Gẹnẹsis 45
45
E Josẹf Ta Ọmwa Ne Irẹn Khin Ma Etiọnrẹn
1E Josẹf ma ghi sẹtin ziengbe ẹre vbe sirra iran ni ruemwi nẹẹn, ọ keghi davan wẹẹ, “Ne emwa hia kpao.” Ọmwa rhọkpa ighi rre evba vbe Josẹf tama etiọnrẹn ọmwa ne irẹn khin. 2Ọ keghi ya urhu ne ọ la viẹ sẹrriọ ne emwa Igipt na họn, iran na ya na iyẹn ọnrẹn sẹ ẹguae ọba. 3E Josẹf keghi tama etiọnrẹn wẹẹ, “Mẹ ne Josẹf ọna khin, Erha mwẹ ye rre agbọn ra?” Sokpan ohan mu avbe etiọnrẹn sẹrriọ wẹ iran ma sẹtin rhie ewanniẹn nẹẹn vbe iran họn ẹmwẹ na. 4Ẹre Josẹf na khama iran wẹẹ, “Lahọ, wa sikẹ mwẹ.” Iran keghi khian sikẹ ọre, ọ na khama iran wẹẹ, “Mẹ ne Josẹf ne ọtẹn uwa ne uwa khiẹn fi Igipt ọre ọna khin. 5Banbanna nian, wa ghẹ gie iro han uwa ra ne uwa gha gu egbe uwa gui rhunmwuda ighẹ wa khiẹn mwẹ gha die edinran. Osanobua ọ re ọ gie mwẹ ke aro ne uwa ne I sẹtin sinmwi emwa ye agbọn. 6Ukpo nogieva kẹkan ọ re ukhunmwu na he ye na vbe otọ na, ọ ye kẹ ukpo isẹn ne a i ra na kọ ra ne a rhọ emwiokọ. 7Te Osanobua gie mwẹ ke odaro ne uwa, ne uwa miẹn ehe na gha mwẹ emọ vbe uniẹn uwa. Te a gie mwẹ ne I do sinmwi uwa nibun ne uwa ghẹ wulo. 8Rhunmwuda ọnii, ẹ i re uwa ọre ọ gie mwẹ gha die edinran sokpan Osanobua nọ. Ọ keghi ya mwẹ ru zẹ vbe ihe erha ne ọba, mẹ ọ re ọ gbearoghe ẹvbo ẹre hia kevbe ne ọ khaemwisẹ yan Igipt hia.”
9Banbanna nian, wa zẹgiẹgiẹ bu erha mwẹ gha khian ya tama rẹn wẹẹ, “E Josẹf ne ovbuẹ khare wẹẹ, ‘Osanobua ya mwẹ ru nọkhaemwisẹ yan Igipt hia; ne ọ zẹgiẹgiẹ bu mwẹ gha dee. 10U sẹtin tota ye Gosiẹn ehe ne u gha na sikẹ mwẹ. Wẹ kevbe ivbuẹ kevbe avbe eyẹ ruẹ, avbe ohuan ruẹn kevbe ẹwe ruẹ kevbe ẹmila ruẹ kevbe emwi ne u mwẹ hia. 11U gha rre Gosiẹn, I gha sẹtin gha gbearoghe ruẹ. Ukpo Isẹn ọ ye kẹe ne ukhunmwu ra fi la, mẹ ma ho ne ohanmwẹ gbe uẹ ra ẹgbẹe ruẹ ra emwi ne ọ re ọwuẹ hia.’ 12Banbanna nian wa hia, kevbe Bẹnjamin ne ọtẹn mwẹ gha miẹn wẹ mẹ ọ re ọ gele re Josẹf. 13Wa ya tama erha mwẹ vbene asẹ ne I mwẹ kpọlọ sẹ hẹ vbe Igipt vbe edinran, wa ghi ta emwi ne aro uwa sẹe hia ma rẹn, wa ghi zẹgiẹgiẹ rhie ẹre gha die edinran.”
14Rẹn keghi gba Bẹnjamin ne ọtiọnrẹn ginna egbe, ọ na gha viẹ. E Bẹnjamin kevbe gha viẹ vbe ehe ne ọ na gbae ginna egbe nii. 15Vbe iyeke ọnii, ọ keghi mu unu soso etiọnrẹn hia fẹẹrẹ unu, ọ keghi viẹ vbe ne ọ gba iran ginna egbe.
16Ugbẹn vbe iran ghi na iyẹn na sẹ ẹguae ọba wẹ etẹn e Josẹf rre, ọba, kẹe kevbe emwa iwinna rẹn kegha ghọghọ. 17Rẹn keghi khama e Josẹf wẹẹ, “Tama etuẹn ne iran kun ihẹ yan aranmwẹ iran ne iran dọlegbe gha rrie otọe Kenan. 18Wẹ ne iran viọ avbe erha iran kevbe ẹgbẹe iran ne iran bu mwẹ gha dee. I gha rhie otọ ne ọ maa sẹẹ vbe Igipt ne iran, iran sẹtin vbe gha rri emwiokọ ne ọ maa sẹẹ vbe otọe nii. 19Tama iran ne iran viọ avbe ikẹkẹ okhuae ke Igipt kpao ne iran ya viọ amwẹ iran kevbe ivbi iran negiẹrẹ gha dee. Tama iran ne iran rhie erha iran gha dee. 20Wẹ ne iran ghẹ gie emwi ne iran sẹrae da iran, emwi ne ọ maa sẹẹ vbe otọe Igipt hia, ọghe iran ra gha nọ.”
21Ivbi Izrẹl keghi ruẹe vberriọ. E Josẹf keghi viọ ikẹkẹ okhuae ne iran zẹ vbene ọba khare, ọ na vbe viọ evbare ne iran gha re vbe okhian iran. 22Ọ kevbe viọ ukpọn ne iran gha ya fi ni rre iran ẹkun werriẹ ne iran, sokpan ọ keghi viọ agiẹghẹ esiliva iyisẹn yan uri (300) ne Bẹnjamin kevbe ẹwu ughughan isẹn. 23Ọ keghi viọ ekẹtẹkẹtẹ igbe, ọ ke kun emwi ne ọmaa sẹẹ ne a miẹn vbe Igipt yan iran viọ gie erha ẹe, deba ekẹtẹkẹtẹ igbe ne a kun ebrẹd yan deba avbe evbare ọvbehe ne erha ẹe gha re vbe okhian nii, gie erha ẹe. 24Ọ na wẹ ne avbe etiọnrẹn si okhian, Ọ keghi tama iran vbe iran ghi ra kpao wẹẹ, “Wa ghẹ fian afianma rhọkpa vbe odẹ.” 25Iran keghi kpao vbe Igipt gha bu e Jekọb ne erha iran vbe Kenan. 26Iran tama rẹn wẹẹ, “E Josẹf ye rre agbọn! Rẹn ọ re ọ khaemwisẹ yan Igipt hia!” Ọ keghi yan e Jekọb unuan, ọ ma ya iran yi. 27Sokpan, ugbẹn vbe iran ghi tama rẹn vbene Josẹf kha hẹ, ọ na vbe miẹn avbe ikẹkẹ okhuae ne Josẹf viọ rre ne a do ya mu irẹn gha die Igipt, ẹko keghi rhiẹnrhiẹn ẹn ẹsẹse. 28Ọ keghi kha wẹẹ, “Ọ na sẹe, Josẹf ne ovbi mwẹ ye rre agbọn! I gha ya miẹn ọẹn vbe I te wu.”
Currently Selected:
Gẹnẹsis 45: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996