Woo bɛ ŋa 17

Pɔlu do Silasi à bɔ Tɛsalonika

1Ŋɔi Pɔlu do Silasi à waa nɛ nɔ à lɔ ilu minji gɔ ŋa iyi à ya kpe Anfipolisi do Apoloni nɔ à to Tɛsalonika bii Zuifu ŋa à nɛ ile bii à ya ce kutɔtɔɔ. 2Ŋɔi Pɔlu í bɔ ileu bɛ si bɛi í nɛ dɔ̃ɔnɛɛ. Nɔ aŋaò ŋa à wũa tiai idei Ilaaɔ̃ ajɔi kusĩmi mɛɛta à mɔɔ. 3Wa sɔ̃ ŋa iyi kù nɛ bɛi á ce iyi inɛ iyi Ilaaɔ̃ í cicau kù yɛ ijuukpã. Á kú nɔ ku jĩ hai si balɛ má. Ŋɔi í sɔ̃ ŋa í ni, Jesuu iyi ǹ wa n sisi nŋɛ ideɛu ihɛ̃ nŋui í jɛ inɛ iyi Ilaaɔ̃ í cicau bɛ. 4Inɛ ŋa iyi à de itĩ siɛu inɛ gɔ ŋa à dasi ideu naanɛ, nɔ à baa anu akã ku ce, nŋu do Silasi. Bɛɛbɛi hai jɛ Zuifu nkpɔ mɔ do inaabo ilu iri ŋau à ce, aŋa iyi à mà bɛɛrɛi Ilaaɔ̃.

5Amma Zuifu ŋau à dedeò igu ku ja nɔ à tɔtɔɔ inɛ nfe ŋa bɛɛtɛkɛ à jɔ̀ hoya hoya í dede nɔ aŋa fei à sɛi à bɔ Pɔlu do Silasi ku dɛdɛ kpasɛ̃i Zasɔ̃ɔ ku ba a fitaò ŋa wa si wajui zamaau. 6Iyi à dɛdɛ ŋa a kù yɛ ŋa, nɔ à mu Zasɔ̃ɔ do kpaasi woo dasi Jesu naanɛ gɔ ŋa à fa ŋa à bɔò ŋa bi inɛ ngboi ilu ŋa. Nɔ à wasi ku la à waa ni, inɛ ŋa iyi à waa sinda andunya feiu à to wa ihɛ̃, 7nɔ wee Zasɔ̃ɔ í jɔ̀ à sɔ kpasɛ̃ɛ. Aŋa fei à waa bɛjɛ woodai ilaalu nlai Romu à waa ni ilaalu gɔ í wɛɛ má iyi à ya kpe Jesu. 8Ŋɔi ideu í dede idɔi zamaau do inɛ ngboi ilu ŋau. 9Ŋɔi à ni Zasɔ̃ɔ do kpaasiɛ ŋau a sã fia si bɛi wooda í jilɛ a bɛi a jɔ̀ ŋa a nɛ. Iyi à sã fiau nɔ à jɔ̀ ŋa.

Pɔlu do Silasi à bɔ Beree

10Iyi idũ í dũ gbakã ŋɔi kpaasi woo dasi naanɛ ŋau à jɔ̀ Pɔlu do Silasi à nɛ Beree. Iyi à to bɛ ŋɔi à bɔ ile bii Zuifu ŋau à ya ce kutɔtɔɔu. 11Inɛ ŋa iyi à wa bɛ ŋau à lasabu si ideu do laakai í re Zuifu ŋa iyi à wa Tɛsalonika. À gba idei Ilaaɔ̃ do inɔ didɔ̃. Ajɔ fei à ya maa cio kukɔui ku ba a mà bii í jɛ mii iyi Pɔlu í ya maa sɔ̃ ŋau ntɔi. 12Nɔ Zuifu nkpɔ í dasi Jesu naanɛ do inaabo Gɛrɛki gɔ ŋa iyi à jɛ ilu iriu do inɛmɔkɔ Gɛrɛki nkpɔ gɔ ŋa má. 13Amma Zuifu ŋa iyi à wa Tɛsalonika à gbɔ iyi Pɔlu wa waazo idei Ilaaɔ̃ Beree ŋɔi à koo à dede idɔi inɛ ŋa à fɔ́ inɔ nŋa. 14Bɛ gbakã ŋɔi kpaasi woo dasi naanɛ ŋau à bɔò Pɔlu ikpa tenku ku ba ku nɛ hai bɛ, amma Silasi do Timɔtee à gbe Beree bɛ. 15Inɛ ŋa iyi à koo à leekĩa Pɔluu à bɔòɛi hee Atɛni. Ŋɔi Pɔlu í samba ŋa anu í ni a sɔ̃ Silasi do Timɔtee a da hãmɛi nŋu wa ńya ńya. Nɔ inɛ ŋau à sinda à nɛ Beree má.

