Marko 14

Bɛbɔɔ Yesu ti so pɔ sɛ bebeku no

(Mateo 6:1-5; Luka 22:1-2)

1Na aka nnaanu na Twam ne Apiti afahyɛ he aduru. Na asɔfoɔ mpanyimfoɔ ne atwerɛfoɔ he ɔɔpɛ nyansa kwane bi afa so akye Yesu, na bɛaku no; 2na bɛkaa sɛ, “Yɛnnyɔ yei afahyɛ berɛ yi mu, anyɛ saa a, basabasa bɛsɔre nnipa he mu.”

Baa bi sraa Yesu ngo ya Betania

3Berɛ a Yesu ya Betania, Simon kwatani he fie he, na ɔte adidiiɛ he, baa bi de aduhwam a ne boɔ ɔdene a ogu kɔntoa mu baeɛ, na obie so hwiee aduhwam he guu Yesu ti mu. 4Na nnipa a bɛya hɔ he mu binom de abufuo keka kyerɛɛ bɛ ho bɛ ho sɛ, “Mmɛ nti ne ɔsɛe aduhwam he sei 5berɛ a nka bebetumi atɔno aduhwam yi anya sika a ɔboro paani bosome du akatua, na bɛde sika he ama ahiafoɔ?” Na benwinwii tia baa he. 6Na Yesu kaa sɛ, “Honnyae no; mmɛ nti ne hooha no yi? Nea waayɔ yi yɛ ma me. 7#Deut 15:11 Na ahiafoɔ deɛ bɛya ho nkyɛne daa, na hobetumi ayɔ bɛ papa berɛ biaa a hopɛ, na me deɛ menntena ho nkyɛne daa. 8Waayɔ deɛ obetumi; wasra me nipadua de ɔɔtwɛne me sie da. 9Nɔkorɛ, meeka akyerɛ ho, wiase baabi a bɛbɛpaem aka asɛmpa he, bɛbɛka deɛ waayɔ yi de akae no.”

Yuda gye tomm sɛ obeyi Yesu ama

10Afei Yuda Iskariot a ɔyɛ dummienu he mu baako, kɔɔ asɔfoɔ mpanyimfoɔ he nkyɛne ne bɛ kɔ kasaa sɛ obeyi Yesu ama bɛ. 11Bɛteeɛ he, bɛ ani gyee paa, na bɛhyɛɛ no bɔ sɛ bɛbɛma no sika. Nti ɔhyɛɛ aseɛ hwehwɛɛ kwane a ɔbɛfa so ayi no ama.

Yesu ne asuafoɔ he dii Twam Afahyɛ

(Mateo 26:17-19; Luka 22:7-13)

12Afei da a odi kane a bedi paanoo a mmɔreka nnim he, berɛ a beku Twam dwane he, Yesu asuafoɔ he baa ne nkyɛne bebisaa no sɛ, “Hefa ne wopɛ sɛ yekosiesie ma wodi Twam he?” 13Nti ɔsomaa n’asuafoɔ he mu mmienu, ka kyerɛɛ bɛ sɛ, “Honkɔ kuro he mu, na beema bi behyia ho a ɔsõ asuhina; honni n’akyi, 14#Mar 11:3 na baabi a obewura biaa, honka nkyerɛ fiewura he sɛ, ‘Kyerɛkyerɛfoɔ he dɛ yemmisa sɛ, Hefa ne m’ahɔhodane a me ne m’asuafoɔ bedi Twam he ya?’ 15Ɔbɛkyerɛ ho dane kɛseɛ bi abrosane he so a bɛasiesie mu ayɛ no krado. Honnyɔ ahosiesie mma yɛ hɔ.” 16Nti asuafoɔ he firii adi kɔɔ kuro he mu, na bibiaa siiɛ sɛdeɛ na waaka akyerɛ bɛ he, na besiesie Twam aduane he.

Adidie a otwa toɔ

(Mateo 26:20-29; Luka 22:14-23; Yohane 13:21-26)

17Nnwunu dwoeɛ he, Yesu ne dummienu he baeɛ. 18Na bɛtenaa ase a beedidi he, ɔkaa sɛ, “Nɔkorɛ, meeka akyerɛ ho, ho a ho ne me oodidi he mu baako beyi me ama.” 19Na bɛyɛɛ basaa, na bebisaa no mmaako mmaako sɛ, “Ɔyɛ me a’?” 20Ɔka kyerɛɛ bɛ sɛ, “Ɔyɛ dummienu yi mu baako, nea ɔne me de paanoo ɔɔbɔ ayowa baako mu he a, 21na Nipa Ba he ɔɔkɔ deɛ, sɛdeɛ bɛatwerɛ afa ne ho he, nso deɛ ɔnam ne so beyi no ama he nnue! Nka ɔyɛ ma no sɛ bɛanwo no mpo.”

