Ẹksọdọs 26
26
Owa Ukpọn Ọghe Nọyaẹnmwa
(Ẹksọdọs 36:8-38)
1“Wa ghi ya igbu igbe ọghe eto ovbiohuẹ ne a mẹ, bọ owa ukpọn ne imẹ dia, deba eto ohuan ne raghoragho, ne ọ vboro kian an kevbe ne ọ baa. A ghi munọ ona avbe emwi nii zẹ ifuẹn ye avbe igbu ukpọn na mose mose. 2Ọkpọkpa vbe igbu ukpọn ghi gha re ọkpọ iwenẹ vbe utanmwẹ kevbe ọkpọ eva vbe uvbẹmwẹ, ẹ i vbe kpọlọ sẹ egbe. 3A ghi dọlọ isẹn kugbe ke a ghi vbe dọlọ isẹn nọkpa vberriọ. 4U ghi ya ukpọn ne raghoragho ru ehe ne a fi emwi la lele ehọ ẹre ne ọ mu da ore vbe ọkpọkpa vbọ. 5Ru ehe ne a fi emwi la ekigbe siyeha ye igbu nokaro ọghe nokaro kevbe ekigbe siyeha ne ọ gua ẹe ro ye igbu ne ogieva. 6U ghi ru aban igoru ekigbesiyeha ne ọ gha de e eva kugbe ne ọ miẹn ehe na khian ehe ne a dia ọkpa kẹkan.
7“U ghi ya eto ẹwe do ukpọn igbu owọrọ ne a ya bọ owa ukpọn yan ehe ne a dia nii. 8Ọkpọkpa vbọ ghi gha re ọkpọ ekesugie vbe utanmwẹ, ọkpọ eva vbe uvbẹmwẹ, ehia ghi vbe gha re ọkpa vbe ukpọlọmwẹ. 9U ghi sẹ isẹn kugbe ne ọ gha re ọkpa, ehan nii dekẹe ghi vbe gha re ọkpa. U ghi bun ẹre eva yan egbe yan odaro owa ukpọn nii ighẹ ne a ye igbu ehan sẹ vbọ nii. 10U ghi ru uvun na fi emwi la ekigbesiyeha lele ehọ ọghe ne okiekie nii. Kevbe ekigbesiyeha ye enọkpa. 11U ghi ru aban ọghe ose ekigbesiyeha ne u viọ iran ye uvun ekigbesiyeha nii ne a ya de ukhukhu eva nii kugbe ne iran do gha re owa ukpọn ọkpa. 12Obọ ọkpa vbe igbu ne a mu yan owa ukpọn nii ghi tuo yan iyeke ehe ne a dia nii. 13Ọkpa ukpọn ne ọ ghi dekẹe vbe obọ e eva ọghe utanmwẹ owa ukpọn nii, ghi tuo ghe otọ vbe asefẹn ehe ne a dia nii ne ọ de gue ẹre. 14U ghi ru emwi ne a ya gue ẹre eva ọvbehe, ọkpa ọghe ohian ogho ne a ya ẹmu ne ọ baa gbe, kevbe nọkpa ohian ne vbukhẹẹ, ne a ya gha gue ẹre vbe iyeke ẹre.
