Ẹksọdọs 36
36
1“E Bezalẹl, Oholiab kevbe emwa ifuẹro hia ne Nọyaẹnmwa rhie irẹnmwi kevbe ẹwaẹn na, ni vbe rẹn emwi hia ne a gha ya bọ ehe ne ne ọ huanrẹn nii, iran ghi ru emwi hia zẹ vbene Nọyaẹnmwa ta ẹe.”
Emwa Nii Zẹ Ọhẹ Nibun Rre
2E Mosis keghi tie Bezalẹl, Oholiab kevbe emwa ifuẹro hia ne Nọyaẹnmwa rhie ẹtin na, kevbe emwa hia ni mu egbe ne iran ya ru iyobọ, ọ tama iran wẹ ne iran suẹn iwinna. 3Iran keghi miẹn e Mosis emwi izọhẹ hia ne ivbi Izrẹl viọ rre ne a ya bọ owa ne ọ huanrẹn nii. Ivbi Izrẹl keghi ye gha viọ emwi izọhẹ iran gie Mosis owiowiẹ. 4Ẹre iran ni fuẹro nii, ni winna vbe iwinna ọghe owa ne ọ huanrẹn ne a bọ nii, keghi sẹ iwinna edọmwadẹ ọghọe rae, iran na gha dee. 5Iran tama e Mosis wẹẹ, “Emwi ne emwa nii viọ rre bun gbe, ọ sẹẹ emwi ne a gha ya winna iwinna ne Nọyaẹnmwa wẹ ne a winna.”
6Ẹre Mosis ghi na wẹ ne a ta ẹe gba agọ hia wẹẹ, “Omwa rhọkpa, ọre okpia ra okhuo nọ, ghẹ ghi viọ emwi rre ne a ya bọ owa ne ọ huanrẹn nii.” Ọna ọre ọ ghi ye emwa nii da obọ emwi ne a viọ rre yi. 7Emwi ne iran viọ rre keghi bun gberra ne a gha lo ya winna iwinna nii fo.
Ubọmwẹ Owa Ukpọn Ehe Ne Nọyaẹnmwa Ye
(Ẹksọdọs 26:1-37)
8Iran ni ghi fuẹro sẹ vbe uwu iran nii winna nene iwinna kegha bọ Owa Ukpọn nii. Igbu ukpọn igbe ne a ya eto ovbiohuẹ ne vbukhẹẹ ne a mẹ, ne raghoragho, ne ọ vboro rhan-an, kevbe eto ohuan ne a ye emwi ni zẹ ifuẹn do ona yi. 9Ọkpọkpa vbe avbe igbu ni kegha re ọkpọ iwenẹ vbe utanmwẹ kevbe ọkpọ eva vbe uvbẹmwẹ, ukpọlọmwẹ ọkpa ọre ehia khin. 10Ọ keghi dọlọ isẹn vbe uwu igbu nii kugbe ye ọkpa, ọ keghi vbe dọlọ ne isẹn nii dekẹe ye ọvbehe.
11Ọ keghi halọ uvun ne a dọlọ ukpọn ne raghoragho mu lẹga ehọ ọghe ne ọ ke ore vbe ọkpọkpa. 12Ọ keghi do uvun ekigbe siyeha ye ukpọn nokaro, ekigbe siyeha kevbe gha rre ne ogieva vbe ne ọ na gua ẹe ro. 13Ọ keghi sẹ uvun ekigbe siyeha ọghe igoru, evba ọre ọna dọlọ eveva kugbe. Ọna kegha re owa ukpọn ehe ne Nọyaẹnmwa ye ọkpa. 14Ọ keghi vbe do igbu owọrọ ọghe eto ẹwe ne ọ ya gue owa ukpọn ne a dia nii. 15Ọkpọkpa vbe igbu nii kegha re ọkpọ ekesugie vbe utanmwẹ kevbe ọkpọ eva vbe uvbẹmwẹ, ehia kegha re umwọmwẹ vbe ukpọlọmwẹ. 16Ọ keghi dọlọ isẹn kugbe ye ọkpa, ọ keghi vbe dọlọ ehan nii dekẹe ye ọkpa.
