Matɨyo 17

Ka-aye-cay-tɨbayi Jesu solge Jesu duroy asɨn̰a gɨ da Kumu

(Marg 9:2-9; Lug 9:28-36)

1Wɔlɛ jii kardi nee na, Jesu dor Pɨyɛr bɨ Ja̰ dan̰ kurɨndi Jag bɨ, orɨn̰ danage a cay garma gɨ sɨngɨɗɨ gɨ pɨna wo̰ kan̰dɨge hage. 2Ɨni na, cɨndi bɨle ɗaŋ tumoyge: Cɨndi ƴee tɨwa hɨn̰ tɨwa di daa wo̰ bɨ, badɨgedi bɛdɨrdɛŋ tɨrɨjɨ tɨrɨjɨ hɨn̰ kɨɗɨn̰ ga woli wo̰ bɨ. 3Bɨ ga ma, ka-aye-cay-tɨbayi ga sɨbɨ le, solge Moyis bɨ, Eli bɨ, somge arge kɔl dan̰ Jesu. 4Ɨni na, Pɨyɛr say yen̰ Jesu hɨn̰: «Ba-gulɔŋ, kuɗa gɨ na somgɨŋ a kɛ. Hɨn̰ gɨ ji na gey na, ɨŋ kɨya paye dabaŋ won̰ sɨbɨ a kɨɗɨn̰ ga kɛ gaŋ le, pɨna kon̰ bɨ, pɨna gɨ da Moyis bɨ, pɨna gɨ da Eli bɨ.» 5Kɨɗɨn̰ ga Pɨyɛr ɨre ye kɔl ba kɨbi ƴee bɨ ga ma, gɨrɨmbale ga orɨn̰ dan̰ asɨn̰a ɨrga umboŋ cayge. Bɨ ga ma, noy ungo ye kɔl duroy gɨrɨmbale gaŋ le pəŋ pəŋ bɨ ye hɨn̰: «Ban gɨ kɛ le na Kuronɨ gɨ ɨŋ lee-toyi tɔgɨ, gusɨnɨ mɔŋ cayi, jagɨŋ kɔl koyi.» 6Kɨɗɨn̰ ga ka-aye-cay-tɨbayi jege noy ungo gɨ nee le na, hundɔrɔ leege gɨɗaŋ. Lee gɨ laydange ɨmdɨn̰ge cɨndɨge dugo. 7Jesu ɨrga gusɨge, ɨsɨbɨge dan̰ kobi bɨ yege hɨn̰: «Sagɨŋ daa! Kɨŋ ɗɔɔ ba hundɔrɔ naŋ!» 8Kɨɗɨn̰ ga nee le, kan dorge cayge daa ɨni na, kan solge na Jesu kan̰di hayi ba ɨre. 9Kɨɗɨn̰ ga kan ɨre gɨsɨnge cay garma gɨŋ dugo ɨni na, Jesu ay noy bɨge yege hɨn̰: «Hɨnga ga kɨŋ ba sol kɛ le, kɨŋ yon̰ ungo koldɨge naŋ bɨrɨŋ, gɨsɨn̰ gɨ Kurɨn̰-ungo na mara bɨ, bɨya lɨbɨ bɨ, pa dɨm.» 10Ɨni na, ka-aye-cay-tɨbayi ɨngɨrige yeyige hɨn̰: «Kɛ na kɨya wa ma ka-gɨlɨn̰ kalaŋ gasɨn̰-kɔl gɨ da Moyis na yege gɨ naa wa wa kalɨn̰ ma, Eli na kɨya caga tumɔ pa dɨm le ga?» 11Ban dɨbɨge cay nee yege hɨn̰: «Na cɨndi Eli na kɨya ɨrga bɨ kɨya ɗɔɔ hɨnga nɔm ban̰di nee kɨɗɨn̰dɨge gaŋ. 12Ama aŋ yəgɨŋ, Eli le caga ɨni, ama kalaŋ sɨlayige naŋ bɨ, leeyige hɨnga nɔm ga kuduroyge gey bɨ. Kan kɨya leen̰ Kurɨn̰-ungo hɨnga ga ni gɨle-cɨn̰ hɨn̰ wo̰ bɨ.» 13Kɨɗɨn̰ ga nee le, ka-aye-cay-tɨbayi solge gɨ ban na dorge naa kɔl gɨ ojɨ cay Ja̰ ba-lɔɔ batɛm.

Jesu poɗɨ kɨye gɨ jɨmgɨl leeyi

(Marg 9:14-29; Lug 9:37-43)

