Ẹksọdọs 37
37
Vbene A Ru Ẹkpẹti Ile He
(Ẹksọdọs 25:10-22)
1E Bezalẹl keghi ya erhan akesia ru Ẹkpẹti Ile nii, ọ kegha re akhuẹn obọ isẹn yan iyeva vbe utanmwẹ kevbe akhuẹn obọ eha irrọvbọgban vbe uvbẹmwẹ, akhuẹn obọ eha irrọvbọgban vbe uyomwẹ. 2Ọ keghi ya igoru ne a ma gua rhu ẹe ke aro kevbe iyeke, ọ na ru ehọ igoru lẹga ẹre. 3Ọ keghi ya igoru ru ẹgba enẹ ne a ya muẹn, ọ keghi kan rẹn lele owẹ ọre enenẹ vbene ẹgba eva na rre obọ ọkpọkpa. 4Ọ keghi ya erhan akesia ru ọkpọ, ọ na ya igoru rhu ẹe. 5Ọ keghi filo ẹe la uwu ẹgba nii vbe obọ eveva ọghe Ẹkpẹti Ile nii. 6Ọ keghi ru ugue ọghe igoru ne a ma gua, akhuẹn obọ isẹn-ya iyeva vbe utanmwẹ kevbe akhuẹn obọ eha irrọvbọgban vbe uvbẹmwẹ. 7Ọ keghi ru emwi nọ zẹ ifuẹn eva ne a ya igoru ne a ya umọmọ dunmwu ru ye okhiẹ ọkpọkpa ọghe ugue ẹre nii. 8Ọkpa vbe okhiẹ ọkpọkpa. Ọ keghi ru ẹe vbe ne iran vbe ugue nii na wa gha re ọkpa. 9Avbe emwi nii zẹlẹ ifuẹn nii keghi rhan ifuẹn iran ghe odukhunmwu vbene iran gha na degue ẹkpẹti nii. Iran keghi mu aro da egbe, iran kegha ghe ugue ẹkpẹti nii.
Vbene A Ya Ru Eteburu Ọghe Ebrẹd Ne A Ya Zẹ Ọhẹ Gie Osa Hẹ
(Ẹksọdọs 25:23-30)
10Ọ keghi ya erhan akesia ru eteburu ne ọ rrọọ, ọ kegha re akhuẹn obọ enẹ irrọvbiyeva vbe utanmwẹ ọnrẹn, eva irrọvbugie vbe uvbẹmwẹ ọnrẹn kevbe akhuẹn obọ ehairrọvbọgban vbe uyomwẹ.
11Ọ keghi ya igoru ne a ma gua rhu ẹe, ọ na vbe ya igoru ru ehọ yọ lẹga. 12Ọ keghi vbe ru akhuẹn ne ọ re akhuẹn obọ enẹ lẹga ẹre. 13Ọ na ru ẹgba ne a ya muẹn enẹ yọ, ọ keghi viọ ẹre lele ẹre igie enenẹ vbe ehe ne a na viọ owẹ yọ. 14Ẹgba na ọre ọ de avbe ọkpọ na ya mu nene eteburu yi, a keghi viọ ẹre sikẹ akhuẹn ọnrẹn. 15Ọ keghi ya erhan akesia ru avbe ọkpọ ni rrọọ, ọ na ya igoru rhu iran.
16Ọ keghi vbe ya igoru ne a ma gua ru avbe ọkpan viọ ye eteburu nii, deba avbe ukpu, uru kevbe ọkpan nekhua ne a ya gha ru izọhẹ emwi ne a wọn.
Vbene A Ya Ru Erhan Ọmukpa Hẹ
(Ẹksọdọs 25:31-40)
17Ọ keghi ya igoru ne a ma gua ru erhan ọmukpa, ọ keghi ya igoru ne a ya umọmọ dunmwu ru ẹzi ẹre kevbe erhan rẹn. Avbe obobo ne a ya te ẹre kevbe ukpu kevbe ebe obobo, keghi wa gha re ọkpa deba ẹre. 18Abọ ehan ọre ọ si ke ugbefẹn ọnrẹn ladian, eveva vbe obọ ọkpọkpa. 19Ọkpọkpa vbe uwu abọ ehan nii kegha mwẹ obobo ne a ya te ẹre eheha, ọ keghi zegbe zẹ vbe obobo almọnd kevbe ukhu kevbe ebe.
20Erhan rẹn ighẹ erhan ọmukpa nii keghi vbe mwẹ obobo ne a ya te ẹre enẹ ne ọ zegbe vbe obobo almọnd kevbe ukhu kevbe ebe obobo ẹre. 21Ukhu ọkpọkpa kegha rre ototọ abọ eva. 22Ukhu ẹre kevbe avbe abọ ẹre keghi wa gha re ọkpa ba erhan ọmukpa, ohoho igoru ne a ma gua ne a ya umọmọ dunmwu ọre a ya ru ẹe. 23Ọ keghi ru ukpa ihinrọn ọghe erhan ọmukpa nii, ọ keghi ya igoru ne ama gua ru ọkpan nọ vbe gha re na zẹ ọre ukpẹ. 24Uwan isẹn irrọvbiyene ọghe igoru ne a ma gua ọre ọ loro ya ru erhan ọmukpa nii ke emwi nii lele ẹe khian.
Vbene A Ya Ru Aka Eturari Hẹ
(Ẹksọdọs 30:1-5)
25Ọ keghi ya erhan akesia ru aka ne a na giẹn eturari. Umwọmwẹ nọ vbe igienenẹ, akhuẹn obọ eva irrọvbugie vbe utanmwẹ, akhuẹn obọ eva irrọvbugie vbe uvbẹmwẹ, akhuẹn obọ eha yan ọgban vbe uyomwẹ. Ehe ne ọ na vbẹ ladian keghi ye gha re ọkpa ba ọkpa ba ẹre. 26Ọ keghi ya igoru ne ama gua rhu odukhunmwu ẹnrẹn vbe igienenẹ, ọ na ya avbe igoru gbe oroka lẹga ẹre. 27Ọ keghi vbe ru ẹgba ne a ya muẹn eva yọ, ọ na sele ẹe ginna ẹn vbe ototọ oroka ne ọ gbe lẹga ẹre nii vbe obọ eveva, ọ keghi da okpa ne a ya muẹn yi. 28Ọ keghi ya erhan akesia ru ọkpọ nii, ọ na ya igoru rhu ẹe.
Vbene A Ru Ori Ne A Nọnọ Ye Emwa Uhunmwu Kevbe Eturari He
(Ẹksọdọs 30:22-38)
29Ọ keghi vbe ru ori ne ọ huanrẹn ne a nọnọ ye emwa uhunmwu kevbe eturari ne a ma gua nọ winhin, emwi ne a gua re zẹ vbe ne iran ni ru ori ne ọ winhin gha gua ẹre zẹẹ.
Currently Selected:
Ẹksọdọs 37: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996
