Yowana 11
11
Orufu rwa Rajaaro
1Aariga ari‑wo omuunu umwi unu aariga ari murwaye. Omuunu oyo aariga ˆnaatogwa ati Rajaaro. Omwene na abhayara bhaabho bhabhiri, Maryamu na Maarita bhaariga bheekaaye mu‑ruguuyo rwa Bheetaniya. 2Maryamu oyo, niwe ꞉aabhambagire Raatabhugenyi Yeesu amafuta ga ebhirange, na okumufwafuuta na jifwiri jaaye ku‑maguru. Rajaaro owaabho niwe aariga ari murwaye.#11:2 Ringira Yowana 12:1‑8. 3Mbe, abhayara bhaabho Rajaaro, nibhatuma omuunu okugenda ku‑Yeesu okumubhwira ati, “Raatabhugenyi, omusaani waawo Rajaaro ni murwaye.” 4Yeesu ejire oongwa emisango ejo, ˆnaayika ati, “Obhurwaye obhwo bhutari bhwa okumwita, tari ni bhwa okweresya rikusyo rya Nyamuwanga. Aarwara korereki anye Omwana wa Nyamuwanga, nikusibhwe okutura ku‑bhurwaye obhwo.” 5Yeesu ꞉eendere Maarita, Maryamu na Rajaaro omundurume weebhwe. 6Noorwo omwanya gunu Yeesu ꞉oonguuwe ati Rajaaro ni murwaye, ꞉aagendereeye okwikara anu aariga ari mwanya gwa siku ebhiri.
7Mbe, siku ebhiri jejire jaatura, Yeesu ˆnaabhwira abheeyigisibhwa bhaaye ati, “Chisubhe Yuudeya.” 8Abheeyigisibhwa bhaaye nibhamusubhya ati, “Omwiyigisya, ni jorirya anu era Abhayawudi bheendaga okukubhuma na amabhuyi korereki bhakwite. Kurwa ki woori oweenda okusubha eyo rindi?” 9Yeesu ˆnaabhasubhya ati, “Angu, omwanya gwa mu‑mwisi gutari na masaa ekumi na gabhiri? Omuunu aakaribhata mu‑mwisi, atakutura okwikuujura, kwa okubha obhweru bhwa ku‑chaaro anu obhumumurikira woone. 10Nawe unu kaaribhata mu‑ngeta, keekuujura, kwa okubha bhutari‑wo obhweru bhwa okumumurikira.”#11:9‑10 Ringira Yowana 8:12.
11Yeesu ejire aamara okwayika emisango ejo, ˆnaagenderera okubhwira abheeyigisibhwa bhaaye ati, “Omusaani weeswe Rajaaro awongeeye, nawe enigenda okumurafya.” 12Mbe, abheeyigisibhwa bhaaye nibhamubhwira ati, “Raatabhugenyi awe, araabha awongeeye, kaja okuwora.” 13Abheeyigisibhwa bhaaye bhaariga nibheetogera ati kaayika ati Rajaaro awongeeye tiro, nawe omwene aariga ˆnaayika inguru ya orufu rwa Rajaaro. 14Mbe, Yeesu ˆnaabhabhwira abhwerubhweru ati, “Rajaaro afuuwe. 15Nawe anye enikonderwa ati omwanya gunu Rajaaro aafwa, naari nitari‑wo, korereki emwe munyiikirisye. Mbe, chigende ewaaye.” 16Mbe Tomaasi, unu bhaamubhirikiraga wone ati Marongo, ˆnaabhwira abheeyigisibhwa abheejaabho ati, “Eswe wone chigende, korereki chifwe aamwi nage.”
Yeesu ari na amanaga ga okusuurura abhafuuwe
17Mbe, Yeesu ejire aakinga mu‑mukoowa gwa Yuudeya mu‑ruguuyo rwa Bheetaniya, ˆnaasongʼana Rajaaro aamarire siku ena ari mu‑chituuro. 18Oruguuyo rwa Bheetaniya rwariga wuti kiromeeta esatu era okusooka Yerusareemu. 19Abhayawudi bhaafu okusooka Yuudeya bhaariga bheejire Bheetaniya okusiiriisya Maarita na Maryamu, ku‑songa ya orufu rwa Rajaaro omundurume weebhwe.
