LUKE 21
21
Sa dokai koya na yalewa dravudravua ko Jisu ni sa solia na nonai yau kece vua na Kalou, 1—4. Sa tukuna ni na ca ko Jerusalemi, 5—24. Sa tukuna na veivakatakilakila ni nona lako mai me lewai ira na kai vuravura, 25—33. Sa vakavulici ira na nona tamata me ra dauvakatawa, 34—38.
1A Sa ta cake ko koya, ka raici ira na vutuniyau ni ra sa biuta na nodrai solisoli ki na kato ni lavo. 2A sa raica talega e dua na yada sa dravudravua ni sa biuta kina e rua nai lavo lalai sara. 3A sa kaya ko koya, Au sa kaya vakaidina vei kemudou, Na yada dravudravua oqo sa biuta vakalevu kina, ko ira kecega era biuta vakalailai ga: 4ni ra sa biuta eso ko ira kecega oqo, mai na nodra ka e vuqa, ki na kato ni soli: ia ko koya, sa dravudravua, sa biuta kecega kina na nona ka me bula kina.
5Ia ni sa tukuna na vale ni soro ko ira eso, ni sa vakaiukuukutaki e na veivatu vinaka kei nai solisoli, sa kaya ko koya, 6Na veika oqo dou sa raica, ena yaco na siga ena sega ni vo e dua na vatu me veitaqataqai, ena talaraki sobu kecega.
7A ra sa tarogi koya, ka kaya, Vakavuvuli, ena yaco ninaica na veika oqo? ia ka cava mei vakatakilakila ni sa voleka ni yaco na veika oqo?
8A sa kaya ko koya, Dou qarauni kemudou vinaka de dou vakacalai: ni ra na lewe vuqa era na lako mai ka vakacavucavutaki au, ka kaya, Koi au ga ko koya; a sa qai toro voleka na kena gauna: ia mo dou kakua ga ni laki muri ira. 9Ia ni dou sa rogoca nai tukutuku ni valu, se na veisei, kakua ni kidroa: ni sa dodonu me yaco mada eliu na veika oqo; ia sa sega ni voleka sara nai vakataotioti. 10Sa qai kaya vei ira ko koya, Ena veibolebole na vanua eso, kei na matanitu eso: 11ia ena tavuki vakalevu na veivanua eso, ena tubu talega na dausiga, kei na mate ca; ia ena rairai eso na ka e dauveivakarerei ka so nai vakatakilakila levu mai na lomalagi.
12Ia ni sa bera ni yaco na ka kecega oqo era na tauri kemudou, ka vakacacani kemudou, ka soli kemudou yani ki na veivale ni lotu, kei na veivale ni veivesu, ia dou na kau ki na matadra na tui kei na kovana eso, e na vuku ni yacaqu. 13Ia na ka oqo ena yaco me nomudou i vakadinadina. 14O koya mo dou qai vakataudeitaka na lomamudou, mo dou kakua ni nanuma mada eliu na ka mo dou kaya: 15ni’u na solia vei kemudou na gusu, kei na vuku ena sega e dua na nomudou meca ena veiletitaka rawa, se vorata. 16Ia era na soli kemudou yani na nomudou qase, kei na tacimudou, kei na kai nomudou, kei na wekamudou; a ra na vakavuna na nomudou mate eso. 17Ia ena cati kemudou na tamata kecega, e na vuku ni yacaqu. 18Ia ena sega ni rusa e dua na drau ni ulumudou. 19Dou na maroroya na yalomudou ni dou sa dauvosota.
20Ia ni dou sa raica sa buku na druadrua mai Jerusalemi e na mataivalu eso, dou kila kina ni sa qai voleka na kena ca sara: 21me qai dro ki na veiulu-ni-vanua ko ira era sa tiko e Jutia; ia ko ira sa tiko eloma me ra lako tani yani; me kakua talega ni curu mai kina ko ira sa tiko e na veiyasana ki vanua. 22Ni sa gauna ni veisausaumi oqo, me vakayacori kecega na ka sa volai. 23Ka na ca vei ira sa bukete, kei ira era sa vakasucuma na gone, e na gauna ko ya! ni na ca vakalevu sara na vanua, a ra na cudruvi vakalevu na tamata oqo. 24A ra na vakamatei e nai seleiwau, a ra na kau vakabobula ki na veivanua: a ra na butuki Jerusalemi sobu ko ira na veimatanitu, me yacova nai vakataotioti ni nodra gauna na veimatanitu.
25Ena qai tu nai vakatakilakila eso e na mata-ni-siga, kei na vula, kei na veikalokalo; a ra na ca na lewe ni veivanua e vuravura, ni ra na kidroa e na kena vadugu na wasaliwa kei na biau; 26ena kani yatedra na tamata e na rere, ni ra sa waraka na veika sa voleka ni yaco e vuravura: ni na veitosoyaki na veika kaukauwa ni lomalagi. 27Ia era na qai raica na Luve ni tamata, ni sa lako mai e na o e na kaukauwa kei nai ukuuku levu. 28Ia ni sa vakatekivu me yaco na veika oqo, dou ta cake, ka vagelegelei kemudou; ni dou sa qai voleka ni vakabulai.
29A sa vosataka vei ira e dua na vosa vakatautauvata: Raica na lolo, kei na veikau kecega; 30ni ra sa tubu, dou sa raica ka kila kina vakai kemudou ni sa voleka na vula i katakata. 31Sa vaka talega kina koi kemudou, ni dou sa raica na kena yaco na veika oqo, dou kila kina sa qai voleka na matanitu ni Kalou. 32Au sa kaya vakaidina vei kemudou, Ena sega ni takali nai tabatamata oqo, ena yaco mada eliu na ka kecega. 33Ena takali ko lomalagi kei vuravura; ia na noqu vosa ena sega ni takali. 34Ia dou qarauni kemudou vinaka, de dua na siga sa bibi kina na yalomudou e na daukana, kei na daumateni, kei na lomaocaoca e na veika ni bula oqo, ka yaco vakidacala kina vei kemudou na siga ko ya. 35Ni na vaka ga nai cori ni sa yaco vei ira kecega era sa tiko e dela i vuravura taucoko. 36O koya mo dou qai vakatawa, ka daumasu tikoga, mo dou vakabau kina mo dou yaga me bula mai na ka kecega oqo ena yaco mai, ka tu e na mata ni Luve ni tamata.
37A sa vakatavuvuli tiko ko koya e na vale ni soro ni sa siga; ia ni sa bogi sa lako yani, ka moce e na ulu-ni-vanua sa vakayacani ki na veiolive. 38A ra sa lako kecega mai vua na lewe vuqa ki na vale ni soro ni sa mataka caca, me ra rogoci koya.
Currently Selected:
LUKE 21: FOV
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Vakavakadewa Makawa (Fijian Old Version) © Bible Society of the South Pacific
