Ẹksọdọs 25
25
Emwi Izọhẹ Ọghe ọgua Osa
(Ẹksọdọs 35:4-9)
1E Nọyaẹnmwa keghi tama e Mosis, 2“Tama ivbi Izrẹl ne iran rhie izọhẹ gu mwẹ. Miẹn iran emwi ne iran a rhirhi ya ru izọhẹ rre. 3Emwi ne iran gha ya zẹ ọhẹ rre ọre ena khin, igoru, esiliva kevbe oze. 4Eto aranmwẹ ne raghoragho, ne ọ baa kevbe ne ọ vboro yan an, eto ovbiohuẹ ne yẹnghẹẹn, ukpọn ne a ya eto ewe ru. 5Ohian ogho, ne a ya ẹmu ne o baa mu, ohian ẹmila ne vbukhẹẹ, ẹkpo umẹ. 6Ofigbọn ne a sa ye ukpa, emwi nii winhin ne a gha ya gua ofigbọn ne a nọnọ ye emwa uhunmwu kevbe eturari ne ọ winhin ẹsẹse.
7“Ikpẹrọnmwọ ne mosee kevbe ikpẹrọnmwọ ne a ra ya te adaghọ ogiohẹn egbe, kevbe ne a ra viọ ye uhanhan ẹwẹe ọghe ogiohẹn. 8Iran ghi bọ ọgua Osa mẹ ne I mẹ miẹn ehe na gha rre ehe ne iran ye. 9U ghi ru ehe ne a dia na kevbe emwi ne a ya te ẹre zẹ vbene I gie ẹre ma ruẹn.
Ẹkpẹti Ile
(Ẹksọdọs 37:1-9)
10“Ye erhan akesia ru ẹkpẹti ne ọ gha re akhuẹn obọ isẹnyan-iyeva vbe utanmwẹ, akhuẹn obọ ehairrọvbọgban vbe uvbẹmwẹ, kevbe ehairrọvbọgban uyomwẹ. 11U ghi ya igoru na ma gua rhu ẹe vbe uwu ẹre kevbe iyeke ẹre, u ghi vbe ya igoru ru ehọ ẹre lẹga. 12Wa ghi vbe ru ẹgba igoru ne a gha ya gha muẹn, so ye ẹre igie enenẹ, ẹgba eva vbe obọ ọkpọkpa. 13Wa ghi ya erhan akesia ru ọkpọ, wa ghi ya igoru rhu ẹe. 14Wa ghi fi ọkpọ la ẹgba vbe obọ ọghe ẹkpẹti ne a ya gha muẹn. 15A ghi sẹ avbe ọkpọ nii rae ye uwu ẹgba nii, a i vbe yuo ẹre ladian vbọ.
16“U ghi viọ avbe uhanhan okuta ne a gbẹnnẹ avbe uhi nii yi ne I gha mu nuẹn ye uwu ẹkpẹti nii. 17U ghi ya igoru ne ama gua ru ugue yọ, ọ ghi gha re akhuẹn obọ isẹn yan iyeva vbe utanmwẹ kevbe akhuẹn obọ ehairrọvbe ọgban vbe uvbẹmwẹ. 18Ya igoru ne a ya umọmọ dunmwu ru emwi nii zẹ ifuẹn eva. 19Ọkpọkpa vbe obọ ọkpọkpa ọghe ugue nii. U ghi ru ẹe vbene a gha na miẹn wẹ te iran vbe ẹkpẹti nii wa gha re okpa. 20Avbe emwi nii zẹ ifuẹn nii ghi viọ aro da egbe. Ifuẹn ne iran rhanrẹn ghi degue ẹkpẹti nii. 21U ghi viọ uhanhan okuta eveva nii ye uwu ẹkpẹti na, ne u vbe mu ugue ẹre rhu ẹe. 22Evba I gha na do gha miẹn ruẹn, I gha vbe mudia ye ugue Ẹkpẹti ne, I do rhie uhi mwẹ hia ne uwa ke adesẹneva emwi nii nẹ ifuẹn nii gha dee, gie ivbi Izrẹl.
