Ẹksọdọs 24
24
A Yi Ile Nii Okhi
1E Nọyaẹnmwa keghi tama e Mosis nẹ wẹẹ, “Bu mwẹ gha die uhunmwu oke, ke uwẹ kevbe Errọn, e Nadab, Abihu kevbe ediọn ekigbe siyenẹ vbe ivbi Izrẹl, ne uwa ya uhunmwu rhanmwẹ otọ vbe urria, ne uwa ga mwẹ. 2Wẹ ne Mosis ọkpa ọre ọ gha sikẹ mwẹ; wẹ ne iran nekpa ghẹ sikẹ mwẹ, emwa nii ghẹ vbe lele ẹe hin uhunmwu oke.”
3E Mosis keghi ya gu emwa nii guan vbene Nọyaẹnmwa kha hẹ kevbe iyi ne ọ vbe yi. Emwa nii hia keghi koko wanniẹn wẹẹ, “Ma gha ru emwikemwi ne Nọyaẹnmwa kha re.” 4E Mosis keghi gbẹnnẹ iyi ọghe Nọyaẹnmwa hia ye otọ. Owiẹ vbe ẹdẹ ne ọ lele ẹe, ọ keghi gba aka ye ototọ oke nii, ọ keghi vbe viọ okuta iyama iweva ye evba ne ẹwae iweva nii rre Izrẹl. 5Rẹn keghi gie igbama vbe uwu ivbi Izrẹl, iran na ya zọ ese ne a wa giẹn uan, iran na vbe gbele ẹkhuia ẹmila ya zọ ese ghe Nọyaẹnmwa, zẹvbe izọese ọghe isara. 6E Mosis da obọkpa ọghe esagiẹn iran ye ọkpan; ọ na mu obọ nọkpa rhurhẹ yan aka. 7Ẹre ọna mu ebe ile, ọ na tie ẹre ladian ye emwa nii hia ehọ, iran na kha wẹẹ, “Ma gha ru zẹ vbe iyi hia ne Nọyaẹnmwa yi, ma gha họn ẹmwẹ nẹẹn,” 8Ẹre Mosis na mu esagiẹn ne ọ rre ọkpan nii ọ na rhurhẹ ọe yan emwa nii, ọ na kha wẹẹ, “Esagiẹn na ọre a ya yi ile ne Nọyaẹnmwa gu uwa ta okhi vbe ẹghẹ ne ọ na yi iyi na hia ne uwa.”
9E Mosis, Errọn, e Nadab, Abihu kevbe olotu ekigbesiyenẹ vbe uwu Izrẹl keghi hin oke nii gha khian. 10Iran keghi bẹghe Osanobua Izrẹl. Otọe vbe ehe ne owẹ ọre ye keghi yevbe otọ owa ne a ya okuta ẹrọnmwọ ne raghoragho ru, ọ keghi de wainwain ze vbe iso. 11Osanobua ma ru avbe ọkaolotu Izrẹl emwi ikuangbe. Iran dẹghe Osanobua iran keghi koko re, iran na vbe koko da.
E Mosis Vbe Uhunmwu Oke Sainai
12E Nọyaẹnmwa keghi tama e Mosis wẹẹ, “Hin odukhunmwu oke bu mwẹ gha dee ne u do mudia mwa. Mẹ gha viọ uhanhan okuta eva ne avbe iyi kevbe uhi nii ye nuẹn, emwi ne imẹ gbẹnnẹ ne a ya gha ma avbe emwa na emwi.” 13E Mosis keghi rhie Jọsua ne ọguọmwadia ẹre ba egbe, iran ke hin uhunmwu oke Osanobua. 14E Mosis keghi tama avbe ọkaolotu wẹẹ, “Wa mudia khẹ ima vbe agọ vbe emwa ma te rre. Errọn kevbe Họ gu uwa rre emwana, emwa nii mwẹ ohiẹn ne a ra bu sẹtin gha mu bu iran.” 15E Mosis keghi hin uhunmwu oke Sainai, okuku keghi degue oke nii. 16-17Uyi ọghe Nọyaẹnmwa keghi tuo rre yan oke nii. Ivbi Izrẹl gha ghẹ ẹre awanwan nii keghi yevbe erhẹn ne ọ wa giẹn vbe uhunmwu oke nii, okuku keghi degue ẹre la ikpẹdẹ ehan, vbe ikpẹdẹ ne ne ogihinrọn, e Nọyaẹnmwa keghi datie Mosis ke adesẹneva okuku nii gha dee. 18E Mosis keghi la uwu okuku nii, ọ na hin uhunmwu oke. O kegha rre evba vbe avan iyeva kevbe asọn iyeva.
Currently Selected:
Ẹksọdọs 24: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996
