Yowana 10
10
Echijekekanyo cha omureefi wa ekisi
1Yeesu ˆnaagenderera okwayika ati, “Ni chimari enibhabhwira ati, omuunu woonewoone unu atakutura mw‑irango okwingira mw‑igutu rya jinaama, tari kaatura andi okwingira omwo, oyo ni mwifi ka wone ni musaakusi. 2Nawe unu keengira okutura mw‑irango rya rigutu, oyo niwe omureefi wa jinaama. 3Omuriisi wa rigutu kaamwigurira rirango, na jinaama ejuungwa obhuraka bhwaye. Omureefi kaabhirikira risiina rya bhuri naama yaaye na okujitangatira okuwuruka okuja anja. 4Aakamara okujiwurusya joone okusooka mw‑igutu, kaajitangatira, na ejeene nijimuruubha, kwa okubha jimenyere obhuraka bhwaye. 5Jinaama jitakutura okuruubha omuunu omugenyi, tari ejimwiruka, kwa okubha jitakumenya obhuraka bhwaye.” 6Yeesu ꞉aabhwiriiye Abhafarisaayo echijekekanyo echo, nawe abheene ꞉bhataasombookeeywe jinu aariga ˆnaabhabhwira.
7Mbe, Yeesu ˆnaabhabhwira rindi ati, “Ni chimari enibhabhwira ati, anye naanye rirango rinu jinaama ejitura‑mo okwingirira mw‑igutu. 8Bhoone bhanu ꞉bhaantangatiiye nibheekoraga wuti ni bhareefi bha jinaama, bhaariga bhari bheefi na abhasaakusi, nawe jinaama ꞉jitaabhoonguuwe. 9Anye naanye rirango eryo. Woonewoone unu keengira mw‑igutu okutura kw‑anye arichungurwa, ka wone aribha na obhwitaage bhwa okuwuruka na okwingira, na okugenda okureebha mu‑bhureebho bhwa ekisi. 10Omwifi kaaja mw‑igutu korereki eebhe, eete na okusingaarisya jinaama. Nawe anye niijire korereki jibhe na obhuwanga, ka wone jibhe nabhwo bhwafu.
11“Anye naanye omureefi wa ekisi. Omureefi wa ekisi kaasoosyaga obhuwanga bhwaye inguru ya jinaama jaaye. 12Omuunu unu kaareebha jinaama korereki eebhonere omuyeero, oyo atari mureefi wa jinaama, ka wone jinaama jitari jaaye. Araabha aakarora omusege niguuja, keeruka na okusiga jinaama jenyere. Kurwa ejo, omusege ogugwata‑ko jinaama jindebhe, na ejindi jinu ejisigara ejinyaragana. 13Omuunu oyo keeruka, kwa okubha jinaama ejo jitakumusaasa.
14“Anye naanye omureefi wa ekisi. Nimenyere kisi jinaama jaani, ejeene wone jimmenyere, 15rwa kutyo Raata ammenyere, anye wone nimumenyere kisi. Anye enisoosya obhuwanga bhwani inguru ya jinaama jaani. 16Anye niri na jinaama ejindi jinu jitari ja mw‑igutu rinu, ejo wone neenderwe nijireebhe. Jinaama ejo wone, jirimenya obhuraka bhwani. Kurwa ejo, jiribha eyijo rimwi, na omureefi umwi.
17“Raata aanyendere, kwa okubha enisoosya obhuwanga bhwani, korereki nibhuramire rindi. 18Atari‑wo omuunu unu kaatura okunsoosisya‑wo obhuwanga bhwani. Anye omwene naanye enibhusoosya‑wo. Niri na obhuturo bhwa okubhusoosya‑wo, ka wone niri na obhuturo bhwa okubhuramira rindi. Nikwo kutyo Raata waani ꞉aandagiriiye okukora.”
19Bhunu ꞉bhoonguuwe emisango ejo, Abhayawudi nibhataasyanya rindi abheene kwa abheene. 20Abhaanu bhaafu mu‑bheene, nibhaayika ati, “Unu ari na risambwa! Ka wone ni musasi! Woori ni kurwa ki omumutegeresya?” 21Nawe abhandi nibhaayika ati, “Emisango ejo jitakusooka ku‑muunu unu ari na risambwa. Angu, risambwa eritura okukora omuwofu arore?”
