Svun Marcos 4
4
Ja' lo'il scuenta jvajtrigo
(Mt 13.1-23; Lc 8.4-15)
1Ichanubtasvan noxtoc ta ti'nab ti Jesuse. Ta scuenta ti ep tajmec istsob sba li crixchanoetique, ti Jesuse i'och ta canova, ti tey ta nabe, tey och chotluc, ti crixchanoetique tey lamal icomic ta ti'nab. 2Yech'o un tey lic xchanubtas ta joy c'op.
Ja' yech ichanubtasvan chac li'i: 3«A'yic me li c'usi chcale: Oy jun vinic ba svaj strigo. 4Ti c'alal isvaje, oy jlom ta be ic'ot. Ital mutetic, istam slo'ic. 5Oy jlom ta tontic ic'ot, ti bu ch'abal lec slumale. Ora ivoc' yu'un muc' bu pim slumal; 6Pero c'alal iloc'tal c'ac'ale ora ic'anub, itaquij yu'un ch'abal lec yisim. 7Oy jlom ic'ot ta ch'ixtic. Ti c'alal ich'i li ch'ixe, iyolontaj, ja' ich'ajub o, muc' bu ibeq'uin. 8Oy jlom ta lequil balamil ic'ot, ich'i, lec ibeq'uin; oy jlom iyac' lajuneb xcha'vinic (30), oy iyac' oxvinic (60), oy iyac' cien.»
9Ti Jesuse xi to iyal noxtoque: «Ti much'u xa'ie, ac'u ya'ibe lec smelol.» ―Xi.
Ja' li' yaloj ti c'u yu'un ti naca ta joyc'op ichanubtasvan ti Jesuse
(Mt 13.10-17; Lc 8.9-10)
10Ta más ts'acal ti c'alal stuc xa'ox tey ti Jesuse, ti much'utic tey nopolique xchi'uc li lajchavo' yajchanc'optaque, isjac'beic c'usi smelol ti c'usitic iyal ta joyc'ope. 11Itac'av ti Jesuse: «Li vo'oxuque, chayac'be ava'iic smelol ti Rioxe ti c'u x'elan tspasvan ta mantal ti muc' much'u sna'oje. Pero li much'utic muc' bu cuentainbilique ta joyc'op no'ox ta xich'ic albel, 12yu'un li stuquique ac'u mi tsq'uelic pero mu xilic, cha'iic pero mu xa'ibeic smelol. Ja' yo' mu sutes o yo'onic ta stojol ti Rioxe, yo' mu x'ac'batic o pertonal yu'un li smulique.»
Ja' li' yaloj ti c'usi smelol li joyc'op ta scuenta li jts'un trigoe
(Mt 13.18-23; Lc 8.11-15)
13Ti Jesuse ja' yech iyal chac li'i: «¿Mi mu xa va'ibeic smelol li lo'il icale? ¿C'uxi chba ava'ibeic smelol li yan lo'il ti ta to xcale? 14Li jvajtrigoe ja' seña ti much'u chal li sc'op Rioxe. 15Li bec' trigo ti ic'ot ta bee, ja' seña ti much'utic cha'iic li sc'op Rioxe, pero ti c'alal cha'iique ta xtal ta ora ti pucuje, chtal pojbaticuc loq'uel ti c'uyepal ts'unbil ta yo'onique. 16Li bec' trigo ti ic'ot ta tontique, ja' seña ti much'utic cha'iic li sc'op Rioxe, ta ora ta xch'unic, jun xa yo'onic yilel, 17Pero ta sc'oj ti muc'bu nat yalem li yisime mu xjalijic. C'alal chtal li vocoletique, c'alal chich'ic ilbajinel ta scuenta li sc'op Rioxe, ta ora chlic chibajicuc ta xicta o sbaic. 18Li bec' trigo ti ic'ot ta ch'ixtique, ja' seña ti much'utic ya'yojic xa li sc'op Rioxe, 19pero ja' no'ox batem ta yo'onic li c'usitic oy ta sba balamile, xchi'uc ti ja' lo'lobilic o ti tsc'an chc'ulejajique; yu'un yo'onicuc yu'uninic scotol li c'usitic oye. Scotol taje, ja' no'ox tey tiq'uil o ta yo'onic, ja' yolontabil chcom li sc'op Rioxe, yech'o ti mu satinique. 20Li bec' trigo ti ic'ot ta lequil balamile, ja' seña ti much'utic cha'iic li sc'op Rioxe, ti sjunul yo'on ta xch'unique, lec tsatinic. Jlom iyac' lajuneb xcha'vinic (30), jlom iyac' oxvinic (60), jlom iyac' cien ta ju p'ej sts'unubal.» ―X'utatic yu'un ti Jesuse.
