ยอห์น 3
3
เหย่ซู่ เร๊อ คูนิโคเดมัส
1แกแยยิวพู๊ กู่ กล๊อ เด๊อ อามุย เร๊อ คูนิโคเดมัส โอ่ เตเพร. อา หม่า อา โอ่เตอเกอ เด๊อ ฟาริสี ตู๊หมู่ตอกล๊อ เต๊เห่ อากู. 2เตเซเคเนอ คูนิโคเดมัส แฮ เด๊อ เหย่ซู่ โอ่ เร๊อ อา เฮ๊ ลู เน๊อ, “ซ๊าร๊า, เป ซิเง เร๊อ เน หม่า หม่า ซ๊าร๊า เด๊อ อา โอ่ เด๊อ จอแปแหร่ อา โอ่แฮแล เตเพร. เป ซิเง เร๊อ จอแปแหร่ เก่ โอ่เกอ เร๊อ แกแย เตเพรเพร โต่ เฮ๊เนอหม่า อา เมแจ่ เตโค๊ตีกลี๊ ฮู๊ เน เม เออเนอ เตเพร่ว โต่.”
3เหย่ซู่ เฮ๊ฉื่อ ลู เน๊อ, “แว แด๊โฉ่จ๊อจ๊อ เน, แกแย เด๊อ อา โอ่เป๊เจ่แลเซเต๊เปล่ คยาแซ๊ ตื๊อหื่อ โต่ เต๊เห่เนอ, อา แม๊เถอะเบ๊ จอแปแหร่ อาเทออาเก่ เตเพร่ว โต่.”
4คูนิโคเดมัส แด๊เฮอ ลู เน๊อ, “แกแย ดุเผร่เฮ๊อ เตเพรเนอ. อา จว๊า กาโอ่เซเต๊เปล่ แจ่ คยาแซ๊ ฮู๊เต? อา กา กาโน คยาแซ๊ เด๊อ อา โหมะฮ๊อกู เร๊อ อา กาโอ่เซเต๊เปล่ เนอโพ๊เนอ หม่า อา แจ่ ปาแหน่ แอ?”
5เหย่ซู่ เฮ๊ฉื่อ ลู เน๊อ, “แว แด๊โฉ่จ๊อจ๊อ เน, แกแย เด๊อ อา โอ่เป๊เจ่แลเซเต๊เปล่ คยาแซ๊ เน๊อ เทอ เร๊อ จอแปแหร่ อาแหย่โยบูโพ๊ โต่ เต๊เห่เน๊อ, อา โนหนิ แจ่ เด๊อ จอแปแหร่ อาเทออาเก่กู โต่. 6แกแย เห่ขุพู๊ โอ่เป๊เจ่แล เกอเร๊อ คยาดื่อ แกแย เห่ขุพู๊ แพ๊. หม่าแน๊ เตโอ่ เป๊เจ่แล เร๊อ แหบ่โยบูโพ๊ แบ่เจ่เนอ, อา เด๊อะ โอ่ เซอเพร อู เด๊อ แหย่โย ตากยา. 7เด๊อ แว เฮ๊ เป่ เน เน๊อ, ‘ซี โตเบ่ กาโอ่เซเต๊เปล่ โป่ โตโพ๊,’ ฮู๊เออเนอ อาขว่าอาคยาเร๊อ, คย๊ายื๊อ แต่เหม่. 8เก่แลเซ๊ เนอ อา แลเซ๊จว๊า จู๋ ดื่อ อาเต แพ๊. เน หนิโฮ อาพรา ตื๊อดื่อเรอ อา โอ่ เบ๊อะเตแฮ หม่าโต่เรอ อา เตเร จว๊าโต เบ๊อะเนอ เน ซิเงโต่. ล๋อ แกแย กาโอ่เป๊เจ่ เซเต๊เปล่ เร๊อ จอแปแหร่ อา แหย่โยบูโพ๊แบ่เจ่ เต๊เห่ เนอหม่า อา แซ่ฮู๊ เนอเฮ๊อ”
9คูนิโคเดมัส แด๊เฮอ ลู เน๊อ, “อา จว๊า ทวาแถ่ แจ่ ฮู๊เต?”
