Ẹksọdọs 5
5
E Mosis Kevbe Errọn Vbe Odaro Ọba Igipt
1E Mosis kevbe Errọn keghi bu ọba ọghe Igipt, iran tama rẹn wẹẹ, “E Nọyaẹnmwa khare wẹẹ, ‘Gie emwa mwẹ kpao ne iran ya ru eghọ ugamwẹ mẹ vbe uwu ato.’ ” 2E Fero keghi wanniẹn wẹẹ, “Gha ọre Nọyaẹnmwa yi? Vbọzẹ ne I gha na danmwehọ ẹre yi ne 1 gele gie ivbi Izrẹl kpao. Mẹ ma rẹn Nọyaẹnmwa, mẹ i ra vbe gie Izrẹl gha khian.” 3E Mosis kevbe Errọn keghi wanniẹn wẹẹ, “Osanobua avbe emwa Hibru do miẹn ima. Lahọ gie ima khian okhian ikpẹdẹ eha gha rrie uwu ato ne ima ya zọ ese ghe Nọyaẹnmwa Osanobua ima. A deghẹ ma ma yo, ọ gha ya okuo ra okpe emianmwẹ gbele ima hia a.” 4Ọba keghi tama e Mosis kevbe Errọn wẹẹ, “Vbe uwa ya ẹe kha ne uwa na gie iran gha ya iwinna iran rho eghẹrẹ yi? Wa gie avbe eviọnmwa na gha rrie iwinna iran! 5Ọba ọghe Igipt keghi rhie te ẹe wẹẹ, wa na bun sẹ ivbi Igipt nẹ nian, te uwa ghi ho ne uwa sẹ iwinna rae.”
6Vbe ẹdẹ ne ẹdẹrriọ zẹẹ, ọba ọghe Igipt keghi yi iyi ma avbe iran ni ya avbe eviẹn winna ne ivbi Igipt, kevbe avbe ọkaolotu iwinna ne ivbi Izrẹl wẹẹ, 7“Wa ghẹ ghi dọlegbe viọ irunmwu ne avbe emwa na, zẹ vbe ne uwa te ka ru ẹe, wa gie iran tobọ iran ya gha gualọ. 8Sokpan wa ghi wẹ ne iran gha mannọ inu ibiriki ne iran na ka mannọ de yi, ghẹ fian hin rre hiehiere. Te iwinna ma kpọlọ sẹ, ọnii ọre ọ sii ẹe ne iran na ta ẹe wẹ ne a gie iran ya zọ ese ghe Osanobua iran.” 9Wa ya iran na kakabọ winna sayọ, wa gie iran gha winna vbe ẹghẹ hia, ẹghẹ nii, iran ighi miẹn obọ ya gha danmwehọ ẹmwẹ ohoghe!
10Iran ni ye avbe eviẹn winna kevbe avbe ekaolotu iwinna avbe ivbi Izrẹl, keghi ladian ya khama iran wẹẹ, “Vbenian ọre ọba ọghe Igipt khare. I i ghi viọ irunmwu ne uwa ọvbehe. 11Wa ọre ọ ghi tobọ uwa ya gha gualọ vbe ehe ne uwa rhirhi na miẹn, sokpan wa ghi ye gha mannọ inu ibiriki ne ọ ka khin ẹdẹ.” 12Rhunmwuda ọnii, emwa nii na ragha gba otọ Igipt hia ya gha gualọ irunmwu. 13Iran ni ya eviẹn winna keghi ya tua iran wẹ inu ibiriki ne ivbi Izrẹl ka mannọ vbe ẹdẹ ẹkpo ne a na viọ irunmwu ne iran, ọre iran gha ye vbe mannọ. 14Iran ni ya eviẹn winna ne ọba Igipt kegha gbele avbe ekaolotu iwinna ọghe ivbi Izrẹl ne iran mu iwinna ye ẹre obọ, iran kegha nọ iran wẹẹ, “Vbọzẹ ne uwa ma na mannọ ẹrẹna inu ibiriki ne uwa ka mannọ de ẹdẹ?”
15Avbe ekaolotu iwinna keghi bu ọba Igipt gha khian ya gui ma rẹn wẹẹ, “Umogun, vbe u ghi na ru ima vbenian hẹ yi? 16A i ghi viọ irunmwu ne ima, Sevba a keghi wẹ ne ima ye gha mannọ ibiriki. Banbanna nian, te a ghi gbele ima, obọ ruẹ ọre ọna ye.” 17Ọba keghi wanniẹn wẹẹ, “Wa ọre ọ sii ẹe, avbiẹrẹ wa khin, avbiẹrẹ, ọnii ọ sii ẹe ne uwa na kha wẹẹ, ‘Gie ima ya zọ ese ne Nọyaẹnmwa.’ 18Banbanna nian, wa werriegbe gha rrie iwinna uwa, a i viọ irunmwu ne uwa sokpan te uwa gha mannọ ibiriki gba.”
19Avbe ekaolotu iwinna ivbi Izrẹl ghi họn ewanniẹn ne a rhie ne iran, wẹẹ, “Te uwa gha mannọ ibiriki nii gba ẹdẹgbegbe, iran keghi rẹn wẹ iran la ẹmwẹ.” 20Iran ghi wa kpao vbe ehe ne ọba ye rre iran keghi do vba e Mosis kevbe Errọn ni mudia khẹ iran. 21Iran keghi tama e Mosis kevbe Errọn wẹẹ, “Te Osanobua gha bẹghe emwi ne uwa ru, ne ọ rria uwa ikhi ne uwa na gie ọba kevbe emwa iwinna do gha mu ohu ima, te uwa gie iran miẹn ehe la la ima egbe na, ne iran gha gbele ima an.”
E Mosis Gui Ma E Nọyaẹnmwa
22E Mosis keghi dọlegbe bu e Nọyaẹnmwa, ọ na kha wẹẹ, “Vbọzẹ ne u na ru avbe emwa na khọ? Vbọzẹ ne u na gie mwẹ? 23Ke ne I ya bu ọba Igipt gha dee do ta uhunmwu ne u gie ima rẹ, te ọ ghi ru iran khọ, u ma ru emwi rhọkpa ne iran!”
Currently Selected:
Ẹksọdọs 5: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996
