GÉNESIS 22
22
Abrahampaj churi Isaacta Taita Dios carachun mañashcamanda
1Jipa huatacunapimi Taita Diosca, Abraham ali crij cashcata yachangapa cashna nirca:
“Abraham” nishpami cayarca.
Shina cayajpimi, paica:
“Caipimi capani” nirca.
2Shina nijpimi cashna nirca:
“Cunanga, cambaj juyashca shujlla churi Isaacta pushashpa, Moriah shuti pambaman rilla. Chaipimi Ñuca nishca shuj lomapi, Isaactaca Ñucaman cushpa tucuilla rupachina cangui” nirca.
3Shina nijpimi Abrahamga, tutamandata jatarishpa, paipaj burrupi apachinata churashpa, paipajta ruraj ishcai runacunatapash, paipaj churi Isaactapash pushashpa rirca. Shinallata, Diosman cushpa tucuilla rupachina yamdatapash cuchushpami, Taita Dios maiman richun mandashca pushtuman rirca. 4Ña quimsa punlla tucujpimi Abrahamga chai pushtu maipi cashcata carumanda ricujurca. 5Shina ricushpami Abrahamga, paipajta rurajcunataca cashna nirca:
“Cangunaca, burrundi caipi shuyaichilla. Huambraguhuan Ñucahuanga, chai chimbaman rishpami, Diosta alicachishpa tigramugrinchi” nirca.
6Shina nishpami Abrahamga, Diosman cushpa rupachingapa yamdata, paipaj churi Isaacman apachirca. Shinallata, ninatapash, cuchillotapash apashpami ishcandi rinajurca. 7Shina rinajushpami Isaacca, paipaj taita Abrahamdaca:
“Ñuca taiticu” nirca.
Shina nijpimi, Abrahamga:
“Caipimi cani ñuca huahualla” nirca.
Shina nijpimi Isaacca:
“Ninapash, yamdapash caipimi. Shina cajpipash, ¿Diosman cushpa tucuillata rupachina llamaguca maipitayari?” nirca.
8Shina nijpimi Abrahamga:
“Ñuca huahualla, Diosman cushpa tucuilla rupachina llamagutaca, Taita Diosmi caranga” nirca.
Shina nishpami ishcandi rinajurca. 9Taita Dios villashca pushtuman chayashpaca, shuj altartami Abrahamga rurarca. Chai altarpi yamdata churashpami, paipaj churi Isaacta huatashpa, altarpi yamda jahuapi churarca. 10Shina churashca jipami Abrahamga, paipaj churipaj cungata cuchungapa cuchillota japirca. 11Shina cajpimi Mandaj Diospaj ángel, jahua pachamanda:
“Abraham, Abraham” nishpa caparirca.
Shina caparijpimi paica:
“Caipimi capani” nirca.
12Shina nijpimi:
“Cambaj huahuataca ama huañuchishpa saquilla. Paitaca, ama imatapash ruraichu. Cambaj shujlla churita, Ñucaman cunata na mitsashcamandami, Taita Diosta can manllajtaca ali yachani” nirca.
13Shina nijpi Abraham huashaman ricushpaca, zarza cashapi cachucunahuan jarcarishca shuj jari llamagu shayajujtami ricurca. Shina ricushpami Abrahamga, paipaj churipaj randica, chai jari llamaguta japingapa rishpa, Diosman cushpa tucuilla rupachirca. 14Chaimandami Abrahamga, chai pushtutaca: “Mandaj Diosca imatapash caranllami” nishpa shutichirca. Chaimandami cunangaman: “Mandaj Diosca chai lomapica imatapash carangallami” ninajun.
15Mandaj Diospaj angelca, Abrahamdaca cutinmi jahua pachamanda cayachishpa, 16cashna nirca:
“Mandaj Diosca cashnami nin: ‘Cambaj shujlla churita, Ñucaman cunata na mitsashcamandami, Ñucamandallata juramentuni. 17Candaca ninanda bendiciashpami, cambaj miraicunataca, jahua pachapi luzerocunatashna, mama cucha manñapi t'iyu alpatashna mirachisha. Cambaj miraicunaca, paicunata fiñajcunata mishashpami, paicunapaj pueblocunatapash quichunajunga. 18Cambaj miraicunamandami, cai pachapi tiyaj tucui llactacunapash bendiciai tucunga. Ñuca rimashcata can cazushcamandami chashna canga’ ninmi” nircami.
19Chai jipaca, paipajta rurajcunapajman tigrashpami Abrahamga, paicuna causanajushca Beerseba puebloman rishpa, chaipi causajurca.
20Chai jipa punllacunami, Abrahamman cashna nishpa villarca: “Milca shuti huarmica, cambaj huauqui Nacorhuanga, jari huahuacunatami charin” nirca. 21Punda churica, Uz shutimi, paipaj cati huauquica Buz shutimi, chaipaj cati huauquica Kemuel shutimi. Paica, Aram shuti runapaj taitami. 22Shinallata, Quesed, Hazo, Pildas, Jidlaf, Betuel shuti churicunatapashmi charin. 23Betuel runaca, Rebecapaj taitami. Paicunami, Abrahambaj huauqui Nacorpaj huarmi Milca charishca, pusaj churicuna.
24Reúma shuti, Nacorpaj caishuj huarmipashmi, Teba, Gaham, Tahas, Maaca shuti churicunata charirca.
Currently Selected:
GÉNESIS 22: QVI16
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.