Ẹksọdọs 4
4
Osanobua Rhie Ẹtin Emwi Ọyunnuan Ne Mosis
1E Mosis keghi wanniẹn tama e Nọyaẹnmwa wẹẹ, “Sokpan a deghẹ ivbi Izrẹl ma ya mwẹ yi vbo, ighẹ iran ma rhie ehọ mẹ ta yi, iran na wẹẹ, ‘E Nọyaẹnmwa ma rhie egbe ma ruẹn.’ Vbe I a gha ghi ru?” 2E Nọyaẹnmwa keghi nọ rẹn wẹẹ, “De emwi ne u da yi nii yi?” Ọ wanniẹn, “Ọkpọ ne a ya tua otọ khian.” 3E Nọyaẹnmwa keghi kha wẹẹ, “Rhie ẹre fi otọ.” E Mosis ghi rhie ẹre fi otọ, ọ keghi khian ẹyẹn, rẹn na lẹ nẹẹn. 4Ẹre Nọyaẹnmwa na tama Mosis wẹẹ, “Ghughẹrre ne u rhie ẹre ẹrhunrhun.” E Mosis keghi gele ghughẹrre, ọ muẹn, ọ ke dọlegbe khian ọkpọ ne a ya tua otọ. 5E Nọyaẹnmwa keghi kha wẹẹ, “U ghi ru ọna ne ivbi Izrẹl miẹn ehe na yayi wẹ, e Nọyaẹnmwa Osanobua avbe erha iran odede, Osanobua Ebraham, Osanobua Aizik kevbe Osanobua ọghe Jekọb gele rhie egbe ma ruẹn.” 6E Nọyaẹnmwa keghi dọlegbe gu e Mosis guan wẹẹ, “Rhie obọ ruẹ ye ototọ ẹwu ruẹ.” Ọ keghi ru vberriọ, ọ ghi rhie ẹre ladian, emianmwẹ keghi gba ẹre, emwi ne ọ fuọfua vbe esia ke salọ ẹe gba. 7E Nọyaẹnmwa keghi kha wẹẹ, “Dọlegbe rhie obọ ruẹ ye uwu ẹwu ruẹ.” Ọ keghi ru vberriọ, ọ ghi rhie ẹre ladian, ọ kegha ye zẹ vbene egbe ẹre nekpa ye. 8E Nọyaẹnmwa keghi kha wẹẹ, “A deghẹ iran ma ya a yi ra deghẹ ọyunnuan ne okaro ma fi iran ekhọe werriẹ, iran gha rhunmwuda ne ogieva na yayi. 9A deghẹ ama eva na ma ye sẹtin ye iran yayi, ighẹ iran ma rhie ehọ nuẹn ta yi, u ghi sa amẹ vbe ẹzẹ Nail, u ghi rhurhẹ ọe ye otọ ne ọ kae, amẹ nii gha khian esagiẹn.”
10Sokpan, e Mosis keghi tama Nọyaẹnmwa wẹẹ, “Lahọ ghẹ gie mwẹ, Nọyaẹnmwa, mẹ ma he guara guan vbe ẹbu ẹdẹ, kevbe ne u vbe ya suẹn gha gu mwẹ guan gha dee, I ma he vbe ye guẹ, Nọyaẹnmwa. I i gua ra guan, te I ta ẹe lọkọlọkọ, I ghi vbe gha ba ẹmwẹ.”
11E Nọyaẹnmwa keghi tama rẹn wẹẹ, “De ọmwa ne ọ rhie unu ọmwa nẹẹn yi? Gha ọ ya ẹe khian odin ra ayin ehọ? Gha ọ rhie adẹghe nẹẹn ra ne ọ ya ẹe rhu aro? Mẹ ne Nọyaẹnmwa nọ. 12Banbanna nian, gha khian, I gha ru iyobọ nuẹn ne u sẹtin gha guan, I gha vbe tama ruẹn ẹmwẹ ne u gha ta.” 13Sokpan e Mosis keghi kha wẹẹ, “Lahọ, ghẹ gui Nọyaẹnmwa, gie ọmwa ọvbehe ne ọ khọn ruẹn.” 14Ohu e Mosis keghi mu e Nọyaẹnmwa, ọ na kha wẹẹ, “Ọtuẹn ighẹ Errọn ne e Livai vbo? I rẹnrẹn ighẹ ọ sẹtin guan ẹsẹse. Wa ghe vbe ọ dee do miọn nian, ẹko gha wa rhiẹnrhiẹn ọẹn vbe ọ gha miọn. 15U sẹtin guẹe guan ne u vbe gha tama rẹn ẹmwẹ ne ọ gha guan. I gha ya uwa eveva obọ ne u wa sẹtin guan. I gha vbe tama uwa eva emwi ne uwa gha ru. 16Rẹn gha sẹtin gha gu avbe emwa nii guan nuẹn, rẹn ọre ọ khian gha re ne ọ guan nuẹn, wẹ ghi do yevbe Osanobua ne ọ gha tama rẹn ẹmwẹ ne ọ gha ta. 17Rhie ọkpọ ne a ya tua otọ khian nii mwẹ obọ, ọnii ọre u ra ya gha winna iwinna ọyunnuan.”
