Woo bɛ ŋa 18

Pɔlu í bɔ Kɔrɛnti

1Si anyii nŋu, Pɔlu í nɛ hai Atɛni bɛ í bɔ Kɔrɛnti. 2Ŋɔi í ko Zuifu gɔ bɛ iyi à ya kpe Akilasi, iyi à buu ilɛi Pɔntu. Kù kpɛ titã iyi í naa hai ilɛi Itali, nŋu do aboɛ Piisila, domi Kolodu ilaalu nlai Romu í na wooda í ni Zuifu fei ku fita hai Romu. Ŋɔi Pɔlu í bɔ ku cɔ ŋa. 3Nɔ í buba aŋaò ŋa à ce icɛ ajɔ domi í ya ce ilei acɔ bɛi aŋa mɔ à ya ce. 4Ajɔi kusĩmi fei í ya bɔ waazo ku ce ile bii Zuifu ŋa à ya ce kutɔtɔɔ. Nɔ í ya maa mu nŋa ide aŋa do Gɛrɛki ŋau ku ba a dasi Jesu naanɛ.

5Waati iyi Silasi do Timɔtee à to wa hai ilɛi Masedɔni, Pɔlu í ya maa ce icɛi waazoi waati kãma fei ku maa sɔ̃ Zuifu ŋau iyi ntɔ ntɔ Jesui í jɛ inɛ iyi Ilaaɔ̃ í cicau. 6Amma à jãa nɔ à waa buu, ŋɔi í gbugbã si ŋa ilùlùi ibɔɛ nɔ í sɔ̃ ŋa í ni, bii ì na ì ce nfe ŋa, í jɛ idei iri nŋɛ. Kù jɛ baam má. Hai nnyi an jɔ̀ ŋɛ n koo n cea hai jɛ Zuifu ŋa waazo. 7Ŋɔi í nɛ hai bɛ í bɔ kpasɛ̃i Titee Zusitu, inɛ iyi í ya maa jirima Ilaaɔ̃u. Ileɛ wee kɔkɔi ile bii Zuifu ŋa à ya ce kutɔtɔɔui í wa. 8Ŋɔi Kirisipu inɛ ngboi igbɛu í dasi Lafɛ̃ɛ Jesu naanɛ, nŋu do inɛi kpasɛ̃ɛ ŋa fei. Inɛi Kɔrɛnti nkpɔ í gbɔ waazoi Pɔlu nɔ aŋa mɔ à dasi naanɛ, nɔ à dasi ŋa inyi.

9Ŋɔi Lafɛ̃ɛ í sɔ̃ Pɔlu si kuyɛ idũ í ni, maà ce njo. Hanya i sɔ̃ ŋa, maà coko, 10domi ǹ wɛɛ do awɔ. Inɛ gɔ kaa yɔkɔ ku lesiɛ awɔ hee ku ceɛ laalɔ. Sɔ̃ ŋa ideu domi inɛ nkpɔi í wa ilu ihɛ̃ iyi á jɛ titom. 11Pɔlu í buba ilu bɛ adɔ̃ akã do bubu nɔ wa kɔ ŋa si idei Ilaaɔ̃.

12Waati iyi Galiɔ̃ɔ wa jɛ ilu ilɛ si ilɛi Gɛrɛsi, ŋɔi Zuifu ŋau à ce anu akã à tɔtɔɔ à gbã Pɔlu à bɔòɛ bi ku ce kiiti. 13À ni, mɔkɔu ihɛ̃ njɛi wa lɛlɛ inɛ ŋa ku ba a tɔɔ Ilaaɔ̃ si bɛi wooda nwa kù bi.

