YUHANI 7
7
Wananyahe wa Insa kawasuamini
1Ɓaanda ya v̄ale, Insa akozingidzia iGalilaya. Kakotsaha angia na ulawa hari mwa iYudeya, mana Mayahudi wakotsaha wamuule. 2Na v̄ale uMusherehio wa yaMayahudi wa Maɓanga ya Haima uka ukuruɓia. 3Ɓas, wananyahe wamuambia: «Lawa v̄anu, wendre hari mwa iYudeya, ile pare maswihaɓa yaho yaone wajau trongo za ãdjaɓu uzifanyao. 4Mana kav̄u mutru afanyao trongo zahe sirini neka asutsaha ajulihwane ha dhwahiri. Ɓaanda ufanyao trongo zizo, v̄av̄o dzionese ha piya lidunia.» 5Mana ata wananyahe, ne kawakomuamini.
6Ɓas, Insa awaambia: «Wakati wangu raha kawaja, ɓadi hanyuju, kula wakati ɗe uwo. 7Dunia kalishindri muengani, ɓadi wami, lilo unienga, mana nisulilawia ushahidi amba zitrendro zalo za peu. 8Namwendre wanyu hari mwa uMusherehio. Wami tsisendra hari mwa Musherehio uwo, mana wakati wangu raha kawatsimidziha.» 9Ɓas, ɓaanda awaambia trongo zile, aɓaki Galilaya.
Insa hari mwa Musherehio wa Maɓanga ya Haima
10Ɓadi ɓaanda wananyahe wahea hari mwa uMusherehio, Insa ahea hule wajau, tsi ha hadhwira, ɓadi ha siri. 11Ɓas, yaMayahudi yakomuzunguha hari mwa uMusherehio na udzisa: «Afa a hav̄i mwa?»
12Watru wakonguruma trongo nyengi ju lahe hari mwa idunia ile. V̄wa wakorongoa: «Waye mutru mwema», ɓadi wasalia wakorongoa: «Ata hata, asulaɓa idunia.» 13Ɓadi kav̄waka ata mutru akomurongoa ha hadhwira, mana wakoria yaMayahudi.
14iNusu ya wakati wa uMusherehio yamokoma, Insa ahea hari mwa iNyumba Ndzitwaharifu, aandrisa usomedza. 15V̄ale Mayahudi wakoshanga na urongoa: «Ha namuna jeje ajuao yiMiangishio, ne kasoma?»
16Insa awadjiɓu: «Musomo wangu niutoao, kausulawa hangu, ɓadi ha Uwo aniv̄eleha. 17Mutru atsahao afanye mav̄endzeleo yahe waye Mungu, atsojua neka musomo wangu ulawa ha Mungu, au neka nisulagua ha iwami yangu. 18Mutru alaguao ha iwaye yahe, uwo asutsaha sifa zahe monyewe. Ɓadi uwo atsahao sifa za Ule amuv̄eleha, uwo wa kweli, kav̄u unafiki utsokao yotsi haheju. 19Hali Musa kamuv̄ani iSharia? Na kav̄u ata moja hanyuju aɗungao iSharia. Manatrini mutsahao muniule?»
20iDunia imudjiɓu: «Una shetwani! Mbani ɗe atsahao ahuule?»
21V̄ale Insa awadjiɓu: «Tsifanya shitrendro moja ya midjuza, na wanyu piya mushanga. 22Musa amuv̄ani matahiri, (na v̄ale iyo tsi trongo yalawa ha Musa, ɓadi ha wadzaɗe watru wa hale), na wanyu utahiri mutru ata wala ukana *Suku ya Uv̄umuzi. 23Neka mutru atsojua atahiriwe Suku ya Uv̄umuzi pare iSharia ya Musa isuvundzwe, v̄av̄o manatrini munijaliao hasera iv̄o nav̄onesa mutru wa kamili Suku ya Uv̄umuzi? 24Musunamuwe ha sura, ɓadi namunamuwe ha haki.»
Hali Insa ɗe uMutsahuliwa?
25Na v̄ale ɓaãdhwi ya wakazi wa Yerusalemu wakorongoa: «Hali unu tsi ɗe ule watsahao wamuule? 26Na tsunu asulagua ha unafasi v̄anu, wala kawasumuambia ata trongo. Saɓu ha kweli madhwamana wakuɓali amba waye ɗe Mutsahuliwa? 27Ɓadi mutru unu, wasi ujua v̄ahali ala, na uMutsahuliwa amoja, kav̄u ata mutru atsojuao v̄ahali ala.»
