ยอห์น 2
2
ป่วยกาฉู่แด่ เด๊อ วีคานา อากู
1โซเนอ เตอเนอเนอ ป่วยกาฉู่แด่ โอ่เด๊อ กาลิลีเก่, วีคานา อากู ตู๊ผู่, เร๊อ เหย่ซู่ อาโหมะ โอ่เกอ เบ๊อะเนอ. 2ป่วยกาฉู่แด่ เออเนอ, อู หม่าแฮ เต่อเกอ เหย่ซู่ เร๊อ อา โคเจ่ เต๊เห่. 3เบ๊อะแท๊ทือเส่เทอแย เด๊อ ซิเผระ เต๊เห่ อาเง ลอแกเฮ๊อ เบ๊อะเนอ, เหย่ซู่ อาโหมะ แด๊โฉ่โล เหย่ซู่ เน๊อ, “เหย่ซี อา แท๊ทือเส่เทอแย ลอเฮ๊อ.”
4เร๊อ เหย่ซู่ เฮ๊ฉื่อ ลู เน๊อ, “โม๋, เน จว๊าแฮ เฮ๊โฉ่โต่ แว เมเต? เบ๊อะโต่แต่ เด๊อ แว เก่ เด๊อะโล แว เตโพรเตเตอเรอ แต๋โต่.”
5เหย่ซู่ อาโหมะ แด๊โฉ่ หลู่เล๊ เต๊เห่ เน๊อ, “เก่ อา นอ ซี เต๊อเจ่อเจ่อ เฮ๊เรอ เม เป่ อา นี๋.”
6ตีวี๊ตาวา เบ๊อะเนอ โต๊โผ่เนอ โซดุ โอ่ เม โซซว๊า เร๊อ เตเมเนอ, อู ยือโน เร๊อ เทอ เฮ๊เนอหม่า อา หนิ แปดุ เนอ ๘๐-๑๒๐.#2:6 ๘๐-๑๒๐ แปดุ เฮ๊เนอหม่า กู่ลา โหง่ หม่า ลีเถ่อ โซดุ เออเต๊เห่เนอ, แกแยยิวพู๊ เต๊เห่ ยือโนโอ่ เร๊อ เทอ เร๊อ เหย่ซี นอจ่อ เร๊อ อา เหล่ซู๊ปลี เร๊อ กู๊ขุ ฮู๊ เหย่ซี เตจ๊อบู่จ๊อเบ เหล่โกล โอ่ อาเง เนอแพ๊.#2:6 แซ่ฮู๊ อิสราเอลพู๊ เต๊เห่ เก่ เมโต จอแปแหร่ อาซิปล่อ อาเงเนอ, เหย่ซี ครวา ซู๊ปลีเกอ ฮู๊ เตซว๊าเตแส่ โอ่ เนอ.
7เหย่ซู่ นอ เพรแรเต เนอเต๊เห่ เน๊อ, “ยือโน บาลอเทอ เด๊อ โซดุ เนอเต๊เห่ อากูเนอ.” เร๊อ เหย่ซี ยือโน บาลอ โทเรอ,
8เหย่ซู่ เฮ๊ เหย่ซี เน๊อ, “กู๊แหน่เออ ดื่อหนิเทอ เตเบ เร๊อ จว๊าเด๊อะ เด๊อ ป่วยกู่กล๊อดุ เด๊อ อา ตี๊หรี่ แม๊ตู่ หนิเป่ ลอ อู เตปว๋า เต๊อเจ่อ เนอเตเพร อา โอ่,” อา เฮ๊ เร๊อ เหย่ซี ดื่อจว๊า เป่ ลู. 9ป่วยกู่กล๊อดุ โอแม๊ เทอ เด๊อ อา ทวาแถ่ แท๊ทือเส่เทอแย เออเนอ. หม่าแน๊เรอ แท๊ทือเส่เทอแย เออ อา โอ่ เบ๊อะแฮเนอ อา ซิเงโต่. (หลู่เล๊ เออเต๊เห่ อา ดื่อเทอ อาขว่าอาคยา, อา ซิเง แพ๊ตื๊อ เหย่ซี เออเต๊เห่ แพ๊) เร๊อ ป่วยกู่กล๊อดุ เออเตเพร เอ๊แฮ เพรกาฉู่แด่เพรคู, 10เร๊อ อา เฮ๊ ลู เน๊อ, “อู ปว๋า เตเพร เหล่โกล เด๊อะโอเหร่อแท๊ทือเส่เทอแย เด๊อ อาหวี่อาชือ เต๊เห่, โทเรอ อู ซิโอ บ๋า เต เร๊อ อู โอ โทเฮ๊อ เบ๊อะเนอ, อู เด๊อะโอติ แท๊ทือเส่เทอแย เปเอ เต๊เห่. หม่าแน๊เรอ เนเออ เน แด่ดว๊า เกอเร๊อ โต่ปา เน แท๊ทือเส่เทอแย อาหวี่อาชือ เต๊เห่ โต่กู๊แหน่ เจ๊อเจ๊อ.”