Pɔlu í wa Atɛni

16Waati iyi Pɔlu wa degbe Silasi do Timɔtee Atɛni, laakaiɛ ci ya sũ domi iwɛ̃ í kpɔ si iluu. 17Na nŋu, í ya ba Zuifu ŋa do hai jɛ Zuifu ŋa iyi à ya maa jirima Ilaaɔ̃ faaji ku ce ile bii Zuifu ŋa à ya ce kutɔtɔɔu. Nɔ ajɔ fei, inɛ ŋa iyi í ko si bantumai iluu aŋaò ŋa mɔ à ya maa ce kakɔɔ má. 18Si bɛi í ya maa ba ŋa kakɔɔ ku ce ŋɔi woo mà gɔ ŋa iyi à ya kpe Epikuri#17:18 Epikuri Aŋai à ya ni, inɔ didɔ̃i í re mii fei si kuwɛɛi amanɛ. do Sitosi#17:18 Sitosi ŋa Aŋai à ya ni, inɛ ku jɛsi mii iyi á naa siɛ fei. ŋa à bɔ bi tɛɛ à waa baa kakɔɔ ku ce. Inɛ gɔ ŋa à ni, woo ce ide nkpɔ yoomai ihɛ̃. Nɔ inɛ gɔ ŋa mɔ, iyi à gbɔ wa fɔ idei ikui Jesu do kujĩɛ má à ni, mà iwɛ̃ mmu gɔ ŋai wa fãa ya. 19Ŋɔi à bɔòɛ iri kuta gɔ iyi à ya kpe Arepagu, tengi bii inɛ ngboi ilu ŋau à ya ce kutɔtɔɔ nŋa nɔ à ni, à bi ka gbɔ ide titɔ̃ iyi ì waa dabiiò, 20domi ì waa sisi nwa ide titɔ̃ nɔ à bi ka mà yaaseɛ. 21Wee inɛi Atɛni ŋa fei do inɛ njoo ŋa iyi à na à buba ilu bɛ à ya so waati nŋa fei a maa fɔ walakɔ a gbɔò baaui mii titɔ̃i.

22Ŋɔi Pɔlu í dede í leekĩ Arepagu bɛ í sɔ̃ ŋa í ni, iŋɛ inɛi Atɛni ŋa, ǹ yɛ iyi idei iwɛ̃ ŋai wa mu ŋɛ ntɔ ntɔ. 23Waati iyi ǹ wa n dabii si inɔ ilu nŋɛ ǹ yɛ mii nkpɔ iyi ì waa tɔɔ ŋa. Ǹ yɛ bi kuwee gɔ à kɔ si à ni, tengi ihɛ̃i à ya tɔɔ inɛ iyi a kù mà. Nsɛi inɛ iyi iŋɛ ì waa tɔɔ iyi i kù mà ŋau bɛ, ideɛi ǹ wa n sisi nŋɛ. 24Ilaaɔ̃, nŋu iyi í taka andunyau do mii iyi í wa si fei, nŋu iyi í jɛ Lafɛ̃ɛi lele do ilɛ, kaa buba si ile iyi amanɛ ŋa à ma do awɔ nŋa. 25Awɔi amanɛ kaa yɔkɔ ku muaa nkãma, domi kù nɛ bukaatai ngɔgɔ. Nŋu takaɛi wa mua amanɛ ŋa kumi do kuwɛɛ do mii fei. 26Hai si inɛ akã iyi í tako í takaui dimi iyi wa tɛ si andunyau ihɛ̃ fei í fita. Hai takoi í jilɛ waati nŋa do tengi bii aa maa wa. 27Ilaaɔ̃ í ce bɛɛbɛi ku ba a ce kookaai a maa dɛdɛɛ do kubabii nɔ si kudɛdɛu á yɔkɔ ku jɛ aa yɔɔ. Amma ntɔ ntɔ Ilaaɔ̃ kù jĩò kãma nwa gɔ, 28domi na iriɛi à nɛ kuwɛɛ, nɔ nŋui í jɔ̀ ara nwa wa nɛ. Woo kɔ tia nŋɛ gɔ ŋa à ni, awa mɔ amaɛ ŋai. 29Debɛi, si na iyi í jɔ̀ à jɛ amai Ilaaɔ̃ ŋa, kù sĩa ka maa ce lasabu ka ni Ilaaɔ̃ í yɛ bɛi iwɛ̃ iyi amanɛ í lasabu í coo í sĩa do wura walakɔ do isɔ fũfũ walakɔ do kuta. 30Ilaaɔ̃ í temuaò amanɛ ŋa wo si kumà hai mà nŋa, amma nsɛi wa sɔ̃ inɛ ŋa tengi bii à wa fei a kpaasi idɔ nŋa. 31Nɔ í jilɛ ajɔ si bii inɛ iyi í cicau á kiitiò inɛi andunya ŋa fei nɔ kiitiɛu dee deei á jɛ. Nɔ í jũu tã hai si balɛ ku ba ku nyisi inɛ fei iyi inɛ bɛ á na ku cei.

32Iyi à gbɔ Pɔlu wa fɔ idei kujĩi iku ŋa hai si balɛ ŋɔi inɛ gɔ ŋa à waa yaakoɛ. Inɛ gɔ ŋa mɔ à ni, à bi faajii ideu bɛ má ajɔ gɔ. 33Ŋɔi Pɔlu í nɛ í jɔ̀ ŋa. 34Do nŋu fei, inɛ gɔ ŋa à bɔ bi tɛɛ à dasi Jesu naanɛ. Si inɔ nŋai Deni woo ce kiitii Arepagu gɔ í wa. Abo gɔ mɔ iyi à ya kpe Damarisi í dasi naanɛ do inɛ gɔ ŋa má.

المحددات الحالية:

Woo bɛ ŋa 17: MKL

تمييز النص

نسخ