28Na Insa iv̄o akosomedza moni na iNyumba Ndzitwaharifu, arongoa ha nguvu: «Amba wanyu musunijua, tsena musujua v̄ahali nala? Tsaja ha iwami yangu, ɓadi Uwo aniv̄eleha, waye kweli, na wanyu kamumuji. 29Wami umujua, mana tsilawa haheju, tsena waye ɗe aniv̄eleha.»
30Ɓas, wakotsaha wamuziye, ɓadi kav̄waka ata mutru av̄eleha umuhono amusike, mana wakati wahe raha kawaka wapara. 31Na v̄ale hari mwa idunia ile wengi wamuamini, ata wakorongoa: «Wakati uMutsahuliwa atsojao, hali atsofanya trongo za midjuza rahana mutru unu?»
Magogezi yasurumwa yandre yamuziye Insa
32Watru wa ishama ya Mafarisayo wakia idunia iv̄o yakonguruma trongo zile uhusu Insa. Ɓas, yaMatolezi Maɓole ya Masadaka|Mutolezi-Masadaka na Mafarisayo yav̄eleha magogezi yandre yamuziye.
33V̄ale Insa arongoa: «Tsa na wanyu raha hari mwa muda mushashi, amwesa nitsendra ha Uwo aniv̄eleha. 34Mutsonizunguha, ne kamutsonipara, na v̄ahanu nitsokao, kamushindri uja.»
35Mayahudi yaambiana: «Hav̄i ɗe atsendrao ata karitsomupara? Saɓu katsendra ha wale waẽshio hari mwa yaMagiriki, andra asomedza yaMagiriki? 36Mana ya urongozi uwo aurongoa trini amba: ‹Mutsonizunguha, ne kamutsonipara, na v̄ahanu nitsokao, kamushindri uja›?»
Maji yav̄ingao uhayati
37iSuku ya mwiso ya Musherehio ule, ne ɗe isuku ɓole, Insa ahimi, arongoa ha nguvu: «Neka mutru asuona nyora, nanijiliye, anwe. 38Mutru aniaminio, mauri ɗe inamuna uMuangishio urongoao: ‹Miro ya maji yiv̄ingao uhayati yitsoshuka ulawa moni hahe› ». 39Na trongo iyo airongoa husuana na iRoho watru wamuaminio wakoja wav̄olweyo. Mana v̄ale raha iRoho kayaka yadjaãliwa watru, ha iv̄o Insa raha kaka atukuziwa.
Dunia isufarikishana ha siɓaɓu ya Insa
40Ɓas, wakati idunia ile yakia marongozi yale, ɓaãdhwi yakorongoa: «Ha kweli, unu ɗe uMutrume#7:40 uMutrume: Mutrume unu aka arongolwa na uMuangishio Mutwaharifu amba atsoja, ɗe Insa..»
41Na wasalia wakorongoa: «Unu ɗe uMutsahuliwa.»
Iv̄o wasalia tsena wakorongoa: «Kweli amba Galilaya ɗe v̄ahali uMutsahuliwa atsolawao? 42Hali uMuangishio kausurongoa amba uMutsahuliwa atsoka shilembwe yalawa ha Daudu ɗagoni Ɓaitilham, v̄ahanu Daudu aka?» 43Ɓasi v̄ungia mufarikishano hari mwa idunia ile ha siɓaɓu ya Insa. 44Ɓaãdhwi yawo wakotsaha wamuziye, ɓadi kav̄waka ata mutru av̄eleha umuhono amusike.
Makizi-mbeli wa yaMayahudi kawamuamini Insa
45Ha izo, magogezi yale yarudi ha yaMatolezi Maɓole ya Masadaka na watru wa ishama ya Mafarisayo. Sa ile wawadzisa: «Manatrini kamwamuv̄inga?»
46Magogezi yale yadjiɓu: «Kav̄waparoka mutru alagua mauri ɗe mutru uwo.»
47Ɓas, Mafarisayo yale yawadjiɓu: «Afa wanyu wajau ne mulaɓiha? 48Hali v̄wa mutru hari mwa yamadhwamana au yaMafarisayo amuamini? 49Ɗe idunia iyo tu kaiji iSharia; wao watru walaãniwa!»
50Ɓas Nikodemu, moja mengoni na yaMafarisayo aka andra ha Insa ina wakati, awaambia: 51«Hali Sharia yatru uhukumu mutru kaɓula ya umuvulishia na ujua izo azifanya?»
52Wamudjiɓu: «Wawe wajau wa shi Galilaya? Twalia ha uzuri, na utsoona amba Galilaya kav̄ulawa mutrume.»
[53Ɓaanda ya v̄ale kula mutru arudi ɗagoni hahe.
Currently Selected:
YUHANI 7: swb
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2021, Wycliffe Bible Translators, Inc. All rights reserved.
