Gẹnẹsis 46
46
E Jekọb Kevbe ẹgbẹe Ọre kpao Gha Rrie Igipt
1E Jekọb keghi koko emwi ne ọ mwẹ hia, ọ na gha rrie Biẹsiẹba, ọ na ya zọ ese gha Osanobua ọghe Aizik ne erhae. 2Osanobua keghi tama rẹn vbe umian vbe asọn wẹẹ, “Jekọb, Jekọb!” Rẹn wanniẹn wẹẹ, “Ghe mwẹ, I rre emwa!” Ọ tama rẹn wẹẹ, 3“Mẹ ọrọre Osanobua, ọghe erha a, ghẹ gie ohan muẹn ne u gha rrie Igipt, I gha ya uniẹn ivbuẹ khian okpẹvbo vbe evba. 4I gha leluẹ gha rrie Igipt, I gha vbe viọ ivbi uniẹn ruẹn dọlegbe gha die emwa. E Josẹf gha rre ehe ne u ye vbe ẹghẹ ne u gha ya wu.”
5E Jekọb keghi suẹn okhian rẹn ke Biẹsiẹba kpao. Ivbi Izrẹl keghi mu erha iran ighẹ Jekọb kevbe avbe ivbi iran kevbe amwẹ iran ye uwu ikẹkẹ okhuae ne ọba wẹ ne a do ya hẹ iran rre. 6Iran keghi viọ emwirri iran kevbe emwi hia ni iran khuaẹn vbe Kenan, iran na gha rrie Igipt. E Jekọb keghi viọ avbe ivbi ẹre hia ba egbe. 7Ivbi ẹre nikpia, eyẹ nikpia, ivbi ẹre nikhuo, kevbe eyẹ ọre nikhuo.
8Ivbi e Jekọb ni lelẹe kpao gha rrie Igipt ọre ena khin. E Jekọb kẹe kevbe ivbi ẹre. Ovbi e Jekọb nọdiọn ighẹ Riubẹn, 9ke ivbi e Riubẹn, ighẹ Hanọk, Pallu, Hẹzrọn kevbe kami. 10Ivbi e Simiọn, Jemuẹl, Jamin, Ohad, Jakin, Zoha, Siọl ne okhuo Kenan ọkpa biẹe. 11Ivbi e Livai kegha re Gẹsiọn, Kohat kevbe Merari. 12Ivbi e Juda kegha re, Siẹla, Pẹrẹs kevbe Zẹra (sokpan Kenan ọ re Eri kevbe Onan na wulo). Ivbi e Pẹrẹs kegha re Hẹzrọn kevbe Hamul. 13Ivbi Isaka kegha re Tola, Pua, Jasiub kevbe Simrọn. 14Ivbi e Zẹbulọn kegha re Sẹrẹd, Ilọn kevbe Jalil.
15Ena kegha re emọ ne Lia biẹlẹ ne Jekọb vbe Mẹsopotamia deba ovbi ẹre nokhuo ighẹ Dina. Vbe uwu ehia, ivbi urho ẹre ke obọ Lia rre kegha re eha yan ọgban.
16Ivbi e Gad kegha re Zefiọn, Hagi, Siuni, Ezbọn, Eri, Arod kevbe Areli. 17Ivbi Asia kegha re Imna, Isva, Isvi, Beraia kevbe Sera ne ọtẹn iran nokhuo. Ivbi e Beria kegha re Hebẹ kevbe Malkiẹl. 18Iran enẹirrọvbugie na kegha re ivbi e Jekọb ne ọ biẹlẹe ighẹ Zilpa ne Leban rhie ne Lia ne ovbi ẹre.
19Ivbi e Rekiẹl ne amwẹ Jekọb ọre ena khin: e Josẹf kevbe Bẹnjamin. 20Asẹnat ne ovbi e Pọtifera ne ohẹn On, keghi biẹlẹ Manasẹ kevbe Ifreim ne Josẹf vbe Igipt. 21Ivbi e Bẹnjamin kegha re Bẹla, Bẹkia, Asbẹl, Gera, Naaman, Ẹhi, Ros, Mupim, Hupim kevbe Ad. 22Iran iwenẹ na ọrọre ivbi e Jekọb ne Rekiẹl biẹlẹ. 23Ovbi e Dan nokpia kegha re Husin. 24Ivbi e Naftali kegha re Jazil, Guni, Jezẹ kevbe Silẹm. 25Iran ihinrọn na ọrọre ivbi e Jekọb ne Bilha ne ọviẹn ne Leban rhie ne ovbi ẹre ighẹ Rekiẹl biẹlẹ nẹẹn.
26Ivbi e Jekọb taara ni gha rrie Igipt kegha re ehan yan iyeha vbe ne a i na ka avbe amwẹ ivbiẹre yọ. 27Emọ ikpia eva ọre a biẹlẹ ne Josẹf vbe Igipt, ọnii keghi ye ẹgbẹe Jekọb ne ọ gha rrie odọ gba vbe ekigbesiyenẹ.
E Jekọb Kevbe Ẹgbẹe Ọre Vbe Igipt
28E Jekọb keghi gie Juda ke odaro ne ọ ya tama e Josẹf ne ọ do diakhẹ irẹn vbe Gosiẹn. Iran ghi bu Gosiẹn, 29e Josẹf keghi wẹ ne a mu ikẹkẹ okhuae gie irẹn ọ na gha rrie Gosiẹn ne ọ ya vba erha ẹe ighẹ Izrẹl. Ugbẹn vbe ọ ghi wa miọẹn, ọ gbae ginna egbe, ọ keghi viẹ kpẹe vbotọ ẹsẹse vbene ọ ya gbae ginna egbe nii. 30Izrẹl keghi tama e Josẹf wẹẹ, “Banbanna nian, I mu egbe ne I gha ya wu vbene I ghi na miẹn ọẹn nẹ na ighẹ, u ye rre agbọn.” 31Ẹghẹ nii ọre Josẹf na tama etiọnrẹn nikpia kevbe emwa erha ẹe wẹẹ, “I ra gha khian ne I ya tama ọba wẹẹ, ‘Etẹn mwẹ kevbe emwa erha mwẹ ni te rre Kenan bu mwẹ gha dee. 32I gha tama rẹn wẹẹ ọsuohuan ọ re uwa khin, wa vbe gbearoghe avbe ẹmila uwa, wa viọ avbe oghẹn ohuan uwa, ke oghẹn ẹmila ke emwi ne uwa mwẹ hia gha dee.’ 33Ọba gha tie uwa ọ na nọ uwa wẹẹ, ‘De iwinna ne uwa winna?’ 34Wa ghi khama rẹn wẹẹ, ‘Enọwanrẹn aranmwẹ ọre ima rri ke ẹghẹ ọvbokhan mwa gha de zẹ vbe ne avbe erha mwa vbe gha ru.’ Erriọ ọre uwa gha na ya di odẹ Gosiẹn ya.” Emwi ne ọ yae ta ọna ọrọre wẹ emwa Igipt i ho ẹmwẹ avbe ọsuohuan.
Currently Selected:
Gẹnẹsis 46: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996
