ยอห์น 1
1
ครี๊ หม่า จอแปแหร่ อาลาโหง่ ตูจูเพร เตเพร
1เด๊อ จอแปแหร่ แบ๊แล แต่ล๋าย เห่ขุ โต่ เบ๊อะเนอปาเนอ, อู เอ๊ ลู เร๊อ เตลาเตโหง่#1:1 เตลาเตโหง่ อาโหง่แลช๊า หม่า หม่าเฮ๊อ แกแย เตเพรเพร เด๊อ อา หม่า หม่า เพรแจ่เพรลีแม เร๊อ อา เด๊อะโล เป่ เป เร๊อ จอแปแหร่ เออเตเพรเนอ, อา โอ่โทดื่อ เฮ๊อ. เตลาเตโหง่ เออเนอ อา โอ่ เกอ เร๊อ จอแปแหร่ เร๊อ เตลาเตโหง่ เออเนอหมา หม่าเฮ๊อ จอแปแหร่ เฮ๊อ. 2เด๊อ จอแปแหร่ แบ๊แล แต่ล๋าย เห่ขุโต่ เนอปาเนอ, อา โอ่เต่อเกอ เร๊อ จอแปแหร่ เด๊อ กูลู่เค ปา เจ๊อ.
3จอแปแหร่ นอแบ๊แลโดโต่ แฮเง ลู ปว๊าเต๊อเจ่อ. เต เด๊อ อา แบ๊แล โต่ เนอ อา โอ่ เตอเจ๋อ โต่. 4อา หม่า เตเซอเพร อา แก่ช๊าแก่แร เร๊อ เตเซอเพร เออเนอ อา เด๊อะ เตลี เด๊อ อู ปว๋า เตเพร อาเง. 5อา หม่า อาแซ่เน๊อ เตลี เร๊อ อา ลีเตเค เด๊อ เตคี๊ อาเกล เร๊อ เตคี๊ เมเป่แก แจ่ ลู โต่.
6จอแปแหร่ นอแฮ แกแย เตเพร เด๊อ อามุย เร๊อ เพรเจเทอ คูยอห์น.#มัทธิว ๓:๑, มาระโก ๑:๔, ยอห์น ๓:๑,๒ 7แซ่ฮู๊ แกแย ปว๋า เตเพร เก่ หนิโฮ อา เหล่แด๊โฉ่โด่แน เต๊เห่ เร๊อ อา เก่ หยื่อเอ่แหน่ อาเงเนอ, อา แฮ เฮ๊โฉ่ซิเง เป่ อู เร๊อ แกแย เด๊อ จอแปแหร่ นอแฮแล ลู ฮู๊ เตลี เออเนอ เตเพร อาหรี่อาแก. 8คูยอห์น เนอหม่า เตลี หม่าโต่. หม่าแน๊เรอ อา หม่า เพร แฮ เฮ๊โฉ่ซิเง เป่ อู เร๊อ เตลี อาหรี่อาแก เตเพร. 9เตลี หม่าแหน่ เออเนอ, อา เตเร แฮโน เฮ๊อ เด๊อ เห่ขุเออ เฮ๊อ, เร๊อ อา เก่ ลีเตเค แถ่โล เป่ อู ปว๋า เตเพร.
10อา แฮ โอ่เซอเพร โทเฮ๊อ เด๊อ เห่ขุเออ เฮ๊อ. เร๊อ อา แบ๊แล เร๊อดื่อ เจ๊อ เห่ขุเออ ตื๊อดื่อเร๊อ อา หม่า แกแย ฮู๊เต เตเพรเนอ เห่ขุพู๊ ซิเงโปล ลู โต่. 11อา แฮ เด๊อ อา แกแย เร๊อดื่อ เออเต๊เห่ อา โอ่ ตื๊อดื่อเร๊อ อาแกแย เร๊อดื่อ เต๊เห่ เอ๊ฉื่อ ลู โต่. 12หม่าแน๊เรอ แกแย เด๊อ อา เอ๊ฉื่อ ลู เต๊เห่ เร๊อ อา หยื่อเอ่แหน่ ลู เต๊เห่เนอ, อา เด๊อะทวาแถ่ เหย่ซี เร๊อ จอแปแหร่ อา พู๊เหมาะ พู๊คู เต๊เห่. 13เหย่ซี ทวาแถ่ แจ่ จอแปแหร่ อา พู๊เหมาะ พู๊คู ฮู๊ แกแย เหล่โกล กาโอ่เป๊เจ่แล เกอเร๊อดื่อเนอ หม่าโต่. หม่าโต่เรอ ฮู๊ สุ่ยเทอ พ๊า หย่า พู๊โอ่หนิ ฮู๊เนอ เต๊เห่ หม่าโต่. โทเรอ ฮู๊ โหมะเพ โอ่เมอเต่อลู เร๊อ อาพู๊ โอ่ เกอเร๊อดื่อ เนอ หม่าโต่โต่. หม่าดื่อ เหย่ซี ทวาแถ่ แจ่ จอแปแหร่ อา พู๊ ฮู๊ จอแปแหร่ อาซิปล่อ โอ่เกอ เร๊อดื่อ เนอแพ๊.
