LUKE 22
22
Era sa via vakamatei Jisu ko ira na bete levu, a sa kaya ko Jutasa me soli koya vei ira, 1—6. Nai lesilesi ni vakayakavi ni Turaga, 7—23. Sa vakavulici ira na tisaipeli ko Jisu me ra yalomalumalumu, a sa tukuna ni na cakitaki koya ko Pita, 24—38. Sa rarawa na loma i Jisu, a sa masu, a ra sa mai tauri koya na kai Jutia, ka vakacacani koya, a sa cakitaki koya ko Pita, a sa tukuni koya ko Jisu ni sa Luve ni Kalou, 39—71.
1A sa voleka na gauna ni kana madrai sa sega ni vakaleveni, a yacana na kana vata ni lako-sivia. 2A ra sa veinanuyaka ko ira na bete levu kei ira na vunivola se ra na vakamatei koya vakaevei; ni ra sa rerevaki ira na tamata.
3Sa qai curu ko Setani ki na loma i Jutasa na yacana talega ko Isikarioti, a sa dua vei ira na lewe tinikarua. 4A sa lako yani, ka veivosaki kei ira na bete levu kei ira na turaga ni valu, se na soli koya vakaevei vei ira. 5A ra sa reki, a ra sa yalataka vua nai lavo. 6A sa vakadonuya ko koya, ka sa qai waraka e dua na gauna e rawarawa me soli koya kina vei ira ni ra sa tiko tani na lewe vuqa.
7Sa qai yaco na siga ni kana madrai sa sega ni vakaleveni, e dodonu me vakamatei kina na lami ni kana vata ni lako-sivia. 8A sa talai rau ko Pita kei Joni ko koya, ka kaya, Mo drau lako ka vakarautaka na kakana ni lako-sivia, me da kania. 9A rau sa kaya vua, Evei na tikina ko ni sa vinakata me keirau vakarau kina? 10A sa kaya vei rau ko koya, Raica, ni drau sa curu ki na koro, drau na sota kaya e dua na tamata sa colata e dua na saqa wai; muri koya ki na vale ena curu kina. 11Ia drau kaya vua nai taukei ni vale, Sa kaya nai Vakavuvuli vei iko, Evei na tiki-ni-vale, me keitou ia kina na kana vata ni lako-sivia kei ira na noqu tisaipeli? 12Ena qai vakatakila vei kemudrau e dua nai taba levu e loma ni vale ecake sa vakaiyaya tu: drau vakarau kina. 13A rau sa lako, ka kunea me vaka sa kaya vei rau ko koya: a rau sa vakarau me ra ia na kana vata ni lako-sivia.
14Ia ni sa yaco dina na kena tiki-ni-yakavi, sa tiko sobu ko koya, kei ira vata kaya nai apositolo e le tinikarua. 15A sa kaya vei ira ko koya, Au a gadreva vakalevu me’u ia mada eliu kei kemudou na kana vata ni lako-sivia oqo, me’u qai mate emuri: 16ni’u sa kaya vei kemudou, Au na sega ni kania tale, ka malua me vakayacori mada e na matanitu ni Kalou. 17A sa taura na bilo, ka vakavinavinaka, ka kaya, Taura oqo, ka vota vei kemudou: 18ni’u sa kaya vei kemudou, Au na sega tale ni gunuva na vua ni vaini, ka malua me yaco mada na matanitu ni Kalou.
19A sa taura na madrai, ka vakavinavinaka, ka dovia, ka solia vei ira, ka kaya, oqo na yagoqu sa soli e na vukumudou; dou cakava oqo mo dou vakananumi au kina. 20Sa vaka talega kina na bilo, ni sa oti nai vakayakavi, ka vaka, A bilo oqo na veiyalayalati vou e na noqu dra sa liviraki e na vukumudou. 21Ia ka raica, sa tu vata kei au e na tepeli na liga i koya sa soli au yani. 22Ia sa lako na Luve ni tamata, me vaka sa lesi; ia ka ca vua na tamata ko ya sa soli koya yani! 23A ra sa qai veitarogi vakai ira, se ko cei beka vei ira ena kitaka na ka oqo.