E Mosis Dọlegbe Gha rrie Igipt
18E Mosis keghi dọlegbe bu Jẹtro ne orruan rẹn gha khian, ọ keghi tama rẹn wẹẹ, “Lahọ, gunmwe kpao, I ra bu etẹn mwẹ ni rre Igipt ne I ya ghe a deghẹ iran ye rre agbọn.” E Jẹtro keghi gbe ọ khian ẹdẹ hia nẹẹn.
19E Nọyaẹnmwa keghi tama e Mosis vbe Midian wẹẹ, “Banbanna nian, dọlegbe gha rrie Igipt, iran hia ni te ho ne iran gbe uẹ ua wulo nẹ.” 20E Mosis keghi viọ amwẹ ọnrẹn kevbe avbe ivbi ẹre nikpia, ọ ke viọ iran yan ekẹtẹkẹtẹ, ọ na dọlegbe gha rrie Igipt. Ọ keghi vbe rhie ọkpọ nii ne Osanobua rhie nẹẹn.
21E Nọyaẹnmwa keghi dọlegbe tama e Mosis wẹẹ, “Vbene u ghi na rrie Igipt na nian, ghẹ mwẹ u ma winna avbe iwinna ama ne I rhie ẹtin nuẹn ya gha ru. I gha ya ọba ze vbe udu, rẹn i ra gie emwa nii kpao. 22Ẹghẹ nii, u ghi tama rẹn wẹẹ, vbenian ọre Nọyaẹnmwa khare ‘Izrẹl ọrọre ovbi mwẹ ne ọdiọn. 23I tama ruẹn ne u gie ovbi mwẹ gha khian ne ọ ya ga mwẹ sokpan u keghi he. Wanwanna nian, mẹ gha gbe ovbi uẹ ne okpia ne ọdiọn.’ ”
24Vbe ehe ne iran na bu agọ vbe odẹ, vbe iran rrie Igipt E Nọyaẹnmwa keghi do vba e Mosis, ọ keghi te ra gbe ẹe rua. 25-26E Zipora ne amwẹ ọnrẹn keghi rhie okuta ne ọ mu, ọ keghi fian ovbi ẹre ne okpia ukpikolo, ọ keghi ya ẹe kan owẹ e Mosis. Okhuo nii keghi kha wẹẹ, “Ọdafẹn ọha ọghe esagiẹn ọre u gele khin mwẹ re.” Ẹre Nọyaẹnmwa ghi na sẹ Mosis rae. Ẹghẹ nii ọre ọna kha wẹẹ, “Ọdafẹn ọha ọghe esagiẹn” rhunmwuda arhuẹ nii. 27E Nọyaẹnmwa keghi khama Errọn wẹẹ, “Gha rrie uwu ato ne u ya vba Mosis.” Rẹn keghi ya vba ẹre vbe oke ne ọ huanrẹn, ugbẹn vbe ọ ghi miẹn ọẹn, ọ keghi ya unu soso ẹre unu. 28E Mosis keghi tama Errọn emwi hia ne Osanobua tama rẹn vbe ẹghẹ ne ọ na gie ẹe, ne ọ werriegbe gha rrie Igipt kevbe avbe emwi ọyunnuan ne Nọyaẹnmwa wẹ ne ọ ru. 29E Mosis kevbe Errọn keghi ya si avbe ekaolotu ivbi Izrẹl koko. 30Errọn na ta avbe emwi ọyunnuan nii. 31Iran keghi yayi, ugbẹn vbe iran ghi họn wẹ Nọyaẹnmwa bu iran gha dee, ighẹ ọ vbe miẹn vbe iran sẹ iran usẹ hẹ, iran keghi ya uhunmwu rhanmwẹ otọ, iran na ga Osanobua.
Currently Selected:
Ẹksọdọs 4: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996