14แกแย เด๊อ อู เอ๊ อา เร๊อ เตลาเตโหง่ เออเตเพรเนอ, อา แฮทวา ฮู๊ แกแย เนอ เร๊อ อา แฮ โอ่เซอเพร เฮ๊อ เด๊อ เปเกล. เป แม๊เถอะเฮ๊อ อา เตเตอเรอดุ เตอเรอทู. จอแปแหร่ อาพู๊คู ย๊อโอ่ตื้อ เตเพรแพ๊ อาขว่าอาคยา, อา พย๊าหนิ ลอปลี เจ๊อ เตเตอเรอดุ เตอเรอทู เออ เด๊อ อาเพโอ่ เจ๊อ. อา หม่า แกแย เด๊อ อา เล๊อบา เร๊อ เตบุ๊ยเตเตอเรอ เร๊อ เตหมะเตจ๊อ เตเพร.
15คูยอห์น เฮ๊โฉ่ซิเง อา อาหรี่อาแก เร๊อ อา เอ๊โทแถ่ เน๊อ, “ฮู๊ แว แด๊โฉ่ โทเป่เฮ๊อ ซี อา อาหรี่อาแก เน๊อ, ‘แกแย เด๊อ อา เก่ แฮ เด๊อ แวคยา ปา เตเพรเนอ อา เตอเรอฉว่าชอ ดุทูเล๊อ เจ๊อ เร๊อ แว ปา, เมเตเฮ๊เรอ เบ๊อะแว กาโอ่เป๊เจ่แล แต๋โต่ เบ๊อะเนอ, อาโอ่หนื่ออื่อ โทดื่อเฮ๊อ.’” 16อาบุ๊ยเตอเรอ โอ่เล๊อโอ่บา เจ๊อ อาขว่าอาคยา, เป ล๋อ ปลี พย๊าหนิ เกอดื่อเฮ๊อ เตบุ๊ยเตเตอเรอ เต๊อเจ่อ โท เต๊อเจ่อ เด๊อ ลูโอ่ เฮ๊อ. 17จอแปแหร่ เด๊อะตา เตซว๊าเตแส่ เร๊อ คูโมเสส เร๊อ คูโมเสส เด๊อะตา แฮเง เน๊อ เป, ตื๊อดื่อเร๊อ เหย่ซู่ครี๊ หม่า หม่าเฮ๊อ แกแย เด๊อ อา เด๊อะตา เป่ เป เตบุ๊ยเตเตอเรอ เร๊อ เตหมะเตจ๊อ. 18อู แม๊เถอะน๊อ จอแปแหร่ เตเพร่ว โต่ ตื๊อดื่อเร๊อ, อาพู๊คู โอ่ตื๋อ เตเพรเออ, อา หม่า จอแปแหร่ เฮ๊อเฮ๊อ เร๊อ อา โอ่เต่อเกอ เร๊อ อาเพ เออ เด๊อะโลแถ่เฮ๊อ เป่ เร๊อ จอแปแหร่ เฮ๊อ.
