LUKE 20
20
Sa tarogi Jisu eso se ko cei sa lesi koya, 1—8. Sa tukuna na vosa vakatautauvata ni were-ni-vaini, 9—19. Sa vakavulici ira mera soli vakacavacava vei Sisa, 20—26. Sa tukuna ena tu cake tale na mate, 27—40. A tarogi ira, ka vakavulici ira, 41—47.
1A Sa yaco e na dua na siga ko ya, ni sa vakavulici ira tiko na tamata ko koya e na vale ni soro, ka vunautaka nai tukutuku-vinaka, era sa lako mai na bete levu, kei na vunivola, kei na qase, 2a ra sa tarogi koya, ka kaya, Tukuna mai vei keitou, se ko sa lesi maivei mo cakava na veika oqo? se ko cei sa solia vei iko nai lesilesi oqo? 3A sa vosa ko koya, ka kaya vei ira, Au na tarogi kemudou talega e na dua na ka; ia dou tukuna mai vei au: 4A papitaiso i Joni, sa vu mai lomalagi, se vu mai na tamata? 5A ra sa veivosakitaka vakai ira, ka kaya, Kevaka eda na kaya, Mai lomalagi; ena qai kaya ko koya, Ia dou sa sega ni vakadinati koya e na vuku ni cava? 6Ia kevaka eda na kaya, Mai na tamata; era na vakaviriki keda e na vatu ko ira kecega na tamata; ni ra sa vakadinata ni sa parofita ko Joni. 7A ra sa kaya, ni ra sa sega ni tukuna rawa se sa vu maivei. 8A sa kaya vei ira ko Jisu, Au sa sega talega ni tukuna vei kemudou se ka’u sa lesi maivei me’u kitaka na veika oqo.
9Sa qai tukuna ko koya na vosa vakatautauvata oqo vei ira na tamata: Sa dua na tamata sa tea e dua na were-ni-vaini, ka lisitaka vei ira eso nai vakatau-ni-were; a sa qai lako ki na vanua tani me tiko vakadede kina. 10Ia ni sa yaco na kena gauna, sa tala ko koya e dua na tamata vei ira nai vakatau-ni-were, me ra solia vua eso na vua ni were-ni-vaini: a ra sa yaviti koya ko ira nai vakatau-ni-were, ka vakatala tani wale. 11Sa qai tala tale ko koya e dua na tamata tani: a ra sa yaviti koya talega, ka vakamaduataka, ka vakatala tani wale. 12A sa tala tale ko koya nai katolu; a ra sa vakamavoataki koya talega, ka vakasava yani. 13Sa qai kaya nai taukei ni were-ni-vaini, A cava me’u kitaka? au na tala na noqu gone ni toko: era na dokai koya beka ni ra sa raica. 14Ia ni ra sa raica ko ira nai vakatau-ni-were, era sa veivosaki vakai ira, ka kaya, O koya oqo sa kenai taukei maimuri, tou vakamatea, ka me noda ga na vanua. 15A ra sa biliga ki taudaku ni were-ni-vaini, ka vakamatea. A cava beka ena qai kitaka nai taukei ni were-ni-vaini vei ira? 16Ena lako mai ka vakamatei ira nai vakatau-ni-were oqori, ka solia na were-ni-vaini vei ira na tani. Ia ni ra sa rogoca, era sa kaya, Me kakua ga. 17A sa vakaraici ira ko koya, ka kaya, A cava oqo sa volai, A vatu era sa cata na matai ni vale, Sa yaco me kenai vakadei e na tutu ni vale?
18O koya yadua e na lutu ki na vatu oqori, ena dasila kina: ia ko koya ena lutuka, ena vurumemea me vaka na nuku. 19A ra sa vakatovolea ko ira na bete levu kei ira na vunivola, me ra taura e na tiki-ni-siga ko ya, a ra sa rerevaki ira na tamata: ni ra sa kila sa vosataki ira ko koya e na vosa vakatautauvata ko ya.