Eteburu Ọghe Ebrẹd Ne A Ya Zẹ Ọhẹ Gie Osanobua
(Ẹksọdọs 37:10-16)
23“Ya erhan akesia ru eteburu ọkpa ne ọ gha re akhuẹn obọ ehan yan ọgban vbe utanmwẹ, evairrọvbugie vbe uvbẹmwẹ, kevbe ehairrọvbọgban vbe uyomwẹ. 24Ya igoru ne ama gua rhu ẹe ne u vbe ru okhiẹ igoru yọ. 25Vbe ru ehọ ẹre yọ ne ọ gha re akhuẹn obọ eha vbe uvbẹmwẹ lẹga ẹre, ọ ghi gha re ọghe igoru. 26Vbe ru ẹgba igoru ne a ya muẹn ye ọre igienenẹ vbe dọmwadẹ ehe ne owẹ ọre ye. 27Avbe ẹgba ne a ra gha fi erhan la ya muẹn nii, a ghi viọ iran sikẹ ehọ ẹre. 28U ghi ya erhan akesia ru ogba na, ne u ya igoru rhu ẹe. 29U ghi ru avbe ọkpan, ukpu, uru kevbe agbada ne a gha ya gha ru izọhẹ ọghe ayọn. Ena hia, igoru ne ama gua ọre a gha ya ruẹ. 30A ghi mu eteburu nii, ye odaro Ẹkpẹti Ile nii, Ebrẹd iruemwi, ne a ya ru izọhẹ gunmwẹ ghi gha rre uhunmwu eteburu nii vbe ẹghẹ hia.
Erhan Ọmukpa
(Ẹksọdọs 37:17-24)
31“Ya igoru ne ama gua ru erhan ọmukpa, u ghi ya igoru ne a ya umọmọ dunmwu ru ẹzi ẹre kevbe erhan rẹn; avbe obobo ne a ya zẹ ose yọ, deba ukhu kevbe ifuẹn obobo ẹre, ehia ghi wa gha re erhan ọkpa deba irẹn. 32Ọ ghi gha mwẹ abọ ehan vbe asefẹn ọnrẹn, eheha vbe efẹn ọkpa. 33Ọkpọkpa vbe nene abọ ehan na, ghi gha mwẹ obobo eheha ne a ya te ẹre egbe ne ọ gha ye vbe obobo almọnd kevbe ukhu kevbe ebe obobo. 34Ọkpọ ọghe erhan ọmukpa nii ghi gha mwẹ obobo enẹ ne a ya re ẹre ne ọ yevbe obobo almọnd ke ẹe kevbe ukhu kevbe ebe obobo. 35Ukhu ọkpọkpa ghi gha rre ototọ abọ ọkpọkpa vbe uwu abọ agbeva eheha nii. 36Avbe ukhu nii kevbe abọ nii ghi ye gha re ọkpa yaba erhan ọmukpa nii. Ọ ghi gha re igoru ne ama gua ne a ya umọmọ dunmwu. 37Ru ukpa ihinrọn viọ ye erhan ọmukpa nii, u ghi mwamwa ẹn yọ vbene iran gha na gha rhie awanwan iran ghe odaro.
38“U ghi ya igoru ne ama gua ru uyẹngbe ẹre kevbe emwi ne a ya dọlọ ukpa yi ne ọ rrọọ. 39U ghi ya igoru ne ọ sẹ uwan ekigbesiyenẹ ru erhan ọmukpa na kevbe emwi nekpa hia fẹẹrẹ ne a lo vbe evba. 40U ghi gbe aro ke otọ ne u ru ẹe zẹ vbene a gie ma ruẹn vbe uhunmwu oke.
Currently Selected:
Ẹksọdọs 25: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996