20Mbe, Maarita ejire oongwa ati Yeesu kaaja, ˆnaawuruka mu‑nju, ˆnaagenda okumuramira, nawe Maryamu ˆnaasigara mu‑nju. 21Maarita ˆnaabhwira Yeesu ati, “Raatabhugenyi awe, araabha waakabheeye uri anu, omundurume waani ataakafuuwe. 22Nawe noorwo woori nimenyere ati gwonegwone gunu owuja okusabhwa Nyamuwanga, kaja okukuyaana.” 23Mbe, Yeesu ˆnaamusubhya ati, “Omundurume waawo kaja okusuuruka.” 24Maarita ˆnaayika ati, “Nimenyere ati arisuuruka omwanya gunu Nyamuwanga arisuurura abhafuuwe bhoone orusuku rwa obhuteero.” 25Yeesu ˆnaamusubhya ati, “Anye naanye obhusuuruko, ka wone naanye obhuwanga. Omuunu unu kaanyikirisya anye, noorwo araabha aakafwa, aribha omuwanga. 26Ka wone omuunu woonewoone unu ari muwanga na kaanyikirisya anye, atarifwa wuri noorwo na akatyari. Angu, owikirisya emisango ejo?” 27Maarita ˆnaamusubhya ati, “Raatabhugenyi, eniikirisya chimari ati naawe Kirisito, Omwana wa Nyamuwanga, unu eenderwe aaje ku‑chaaro kunu.”
Yeesu kaarira
28Maarita ejire aamara okwayika emisango ejo, ˆnaagenda okubhirikira Maryamu omuyara oweejaabho. Mbe, ˆnaamubhwira bhumbise ati, “Omwiyigisya ari anu, kaakubhirikira.” 29Maryamu ejire oongwa emisango ejo, ˆneemuka bhwangu, ˆnaagenda ku‑Yeesu. 30Omwanya ogwo, Yeesu aariga achaari okwingira mu‑ruguuyo orwo, aariga achaari anu Maarita ꞉aagendere okumuramira. 31Abhayawudi bhanu bhaariga bhagendere okukeesya na okusiiriisya Maryamu, bhejire bhaamurora ˆneemuka bhwangu, ˆnaawuruka anja, abheene wone nibhamuruubha. ꞉Bhaakorere kutyo, kwa okubha bheetogeraga ati Maryamu kaagenda ku‑chituuro korereki arire eyo.
32Mbe, Maryamu ˆnaakinga anu Yeesu aariga ari. Ejire aarora Yeesu, ˆneefukama imbere yaaye, ˆnaamubhwira ati, “Raatabhugenyi awe, araabha waakabheeye uri anu, omundurume waani ataakafuuwe.” 33Yeesu ejire aarora Maryamu ˆnaariraga na abhaanu bhanu ꞉eejire nabho wone nibhariraga, ˆnaarumwa mu‑mwoyo gwaye, ˆnaasurumbara muno. 34Mbe, ˆnaabhabhuusya ati, “Mumusiikire aaki?” Nibhamusubhya ati, “Raatabhugenyi, chigende chikweresye.” 35Yeesu ˆnaarira. 36Mbe, Abhayawudi bhanu bhaariga bheejire mu‑rufu awo nibhaayika ati, “Ringira kutyo aariga amwendere!” 37Nawe abhaanu abharebhe mu‑bheene nibhaayika ati, “Omuunu unu niwe ꞉aawosiisye omuwofu urya, ni kurwa ki ꞉ataaturire okuyingirira Rajaaro, korereki aasiga okufwa?”
Yeesu kaasuurura Rajaaro
38Niwo Yeesu ˆnaarumwa rindi muno mu‑mwoyo gwaye, ˆnaakinga ku‑chituuro. Echituuro echo chaariga chiri senga inu ifundikiiywe‑ko ribhuyi rinene ku‑muryango. 39Yeesu ˆnaaragirira abhaanu bhanu bhaariga bhari‑wo awo, ˆnaayika ati, “Musoosye‑ko ribhuyi eryo.” Nawe Maarita, omuyara waabho Rajaaro omufuuwe, ˆnaamusubhya ati, “Raatabhugenyi, woori aawunyire chuchuchu, kwa okubha aamarire siku ena ari mu‑chituuro omwo.” 40Mbe, Yeesu ˆnaamubhwira ati, “Angu, nitaakubhwira ati, araabha owikirisya, owuja okurora rikusyo rya Nyamuwanga?”