14Iyi Pɔlu wa bi ku fɔ ide, ŋɔi Galiɔ̃ɔ í sɔ̃ ŋa í ni, bii í jɛ idei kurara walakɔ laalɔ gɔi í ce an nyi wa n naa n gbɔ ide nŋɛ. 15Amma bii í jɛ idei kakɔɔ ŋai do idei irii inɛ ŋa do woodai iŋɛ taka nŋɛi, iŋɛi aa wũa ndu ŋɛ. N kaa n jɛ woo kiitii ide dimi bɛɛbɛ. 16Ŋɔi í lele ŋa hai bi ku ce kiitiu. 17Nɔ inɛ ŋau fei à mu Sɔsitɛni inɛ ngboi igbɛi Zuifu ŋau à lɔsi ku cãa tengii andɛi ile bi ku ce kiitiu. Amma baai Galiɔ̃ɔ kù wa si ideu.

Pɔlu í nyi ikpa Antiɔsi

18Pɔlu í kpɛ Kɔrɛnti má. Si anyiɛ nɔ í tɔɔ kpaasi woo dasi naanɛ ŋau sukudɔ̃ nɔ í koo í wa iriɛ Sankeree ku ba ku nyisi iyi í tako í cea Ilaaɔ̃ kuwã do kugbasi wo. Nɔ í lɔ akɔi inyi do Piisila do Akilasi ajɔ à nɛ ikpa ilɛi Siri. 19-21Iyi à to Efɛɛzu ŋɔi Pɔlu í lɔ ile bii à ya ce kutɔtɔɔ nɔ í ba Zuifu ŋau faaji ku ce. Ŋɔi à tɔɔɛ ku ce ajɔ minji bi tu ŋa, amma kù waa jɛ. Iyi wa nɛ ŋɔi í sɔ̃ ŋa í ni, bii Ilaaɔ̃ í bi an nyi wa má. Nɔ í jɔ̀ Piisila do Akilasi bɛ í koo í lɔ akɔi inyi í nɛ hai Efɛɛzu.

22Iyi í to Sezaree, ŋɔi í kita í bɔ Zeruzalɛmu í koo í ce inɛi igbɛi Jesu ŋa fɔɔ. Si anyiɛ nɔ í bɔ Antiɔsi. 23Iyi í ce ajɔ minji bɛ ŋɔi í nyi í dasi kpãa má í koo wa dabii si ilɛi Galati do Firizi wa mua inɛ ŋa iyi à waa too kpãai Jesu fei gbugbã.

Apolo í bɔ Efɛɛzu do Kɔrɛnti

24Zuifu gɔ iyi à ya kpe Apolo iyi à bí Alesandii í bɔ Efɛɛzu. Í nɛ bisi nɔ í mà tiai idei Ilaaɔ̃ sãa sãa. 25Wee í mà kpãai idei Lafɛ̃ɛ nɔ í ya ce waazoɛ do himma nɔ í sisi idei Jesu dee dee. Amma inyi ku dasii Zãa nŋu akãi í mà. 26Wa ce nŋa waazo do naanɛ ile bii Zuifu ŋa à ya ce kutɔtɔɔu. Ŋɔi Piisila do Akilasi à gbɔ waazoɛ nɔ à kpoo ide nŋa à koo à teese à sisiaa yaasei idei Ilaaɔ̃ dee dee. 27Si anyiɛ, Apolo í dasi idɔ nŋu ku bɔ ilɛi Gɛrɛsi. Nɔ kpaasi woo dasi naanɛ ŋau à muaa gbugbã ku ba ku koo nɔ à cea inɛ ŋa iyi à waa too kpãai Jesu iyi à wa ilɛi Gɛrɛsiu tia ku ba bii í to bɛ a coo cenkã. Waati iyi í to bɛ í sobi inɛ ŋa iyi à dasi Jesu naanɛ na didɔ̃i Ilaaɔ̃ jiida jiida. 28Nɔ í kãmia Zuifu ŋau do wɔɔkɔ si bantuma ku ba a mà iyi aŋa à wa si kurarai nɔ í nyisi ŋa hai si tiai idei Ilaaɔ̃ iyi Jesui í jɛ inɛ iyi Ilaaɔ̃ í cicau dim dim.

المحددات الحالية:

Woo bɛ ŋa 18: MKL

تمييز النص

نسخ