GÉNESIS 23
23
Mama Sara huañujpi pambashcamanda
1Sara shuti huarmica, patsaj ishcai chunga canchis huatacunata charishpami huañurca. 2Sara huarmica, Canaán llactapi, Quiriat-arba shuti, Hebrón pueblopimi huañurca. Chaimandami Abrahamga, ninandapacha llaquirishpa huacajurca. 3Shina cashpami Abrahamga, paipaj huarmi huañushca pushtumanda rishpa, Het shuti runapaj miraicunataca cashna nirca:
4“Cangunapurapica, caru llactamanda shamushpa mingarishpami causajupani. Shina cajpipash, ñuca huarmi huañushcata pambangapa shuj alpaguta jatuhuaichi” nircami.
5Abraham shina nijpimi Het shuti runapaj churicunaca:
6“Taitalla uyapailla. Canga, Taita Dios agllashca, tucuicuna alicachishcamari cangui. Cambaj huarmitaca, ñucanchi pambarina ashtahuan ali pushtupi pambagrilla. Pipash na jarcashunllu, pipash na mitsashunllu” ninajurcami.
7Shina ninajujpimi Abrahamga jatarishpa, chai llactapi causaj Het shuti runapaj miraicunapaj ñaupajpi urai cumurirca. 8Chaipimi paicunataca cashna nijurca:
“Ñuca huarmita caipi pambachun, canguna tucui shungu munashpaca, Zohar shuti runapaj churi Efrón shuti runahuan rimashpa carahuaichi. 9Paipaj alpa manñapi tiyaj Macpela shuti pushtuta ñucaman jatuchun rimapaichi. Cangunapurapi, ñucapash maipi pambarinata charingapami, mashnata nijpipash cungapa munapani” nirca.
10Abraham chashna nijujpimi, heteo gentecunamanda Efrón runaca, Het shuti runapaj miraicunapaj ñaupajpi, puebloman yaicumujcunapaj ñaupajpipash cashna nijurca:
11“Ñucata mandaj taitalla, ama chashna nihuaichu. Cai pueblopi causaj gentecunapaj ñaupajpimi ñuca alpataca, chaipi pambana utujundi yanga carani. Cambaj huarmitaca, chaipi pambailla” nirca.
12Shina nijpimi Abrahamga, chai llactapi causajcunapaj ñaupajpi urai cumurirca. 13Shinallata, chai pueblopi causajcunapaj ñaupajpimi, Efrón shuti runataca cashna nirca:
“Ñuca ima nijujta uyashpachari ali capanguiman. Cambaj alpamanda mashnagu cajpipash, ñuca cushcata can japijpimi, ñuca huarmigutaca chaipi cungailla pambapasha” nircami.
14Shina nijpimi Efrón shuti runaca, Abrahamdaca cashna nirca:
15“Ñucata mandaj taitalla, ñuca ima nijujta uyapai. Chai alpataca chuscu patsaj culquipajlla jatunami capan. Cambajpash, ñucapajpash chai culquica imapash na canllu. Cambaj huarmigutaca chaipi pambailla” nijurcami.
16Shina nijpimi Abrahamga, Het runapaj miraicunapaj ñaupajpi, Efrón runahuan randimanda ari nirishpa, chuscu patsaj culquita curca. Chashnami, mashna culquita cuna cashcata Efrón runaman cushpa, tucuita pactachijurca. 17Efrón runapaj Macpela shuti alpaca, Mamre shuti pambamandaca indi llujshimujmanmi carca. Chai alpaca, huañushcata pambana utujundi, muyundi tarpushca quirucunandimi Abrahambaj saquirirca. 18Shinami, Het shuti runapaj miraicunapaj ñaupajpi, chai puebloman yaicujcunapaj ñaupajpipash, chai alpaca Abrahambaj saquirirca.
19Chai jipami Abrahamga, paipaj huarmi Sarataca, Macpela shuti pambapi tiyaj utujupi pambagrirca. Chai pambaca, Canaán llactapi, Hebrón nishca Mamre shuti pambamandaca, indi llujshimujmanmi tiyajun. 20Chashnami, Het shuti runapaj mirai huahuacunapaj alpaca, huañushcata pambana utujundi randijpi, Abrahambaj saquirirca.
Currently Selected:
GÉNESIS 23: QVI16
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.