Gẹnẹsis 43
43
Etẹn E Josẹf Rhie Bẹnjamin Yo Igipt
1Ukhunmwu keghi dọlegbe tua vbe Kenan. 2Ugbẹn vbe emwa e Jekọb ghi rri ọka ne iran viọ ke Igipt rre fo nẹ, e Jekọb keghi tama ivbi ẹre wẹẹ, “Wa dọlegbe gha khian ne uwa ya de evbare kherhe gie ima.” 3E Juda keghi wanniẹn tama rẹn wẹẹ, “Te okpia nii wa yan tae ma ima wẹ ne ima ghe ye aro kan irẹn aro, a deghẹ ma ma rhie ọtẹn ima rre. 4A deghẹ u gha kue ne ọtẹn ima lele ima gha khian, ma gha yo ya dẹ evbare guẹe. 5A deghẹ u ma kue, ma i rae, sokpan a ma wẹ te ima rhie ọtẹn ima mwẹ obọ.” 6E Jekọb wanniẹn tama iran wẹẹ, “Vbe uwa ghi na vbe si ọna yọ mwẹ urhu hẹ, ne uwa na vbe tama okpia nii ighẹ wa mwẹ ọtẹn ọkpa ọvbehe?” 7Iran wanniẹn wẹẹ, “Te ọmwa nii wa gha nọ ima ẹmwẹ egbe mwa kevbe emwa ima. Erha uwa ye rre agbọn ra? Wa mwẹ ọtẹn okpia ọvbehe ra? Ẹre ima na gha rhie ewanniẹn ye ọta ne ọ nọ. Ma ma rẹn ighẹ ọ gha wẹ ne ima rhie ọtẹn ima gha de.” 8E Juda keghi khama erha iran wẹẹ, “Giẹ ọvbokhan na lele ima gha khian, ne ima muegbe ne a gha khian. Ẹghẹ nii, ne ohanmwẹ gha gbua i ghi rre uwu ima. 9Mẹ gha ye orhiọn mwẹ yan ye ihe ẹre, u ghi kae yọmwẹ urhu. A deghẹ ima dọlegbe rhie ẹre guẹ vbe egbe hẹnnẹdẹn, u ghi gha kpe mwẹ ba ẹre vbe ẹdagbọn mwẹ hia. 10Akpawẹ ẹ i re ne ima na siegbe, ma gha yo rre nẹ igbaeva nian.”
11Erha iran keghi tama iran wẹẹ, “A deghẹ a i miẹn odẹ ọvbehe la vbọ, wa viọ emwi ni maa sẹẹ ne a miẹn vbe otọ na ye ẹkpo zẹ vbe emwi ihaoko gie okpia nii. Ọmọ erhan rezin, owọn kherhe, oziza, ivin urua kevbe almọnd. 12Wa viọ igho ukhukhu eva mwẹ, rhunmwuda te ọ kere ne uwa viọ igho ne u wa miẹn vbe ẹkpo uwa werriegbe, ọ gha kẹe te iran ma rẹn. 13Wa rhie ọtẹn uwa, wa mu egbe ne uwa dọlegbe bu okpia nii gha khian. 14Osanobua Noghodua ne ọ gie okpia nii tohan uwa, ne ọ miẹn ehe na rhie ọtẹn uwa nokpia kevbe Bẹnjamin ne uwa. Zẹvbe ọghomwẹ mwẹ, a deghẹ te a ghi wẹ ne emọ gha wu mwẹ, a gie iran gha wu mwẹ.” 15Ẹre iran nii na viọ emwi ihaoko nii kevbe igho ukhukhu eva, iran kevbe rhie Bẹnjamin ba egbe, iran na mu egbe, iran na gha rrie Igipt, iran na ya ye egbe ne Josẹf miẹn. 16Ugbẹn vbe Josẹf ghi bẹghe Bẹnjamin vbe uwu iran, ọ ke tama ọguọmwadia ne ọ gbearoghe owa irẹn wẹẹ, “Viọ avbe emwa na la owa, gbe aranmwẹ ne u lẹe rhunmwuda mẹ kevbe avbe emwa na gha gba rri evbare vbe avan nẹrẹ.” 17Ọguọmwadia nii keghi ru vbene a tama rẹn, ọ keghi viọ emwa nii gha rrie owa e Josẹf.