10เหย่ซู่ เฮ๊ฉื่อ อา เน๊อ, “เน ทวา เจ๊อ อิสราเอล อา ซ๊าร๊าดู๋ เตเพร แวเฮ๊โต่, ฮู๊เออแพ๊ เร๊อ เน จว๊า ซิเงโต่ เมเต? 11แว แด๊โฉ่จ๊อจ๊อ เน, เป เฮ๊ เป่ อู เต เด๊อ เป ซิเง เต๊เห่, เป โด่แน เป่ อู เต เด๊อ เป แม๊เถอะ เต๊เห่ ตื๊อดื่อเรอ ซี พย๊าฉื่อ เป เตเฮ๊เบ่ เออเนอ เตเพร่ว โต่. 12แว แด๊โฉ่ เป่โทเฮ๊อ ซี เร๊อ เห่ขุ อาหรี่อาแก เออเต๊เห่ ตื๊อดื่อเรอ ซี หยื่อเอ่ แว โต่. แว เก่ แด๊โฉ่ เป่ โป่ ซี เร๊อ ม๊อขุ อาหรี่อาแก เต๊เห่ เฮ๊เนอหม่า ซี เตเร หยื่อเอ่ แจ่ แว ฮู๊เต? 13แกแย แถ่โต่น๊อ เด๊อ ม๊อขุ เนอ อา โอ่ เตเพร่ว โต่. แกแยเห่ขุ อาพู๊คู เด๊อ อา โอ่ เด๊อ ม๊อขุ แฮแล เออเตเพร แถ่โต่ ตื๋อ ดื่อ แพ๊. 14-15แซ่ฮู๊ แกแย ปว๋า เตเพร เด๊อ อา หยื่อเอ่แหน่ แว เต๊เห่, เก่ พย๊าหนิ ซิปล่อเซอเพร ตูจูเพร ตาแลเคร๊ อาเงเนอ, แว เด๊อะ อา หม่าดื่อเฮ๊อ แกแยพู๊คู เออ อู เก่ ช๊อแถ่ เกอดื่อ แว ฮู๊ คูโมเสส มู๋ หนู่เค จอแถ่ หรู่ตีลีแบ แหย่โย เด๊อ อี๊ถื่อลู เร๊อ อา ช๊อแถ่ อา เด๊อ เก่เชเทอแก หล่อตาม๊าขุ เนอ ปา.#เลหมิเกล ๒๑:๙
16“จอแปแหร่ โมเกอเร๊อ ลอ เจ๊อ แกแย เห่ขุพู๊ ล๋อปลี, ล๋อ แกแย เด๊อ อา หยื่อเอ่ อาพู๊คู เต๊เห่เนอ, แซ่ฮู๊ อา เก่ พย๊าหนิ ซิปล่อเซอเพร ตูจูเพร เร๊อ อา เตปย๊าเตแก แต่เหม่ เนอ, อา เด๊อะแลแก อาพู๊คู โอ่ ตื๊อ เตเพร เออเนอ เด๊อ แกแย เห่ขุพู๊ เต๊เห่ อาเงเฮ๊อ. 17เมเตเฮ๊เรอ, จอแปแหร่ นอแฮแล อาพู๊คู เด๊อ อา เก่ เมจากาคยา แกแย เห่ขุพู๊ อาเงเนอ หม่าโต่. เร๊อ อา นอแฮ ลู เด๊อ อา เก่ แฮ เมแลเปล๊กา แกแย เห่ขุพู๊ อาเง เนอแพ๊. 18แกแย เด๊อ อา หยื่อเอ่ พู๊คู เต๊เห่เนอ, จอแปแหร่ เมจากาคยา เหย่ซี โต่. แกแย เด๊อ อา หยื่อเอ่ พู๊คู โต่ เต๊เห่เนอ, จอแปแหร่ เมจากาคยา เหย่ซี เฮ๊อ, เมเตเฮ๊เรอ, อา ย๋อ หยื่อเอ่ เกออู จอแปแหร่ อาพู๊คู เด๊อ อา โอ่ ตื๊อ เตเพรเพร่ว เออเตเพร โต่ อาขว่าอาคยา, อา เมจากาคยา เฮ๊อ เหย่ซี. 