11เหย่ซู่ เมโค๊ตีกลี๊ ลู เต โต๊โผ่หม่า เบ๊อะวีคานา, กาลิลีเก่ เออเนอเฮ๊อ, เร๊อ อา แด๊โฉ่ล๊อลี อา เตลี อาเตเค เบ๊อะเนอ. ฮู๊เนอเรอ อา โคเจ่ เต๊เห่ หยื่อเอ่แหน่ ลู.
12โทเฮ๊อ เนอ อา เร๊อ อาโหมะ เร๊อ อาโป่ เต๊เห่ เร๊อ อา โคเจ่ เต๊เห่ แกแล แลแค เด๊อ วีคาเปอรนาอูม อากู, เร๊อ เหย่ซี จว๊า โอ่ แลแค เบ๊อะเนอ เนอโซเนอ.#มัทธิว ๔:๑๓
เหย่ซู่ จว๊า เด๊อ เตหลู่แตโฮกู
(มัทธิว ๒๑:๑๒-๑๓, มาระโก ๑๑:๑๕-๑๗, ลูกา ๑๙:๔๕-๔๖)
13หม่า เด๊อ แกแยยิวพู๊ ป่วยเตจว๊า ตา ลว๊า ผื่อแฮเฮ๊อ อาขว่าอาคยา, เหย่ซู่ จว๊า เด๊อ วีเยรูซาเล็ม.#2:13 ป่วยเตจว๊า ตา ลว๊าหม่า ป่วย เต๊อป่วย เด๊อ อู เมเต เตเนแถ่ คยาแซ๊ เบ๊อะจอแปแหร่ เมแลเปล๊แก แกแยยิวพู๊ เต๊เห่ เด๊อ เตเน่ว แฮแล เมเซอ อู พู๊แหว่เพร่ว เบ๊อะเนอ.#เถ่จว๊าแลเปล๊ ๑๒:๑-๒๗ 14เบ๊อะอา แฮโต่ เด๊อ เตหลู่แตโฮกู เบ๊อะเนอ, อา แม๊เถอะ แกแย อิเช ปู่, ซิหมิ, ถู่หลุ่ย เต๊เห่ เร๊อ แกแย โอ่แน ถู่แหล่ รือ เด๊อ ดีเหร่ ช๊า เต๊เห่. 15ฮู๊เนอเร๊อ อา เม สู่เปลอ อิปลี๊ เร๊อ อา เหว่เถ่แก ลอ ซิหมิ เร๊อ ปู่ เต๊เห่ เด๊อ เตหลู่แต โฮกู. โทเรอ อา ถู่แลกลอแก ลอ อู เหล่ถู่แหล่ รือ อา ดีเหร่ เนอเต๊เห่ เร๊อ อา เม ลูโพร๊แก ลอปลี เหย่ซี รือหย่า เต๊เห่. 16โทเรอ อา เฮ๊ แกแย อิเช ถู่หลุ่ย เนอเต๊เห่ เน๊อ, “จอเถ่ ตาพาแก ลอ เออเต๊เห่. นอทวาแถ่ แต่ แวเพ อาหี่ เออเนอ เร๊อ เกล๊กู แต่เหม่.”