18A ghi viọ emwa nii sẹ owa e Josẹf, ohan kegha mu iran, iran kegha ro wẹẹ, “Rhunmwuda igho ne iran werriegbe viọ ye ima ẹkpo ọre iran na viọ ima gha die emwa na. Iran gha dekun ima wan, iran ghi viọ ima oghunmwu, iran ghi miẹn ima ekẹtẹkẹtẹ ima.” 19Iran keghi rhunmwuda ọnii bu ọguọmwadia ne ọ gbearoghe owa e Josẹf, iran tama rẹn vbe onurho wẹẹ, 20“Lahọ enọwanrẹn, ma ka rrie emwa na do dẹ evbare yi. 21Ugbẹn vbe ima ghi sẹ ehe ne a na hẹwẹ, vbe ima ghi rhan ẹkpo, dọmwadẹ ọghọe keghi miẹn igho ẹre vbe unu ẹkpo ẹre, igho ima, a keghi wa kae gba. Ma viọ ẹre werriegbe rre nian. 22Ma ye vbe viọ igho ọvbehe rre ne a ya dẹ evbare. Ma ma rẹn ọmwa ne ọ viọ igho nii ye ima ẹkpo.” 23Ọguọmwadia nii keghi khama iran wẹẹ, “Ghẹ zẹ yọ, ghẹ gie ohan muẹn, Osanobua uwa, Osanobua erha uwa ọre ọ viọ igho ni ye uwa ẹkpo. Igho ne uwa ka hae sọmwẹ obọ.” Ọ na ya rhie Simiọn gie iran.
24Ọguọmwadia nii keghi viọ emwa nii gha die owa e Josẹf, ọ keghi sa amẹ ne iran ya kpe owẹ, Ọ na rhie evbare ne ekẹtẹkẹtẹ iran. 25Iran keghi mwamwa emwi ne iran ra ya ne Josẹf ye otọ khẹ ẹghẹ avan. Iran họn wẹ iran gha guẹe rri evbare. 26Ugbẹn vbe Josẹf ghi sẹ owa, iran keghi viọ emwi ihaoko nii bu ẹre la owa, iran keghi mu ẹko rhu otọ nẹẹn. 27Ọ keghi nọ ẹmwẹ egberranmwẹ iran, ọ keghi nọ iran wẹẹ, “Ediọnmwa ne erha uwa ne uwa ta ẹmwẹ ọnrẹn ma mwẹ vbo? Ọ ye rre agbọn? Egbe rran rẹn?” 28Iran wanniẹn wẹẹ, “Erhamwa ne Ọguọmwadia ruẹ ne ọ mu egbe rriotọ, wa ye rre agbọn, egbe rran rẹn.” Iran keghi diguẹ ya uhunmwu rhanmwẹ otọ nẹẹn.
29Ugbẹn vbe Josẹf ghi bẹghe Bẹnjamin ne ovbiyẹe, ọ wẹẹ, “Ọtẹn uwa nokpia nekherhe ne uwa ta ẹmwẹ ọnrẹn ma mwẹ ọre ọ na khin? Te Osanobua gha fiangbuẹ ovbi mwẹ.” 30Ẹre Josẹf na zẹgiẹ ladian rhunmwuda ibiẹ ọre hia keghi ru woo rhunmwuda ọtiọnrẹn, te ọ ghi te ra viẹ, rhunmwuda ọnii, ọ keghi la ughugha ẹre, ọ na ya viẹ vbe evba. 31Ugbẹn vbe ọ ghi kpe aro nẹ, ọ keghi ladian, ọ keghi dọlọ aro yi vbe uhunmwu, ọ na wẹ ne iran viọ evbare ladian. 32Iran keghi rhie ọghe Josẹf nẹẹn, rẹn ọkpa vbe ehe ughaẹn. A kevbe viọ ọ ghe etiọnrẹn ye eteburu ọvbehe, a kevbe viọ ọghe ivbi Igipt ni deba ẹre gha rrie evbare ne iran vbe ehe ughaẹn. Rhunmwuda iran kae ye awua ne a deba emwa Hibru gha rri evbare. 33A keghi viọ etẹn e Josẹf tota ye eteburu vbe odaro ẹre ọsegbe ọsegbe vbe ọghe ọdiọn, ke egbe enọwanrẹn ya sẹ ọghe ọvbokhan. Iran ghi miẹn vbene a viọ iran tota hẹ iran keghi ye ọyunnuan ghe egbe aro. 34A kegha ke eteburu e Josẹf viọ evbare gie iran. A keghi gie evbare Bẹnjamin ye ukhukhu isẹn sẹ ọghe iran nekpa. Iran keghi guẹe re, guẹe da, ayọn te do gha gbe iran.
Currently Selected:
Gẹnẹsis 43: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996