Yowana 9
9
Yeesu kaawosya omuwofu
1Orusuku rumwi, Yeesu aaribhataga ku‑njira, ˆnaarora omuunu umwi unu aariga ari muwofu okusookerera okwibhurwa kwaye. 2Abheeyigisibhwa bhaaye nibhamubhuusya ati, “Omwiyigisya, ni chibhiibhi chaaga chinu ꞉chaakorere eebhurwe ari muwofu? Angu, ni chibhiibhi chaaye omwene tere ni cha bheebhusi bhaaye?” 3Yeesu ˆnaabhasubhya ati, “Unu atari muwofu okuruubhana na ebhibhiibhi bhyaye, amwi ebhibhiibhi bhya abheebhusi bhaaye. Tari ꞉eebhuuywe ari muwofu, korereki obhuturo bhwa Nyamuwanga bhubhonekane ku‑bhaanu mu‑bhurame bhwa omuwofu oyo. 4Chikenerwe okukora emirimu ja Nyamuwanga unu ꞉aantumire, kuchaari mu‑mwisi. Okubha ingeta eyiija, na chitakuja okutura okukora emirimu ejo. 5Omwanya gunu nichaari ku‑chaaro anu, anye niri obhweru ku‑bhaanu bhoone.”
6Yeesu ejire aamara okwayika emisango ejo, ˆnaafubhura amachwata ku‑mayaru, ˆnaanoka orutoto, ˆnaakaata orutoto orwo ku‑meeso ga omuwofu oyo. 7Niwo ˆnaabhwira omuwofu oyo ati, “Genda wiyosye obhusu mw‑itanga rya Sirowaamu.” Obhugajuro bhwa Sirowaamu ni “Unu atumirwe.” Niwo omuwofu oyo ˆnaagenda, ˆneeyosya obhusu, ˆnaasubha iika ewaaye ˆnaaroraga kisi.
8Mbe, abheekasyanya bhaaye na abhaanu abhandi bhanu bhaariga bhanarire okumurora ˆnaasabhiirisyaga, nibhabhuusyanya ati, “Angu, omuunu unu atari niwe unu aariga ˆneenyanja aasi na okusabhiirisya?” 9Abhandi nibhaayika ati, “Niwe.” Abhandi nibhaayika ati, “Wuri, atari niwe, nawe kaasusana nage muno.” Nawe omwene ˆnaabhabhwira ati, “Chimari, naanye.” 10Niwo nibhamubhuusya ati, “Araabha chimari naawe, woori jaabha kutiki ameeso gaawo agarora?” 11ˆNaabhasubhya ati, “Omuunu unu kaatogwa ati Yeesu, ꞉aafubhuuye amachwata ku‑mayaru, ˆnaanoka orutoto, ˆnaakaata orutoto orwo ku‑meeso gaani. Niwo ˆnaambwira ati, ‘Genda wiyosye obhusu mw‑itanga rya Sirowaamu.’ Mbe ningenda, niniiyosya obhusu, ninaamba okurora.” 12Abheene nibhamubhuusya ati, “Angu, omuunu oyo ari aaki?” Omwene ˆnaabhasubhya ati, “Anye nitakumenya enu ari.”
Abhafarisaayo abhabhuusirisya unu aariga ari muwofu
13Mbe, nibhasira omuunu unu aariga ari muwofu ku‑Bhafarisaayo. 14Orusuku runu Yeesu ꞉aanokere orutoto na okuwosya omuwofu oyo, rwariga ruri rusuku rwa Isabhaato. 15Mbe, Abhafarisaayo wone nibhabhuusya omuunu oyo ati, “Jaabha kutiki nuurora.” ˆNaabhasubhya ati, “Omuunu umwi ꞉aankaatire orutoto ku‑meeso, niniiyosya obhusu, woori enirora.” 16Niwo Abhafarisaayo abharebhe nibhaayika ati, “Omuunu unu akorere kutyo, atasookere ku‑Nyamuwanga, kwa okubha kaanyamura echiraagiro cha orusuku rwa Isabhaato.” Nawe abhandi nibhaayika ati, “Omukosi wa ebhibhiibhi kaatura kutiki okukora ebhibharikisyo rwa ebhyo?” Kurwa ejo, nibhataasyanya mu‑bhwiganirisya bhwebhwe. 17Niwo, Abhafarisaayo nibhamubhuusya rindi ati, “Owaayika ki inguru ya omuunu unu aakuwosya ameeso?” Omwene ˆnaabhasubhya ati, “Anye enirora ati omuunu oyo ni muragi wa Nyamuwanga.”
