Gẹnẹsis 44
44
Ukpu Ne Ọ Wiri
1E Josẹf keghi khama ọguọmwadia ne ọ gbearoghe owa ẹre wẹẹ, “Viọ evbare vuọn ẹkpo iran na vbene iran gha sẹtin mu sẹ, u ghi vbe dọlegbe viọ igho dọmwadẹ ọghọe ye unu ẹkpo ẹre. 2Rhie ukpu esiliva mwẹ ye unu ẹkpo ọtẹn iran nọkanmwasẹ kẹe kevbe igho ne ọ ya de ọka.” Ọ keghi ru vbene a tama rẹn. 3Owiẹ vbe ẹdẹ ghi gbe, a keghi zẹ iran urrie ba ekẹtẹkẹtẹ iran. 4Ugbẹn vbe iran ma ghi he khian rrei gbe vbe ore ẹvbo, e Josẹf ke tama ọguọmwadia ne ọ gbearoghe owa ẹre wẹẹ, “Mu egbe ne u khu avbe emwa na. U gha vba iran, u ghi nọ iran wẹẹ, ‘Vbọzẹ ne uwa na ya ọkhọ san ẹse yi? 5Vbọzẹ ne uwa na do ukpu esiliva mwẹ rhie? Ukpu na ọ re arowa mwẹ ya wọn amẹ, ọ re ọ vbe ya bọ. Emwi ne uwa ru i ma hiehiere.’ ”
6Ugbẹn vbe ọguọmwadia nii ghi khu iran mu nẹ, ọ keghi wa talọ ẹmwẹ na hia. 7Iran keghi wanniẹn tama rẹn wẹẹ, “Vbua ye avbe ẹmwẹ ne u talọe na kha yi enọwanrẹn? Ma gha vẹn ihẹn wẹ ma ma ru emwi vberriọ ẹdẹdẹmwẹdẹ. 8U miẹn wẹ, igho ne ima miẹn vbe ẹkpo ima, te ima vbe dọlegbe viọ ẹre ke otọ Kenan bu ruẹ gha dee. De emwi ne ọ gha ghi siẹe ne ima gha na do igoru ra esiliva rhie vbe owa arowa ruẹ? 9Enọwanrẹn, a gha miẹn ọẹn vbe obọ ọmwaikọmwa vbe uwu ima, a ghi gbẹe rua, ma ni de kẹe ghi do khian eviẹn ruẹn, enọwanrẹn.” 10Rẹn keghi wanniẹn wẹẹ, “I kue yọ sokpan a gha miẹn ọmwa ne ukpu ni gue vbe uwu uwa, rẹn ghi khian ọviẹn mwẹ, wa nekpa sẹtin gha rrie kẹkan.” 11Iran keghi zẹgiẹ fannọ ihẹ tuorre ye otọ, edọmwadẹ ọghọe na rhan ẹkpo ẹre. 12Ọguọmwadia e Josẹf keghi hẹko gualọ ke egbe enọwansẹ yasẹ enọkanmwasẹ, a keghi miẹn ukpu nii vbe ẹkpo a Bẹnjamin. 13Etiọnrẹn keghi ye akhiẹ valọ ukpọn ye egbe iran ẹkun, iran na kun ihẹ yan ekẹtẹkẹtẹ iran fi ọdelegbe gha di ore ẹvbo. 14Ugbẹn vbe Juda kevbe etiọnrẹn ghi sẹ owa e Josẹf, te ọ he ye rre evba. Iran keghi vbẹrre nẹ. 15E Josẹf keghi kha wẹẹ, “Vbe ọ na khin uyinmwẹ ne uwa yinrin na yi? Wa ma rẹn wẹ ọmwa vbene imẹ ye gha sẹtin bọ mu uwa ra?” 16Juda keghi kha wẹẹ, “De ẹmwẹ ne ima ra miẹn ta yi enọwanrẹn? De ẹzọ ne a ra miẹn gui? Vbe ima a ra ya fan egbe mwa hẹ? Osanobua wee ima uhe ua nẹ, enọwanrẹn. Enọwanrẹn, eviẹn ruẹn ma hia ghi khin, ẹ i re ọmwa na a miẹn ukpu ni vbe obọ ẹre ọkpa.”
17E Josẹf keghi wanniẹn wẹẹ, “Hiehiere! mẹ i khian ru vberriọ, ọmwa ne a miẹn ukpu nii vbe obọ ẹre ọkpa ọre ọ ra gha re ọviẹn mwẹ. Wa nekpa sẹtin bu erha uwa gha khian vbe egbe hẹnnẹdẹn.”