19เมเตเรอ เหย่ซี ข่าเบ่ เด๊อเตเมจากาคยา เฮ๊เนอหม่า, จอแปแหร่ อาเตลี แฮโน เด๊อ เห่ขุเออ ตื๊อดื่อเรอ แกแย เห่ขุพู๊ เต๊เห่ ซิหยื่อ เตลี เออเนอ โต่, เมเตเฮ๊เรอ เหย่ซี ย๋อ เม เตมู๊แหม่รีแจ่ เต๊เห่ อาขว่าอาคยา, อา โมหนิเล๊อ เด๊อ เตคี๊เตลอ ตากยา. 20ล๋อ แกแย เด๊อ อา เม เตมู๊แหม่รีแจ่ เต๊เห่เนอ, อา ซิเถ่ เตลี เร๊อ อา แฮ เด๊อ เตลี อา โอ่ โต่, เมเตเฮ๊เรอ แกแย เด๊อ อา เม เตมู๊แหม่รีแจ่ เต๊เห่เนอ, อา ซิอิเช เร๊อ อา เตซื๊อเตโอ่หร่า เต๊เห่ โอ่โลแถ่ เร๊อ อา แฮโตโต่. 21หม่าแน๊เรอ แกแย เด๊อ อา เม อาจ๊ออาเต เต๊เห่เนอ, อา แฮโต เด๊อ เตลี อา โอ่, เมเตเฮ๊เรอ แซ่ฮู๊ อู ปว๋า เตเพร เก่ แม๊เถอะ โลแร๊ เร๊อ อา เมเต เต๊เห่เนอ, อาโต เร๊อ จอแปแหร่ อาซิปล่อ อาเงเนอ, อา แฮโต เด๊อ เตลี โอ่.”
เหย่ซู่ เร๊อ เจเทอ คูยอห์น
22อา เฮ๊โท ลู เนอ, เหย่ซู่ เร๊อ อา โคเจ่ เต๊เห่ เถ่จว๊า เด๊อ ยูดาห์เก่. เร๊อ อา จว๊าโอ่ งยาหร่าเหร่ เกอ เร๊อ อา โคเจ่ เต๊เห่ เบ๊อะเนอ เร๊อ อา จว๊าเจ เป่ อู เทอ. 23คูยอห์น เจ เป่ เกอโป่ อู เทอ เบ๊อะเหล่โอ่ เด๊อ อู เอ๊ เร๊อ อายโนน เนอโต๊โผะ. อายโนน หม่า อา โอ่ผื่อ เร๊อ ดอสาลิม โทเรอ เทอ โอ่เอ๊ลา. แกแย แฮ เด๊อ ลูโอ่ เร๊อ อา เจ เป่ เหย่ซี เทอ. 24(เออ หม่า เบ๊อะอู ด๊อตา แต่ล๋าย คูยอห์น เด๊อ ทอกู แต๋โต่ เบ๊อะเนอ)#มัทธิว ๑๔:๓, มาระโก ๖:๑๗, ลูกา ๓:๑๙,๒๐ 25เบ๊อะเนอโตโพ๊ คูยอห์น อา โคเจ่ เต๊เห่ เร๊อ แกแยยิวพู๊ เตเพร เคร๊แขะ แคลู เร๊อ เหล่โกลเหล่แบ่ โอ่เร๊อ เตเมโพ๊เมแปละ ฮู๊เต เนอ อาหรี่อาแก. 26เหย่ซี จว๊า เด๊อ คูยอห์น อา โอ่ เร๊อ อา เฮ๊ ลู เน๊อ, “ซ๊าร๋า แกแย เด๊อ อา โอ่เกอ เร๊อ เร๊อ เบ๊อะจอร์แดน เทอแลโหมะ แบ๊เร เร๊อ เน ข่าเฮ๊โล เป่ อู เร๊อ อา อาหรี่อาแก เนอเตเพร นี๋ กู๊แหน่เออ อา จว๊าเจ เป่ อู เทอ เร๊อ อู จว๊า ลอปลีเฮ๊อ เด๊อ ลูโอ่ เฮ๊อ.”