20A ra sa vakaraici koya, ka tala na tamata eso me ra veretaka, me ra vaka era sa yalododonu, me ra rogoca na nona vosa eso, me ra soli koya kina vua na kovana me lewai koya ka veitaliataki koya. 21A ra sa tarogi koya, ka kaya, Vakavuvuli, keitou sa kila kemuni sa vosataka na ka e dodonu ka vakatavuvulitaka tiko, a sa sega e dua ko ni sa vinakata walega, ia ko sa vakatavuvulitaka vakaidina nai valavala sa vinaka vua na Kalou: 22Sa tara me da soli vakacavacava vei Sisa, se segai? 23A sa kila na nodrai lawaki ko koya, ka kaya vei ira, 24vakatakila mai vei au e dua na pene: a mata i cei, kei na yaca i cei, sa volai tu kina? A ra sa vosa, ka kaya, A nei Sisa. 25A sa kaya vei ira ko koya, Mo dou qai solia vei Sisa na veika nei Sisa, vua talega na Kalou na veika sa nona na Kalou. 26Ka sa sega e dua na nona vosa era sa taura rawa e na matadra na tamata: a ra sa kurabui e na nona vosa, a ra sa galu ga.
27Era sa qai lako mai eso nai tokani i Setoki, ko ira era kaya sa sega na tu cake tale mai na mate; a ra sa tarogi koya, 28ka kaya, Vakavuvuli, sa vola vei keda ko Mosese, Kevaka sa mate e dua na tamata vakawati ia ka sega na luvena, me qai curuma na nona yada ko tuakana se tacina, me vakaivakawa kina vua na tuakana se tacina ka mate. 29Ia ka tiko na veituakani eratou lewe vitu: a sa vakawati ko koya sa qase, a sa mate ka sega na luvena: 30erau sa qai veiwatini kei na yada nai karua, a sa mate ka sega na luvena: 31erau sa qai veiwatini kaya nai katolu: ka sa vaka talega kina ko iratou na lewe vitu; eratou sa mate ka sega na luvedratou. 32Sa qai mate talega emuri na yalewa. 33Ni sa tu cake tale na mate, ena wati i cei ko koya oqo? ni ratou lewe vitu sa veiwatini kaya.
34A sa vosa ko Jisu, ka kaya vei ira, Era sa vakawati ka veimusumusukitaki me ra vakawati na gone ni vuravura oqo; 35ia ko ira era vakabau me ra yaga me nodra na bula ko ya, kei na tu cake tale mai na mate, era sa sega ni vakawati, se veimusumusukitaki me ra vakawati: 36ka ra na sega ni mate rawa tale: ni ra sa tautauvata kei ira na agilose: a ra sa luve ni Kalou, ni ra sa luve ni tu cake tale mai na mate. 37Ia ni na vakaturi cake tale ko ira na mate, sa tukuna ko Mosese mai na kau ni sa vakatoka na Turaga, Na Kalou i Eparaama, kei na Kalou i Aisake, kei na Kalou i Jekope. 38Ni sa sega ni nodra Kalou na mate ko koya, a nodra ga era sa bula tiko; ni ra sa bula kecega vei koya. 39Sa qai vosa eso na vunivola, ka kaya, Vakavuvuli, ko ni sa vosa vinaka. 40A ra sa sega ni doudou emuri me ra taroga e na dua na ka.
41Sa qai tarogi ira ko koya, Sa kainaki vakaevei ni sa luve i Tevita na Karisito? 42ia sa kaya ko Tevita e nai vola ni Same, Sa kaya ko Jiova vua na noqu Turaga, Mo tiko e na ligaqu i matau, 43Me’u vakamalumalumutaki ira mada na nomu meca mei tutu-ni-yavamu. 44Ia sa vakatokai koya ko Tevita me Turaga, sa qai luvena vakaevei?
45Sa qai vosa ko koya vei ira na nona tisaipeli, ni sa rogoca tiko ko ira kecega na tamata, 46Dou qarauni kemudou maivei ira na vunivola, era sa vinakata na lako voli e nai sulu balavu, ka sa vinakata na veikidavaki e na veirara ni veivoli, kei nai tikotiko ni qase e na veivale ni lotu, kei nai tikotiko vakaturaga e na kana vata: 47era sa kovea na nodrai yau na yada, a ra sa ia na masu balavu me veivakaisini; ko ira oqo era na cudruvi vakalevu cake.
Currently Selected:
LUKE 20: FOV
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Vakavakadewa Makawa (Fijian Old Version) © Bible Society of the South Pacific