41Mbe, nibhasoosya‑ko ribhuyi eryo. Yeesu ˆnaaragamira ku‑rwire, ˆnaasabhwa ku‑Nyamuwanga ati, “Raata, enikusiima kwa okubha woongwa risabhwa ryani. 42Nimenyere ati owunyungwaga omwanya gwone, nawe enaayika jinu inguru ya echise cha abhaanu bhanu, korereki bheekirisye ati awe naawe untumire.” 43Yeesu ejire aamara okusabhwa, ˆnaamura obhuraka ˆnaabhirikira ati, “Rajaaro, sooka omwo, iija anja enu!” 44Mbe, Rajaaro unu aariga afuuwe, ˆnaaja anja. Amaguru na mabhoko gaaye bhyariga bhisingiiywe risanda. Ka wone aariga ari na echitambaara chinu bhaariga bhamubhoyere ku‑bhusu. Mbe, Yeesu ˆnaabhwira abhaanu bharya ati, “Mumusuruumure, mumusige agende.”
Abhatangasya bha Abhayawudi abhayenja injira ya okwita Yeesu
(Mataayo 26:3‑5; Maariko 14:1‑2; Ruuka 22:1‑2)
45Mbe, Abhayawudi bhaafu bhanu ꞉bheejire okukeesya Maryamu, bhejire bhaarora jinu Yeesu ꞉aakorere, nibhamwikirisya. 46Nawe Abhayawudi abhandi mu‑abho nibhagenda ku‑Bhafarisaayo na okubhabhwira jinu Yeesu ꞉aakorere. 47Mbe, abhakuru bha abhagabhisi na Abhafarisaayo nibhabhirikirana okwinyanja echinyanjo cha ribharaja rikuru rya Abhayawudi,#11:47 Ribharaja rikuru rya Abhayawudi. Ku‑meeresyo amaafu, ringira mu‑Meeresyo inguru ya Emisango Emikomeeye. nibhabhuusyanya ati, “Chikore kutiki? Okubha omuunu unu kaakora ebhibharikisyo bhyafu. 48Araabha chikamusiga agenderere okukora ebhibharikisyo ebhyo, abhaanu bhoone abhaja okumwikirisya. Niwo Abharuumi bhariija na okunyamura riyanga ryeswe na Riyekaru ryeswe.”
49Mbe, umwi mu‑bhakuru bharya risiina ryaye ˆnaatogwaga Kayaafa, unu aariga ari mugabhisi omukuru#11:49 Mugabhisi omukuru. Ku‑meeresyo amaafu, ringira Abhagabhisi mu‑Meeresyo inguru ya Emisango Emikomeeye. ku‑muguuga ogwo, ˆnaabhabhwira ati, “Emwe mutakumenya omusango gwonegwone! 50Angu, mutakumenya ati, jiiyire omuunu umwi afwe inguru ya abhaanu bhoone, okukira riyanga ryone okusimagira?” 51Kayaafa ꞉ataayikire emisango ejo mu‑kwenda kwaye omwene. Nawe ꞉aajaayikire, kwa okubha aariga ari mugabhisi omukuru ku‑muguuga ogwo. Kurwa ejo, aariga ˆnaaraga ati Yeesu kaja okufwa inguru ya Abhayawudi. 52Ka wone, Yeesu atarifwa inguru ya riyanga eryo era, tari ni ku‑songa ya okukumanya abhaana bha Nyamuwanga bhanu bhanyarageene, korereki bhabhe aamwi.
53Okusookerera orusuku orwo, abhatangasya bha Abhayawudi nibhaamba okuyenja injira ya okwita Yeesu. 54Kurwa ejo, Yeesu ˆnaasiga okuribhata abhwerubhweru mu‑mukoowa gwa Yuudeya. ˆNaasooka awo, ˆnaagenda orubhaara runu rwariga ruri yeeyi na ribhara, mu‑musi gunu ogutogwa ati Ifurayimu, ˆneekara eyo aamwi na abheeyigisibhwa bhaaye.
55Ichikukuru ya Okwambuka ya Abhayawudi yaariga iri yeeyi. Mbe, abhaanu bhaafu nibhasooka mu‑misi jeebhwe, nibhagenda Yerusareemu, korereki bheeyesye, ichikukuru ichaari okukinga.#11:55 Ringira 2 Emisango ja Emyanya 30:17‑19; Obhukumi 9:10. 56Abhaanu nibhagenderera okuyenja Yeesu. Omwanya gunu bhaariga bheemereeguuyu mu‑rubhuga rwa Riyekaru, nibhabhuusyanya abheene kwa abheene ati, “Emwe omwiganirisya ki? Angu, omuunu oyo chimari kaja okuuja mu‑chikukuru inu?” 57Abhakuru bha abhagabhisi na Abhafarisaayo bhaariga bharagiriiye ati, omuunu woonewoone unu amenyere anu Yeesu ari, abhabhwire korereki bhamugwate.
Currently Selected:
Yowana 11: jit
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2023, Wycliffe Bible Translators, Inc. All rights reserved.