17Ọ keghi do uvun ekigbe siyeha ya ehọ igbu ne okiekie vbe enokaro kevbe uvun ekigbe siyeha vbe enọkpa. 18Ọ keghi ru aban oze ekigbe siyeha ne ọ ya dee eveva kugbe ne ọ do gha re owa ukpọn ọkpa. 19Ọ keghi ya ohian ogho ne ọ baa se ugue yan owa ukpọn nii kevbe ohian ẹmila ne mose ne a gha wa yan ọnii.
20Ọ keghi ya erhan akasia ru ọkpọ ni mudia kpasi ọghe Owa Ukpọn. 21Ọ keghi ru edọnmwẹ ọnrẹn ọkpọkpa ne ọ gha re ibata ekesugie vbe utanmwẹ kevbe akhuẹn obọ eha irrọvbọgban vbe uvbẹmwẹ. 22Ọ keghi vbe ya abọ ọkpa fian te eveva ne a ya gha de iran kugbe ọ keghi ru edọnmwẹ ọghe Owa Ukpọn ne a dia nii, deba ne avbe rhie te ẹe hia. 23Ọ keghi ru edọnmwẹ ugie ye odẹ ekẹn vbọ. 24Ọ kevbe ru ẹzi ẹre iyeva ọghe esiliva ne a viọ ye ototọ ẹre, ẹzi eva vbe edọnmwẹ ọkpọkpa. 25Iran keghi ru edọnmwẹ ugie ye odẹ ahọ ọghe owa ukpọn, 26kevbe emwi ne a mu ẹẹn yan ọghe esiliva iyeva, eveva vbe ẹzi edọnmwẹ ọkpọkpa. 27Vbe iyeke Owa Ukpọn nii, vbe ascfẹn orrie vbọ, ọ keghi vbe ru edọnmwẹ ehan. 28Ọ kevbe ru edọnmwẹ eva ye igọgọ odieke Owa Ukpọn nii. 29Ẹdọnmwẹ igọgọ na, a keghi ku ẹe gbe vbe ototọ, a keghi vbe ku ẹe gbe gha khian ya sẹ odukhunmwu, ya sẹ ọmwa nokaro vbene a ya ru edọnmwẹ eva nii rre igọgọ ẹre, ọre ọnii khin. 30Ọ nii rhie ma wẹ edọnmwẹ erẹnrẹn ọre ọ gha rrọọ kevbe wẹ ẹzi enẹ irrọvbugie ọghe esiliva eva vbe ototọ ọkpọkpa.
31Ọ keghi vbe ya erha akasia ru erhan ne a mu gbe odẹ, isẹn ghi gha rre edọnmwẹ vbe asefẹn ọkpa ọghe Owa Ukpọn nii. 32Isẹn vbe edọnmwẹ ne ọ rre asefẹn nọkpa kevbe isẹn vbe asefẹn orrie vbe iyeke ẹre. 33Ọ keghi ru ogba ugbugbe ẹre ne ọ sẹ adesẹneva ideghedeghe edọnmwẹ nii ne ọ ke obọkpa ya sẹ obọ nọkpa. 34Ọ keghi ya igoru rhu edọnmwẹ nii, ọ na vbe viọ ẹgba igoru lele ẹe ne ọ mu ogba ugbugbe nii ne a vbe ya igoru rhu mwẹ.
35Ọ keghi ya eto ohuan ne raghoragho, ne ọ vboro rhan-an kevbe ne ọ baa, ru ukpọn onurho ẹre deba eto ovbiohuẹ ne vbukhẹẹ ne a mẹ, ne a vbe ye ama avbe emwi ni zẹlẹ ifuẹn mu ona lele.
36Ọ keghi ya erhan akesia enẹ ru ọkpọ ne ọ da nene ukpọn onurho yi, a ya igoru rhu ẹe, a keghi vbe viọ aban igoru lele ẹe, ọ kegha re ẹzi esiliva enẹ ne ọ da avbe ọkpọ nii yi. 37Ọ keghi ya eto ohuan ne raghoragho, ne ọ vboro rhan-an kevbe ne ọ baa deba eto ovbiohuẹ ne vbukhẹẹ ne a do ama ya zẹ ose yi ru ukpọn onurho Owa Ukpọn nii. 38Ọ keghi ru ọkpọ isẹn ne a kan aban lele, ọ keghi ya igoru rhu ikinnegbe ẹre kevbe odukhunmwu ẹnrẹn, ọ keghi ru ẹzi isẹn ye nene ọkpọ.
Currently Selected:
Ẹksọdọs 36: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996