เจเทอ คูยอห์น แด๊โฉ่ เป่ อู เร๊อ เหย่ซู่ อาหรี่อาแก
(มัทธิว ๓:๑-๑๒, มาระโก ๑:๑-๘, ลูกา ๓:๑๕-๑๗)
19เบ๊อะโตโพ๊ แกแยยิวพู๊ ทวาดุทวาเต เด๊อ อา โอ่ เด๊อ วีเยรูซาเล็ม อากู เต๊เห่ นอจว๊า เพรหลู่แตเต เร๊อ เลวีพู๊ เด๊อ อา เมจว่า เตหลู่แตโฮกู เต๊เห่ เด๊อ คูยอห์น อา โอ่ เร๊อ อา นอแด๊เฮอ ลู เร๊อ, “เน หม่า อูเป?” เร๊อ คูยอห์น แด๊โฉ่โล ซิเง เป่ เหย่ซี เน๊อ, 20“แว หม่า เมสิยาห์ หม่าโต่.” อา อ๊อแล หล่าหล่า ลีลี ฉื่อเป่ เหย่ซี ฮู๊เนอ.
21เหย่ซี แด๊เฮอ โป่ เน๊อ, “เก่ เมฮู๊เนอเรอ, เน หม่า อูเป? เน หม่า เพรโพร เอลียาห์ แอ?” เร๊อ คูยอห์น เฮ๊ฉื่อ เหย่ซี เน๊อ, “หม่าโต่.”#มาลาคี ๔:๕
โทเรอ เหย่ซี แด๊เฮอ โป่ เน๊อ, “เน หม่า เพรโพร #เมสิยาห์ 1:21 แกแยยิวพู๊ หยื่อเอ่ เร๊อ เพรโพร เก่ แฮ ปา เตเพร เด๊อ จอแปแหร่ อ๊อแล เด๊อ อา เก่ นอแฮแล ลู ปา เนอเตเพร แอ?” เร๊อ อา เฮ๊ฉื่อ เน๊อ, “หม่าโต่”#โด่แน ๑๘:๑๕,๑๘
22โทเร๊อ เหย่ซี เฮ๊ เน๊อ, “แซ่ฮู๊ เป เก่ กา แด๊โฉ่โปลเบ๊ เป่ แกแย เด๊อ อา นอจว๊า แด๊เฮอ เป เต๊เห่ อาเงเนอ, แด๊โฉ่โล เป่ เป เร๊อ เน หม่า อูเป? เน เฮ๊ เกอเร๊อ เนเหน่ เร๊อ เน หม่า อูเป?”
23คูยอห์น เฮ๊ฉื่อ ฮู๊ เพรโพร อิสยาห์ เฮ๊เนอ, เร๊อ อา เฮ๊ฉื่อ เหย่ซี เน๊อ, “แว หม่า แกแย เตเพร เด๊อ อา เอ๊โทแถ่ เด๊อ เก่เชเทอแก หล่อตาม๊าขุ เน๊อ, ‘เมจ๊อ หนื่ออื่อ เป่ แลแค แบ่เจ่ เหล่แฮ แกล๊ อาเง นี๋,’ อา เก่ เอ๊โท เป่ อู เนอเตเพร แพ๊.”#อิสยาห์ ๔๐:๓
24ฟาริสีพู๊ เต๊เห่ นอแฮ แกแย เออเต๊เห่ เด๊อ คูยอห์น อา โอ่, 25เร๊อ เหย่ซี แฮ แด๊เฮอ โป่ คูยอห์น เน๊อ, “เน เก่ หม่า ครี๊ หม่าโต่โต่, เพรโพร เอลียาห์ หม่าโต่โต่, เพรโพร เด๊อ จอแปแหร่ อ๊อแล เด๊อ อา นอแฮ ลู เนอเตเพร หม่าโต่โต่ เก่เฮ๊เรอ เน จว๊า เจ เป่ โต่ อู เทอ เมเต?” เหย่ซี เฮ๊ ลู ฮู๊เนอ,
26เร๊อ คูยอห์น เฮ๊ฉื่อ เหย่ซี เน๊อ, “แว เจ เป่ อู เร๊อ เทอ ตื๊อดื่อเร๊อ เด๊อ ซีเกล เนอ แกแย โอ่ เตเพร หม่าแน๊เรอ ซี ซิเง ลู โต่. 27อา แฮ เด๊อ แวคยาปา แพ๊ ตื๊อดื่อเร๊อ แว เก่ ฉิโล๊แก เป่ แพ๊ อา แข่แด๊พ๊าเปลอ ปา แพ๊เนอ แว ต่า เร๊อ ลู โต่.”