Awurade Adidie ahyɛaseɛ

22 # 1 Ko 11:23-25 Na beedidi he, Yesu faa paanoo, na ohyiraa so he, obuu mu de maa bɛ kaa sɛ, “Honye, yei ne me nnipadua.” 23Afei ɔfaa kuruwaa, na ɔdaa ase he, ɔde maa bɛ, na bɛ nyinaa bɛnom mu. 24Ɔka kyerɛɛ bɛ sɛ, “Yei ne me mogyaa a ɔyɛ apam foforɔ he mogyaa a nnipa bebree nti beehwie agu. 25Nɔkorɛ, meeka akyerɛ ho sɛ, mennom bobe aba bio de kosi da a mɛnom no foforɔ Nyankopɔn ahennie he mu.”

Yesu hyɛɛ Nkɔm sɛ Petro bɛpa no

26Bɛtoo ayeyie dwom, na ɔno akyi he befirii adi kɔɔ Ngo Bepɔ so. 27#Sak 13:7 Na Yesu ka kyerɛɛ bɛ sɛ, “Ho nyinaa hobeyi me ama; na bɛatwerɛ sɛ,

‘Mɛbɔ dwanhwɛfoɔ he,

na nwantene he ahwete.’

28 # Mar 16:7 Na me wusɔreɛ akyi he, medi ho anim akɔ Galilea.” 29Petro ka kyerɛɛ no sɛ, “Sɛ biaa pa wo mpo a, me deɛ mempa wo.” 30#Yoh 13:38 Yesu ka kyerɛɛ no sɛ. “Meeka akyerɛ wo nɔkorem nnɛ sɛ, anadwo yiaa, ansa na akokɔ bɛ bɔne mprenu he na woayi me ama mprɛnsa.” 31Na Petro kaa no anibereɛ so sɛ, “Sɛ otwa sɛ me ne wo wu koraa a, mempa wo.” Na bɛ nyinaa bɛkekaa saa.

Yesu bɔ Mpaeɛ Getsemane

32 # Yoh 18:1 Bɛkɔɔ bea bi a bɛfrɛ no Getsemane; na ɔka kyerɛɛ n’asuafoɔ he sɛ, “Hontena ha na menkɔbɔ mpaeɛ.” 33Ɔfaa Petro ne Yakubu ne Yohane kaa ne ho, na ɔhyɛɛ aseɛ teeteeɛ na odii awerɛhoɔ. 34#Yoh 12:27 Na ɔka kyerɛɛ bɛ sɛ, “Me werɛ aho kɛse de ɔɔkɔ wuo mu mpo; honnka ha, na honnwɛne.” 35Na ɔkɔɔ animu kakra he, ɔde ne ho too fam na ɔbɔɔ mpaeɛ sɛ, sɛ obetumi a nka berɛ he ntwa ne ho nkɔ. 36#Mar 10:38 Ɔkaa sɛ, “Abba, Agya, bibiaa nso wo yɔ; yi kuruwaa yi firi me so; nso nyɛ deɛ mepɛ na mmom deɛ wopɛ.” 37Na ɔba behuu sɛ bɛadeda; na obisaa Petro sɛ, “Ei! Simon, wada? Nti woantumi anwɛne dɔnhwere baako mpo? 38Honnwɛne na hommɔ mpaeɛ na hoankɔ sɔhwɛ mu. Honhom he pɛ paa deɛ, nso honam he ɔmmerɛ.” 39Na bio, ofiri hɔ kɔbɔɔ mpaeɛ korɔ heaa. 40Na ɔsane behuu bɛ sɛ bɛadeda bio, efiri sɛ, na bɛ ani kum kɛse, nti bɛanhu muaeɛ a bɛmfa mma no. 41Na afei ɔbaa ne mprɛnsa so bebisaa bɛ sɛ, “Hogu so ɔɔda dwodwo ho ho? Aayɛ yie! Berɛ he aso sɛ bɛde Nipa Ba he hyɛ nnebɔnyɛfoɔ nsa. 42Honnsɔre ma yɛnkɔ. Honhwɛ, deɛ obeyi me ama he abɛne.”

Yesu Yima ne ne Kyeɛ

43Amonom hɔaa, ogu so ɔɔkasa he, Yuda, dummienu he mu baako beduruiɛ; na nnipadɔm a bekitakita asekane ne mmaa a befiri asɔfoɔ mpanyimfoɔ ne atwerɛfoɔ ne mpanyimfoɔ he mu ne no ne baeɛ. 44Afei na deɛ oobeyi no ama he akyerɛ bɛ nsɛnkyerɛnne bi sɛ, “Deɛ mɛfe n’ano he, ɔno a, honnkye no, mfa no mfiri hɔ nkɔ, honhwɛ yie na wammfiri ho nsa.” 45Nti ɔbaeɛ he, ɔkɔɔ ne nkyɛne ntɛm so kaa sɛ, “Rabi!” Na ɔfee n’ano. 46Afei bɛsɔɔ ne mu, na bɛkyee no. 47Na bɛ a na begyina bɛnkyɛne hɔ he mu baako twee ne sekane na otwaa sɔfo panyini akoa he aso. 48Na Yesu ka kyerɛɛ bɛ sɛ, “Hode asekane ne mmaa ne afiri adi ɔɔbɛkye me te sɛ nea meyɛ korɔmfoɔ? 49Daa na me ne ho ya asɔrefie a meekyerɛkyerɛ, nso hoankye me. Nso aaba saa sɛ ɔbɛyɛ a twerɛsɛm he bɛbam.” 50Bɛ nyinaa begyaa no hɔ dwaneeɛ.