Ja li yaloj ti tsc'an chcaltic a'yuc li sc'op Rioxe
(Lc 8.16-18)
21Ti Jesuse ja' yech lic yal noxtoc: «¿Mi oy xa tsan acasic ti ja' o chamaquic ta cajone, o mi chba atiqu'ic ta yolon teme? I'i, li case ta toyol onox chich' aq'uel yo' ti lec xac' o xojobale. 22Ja' no'ox yech noxtoc, mu c'usi stac' maquel ti mu xvinaje, mu c'usi mucul chcom ti mu xvinaje, persa ono'ox chvinaj. 23Ti much'u oy xchiquine ac'u ya'ibe smelol.» ―X'utatic yu'un ti Jesuse.
24I'albatic noxtoc: «A'ibeic me lec smelol li c'usi chacalbeique. Ti c'u yepal chap'isbeic lachi'ilique ja' no'ox yech cha sp'isbeic ti Riox uque; xchi'uc ta to xayac'beic más. 25Ti much'u oy yu'une ta x'ac'bat más; yan ti much'u ch'abal yu'une, ta xpojbat ta jmoj ti c'uyepal oy ono'ox yu'une.» ―X'utatic yu'un ti Jesuse.
Lo'il scuenta trigo ti sna'oj ta xch'i stuque
26Ti Jesuse ja' yech lic yal noxtoc: «Ti c'u x'elan tspasvan ta mantal ti Rioxe ja' yech c'u cha'al jun vinic ti ch-ovolaj ta balamile: 27Mi vayem o mi julavem co'ol no'ox, mi ta c'ac'altic, o mi ta ac'ubaltic, li ts'unubile ta xvoc', ta xch'i ono'ox, ac'u mi mu sna' c'u x'elan ta xvoc'tal. 28Yu'un li balamile chac' voc'uc tal stuc: Ba'yi ta xch'i loq'uel tal, ja' o ta xac' snich, ts'acal to ta xcom sat li sniche, ja' o ta xbeq'uin. 29Ti c'alal xyijube, chba sloc' yu'un ja' yora ta xich' loq'uel.» ―Xi ti Jesuse.
Lo'il scuenta bec' mustisya
(Mt 13.31-32; Lc 13.18-19)
30Ti Jesuse ja' yech lic yal noxtoc: «¿C'usi xco'olaj o li cuentainel yu'un ti Rioxe, c'usi stac' jco'oltastic o? 31Ja' co'ol c'u cha'al bec' mustisya ti chich' ts'unel ta balamile. Ja' li más c'ox ta scotol li ts'unubiletic ta sjunlej li balamile. 32Pero c'alal chich' ts'unele ta xch'i, ja' más toyol chbat chac c'u cha'al li yantin ts'unbaletic ti tey ts'unbilique, más muc'tic sc'obtac chac', tey chtal spas stso'opic li mutetique yu'un oy lec squevual.» ―Xi ti Jesuse.
Ja' li' yaloj c'u yu'un ti naca ta lo'il iyalbe crixchanoetic ti Jesuse
(Mt 13.34-35)
33Ti Jesuse ep istunes joyc'op ti c'alal ichanubtasvane, ja' ti bu c'alal xa'ibeic smelol li crixchanoetique. 34Muc' bu ichanubtasvan jtosuc ti muc'bu istunes joyc'ope, pero ti c'alal stuquic xa xchi'uc li yajchanc'optaque, ta sjambe lec smelol scotol.
Ja' li' yaloj ti ispajes ic', ivaxi yu'un nab ti Jesuse
(Mt 8.23-27; Lc 8.22-25)
35Ta sc'ac'alil chac taje ti c'alal i'ic'ub osile, ti Jesuse ja' yech iyalbe li yajchanc'optaque:
―Batic ta jech nab —xut.
36Yech'o un, iyictaic comel li crixchanoetique, ja' iyiq'uic o ech'el Jesús li canova ti tey xa ono'ox tiq'uil oe; oy tey yan canovaetic ixchi'inic ech'el. 37Ja'o ital tsots ic'al vo', xyuc'yon xa tajmec li nabe i'och ep vo' ta yut li canovae, chnoj xa'ox ta vo'. 38Ti Jesuse tey vayem ta chac canova, yac'oj lec xonjol. Istijic ja' yech iyalbeic chac li'i:
―¡Jchanubtasvanej! ¿Mi muc' ta alel avu'un ti chimucotic xa yalele? ―Xutic.
39Ilic ti Jesuse, iyalbe ti ac'u pajuc li iq'ue, li nabe ja' yech iyalbe chac li'i:
—¡Mu xa xabac'! ¡Vaxlan xa! —Xut.
Ta ora ipaj li iq'ue, mu xa c'usi xbac' icom. 40Ti c'alal ilaje ja' yech iyalbe li yajchanc'optaque:
—¿C'u yu'un ti chaxi'ique? ¿Mi mu to bu ach'unojic ti vo'on tsots jyu'ele? ―X'utatic.
41Más to ixi'ic. Xalxalbe xa sbaic:
―¿Much'u li vinic li'i ti ich'unbat smantal yu'un li iq'ue xchi'uc li nabe? —Xut sbaic.
Currently Selected:
Svun Marcos 4: LeqAC
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Sociedad Biblica de Mexico AC