18Nawe abhatangasya bha Abhayawudi abho ꞉bhateekirisiisye ati, omuunu unu woori kaarora, ꞉eebhuuywe ari muwofu. Kurwa ejo, nibhabhirikira abheebhusi bhaaye. 19Nibhabhuusya abheebhusi abho ati, “Angu, omuunu unu ni mwana weemwe? Ni chimari ati ꞉eebhuuywe ari muwofu? Araabha nikwo kutyo jiri, jaabha kutiki woori kaarora?” 20Niwo abheebhusi bhaaye nibhabhasubhya ati, “Eswe chimenyere ati unu ni mwana weeswe, na ati ꞉eebhuuywe ari muwofu. 21Nawe chitakumenya chinu chaakora ˆnaarora, ka wone chitakumenya omuunu unu ꞉aamuwosiisye ameeso. Mumubhuusye omwene, kwa okubha ni muunu mukuru, kaatura okwayika.” 22Abheebhusi bhaaye ꞉bhaayikire kutyo, kwa okubha bhaariga nibhoobhaya. Okubha, abhatangasya bha Abhayawudi abho bhaariga bheekirisyanyiisye ati, omuunu woonewoone unu keekirisya ati Yeesu niwe Kirisito, kaja okukindikwa mu‑nju ja ameekofyanyo geebhwe. 23Ogwo nigwo ꞉gwakorere abheebhusi bhaaye nibhaayika ati, “Mumubhuusye omwene, kwa okubha ni muunu mukuru.”
24Mbe, abhatangasya bha Abhayawudi nibhabhirikira rindi omuunu unu aariga eebhuuywe ari muwofu, nibhamubhwira ati, “Nuurayire ku‑Nyamuwanga ati, owaayika echimari! Eswe chimenyere ati, omuunu unu ꞉aakuwosiisye, ni mukosi wa ebhibhiibhi.” 25Omwene ˆnaabhasubhya ati, “Anye nitakumenya araabha omuunu oyo ni mukosi wa ebhibhiibhi, nawe nimenyere omusango gumwi era. Naariga niri muwofu, nawe woori enirora.” 26Nibheeya nibhamubhuusya ati, “Omuunu oyo ꞉aakukoreeye ki? ꞉Aawosiisye kutiki ameeso gaawo?” 27Omwene ˆnaabhasubhya ati, “Naabhabhwiriiye emisango ejo, nawe mutaantegeresya. Kurwa ki woori omwenda nibhabhwire rindi? Angu, emwe wone omwenda okubha abheeyigisibhwa bhaaye?” 28Mbe, abheene nibhamusiijaaka ati, “Awe naawe mwiyigisibhwa waaye! Nawe eswe chiri bheeyigisibhwa bha Muusa. 29Eswe chimenyere ati Nyamuwanga ꞉aayikire na Muusa, nawe chitakumenya ati omuunu oyo asookere aaki.” 30Omwene ˆnaabhasubhya ati, “Anye enibharuguura muno! Emwe mutakumenya anu asookere, nawe omwene niwe aamosya ameeso gaani! 31Chimenyere ati, Nyamuwanga atakungwaga risabhwa rya abhakosi bha ebhibhiibhi, tari koongwaga omuunu woonewoone unu kaamuramya na okukora jinu Nyamuwanga keenda.#9:31 Ringira Ijabhuri 34:15‑16; Jingani 15:29. 32Okusookerera kara, chichaariga okuungwa noorwo na akatyari ati, omuunu omurebhe ꞉aawosiisye omuunu unu ꞉eebhuuywe ari muwofu. 33Omuunu oyo akabheeye atasookere ku‑Nyamuwanga, ataakaturire okukora ejo.” 34Abheene nibhamusubhya ati, “Awe ꞉weebhuuywe uri owa ebhibhiibhi kata. Woori, uri na obhuturo ki bhwa okuchiiyigisya?” Mbe, nibhamubhirimya asooke mu‑nju ya eriikofyanyo.
Obhuwofu bhwa echinyamwoyo
35Yeesu ejire oongwa ati bhaabhirimya omuunu oyo, ˆnaagenda okumuyenja. Ejire aamubhona, ˆnaamubhuusya ati, “Angu, owikirisya Omwana wa Omuunu?” 36Omuunu oyo ˆnaamusubhya ati, “Mwami, nuumbwire Omwana wa Omuunu niga, korereki nimwikirisye.” 37Yeesu ˆnaamubhwira ati, “Awe waamurorere, ka wone niwe unu kaayika na awe.” 38Omuunu oyo ˆnaayika ati, “Raatabhugenyi, enikwikirisya.” Niwo omuunu oyo, ˆnaamuramya.
39Mbe, Yeesu ˆnaayika ati, “Anye ꞉neejire ku‑chaaro anu okuramura, korereki abhawofu bharore, na bhanu abharora, bhabhe abhawofu.” 40Niwo, Abhafarisaayo abharebhe bhanu bhaariga bharya‑wo, bhejire bhoongwa emisango ejo, nibhamubhuusya ati, “Angu, owaayika ati, noorwo eswe chiri bhawofu?” 41Yeesu ˆnaabhasubhya ati, “Araabha mukabheeye muri bhawofu, mutaakabheeye abhakosi bha ebhibhiibhi. Nawe omwayika ati omurora kisikisi, kurwa ejo, omusigara na ebhibhiibhi bhyemwe.”
Currently Selected:
Yowana 9: jit
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2023, Wycliffe Bible Translators, Inc. All rights reserved.