27เร๊อ คูยอห์น เฮ๊ฉื่อ ลู เน๊อ, “อูเป๊ เบ่เบ่ จอแปแหร่ เก่ เด๊อะตา ลู โต่ เนอ, อา พย๊าหนิ แจ่ เต เตอเจ๋อ โต่. 28แว เฮ๊โทเฮ๊อ ซี เน๊อ, ‘แว หม่า ครี๊ หม่าโต่ ตื๊อดื่อเรอ จอแปแหร่ นอแฮ เหร่อ แว เด๊อ เง แพ๊.’ แว เฮ๊โทเฮ๊อ อาขว่าอาคยา, ซี ทวาเฮ๊อ แว เพรข่าเฮ๊โล เต๊เห่ เฮ๊อ.#ยอห์น ๑:๒๐ 29แว หม่า อาแซ่เน๊อ เพรครวาเกอ กาฉู่แด่ เพรคู เตเพรเนอ. กาฉู่แด่ เพรเหมาะ หม่า กาฉู่แด่ เพรคู อาเต. หม่าแน๊เรอ เพรครวาเกอ เนอเตเพร ก๊อถ่อ หนิดา กาฉู่แด่ เพรคู เฮ๊เบ่. อา หนิโฮ ลูโหง่ อาขว่าอาคยา, อา ซิครือซิลอ แหน่เจ๊อ. ฮู๊เนอเฮ๊อ แว เตซิครือ เออเนอ อา เล๊อแถ่บาแถ่ เฮ๊อ. 30อา หม่า อา โตเบ่ โหล่ดุเล๊อ, แว หม่า อา โตเบ่ โอ่ ปีตี๊เล๊อ.
31“แกแย โอ่ เด๊อ ม๊อขุ แฮ เออเตเพรเนอ, อาดุเล๊อ เร๊อ อู ล๋อ ปลี. แกแย โอ่ เด๊อ เห่ขุ เออเตเพรเนอ อา ซิเง เฮ๊เบ่ แพ๊ดื่อ เห่ขุ อาหรี่อาแก แพ๊. แกแย โอ่ เด๊อ ม๊อขุ แฮ เออเตเพรเนอ อาดุเล๊อ เร๊อ อู ล๋อ ปลี. 32อา แด๊โฉ่โล เป่ อู เร๊อ ล๋อ อา แม๊เถอะ เนอเต๊เห่ เร๊อ ล๋อ อา หนิโฮ เนอเต๊เห่. หม่าแน๊เรอ อา แด๊โฉ่โล เป่ อู เนอ อู หนิดา พย๊าฉื่อ ลูเต เตเพร่ว โต่. 33แกแย เด๊อ อา หนิดา พย๊าฉื่อ ลู เตเฮ๊โฉ่โล เต๊เห่เนอ, อา หยื่อเอ่ ตาเต แลแค เร๊อ จอแปแหร่ หม่า อาหม่าอาจ๊อ. 34แกแย เด๊อ จอแปแหร่ นอตา อา เตเพรเนอ, จอแปแหร่ เด๊อะ เล๊อบา เฮ๊อ ลู แหย่โยบูโพ๊แบ่เจ่ อาขว่าอาคยา, อา เฮ๊เบ่แพ๊ จอแปแหร่ อาลาอาโหง่ เต๊เห่ แพ๊. 35เพ จอแปแหร่ โมเร๊อ อาพู๊คู เร๊อ อา เด๊อะตาลอ ลู เตปว๋า เต๊อเจ่อ เด๊อ อา กู๊ยากู เฮ๊อ.#มัทธิว ๑๑:๒๗, ลูกา ๑๐:๒๒ 36แกแย เด๊อ อา หยื่อเอ่แหน่ พู๊คู เออเตเพร เต๊เห่เนอ, อา พย๊าหนิ ซิปล่อเซอเพร ตูจูเพร. เร๊อ แกแย เด๊อ อา หนิดา เกออู โต่ เร๊อ อา หยื่อเอ่แหน่ เกออู พู๊คูเออ โต่ เต๊เห่เนอ, อา พย๊าหนิ เกออู ซิปล่อเซอเพรโต่. จอแปแหร่ อาเต เมจากาคยา ตาโอ่ เด๊อ แกแย เนอเต๊เห่ อาลู.”
Currently Selected:
ยอห์น 3: EKTNTGEN
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Wycliffe USA