14Jesu bɨ, Ja̰ bɨ, Pɨyɛr bɨ, Jag bɨ, kɨɗɨn̰ ga jɨgage a kɨɗɨn̰ ga dɨmdɨrdi kalaŋ dayɨn̰ge nee gaŋ ɨni na, gɨlmi gɨ pɨna wo̰ ɨrga gusi Jesu, poy gɨbay dugo tumoyi bɨ yeyi hɨn̰: 15«Ba-gulɔŋ, sɨla cɨn̰-n̰age da kuronɨ, kɨya gɨ ban na ba jɨmgɨl. Lee gɨ kɨɗɨn̰ ga na sayan̰ danayi na, laydii boy tɨwa dɨŋ naŋ le, boy kaŋ gaŋ daa daa. 16Ɨŋ ɨrgan̰ danayi gusi ka-aye-cay-tɨban̰, ama hɔmɨn̰ɛ le ɗɨn̰ cayge.» 17Ɨni na, Jesu ay kɔl yege hɨn̰: «Kɨŋ te kalaŋ ga aye kudurɔ kogɨŋ unɔ bɨ kɨŋ na ka-masa bɨ! Kɛ, ɨŋ kɨya sɔmɛ danagɨŋ bɨrɨŋ na wɔlɛ mɨna coŋ ga? Kɛ, na ca mɨna ma maŋ kɨya haye kuduronɨ caygɨŋ ga? Ɨren̰gɨŋ danayi bəŋ kɛ.» 18Jesu san̰ dan̰ turnɔ di ɨsɨni le, lee gɨ turnɔ di ɨsɨni le andaŋ kuduroy koroŋ le coŋ. Ɨni na, kɨɗɨn̰di ga nee gaŋ le bɨ, kuroŋ le poɗɨ. 19Kɨɗɨn̰ ga nee le, ka-aye-cay-tɨbayi ɨrgage gusi bɨ, ɨngɨriige kan̰dɨge hage yeyige hɨn̰: «Kɛ, na kɨya wa ma mani ɓala taye turnɔ di ɨsɨni le coŋ naŋ ga?» 20Ɨni na, Jesu dɨbɨge cay nee yege hɨn̰: «Na kɨya gɨ aye kudurɔ kogɨŋ ɓala hɨnga naŋ. Aŋ yəgɨŋ daa waŋ na cɨndi: Hɨn̰ gɨ aye kudurɔ kogɨŋ na gumu hɨn̰ cɨn̰ hɨnga ga n̰en̰əŋ ga kan teegege naa mutardɨ na, kɨŋ kɨya yon̰ garma gɨ kɛ le hɨn̰: “Ɗɨda kɛ ɨra nii kɔ coŋ na”, kɨya ɗɔdɛ bɨ, hɨnga pɨna kɨya mɨn̰gɨŋ naŋ bɨ. 21[Ɗaŋ coŋ, turnɔ ga ɨsɨn ga hɨn̰ wo̰ le, kɨya andaŋge kalɨn̰ wo̰ naŋ, kɨya andaŋge na kɨɗɨn̰ ga ungo na ula Kumu bɨ, ungo na haya kɨbi bɨ, dɨm.»]

Jesu ye kɔl tɨmaydi bɨ bɔyɛ lɨbedi bɨ

(Marg 9:30-32; Lug 9:43-45)

22Wɔlɛ gɨ pɨna gɨŋ wo̰, ka-aye-cay-tɨbay Jesu wayge gusɨge nɔm a gɨsəŋ ga Galile gaŋ ɨni na, Jesu yege hɨn̰: «Ba mɨnde gɨ kan kɨya ƴɔmɛge Kurɨn̰-ungo le dobiige kobi kalaŋ 23ɗe kan na dɨɗiige, ama wɔlɛ sɨbɨdi gɨŋ na ban kɨya bɔyɛ lɨbe.» Kɔl gɨ nee le lee gɨ gusɨge mooge naŋ gɨɗaŋ.

Hɔgɛ lambo di da ƴaa-di-da-Kumu

24Jesu dan̰ ka-aye-cay-tɨbayi orge a Kapɛrnɔm. Kɨɗɨn̰ ga kan bugoŋge a Kapɛrnɔm ɨni na, ka-hɔgɛ lambo di da ƴaa-di-da-Kumu ɨrgage gusi Pɨyɛr bɨ, ɨngɨriige yege hɨn̰: «Kɛ Ba-gɨlgɨŋ hɨnga le bee lambo di ojɨ cay ƴaa di da Kumu wala, bee naŋ ga?»#17:24 Sɨlagɨŋ: Exode 30:11-16. 25Pɨyɛr dɨbɨge cay nee yege hɨn̰: «Ban kɨya bee.» Kɨɗɨn̰ ga ban or bugoŋ ƴen̰ na, Jesu de tumoy ɨngɨrii yeyi hɨn̰: «Simo, boy ɨrɨme dɨn̰ gɨŋ na, kɛrɨmbɛlɛŋ ga cay gɨsəŋ gaŋ kɨya ƴɔɔge lambo wala, kɨya hɔgɛge cay hɨnga na kobɨ ga ani ga? Kan kɨya ƴɔɔge na kobɨ karɨn̰aŋ ka-ƴaa wala, na kobɨ kɨrge ga?» 26Pɨyɛr jɨga dɨbii cay nee yeyi hɨn̰: «Na kobɨ kɨrge.» Ɨni na, Jesu yeyi hɨn̰: «Naa hɨn̰ wo̰ na, karɨn̰aŋ ka-cay ƴaa unɔge nee.» 27Ama ɗe kuduroy kalaŋ na mundoŋ naŋ na, ɨra kɨbɨ kuray gɨ gumu taa taa gɨŋ dɨbe jungɨlɨn̰ nee. Gusa gɨ cay wase gɨ kɨya sɔyɛ jungɨlɨn̰ le, ƴɨmayi bɨ hanga kɨbi na, ji kɨya wɔɔ sɨle di ni arja̰ di ɓal bee hɔgɛ gɨ ni lambo kon̰ bɨ, hɨnge bɨ. Aya ɨran̰ bɨn̰ ka-hɔgɛ lambo kol cay na.

Currently Selected:

Matɨyo 17: gab

ማድመቅ

Copy