28ล๋อ เตเมอาเหน่ เออเต๊เห่ เนอหม่า, อา ทวาแถ่ เบ๊อะจอร์แดน เทอแลโหมะ แบ๊เร, ดอเบธานี, เบ๊อะคูยอห์น เหล่เจ เป่ อู เทอ เนอโต๊โผะ.
จอแปแหร่ อาซิหมิพู๊ เด๊อ อา พย๊าจว๊าแก แกแย เห่ขุพู๊ อา เตซื๊อ
29เด๊อคยา เตอเนอเนอ, คูยอห์น แม๊เถอะ เหย่ซู่ แฮ เด๊อ อา โอ่ เร๊อ อา เฮ๊ เน๊อ, “แม๊มอ, จอแปแหร่ อาซิหมิพู๊ เด๊อ อา พย๊าวีแกแก แกแย เห่ขุพู๊ อา เตซื๊อเตโอ่หร่า เต๊เห่ เออเนอ เตเพร. 30แว แด๊โฉ่ โทเฮ๊อ ซี เน๊อ, ‘แกแย เตเพร เก่ แฮ เด๊อ แวคยา ปา แพ๊, ตื๊อดื่อเร๊อ อา เตอเรอฉว่าชอ ดุทูเล๊อ เร๊อ แว ปา, เมเตเฮ๊เรอ เบ๊อะแว กาโอ่เป๊เจ่แล แต่ล๋ายโต่ เนอ, อาโอ่ หนื่ออื่อ โทเหร่อเฮ๊อ.’ อา หม่า หม่าเฮ๊อ แกแย เด๊อ แว แด๊โฉ่ เป่ ซี เนอเตเพร เฮ๊อ. 31แกแย เด๊อ แว แด๊โฉ่ เป่ ซี เด๊อ อาเหร่อเค เตเพร เนอหม่า อูเปเนอ แว ซิเงโต่, ตื๊อดื่อเรอ แซ่ฮู๊ อิสราเอลพู๊ เก่ ซิเง ตาเต อา อาเงเนอ, แว แฮ เจ เป่ อู เร๊อ เทอ แพ๊.”
32โทเรอ คูยอห์น เฮ๊โฉ่ซิเง เป่ อู เน๊อ, “แว แม๊เถอะ โทเฮ๊อ แหย่โยบูโพ๊แบ่เจ่ โอ่ เด๊อ ม๊อขุ แฮแล โอ่ เด๊อ ลูโล แซ่เน๊อ ถู่หลุ่ย เนอเฮ๊อ. 33เด๊อ อาเหร่อเค เนอหม่า แว ซิเงแต่ล๋าย เร๊อ อา หม่า แกแย ทวา ฮู๊เออเนอ เตเพร ล๋ายโต่, ตื๊อดื่อเรอ จอแปแหร่ เด๊อ อา นอ แว เด๊อ แว เก่ เจ เป่ อู เร๊อ เทอ เออเตเพรเนอ อา เฮ๊ แว เน๊อ, ‘ช๋า เนอปา เนอ, เก่ เน แม๊เถอะ แหย่โยบูโพ๊แบ่เจ่ แฮแล โอ่ เด๊อ แกแย เตเพร อาลู ปา เฮ๊เนอ อา หม่า หม่าเฮ๊อ แกแย เด๊อ อา เก่ เจ เป่ อู เร๊อ แหย่โยบูโพ๊แบ่เจ่ ปา เนอเตเพร เฮ๊อ.’ 34เตทวาแถ่ ฮู๊เออเนอ, แว แม๊เถอะ โทเฮ๊อ อาขว่าอาคยา, แว เฮ๊โฉ่จ๊อ เป่เฮ๊อ ซี เร๊อ อา หม่า จอแปแหร่ อาพู๊คู หม่าแหน่ เตเพร เฮ๊อ.”
เหย่ซู่ อา โคเจ่ อาเหร่อเล๊อ เต๊เห่
35อาเนอ เตอเนอเนอ คูยอห์น ก๊อถ่อ โอ่เต่อเกอ คยาแซ๊ เร๊อ อา โคเจ่ ซิเนอ. 36อา แม๊เถอะ เหย่ซู่ จว๊า เด๊อ แกล๊ลู เร๊อ อา เฮ๊ เน๊อ, “แม๊มอ แลแค, จอแปแหร่ อาซิหมิพู๊ เด๊อ อู เก่ หลู่แถ่ ลู ปา เนอเตเพร.”
