɔ̃ ŋa í ni, i tɔtɔɔ sooge cĩɔ minji a bɔ Sezaree do masa kitaò fɛɛwa do ilu kaka ŋa aŋa cĩɔ minji i ce sɔɔlu i dasi kpãa isɔ mɛɛsãi alɛ ŋa. 24Nɔ i dĩa acĩ ŋa gaayi nɔ i so Pɔlu i kooòɛ bi Felisi ilu ilɛu baani ŋa. 25Iyi í fɔ bɛɛbɛ í tã ŋɔi í kɔ tia má í ni, 26amu Kolodu Lisiasi, ǹ wa n ceɛ fɔɔ, awɔ Felisi ilu ilɛ ilu bɛɛrɛ nla nlau. 27Mɔkɔu ihɛ̃ wee ǹ jɔ̀ à naaòɛ wa bi tɛɛ. Zuifu ŋa à muui à waa bi a kpaa. Iyi ǹ mà iyi inɛi Romui ŋɔi ǹ koo do soogem ŋa nɔ ǹ gbaa. 28Ǹ bi n mà na mii í ce à waa yɛ taaleɛ. Na nŋu, ǹ bɔòɛ si wajui igbɛi woo kiiti nŋa. 29Hai bɛi ǹ yɔɔ iyi à waa yɛ taaleɛi na wooda nŋa amma kù ce ngɔgɔ iyi í to a dasiɛ piisɔ̃ɔ mɔm hee má jɛ a kpaa. 30Si anyiɛ ǹ gbɔ iyi Zuifu ŋau à ce anu akã ku ba aŋa a kpaa, ŋɔi gbakã ǹ jɔ̀ à naaòɛ wa bi tɛɛ. Nɔ ǹ sɔ̃ inɛ ŋa iyi à waa yɛ taaleɛ a naa a fɔ ide nŋa si wajuɛ.

31Iyi í kɔ tiau í tã nɔ í soo í na sooge ŋau. Ŋɔi sooge ŋau à ce bɛi í sɔ̃ ŋau fei, à so Pɔlu idũu à bɔòɛ hee Antipatisi. 32Iju kumáɛ ŋɔi sooge ŋau à nyi bi ileu nɔ masa ŋau à waa bɔò Pɔlu bi Felisi ilu ilɛu. 33Iyi à to Sezaree gbakã ŋɔi à naa tiau nɔ à nyisiɛ Pɔlu. 34Iyi í cio tiau í tã ŋɔi í bee Pɔlu í ni, hai iwoi ì waa naa. Ŋɔi Pɔlu í ni hai ilɛi Silisii. 35Nɔ Felisi í ni, awɔi aa sisiim ideɛ bii woo yɛ taaleɛ ŋau à to wa. Nɔ í ni a dasi Pɔlu kpasɛ̃i ilaalu Herodu.

المحددات الحالية:

Woo bɛ ŋa 23: MKL

تمييز النص

نسخ