Abhaanu bhaafu abharema Yeesu
22Mbe, Yerusareemu eyo, nigukinga omwanya gwa ichikukuru ya orwichukyo rwa okwesibhwa kwa Riyekaru rya Nyamuwanga. Omwanya ogwo, gwariga guri gwa imbewo. 23Yeesu aariga ˆnaaribhata mu‑rubhuga rwa Riyekaru, orubhaara runu orubhirikirwa ati, Rigaragariro rya Seremaani. 24Abhayawudi abharebhe nibhamwiyinda, nibhamubhuusya ati, “Ni kurwa ki owuchinyaasya kutyo? Araabha awe naawe Kirisito, nuuchibhwire abhwerubhweru.” 25Nawe Yeesu ˆnaabhasubhya ati, “Anye naamarire okubhabhwira kutyo, nawe emwe mutakunyikirisya. Ebhiruguusyo bhinu enikora ku‑bhuturo bhwa Raata waani, nibhyo ebhinsoosisya obhubhambaasi ati naanye ga. 26Nawe mutakwenda okunyikirisya, kwa okubha emwe mutari naama jaani. 27Jinaama jaani ejuungwa obhuraka bhwani. Anye nijimenyere, ejeene ejinduubha. 28Anye enijiyaana obhuwanga bhwa kajaanende koone, na jitaribhura wuri. Ka wone atari‑wo omuunu unu kaatura okujisaakura okusooka mu‑mabhoko gaani. 29Raata waani niwe anaaye jinaama ejo, omwene ni mukuru okukira bhoone. Ka wone atari‑wo omuunu unu kaatura okujisaakura okusooka mu‑mabhoko gaaye. 30Anye na Raata chiri chiinu chimwi.”
31Awo niwo Abhayawudi nibhabhooja amabhuyi rindi, korereki bhamubhume nago na okumwita. 32Nawe Yeesu ˆnaabhabhwira ati, “Naabheeresya ebhiruguusyo bhyafu bhya ekisi bhinu ꞉naakorere ku‑bhuturo bhwa Raata. Ni chiruguusyo ki mw‑ibhyo chinu echibhakora mwende okumbuma na amabhuyi?” 33Abhayawudi nibhamusubhya ati, “Chitakwenda okukubhuma na amabhuyi inguru ya okukora emisango ja ekisi, tari kwa okubha owifumiirisya Nyamuwanga. Ka wone owiyayika ati awe uri Nyamuwanga, keenu awe uri muunu era rwa abhandi!” 34Yeesu ˆnaabhabhuusya ati, “Angu, jitakaamirwe mu‑Bhikaame Ebhyeru ati Nyamuwanga ꞉aayikire ati, ‘Emwe muri bhanyamuwanga’?#10:34 Ringira Ijabhuri 82:6. 35Jikaamirwe mu‑Bhikaame Ebhyeru ati, abhaanu bhanu ꞉bhaaramiiye emisango ja Nyamuwanga, abho Nyamuwanga ꞉aabhabhirikiiye ati ni bhanyamuwanga. Eswe chimenyere ati, jinu jikaamirwe mu‑Bhikaame Ebhyeru ni ja chimari. 36Raata niwe ꞉aansorere na okuntuma ku‑chaaro kunu. Angu woori, ni kurwa ki omwayika ati, anye enifumiirisya Nyamuwanga omwanya gunu enaayika ati, ‘Anye niri Mwana wa Nyamuwanga’? 37Araabha nitakukora emirimu jinu Raata waani kaakora, mbe musige okunyikirisya. 38Nawe araabha enikora emirimu jinu Raata kaakora, noorwo araabha mutakunyikirisya anye, mbe mwikirisye emirimu ejo. Niwo omuja okusombookerwa chimari ati, Raata ari na obhumwi na anye, anye wone niri na obhumwi na Raata.” 39Abhayawudi bhejire bhoongwa emisango ejo, nibheenda okumugwata rindi, nawe Yeesu ˆnaawugunyuka okusooka mu‑mabhoko geebhwe.
40Mbe, Yeesu ˆnaagenda rindi ku‑ngego ya omusima gwa Yorodaani, ˆnaakinga anu ku‑bhwambiro Yowana aariga ˆnaabhatiijisya abhaanu. ˆNeekara eyo siku nooto. 41Abhaanu bhaafu nibhamujaa‑ko, nibhaayika ati, “Yowana ꞉ataakorere echibharikisyo noorwo chimwi, nawe emisango joone jinu aariga ˆnaayika inguru ya Yeesu, jaariga jiri ja echimari.” 42Mbe, abhaanu bhaafu bhanu bhaariga bhari awo, nibheekirisya Yeesu.
Currently Selected:
Yowana 10: jit
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2023, Wycliffe Bible Translators, Inc. All rights reserved.