37อา โคเจ่ เออซิเนอ หนิโฮ คูยอห์น เฮ๊เบ่โหง่ ฮู๊เออ เร๊อ อา ครวา จว๊าเกอ เหย่ซู่ อาคยา. 38เบ๊อะเหย่ซู่ ตีรี๊ แม๊กาคยา เบ๊อะเนอ, อา แม๊เถอะ เหย่ซี ครวาจว๊าเกอ ลู เด๊อ คยา เร๊อ อา แด๊เฮอ เหย่ซี เน๊อ, “ซี แม๊ปู อิเต?”
เหย่ซี เฮ๊ฉื่อ เน๊อ, “รับบี, เน โอ่เมอโต หี่ เบ๊อะเตเมเต?” (รับบี อาโหง่แลช๊า หม่า ซ๊าร๊า)
39เร๊อ อา เฮ๊ฉื่อ เหย่ซี เน๊อ, “ครวาจว๊าแม๊ เกอดื่อ แว,”
เร๊อ แกแย เออซิเนอ ครวาจว๊าแม๊ เกอ ลู อา เหล่โอ่เมอ เหล่โอ่. เหย่ซี จว๊าแม๊เถอะ เกอ ลู เหล่โอ่ เร๊อ เหย่ซี โอ่เกอ ลู เบ๊อะเนอ โต่เด๊อ เหมาะคี๊โป๊โหล่. เหย่ซู่ เอ๊ เหย่ซี เบ๊อะเนอหม่า อา โตเบ๊อะเหมาะกุ่ยแล ลุยมือ เบ๊อะเนอ.
40เหย่ซี หนิโฮ โท เจเทอ คูยอห์น เฮ๊ เน๊อ, “แม๊มอ แลแค, จอแปแหร่ อาซิหมิพู๊ เด๊อ อู เก่ หลู่แถ่ ลู ปา เนอเตเพร,” ฮู๊เนอ โทเรอ เหย่ซี ครวาจว๊าเกอ เหย่ซู่ อาคยา. เด๊อ อา ครวาจว๊าเกอ เหย่ซู่ อาคยา เออซิเนอ อาเกลเนอ, เตเพร หม่า คูซีโมนเปโตร อาโป่ คูอันดรูว์ แพ๊. 41อา จว๊า แม๊ปู เหร่อเล๊อ อาแหม่ คูซีโมน เร๊อ อา แด๊โฉ่ เป่ ลู เน๊อ, “เป แม๊เถอะเฮ๊อ เมสิยาห์ เฮ๊อ” (เมสิยาห์ อาโหง่แลช๊า หม่า ครี๊)#เมสิยาห์ 1:41 เมสิยาห์ เบ่เบ่, ครี๊ เบ่เบ่ อาโหง่แลช๊า หม่า เพรเมแลเปล๊กา อู เตเพร อา มีลาดุมีลาทู เด๊อ จอแปแหร่ อ๊อแล เกอเร๊อ ลู เนอเตเพร 42เออโตโพ๊เรอ อา ซูจว๊า คูซีโมน เด๊อ เหย่ซู่ อา โอ่.
เหย่ซู่ แม๊ ลู เร๊อ อา เฮ๊ ลู เน๊อ, “เน หม่า เพยอห์น อาพู๊คู คูซีโมน. อู เก่ เอ๊ เนมุย เร๊อ คูเคฟาส ปา,” (คูเคฟาส อาโหง่แลช๊า หม่า คูเปโตร)#1:42 คูเคฟาส หม่า อารเมด เมวเจอะโหง่, คูเปโตร หม่า กรีกโหง่, มุยเออ เนอเจ่อ ลอ อาโหง่แลช๊า หม่า “หล่อ”
เหย่ซู่ เอ๊หนิ คูฟีลิป เร๊อ คูนาธานาเอล
43อาเนอ เตอเนอ เหมาะลี เบ๊อะเนอ, เหย่ซู่ แด่แล เฮ๊อ อาซิปล่อ เด๊อ อา เก่ จว๊า เด๊อ กาลิลีเก่. อา แม๊เถอะ คูฟีลิป เร๊อ อา เฮ๊ ลู เน๊อ, “จว๊า! ครวาเกอ แวคยา เร๊อ ทวาแถ่เกอ แว โคเจ่ แห.”