51Na abranteɛ bi di n’akyi a ɔde nwera nkoaa ne akata n’adagya so. Bɛsɔɔ ne mu a 52nka bɛɛpɛ no akye no, na ogyaa ne nwera he hɔ de ne ho kwaterekwa dwane kɔeɛ.

Bɛde Yesu kogyinaa Abadwafoɔ he Anim

53Bɛde Yesu kɔmaa sɔfo panyini; na asɔfoɔ mpanyimfoɔ he, mane he mu mpanyimfoɔ ne atwerɛfoɔ he ahyia. 54Na Petro dii n’akyi akyirikyiri koduruu sɔfo panyini he adi hɔ; na ɔne abammɔfoɔ he tenaa gya ho toeɛ.

55Afei asɔfoɔ mpanyimfoɔ he ne badwa he nyinaa hwehwɛɛ adanseɛ tia Yesu na bɛagyina so aku no; nso bɛanya bi. 56Nɔkwasɛm ne sɛ, nnipa bebree dii adansekunumu tia no, nso bɛ adanseɛ he ankɔ bɛnkorɔ mu. 57Binom sɔre dii adanseɛ tiaa no sɛ, 58#Yoh 2:19 “Yɛtee sɛ ɔɔka sɛ, ‘Mɛsɛe asɔredane a bɛde nsa ayɔ yi, na nnansa so, mesi deɛ bɛamfa nsa anyɔ.’ ” 59Nso asɛm yei ho mpo, bɛ adanseɛ he anhyia. 60Na sɔfo panyini he sɔre gyinaa bɛ anim bisaa Yesu sɛ, “Wonni mmuaeɛ biaa? Ɛɛne ho ne beedi adanseɛ atia wo yi?” 61#Mar 15:5; Yes 53:7 Nso ɔyɛɛ komm na wammua. Bio, sɔfo panyini he bisaa no sɛ, “Wone Kristo he, Nhyira Wura Ba he anaa?” 62Yesu kaa sɛ, “Me a; na

‘hobehu Nipa Ba he

sɛ ɔte Tumfoɔ he nsa nifa’

na ‘ɔnam soro mununkum mu ɔɔba.’ ”

63Afei sɔfo panyini he tetee n’ataadeɛ mu, na ɔkaa sɛ, “Mmɛ nti ne yɛda so hia adansefoɔ? 64#Yoh 19:7 Hoate n’abususɛm he! Hoadwene ne sɛ?” Bɛ nyinaa bebuu no fɔ sɛ ɔfata wuo. 65Binom hyɛɛ aseɛ totoo ntasuo guu ne so, kyekyeree n’ani, na bɛbobɔɔ no ka kyerɛɛ no sɛ, “Hyɛ nkɔm!” Abammɔfoɔ he nso bɛfaa no kɔeɛ, na bɛkɔhwee no.

Petro paa Yesu

66Afei berɛ a na Petro ya aseɛ hɔ he, sɔfo panyini he mmaawa he mu baako baa hɔ. 67Na ohuu Petro sɛ ɔɔto gya he, ɔhwɛɛ no gyee kaa sɛ, “Wo nso na woka Nasareni Yesu he ho.” 68Nso wannye antom, na ɔkaa sɛ, “Mennim na mente deɛ wooka yi ase.” Na ofirii adi, kogyinaa aboboɔ ano hɔ. Na akokɔ bɔnooɛ. 69Abaawa he huu no bio he, ɔhyɛɛ aseɛ ka kyerɛɛ bɛ a begyina hɔ he sɛ, “Beema yei yɛ bɛ mu baako.” 70Saa berɛ yi nso, Petro annye antom. Na ɔyɛɛ kakra he, bɛ a begyina hɔ he ka kyerɛɛ Petro sɛ, “Woka bɛ ho ampa, na woyɛ Galileani.” 71Na ɔhyɛɛ aseɛ domeeɛ, na ɔkaa ntam sɛ, “Mennim beema a hooka n’asɛm yi.” 72#Mar 14:30 Saa berɛ he akokɔ bɔno mprenu so. Na Petro kae sɛ Yesu aka akyerɛ no sɛ, “Ansa na akokɔ bɛbɔno mprenu he na woapa me mprɛnsa.” Nti ne werɛ hoeɛ, na osuiɛ.

Currently Selected:

Marko 14: BBTP

ማድመቅ

Copy