17อา โคเจ่ เต๊เห่ เตเนแถ่ โต่ ลีเทส่อพ๊า เฮ๊ เน๊อ, “แว ซิปล่อฉว่า โมเร๊อ แหน่เจ๊อ เนหี่. แว เตซิปล่อฉว่า โมเร๊อ เออเนอหมา อา เก่ อือ ลอแก เจ๊อ แว แซ่เน๊อ หมิเนอ เจ๊อ ปา.”#ถู่เซ๊แถ่ ๖๙:๙
18เด๊อ อา เม ฮู๊เออ อาขว่าอาคยา, แกแยยิวพู๊ กู่กล๊อ เต๊เห่ แด๊เฮอ ลู เน๊อ, “แซ่ฮู๊ เป เก่ ซิเง เร๊อ เน พย๊าหนิ เตเตอเรอฉว่าชอ เด๊อ เน เก่ แฮเม ลูโพร๊ลูแพร ฮู๊เออ หม่า อาหนิ แพ๊ อาเงเนอ, เน เก่ เด๊อะโล เป่ เป เตโค๊ตีกลี๊ โอ่ เด๊อจอแปแหร่ แฮ อิเต?”
19เหย่ซู่ เฮ๊ฉื่อ เน๊อ, “เม ตาพรอแก มอ เตหลู่แตโฮกู เออเนอ. โซเนอ อากู, แว เก่ ช๊อแถ่ คยาแซ๊ ปา” #มัทธิว ๒๖:๖๑, ๒๗:๔๐, มาระโก ๑๔:๕๘, ๑๕:๒๙
20โทเรอ แกแยยิวพู๊ แด๊เฮอ ลู เน๊อ, “โซเนอ อากู, เน เตเร ช๊อแถ่ โทเบ๊ คยาแซ๊ แหน่ ปา แอ? เตหลู่แตโฮกู เออเนอหมา อู ช๊อแถ่ หนิ อา หม่า อางยา เจ๊อ อาหน่าลุยเชอ เร๊อ โซซว๊า เจ๊อ เม.” 21หม่าแน๊เรอ เบ๊อะเหย่ซู่ เฮ๊ เร๊อ เตหลู่แตโฮกู อาหรี่อาแก คยา เบ๊อะเนอ, หม่า อา เฮ๊ตาช๊า เกอเร๊อดื่อ อาเหน่กล่อ แพ๊. 22ฮู๊เนอ อาขว่าอาคยา, เบ๊อะเหย่ซู่ เซอเพร กาคยา คยาแซ๊ เด๊อ เตเซอ เบ๊อะเนอ, อา โคเจ่ เต๊เห่ เตเนแถ่ โต่เบ่ คยาแซ๊ เด๊อ อา เฮ๊เบ่แก อาโหง่ เออเนอ เร๊อ เหย่ซี หยื่อเอ่ ลีเทส่อพ๊า เร๊อ อา เฮ๊หนื่ออื่อแก อาโหง่ เนอเต๊เห่.
เหย่ซู่ ซิเง ลออู ซิปล่อ
23เบ๊อะเหย่ซู่ โอ่ปา วี เยรูซาเล็ม ป่วยเตจว๊า ตา ลว๊า อูป่วยกู เบ๊อะเนอ, อู แม๊เถอะ อา เม เตโค๊ตีกลี๊ เนอเต๊เห่ อาขว่าอาคยา, อู หยื่อเอ่ โหร่แหน่เจ๊อ ลู. 24หม่าแน๊เรอ เหย่ซู่ หยื่อเอ่เกอ เหย่ซี โต่, เมเตเฮ๊เรอ อา ซิเง ล๊อปลู๊ ลอปลี เฮ๊อ อูซิปล่อ เฮ๊อ. 25อู โหล่ แด๊โฉ่โล เป่ เร๊อ เหย่ซู่ เร๊อ แกแย ปว๋า เตเพร อาหรี่อาแก โต่, เมเตเฮ๊เรอ เหย่ซู่ ซิเง โทดื่อเฮ๊อ อู ปว๋า เตเพร อาซิปล่อ เฮ๊อ.
Currently Selected:
ยอห์น 2: EKTNTGEN
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Wycliffe USA