Juda Rinmwian Ne Bẹnjamin
18E Juda keghi bu e Josẹf gha khian ọ keghi wẹẹ, “Lahọ enọwanrẹn, gun mwẹ fanmwegbua guẹ guan. Ghẹ gunmwẹ gui enọwanrẹn, te uwẹ wa yevbe ọba tobọ ẹre, 19Enọwanrẹn, wẹ ọ re ọ nọ ima wẹẹ, ‘Wa ye mwẹ erha ra ọtẹn nokpia ra?’ 20Enọwanrẹn, ewanniẹn ne ima rhie nuẹn ọrọre wẹẹ, ‘Ma ye mwẹ erha ne ọ khian ọmaẹn nẹ kevbe ọtẹn okpia ọkpa ne ọ re ọvbokhan ne a biẹ nẹẹn vbe ọ khian ọmaẹn nẹ. Ọtẹn ọvbokhan okpia nọkpa wu nẹ, rẹn ọkpa ọ re ọ ghi kẹe vbe emọ ne iye ẹe biẹlẹe, erha ẹe wa vbe ho ẹmwẹ ọnrẹn ẹsẹse.’ 21Enọwanrẹn, u na wẹ ne ima rhie ẹre rre ne u miẹn ọẹn, 22Ma na ghi tama ruẹn wẹẹ, ‘Ọmọ nii i sẹtin kpao sẹ erhae rae, a deghẹ ọ kpao, erhae gha wu.’ 23Ẹghẹ ni u ghi na khama ima enọwanrẹn wẹẹ, ‘A deghẹ wa ma rhie ọtẹn uwa nekherhe rre, a i ra kue ne uwa miẹn mwẹ aro.’
24“Ugbẹn vbe ima ghi sẹ ehe ne ọguọmwadia ruẹ ye ighẹ erha ima, ma na tama rẹn vbene u kha hẹ. 25Ẹre irẹn na kha wẹẹ, ‘Wa werriegbe ne uwa ya dẹ evbare kherhe gie ima.’ 26Ma keghi wanniẹn wẹẹ, ‘Ma i sẹtin yo; a i ra gie ima miẹn okpia nii vbe ẹ i re te ọtẹn ima nekherhe rre evba ba ima, ọtẹn ima nekherhe gha lele ima ọkpa ẹre ima gha na yo.’ 27Erha ima ke tama ima wẹẹ, ‘Wa rẹnrẹn wẹ emọ ikpia eva ọre ọvbokhan mwẹ ighẹ Rekiẹl biẹlẹ mẹ. 28Ọkpa vbọ sẹ mwẹ rae nẹ, ọ gha kẹe aranmwẹ akọn ọ re ọ yanghaẹn kua, rhunmwuda I ma ghi miẹn ọẹn ke ẹghẹ ne ọ ya kpao gha dee. 29A deghẹ wa ghi vbe miẹn mwẹ ọna, emwi eso na vbe ruẹe, akhiẹ ne uwa gha si yọ mwẹ egbe vbe ẹghẹ ọmaẹn mwẹ gha gbe mwẹ uan.’ ”
30-31E Juda keghi kha wẹẹ, “Banbanna nian, enọwanrẹn, a deghẹ mẹ na bu erha mwẹ vbene I ma na rhie ọmọ ni mwẹ obọ, ọwarọkpa vbe ọ gha wa miẹn wẹ ọmọ ni i gue mwẹ, ọ ghi wa wu, enọwanrẹn, akhiẹ ne ima gha si ye erha ima egbe vbe ẹghẹ ọmaẹn ẹnrẹn gha gbe ẹe rua. 32Ye vbe sẹ ọnii enọwanrẹn, uhunmwu mwẹ ọre I ya yan ye ọmọ nii vbe obọ erha mwẹ vbene I na tama rẹn wẹ a deghẹ I ma rhie ọmọ nii werriegbe giẹe, ne ọ kae yọ mwẹ urhu vbe ẹdagbọn mwẹ hia. 33Wanwanna nian, enọwanrẹn. I gha tota mwa ne I gha re ọviẹn ruẹn ye ihe ọmọ nii, giẹe lele avbe etiọnrẹn gha rrie owa. 34Vbia ra bu erha mwẹ gha rrie owa hẹ vbe ne ọvbokhan nii i na gue mwẹ? Mẹ i sẹtin zin ẹnrẹn ne I miẹn ọkhọ vbe nian ne ọ sunu vbe egbe erha mwẹ.”
Currently Selected:
Gẹnẹsis 44: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996