24Ia era a veileti talega eliu, se ko cei vei ira ena cavu me uasivi cake. 25A sa kaya vei ira ko koya, Era sa lewai ira na veimatanitu ko ira na nodra tui; ia ko ira sa veitalia vei ira, era sa vakatokai me daucaka vinaka. 26Ia dou kakua ni vakakina koi kemudou; ia ko koya vei kemudou sa levu cake, me sa vaka ga sa gone; ia ko koya sa turaga, me sa vakataki koya sa dauveiqaravi. 27O cei vei rau sa uasivi cake, ko koya sa tiko me kana, se ko koya sa dauveiqaravi? ko koya sa tiko me kana, ne? ia koi au, ka’u sa tiko vata kei kemudou me vaka e dua sa dauveiqaravi. 28Oi kemudou ga, dou sa dautiko vata kei au e na noqu vosota na dauveivakatovolei. 29Ia ka’u sa solia vei kemudou e dua na matanitu me vaka sa solia mai vei au ko Tamaqu; 30mo dou kana ka gunu e na noqu tepeli e na noqu matanitu, ka tiko talega e nai tikotiko vakaturaga, me lewai ira na mataqali nei Isireli e tinikarua.
31I Saimoni, I Saimoni, raica, sa kerei kemudou ko Setani, me tauvuloni kemudou me vaka na witi. 32Ia ka’u sa masulaki iko, me kakua ni malumalumu na nomu vakabauta: ia ni ko sa saumaki tale, mo vakataudeitaki ira na wekamu. 33A sa kaya vua ko koya, Kemuni na Turaga, au sa vakarau me’u lako vata kei kemuni ki na vale ni veivesu, ki na mate talega. 34A sa kaya ko koya, Au sa kaya vei iko, Pita, ni sa bera ni tagi edaidai na toa, ko na cakitaka mada vakatolu na nomu kilai au.
35A sa kaya ko koya vei ira, Ni’u a talai kemudou wale ka sega na nomudou taga ni lavo, se na taga ni vaqa, se nai vava, dou a dravudravua li e na dua na ka? A ra sa kaya, E segai. 36Sa qai kaya ko koya vei ira, Ia edaidai, ko koya sa tu vua na taga i lavo, me kauta, me vaka talega kina na taga kakana: ia ko koya sa sega vua nai seleiwau, me volitaka na nonai sulu, ka volia kina e dua. 37Ni’u sa kaya vei kemudou, E dodonu me vakayacori vei au na ka sa volai vakaoqo, Sa wili vata ko koya kei ira na tamata ca; ni na vakayacori sara me oti na veika e na vukuqu. 38A ra sa kaya, Na Turaga, raica, e rua nai seleiwau oqo. A sa kaya vei ira ko koya, Sa rauta.
39A sa lako ki tautuba, ka lako, me vaka na nonai valavala, ki na ulu-ni-vanua ni veiolive, a sa muri koya ko ira na nona tisaipeli. 40Ia ni sa yaco ki na yasana ko ya sa kaya vei ira, Dou masu me kakua ni rawai kemudou na vere.
41A sa sudra tani vei ira e vaka na kena yawa e viritaki e dua na vatu, a sa tekiduru ka masu, 42ka kaya, Tamaqu, kevaka ko ni sa vinakata, ni kauta tani vei au na bilo oqo: ia me kakua ni yaco na noqu lewa, me yaco ga na nomuni lewa. 43A sa rairai mai vei koya e dua na agilose mai lomalagi, a sa mai vakaukauwataki koya. 44Ia ni sa yaluma sara, sa masu vagumatua cake kina: ia na nona buno sa vaka na titiri ni dra ni sa lutu ki na qele. 45Ia ni sa tu cake tale mai na masu, ka yaco vei ira na nona tisaipeli, sa kunei ira ni ra sa moce ni sa rarawa na lomadra; 46ka sa kaya vei ira, Dou sa moce e na vuku ni cava? tu cake ka masu, de rawai kemudou na vere.