15“U ghi ru edọnmwẹ ne ọ mudia kpasi ne a ya erhan akesia ru ne ehe ne a dia nii. 16Edọnmwẹ ọkpọkpa ghi gha re ibata ekesugie vbe utanmwẹ kevbe akhuẹn obọ eha irrọvbọgban vbe uvbẹmwẹ. 17A ghi vbe rhie ne a fian te ẹe umwọmwẹ ye e eva ne edọnmwẹ nii miẹn ehe na gie a gha si kugbe. Omwa ne u gha ya ru edọnmwẹ ọghe ehe ne a dia nii ọre ọna khin. 18U ghi ru ugie vbe odẹ ekẹn ọnrẹn. 19U ghi ru owẹ iyeva ọghe esiliva yọ ne ọ gha rre ototọ ẹre, owẹ eva ne edọnmwẹ ọkpọkpa ne ọ da orhiete eveva na yi. 20U ghi ru edọnmwẹ ugie ye odẹ okuọ ehe ne a dia nii. 21U ghi ru edọnmwẹ ugie kevbe owẹ esiliva iyeva, eva vbe ototọ edọnmwẹ ọkpọkpa. 22Vbe iyeke owa ukpọn nii vbe odẹ orrie ẹre, u ghi ru edọnmwẹ ehan. 23Kevbe edọnmwẹ eva ye ugẹngẹn ne ọ rre iyeke owa ukpọn nii. 24Vbe edọnmwẹ ugẹngẹn na, a ghi ku ehia gbe vbe ototọ, a ghi sẹ ẹe kugbe wa ya sẹ odukhunmwu vbe ehe ne ẹgba nokaro ye. Vbene a gha ru edọnmwẹ eva nii rre ugẹngẹn hẹ ọre ọna khin. 25Edọnmwẹ erẹnrẹn ọre ọ khian gha rrọọ, ke ẹe kevbe owẹ esiliva enẹ irrọvbugie, eva vbe ọkpọkpa.
26“U ghi vbe ya erhan akesia ru erhan ne a mu gbe ẹre ekesugie, isẹn ghi gha rre edọnmwẹ ne ọ rre obọkpa ọghe owa ukpọn nii. 27Isẹn ghi vbe gha rre obọ nọkpa, isẹn ghi vbe gha rre odẹ orrie ẹre vbe iyeke ẹre. 28Erhan ne a mu gbe ẹre adesẹneva, vbe a gha fian uyomwẹ ọnrẹn ye iheva, ghi wa la ẹe khinkhian ke obọkpa ya sẹ obọ ne ogieva. 29U ghi ya igoru rhu edọnmwẹ na, u ghi vbe viọ ẹgba ọghe igoru yọ ne ọ gha da erhan ne a ya gba yi mwẹ. U ghi vbe ya igoru rhu ena. 30Ọnii nọ wẹ te u ra wa bọ owa ukpọn nii zẹ vbe ne a mu ma ruẹn vbe uhunmwu oke.
31“U ghi ru ukpọn onurho ne a ya eto aranmwẹ ne raghoragho ne ọ vboro kian an, kevbe ne ọ baa, kevbe eto ovbiohuẹ ne a do sẹ. U ghi do ama avbe emwi nii zẹ ifuẹn mose mose lele ẹe. 32U ghi de ẹre mu ọkpọ ne a ya erhan akesia ru ne a vbe ya igoru rhu, ne a vbe viọ aban lele, ne a vbe ya owẹ esiliva enẹ mu mudia. 33U ghi viọ avbe ukpọn onurho nii la ototọ avbe aban nii vbe okpo ọghe avbe owa ukpọn nii. U ghi mu ẹkpẹti ne uhanhan ayere nii ye ye iyeke ukpọn onurho nii. Ukpọn onurho nii ghi fian ehe ne ọ Huanrẹn hin ehe ne ọ Huan sẹ ehia nii. 34Ya ugue gue Ẹkpẹti Ile. 35U ghi mu eteburu ye vbe a ma hie sẹ ukpọn onurho. U ghi mu erhan ọmukpa ye odẹ ọghe Owa Ukpọn nii ne ọ mu aro da eteburu ne ọ rre odẹ okuọ ẹre.
36“U ghi ya eto aranmwẹ ne raghoragho, ne ọ vboro kian-an. kevbe ne ọ baa ne a do kevbe ne a munọ emwi ona ne a do ya zẹ ose yi sẹ ukpọn onurho ye ehe ne a la la uwu owa ukpọn nii. 37U ghi vbe ya erhan akesia ru ọkpọ isẹn ọghe ukpọn onurho na, a ghi ya igoru rhu ẹe, a ghi viọ aban igoru lele ẹe. U ghi ya oze ru owẹ isẹn ye avbe ọkpọ na.
Currently Selected:
Ẹksọdọs 26: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996