44คูฟีลิป หม่า วีเบธไซดา, อา โอ่เต่อ แซ่เกอ เฮ๊อ วี เร๊อ คูอันดรูว์ เร๊อ คูเปโตร โอ่ เกอเร๊อ วีเนอ ตีวี เฮ๊อ. 45คูฟีลิป แม๊เถอะ คูนาธานาเอล เร๊อ อา เฮ๊ ลู เน๊อ, “เป แม๊เถอะเฮ๊อ แกแย เด๊อ คูโมเสส รา ลูหรี่ลูแก เด๊อ ลี เตซว๊าเตแส่ อากูเนอ เร๊อ เพรโพร เต๊เห่ ราเกอ ลูหรี่ลูแก เนอ เตเพร เฮ๊อ. อา หม่า เพโยเซฟ อาพู๊คู เหย่ซู่ เร๊อ อา หม่า แกแย วีนาซาเร็ธพู๊.”
46เร๊อ คูนาธานาเอล แด๊เฮอ คูฟีลิป เน๊อ, “เตตว่าเตแร๊ เต๊อเจ่อเจ่อ โอ่แถ่ แจ่ ช๊าเหล่แหน่ เด๊อ วีนาซาเร็ธ อากู แอ?”
เร๊อ คูฟีลิป เฮ๊ฉื่อ ลู เน๊อ, “จว๋า, แว จว๊ายู เน.”
47เบ๊อะเหย่ซู่ แม๊เถอะ คูนาธานาเอล แฮ เด๊อ ลูโอ่ เบ๊อะเนอ, อา เฮ๊ คูนาธานาเอล อาหรี่อาแก เน๊อ, “อา หม่า อิสราเอลพู๊ หม่าแหน่ เตเพร. อา แลโฮแลแห่ เกออู แตแค๋โต่.”
48เร๊อ คูนาธานาเอล แด๊เฮอ ลู เน๊อ, “เน จว๊า ซิเง แจ่ แว ฮู๊เต?”
อา เฮ๊ เร๊อ เหย่ซู่ เฮ๊ฉื่อ ลู เน๊อ, “เบ๊อะคูฟีลิป เอ๊ แต่ล๋าย เน โต่ เบ๊อะเนอ, แว แม๊เถอะ เน โอ่ เบ๊อะก่อดุ๊ยหม่อเล เนอ.”
49คูนาธานาเอล เฮ๊ฉื่อ ลู เน๊อ, “รับบี เน หม่า จอแปแหร่ อาพู๊คู หม่าแหน่ เฮ๊อ, เน หม่า อิสราเอล อาคุ๊ยจ๊อแผ่ หม่าแหน่ เจ๊อ เฮ๊อ.”
50เหย่ซู่ เฮ๊ ลู เน๊อ, “แว เฮ๊ เน เร๊อ แว แม๊เถอะ เน เด๊อ ก่อดุ๊ยเหมาะเล เนอหม่า เน หยื่อเอ่ หม่าแหน่ แว เร๊อ แว หม่า จอแปแหร่ อาพู๊คู, อิสราเอล อาคุ๊ยจ๊อแผ่ เตเพรเนอ แอ? เน เก่ แม๊เถอะโป่ เตโค๊ตีกลี๊ ดุเล๊อ เจ๊อ เร๊อ เออเต๊เห่เนอ ปา.” 51โทเรอ เหย่ซู่ เฮ๊ เหย่ซี เน๊อ, “แว แด๊โฉ่จ๊อจ๊อ ซี, ซี เก่ แม๊เถอะ ม๊อขุ บ๊อโม เร๊อ จอแปแหร่ เตเน่ว เต๊เห่ เก่ เก๊แถ่ แกแล เด๊อ แกแยพู๊คู หม่าเฮ๊อ แวเออ อาลูเนอ ปา.”#เห่ขุทวาลู่ ๒๘:๑๒
Currently Selected:
ยอห์น 1: EKTNTGEN
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Wycliffe USA