47Ia ni sa vosa tiko ko koya, sa toka tu na lewe vuqa, ka sa liutaki ira ko koya sa vakatokai ko Jutasa, e dua vei ira na lewe tinikarua, ka sa toro voleka vei Jisu me reguca. 48A sa kaya vua ko Jisu, I Jutasa, ko sa solia na Luve ni tamata ni ko sa reguca, oi?
49Ia ko ira era sa tu voleka, ni ra sa raica na ka sa voleka ni yaco, era sa kaya vei koya, Na Turaga, e vinaka me keitou yaviti ira e nai seleiwau, se segai? 50Ka sa dua vei ira sa yavita na nona tamata na bete levu, ka taya laivi na daligana i matau. 51Sa qai vosa ko Jisu, ka kaya, Kua mada ni vaka ko ya. A sa tara na daligana, ka vakabula.
52Sa qai kaya ko Jisu vei ira na bete levu, kei ira na turaga ni valu mai na vale ni soro, kei ira na qase, era sa lako mai vei koya, Dou sa lakova beka e dua na daubutako, ni dou sa vakaiseleiwau ka vakaiwau? 53Ni’u sa dautiko vata kemudou e na vale ni soro e na veisiga, dou sa sega ni dodoka vei au na ligamudou: ia sa nomudou gauna oqo, kei na kaukauwa ni butobuto. 54A ra sa qai taura, ka tubera, ka kauta ki na nona vale na bete levu. A sa muri vakayawa ko Pita.
55Ia ni ra sa vakawaqa na buka e na rara e na mata ni vale, ka ra sa tiko sobu vata kina, sa qai tiko sobu vata kei ira ko Pita. 56Ia sa dua na vada sa raici koya ni sa tiko voleka ki na buka, ka vakaraici koya matua, ka kaya, Ko koya talega oqo ka tiko kaya. 57A sa cakitaki koya ko koya, ka kaya, Yalewa, au sa sega ni kilai koya. 58A sa dede vakalailai ga sa dua tani tale sa raica, ka kaya, Ko iko talega e dua vei ira. A sa kaya ko Pita, Ko iko, e segai koi au. 59Sa oti tale e dua na aua, sa mai vakadinadina matua sara e dua, ka kaya, Sa dina ga sa tiko kaya ko koya oqo, ni sa kai Kalili. 60A sa kaya ko Pita, Ko iko, au sa sega ni kila na ka ko sa kaya. Ia ni sa vosa tiko ko koya, sa tagi sara na toa. 61A sa vuki na Turaga, ka vakaraici Pita. A sa nanuma ko Pita na vosa ni Turaga, ni sa kaya vua, Ni sa bera ni tagi na toa, ko na cakitaki au mada vakatolu. 62A sa lako ki tautuba ko Pita, ka tagi vakalevu sara.
63Ia ko ira na tamata era sa tauri Jisu, era sa vakalialiai koya, ka vacuka. 64Ia ni ra sa tabonaka na matana, era sa sabica na matana, ka taroga, ka kaya, Tukuna mai, se ko cei sa sabici iko. 65Ia ka vuqa tale na ka era sa kaya ni ra sa vosavakacacataka.
66Ia ni sa siga na vanua, era sa soqoni vata ko ira na nodra qase na tamata kei ira na bete levu kei ira na vunivola, a ra sa kauti koya ki na nodra vale ni veilewai, ka taroga, 67O iko na Karisito, se segai? tukuna mai vei keitou. A sa kaya ko koya vei ira, Kevaka ka’u tukuna vei kemudou, dou na sega ni vakadinata: 68ia kevaka ka’u taro, dou na sega ni kaya mai. 69E na gauna maimuri ena tiko na Luve ni tamata e na liga i matau ni Kalou kaukauwa. 70Era sa qai taroga kecega, O iko na Luve ni Kalou, se segai? A sa kaya vei ira ko koya, Dou sa kaya dina, sai au ga. 71Era sa qai kaya, Sa yaga tale vakacava me dua e mai vakadinadina? ni da sa rogoca ga koi keda mai na gusuna dina.
Currently Selected:
LUKE 22: FOV
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Vakavakadewa Makawa (Fijian Old Version) © Bible Society of the South Pacific
